Trening Blong Kam Gud Moa Long Fasin Blong Toktok Mo Tijim Man

NOMATA se yu yu yangfala no yu olfala, yu man no yu woman, trening ya i save givhan long yu blong yu kam gud moa blong talemaot ol tingting blong yu, mo blong yu tijim ol man long Tok blong God.

Elda we i lukaot long Tiokratik Skul bambae i mekem program blong skul ya, se hu nao i mas givim ol tok. Long ol trifala pej we oli kam biaen, i gat ol poen we yu mas wok long olgeta. Ol namba we oli stap bifo long ol poen wanwan, oli soemaot weples long buk ya yu save faenem ol advaes long ol poen ya. Ol advaes ya i blong talem wanem we yu mas mekem blong kam gud long ol poen ya taem yu toktok mo tij, mo i eksplenem from wanem olgeta poen ya wanwan oli impoten. Mo tu, bambae yu faenem sam gudfala toktok blong givhan long yu blong folem ol advaes ya.

Ol kala we oli stap long ol pej ya oli soemaot ol poen we oli stret long ol defren kaen tok, olsem: (1) rid long fored blong ol man, (2) tu man no wan grup i mekem pleplei, mo (3) wan tok we i go long kongregesen. Elda we i lukaot long skul bambae i talem wanem poen we yu yu mas wok long hem. I moa gud yu wok long wan poen nomo, i no long plante poen wantaem. Long en blong evri poen long buk ya, i gat ol rod blong trenem yu we oli save givhan bigwan long yu. Sipos tok blong yu i soemaot se yu folem gud ol advaes long poen we yu wok long hem, elda we i lukaot long skul bambae i talem wan narafala poen we yu save wok long hem nekis taem.

Sipos tok we oli askem long yu blong mekem i olsem wan pleplei, yu mas tingbaot wanem rod blong storian we bambae yu yusum. Long pej 82, i gat wan lis blong ol defren rod we yu save yusum. Be yu no nid blong yusum ol samting nomo we oli stap long lis ya, maet yu gat sam moa tingting bakegen. Brata we i givim advaes, maet i talem long yu wanem rod blong storian we yu mas yusum, hemia blong yu lanem blong toktok long ol defren kaen man long ol defren ples. Sipos no, maet hem i letem yu nomo yu jusum rod we bambae yu yusum blong storian.

Nating sipos yu no gat wan tok blong mekem long Tiokratik Skul, be i gud yu ridim buk ya mo yu trenem yu wan, olsem i talem long en blong evri poen. Samting ya i save givhan long yu blong yu kam gud moa. Maet yu wantem traem wan defren poen evri wik, no maet yu folem prapa program blong yu.

Oltaem yumi mas traehad blong kam gud moa, nating se yumi joen longtaem finis long Tiokratik Skul mo long wok blong prij, no nogat. I gud yu traem mekem se trening we yu kasem long Tiokratik Skul i givhan long yu fulwan.