LESEN 52
?From Wanem Klos Mo Hea Blong Yumi i Mas Stret?
Yumi evriwan i laekem ol defdefren kaen stael blong klos mo hea. Sipos yumi folem sam rul long Baebol, bambae yumi naf blong jusum ol stael we yumi laekem, mo long sem taem mekem Jehova i glad. I gud yumi tokbaot sam long ol rul ya.
1. ?Wanem i save halpem yumi blong jusum gud stael blong klos mo hea?
Yumi sud jusum “ol klos we i stret nomo, mo oli mas soemaot se oli gat respek mo stret tingting,” mo gohed blong stap klin mo soem se yumi man blong “wosipim God.” (1 Timoti 2:9, 10) Tingbaot fofala rul ya: (1) Klos blong yumi i mas “stret nomo.” Olsem we yu luk long ol miting blong kongregesen, ol man blong Jehova oli jusum ol defdefren stael. Nating se i olsem, klos mo hea blong yumi i soem respek long God ya we yumi wosipim. (2) Werem klos wetem “respek,” i minim se ol klos blong yumi oli no pulum man blong tingbaot seks, o pulum ae blong narafala. (3) Yumi soem “stret tingting,” taem yumi no folem ol popiula stael blong klos mo hea we i jes kamaot. (4) Oltaem klos mo hea blong yumi i mas soemaot se yumi man blong “wosipim God” ya we i tru.—1 Korin 10:31.
2. ?Olsem wanem klos blong yumi i save afektem ol narafala Kristin?
I tru se yumi fri blong jusum ol klos blong yumi, be yumi sud tingbaot olsem wanem klos blong yumi i save afektem ol narafala. Yumi no wantem spolem tingting blong narafala, be yumi wantem “givhan long ol narafala man, mo yumi mekem i gud long olgeta blong oli kam strong.”—Ridim Rom 15:1, 2.
3. ?Olsem wanem klos blong yumi i save pulum man i kam long tru wosip?
I tru se yumi traem werem ol klos we oli stret oltaem, be impoten moa blong mekem olsem taem yumi go long ol miting mo joen long wok blong prij. Yumi no wantem we klos blong yumi i pulum tingting blong man i gowe long impoten mesej we yumi stap talem long olgeta. Be ol klos blong yumi save pulum man i kam long trutok mo “oli save flasem tijing blong God ya we i Sevia blong yumi.”—Taetas 2:10.
DIGIM MOA
Makem olsem wanem klos mo hea blong yumi i save soem se yumi Kristin.
Klos mo hea blong yumi i soemaot sipos yumi respektem ol man we oli gat otoriti. Nating se Jehova i luk samting we i stap long hat blong yumi, be ol klos mo hea blong yumi i mas soemaot se yumi respektem hem
4. Taem klos mo hea blong yumi i stret, hemia i soem respek long Jehova
?From wanem i impoten blong lukaot se klos mo hea blong yumi i stret? Ridim Ol Sam 47:2, mo tokbaot ol kwestin ya:
From we yumi karem nem blong Jehova, ?ol jenis blong yumi i mas olsem wanem?
?Yu ting se i stret blong jekem klos mo hea blong yumi bifo we yumi go long ol miting mo wok blong prij? ?From wanem?
5. ?Olsem wanem blong jusum gud stael blong klos mo hea?
Nating se ol klos blong yumi oli sas o nogat, be oli mas klin mo stret, folem ples o situesen we yumi stap long hem. Ridim 1 Korin 10:24 mo 1 Timoti 2:9, 10. Biaen, tokbaot from wanem yumi no wantem werem ol klos we oli . . .
olbaot.
taet, oli soem bodi, o pulum nogud tingting.
Ol Kristin oli no stap aninit long Loa blong Moses, nating se i olsem, Loa ya i soemaot tingting blong Jehova. Ridim Dutronome 22:5, mo tokbaot kwestin ya:
?From wanem yumi no mas werem klos we i mekem man i luk olsem woman o woman i luk olsem man?
Ridim 1 Korin 10:32, 33, mo 1 Jon 2:15, 16, mo tokbaot ol kwestin ya:
?From wanem yumi mas lukaot se klos mo hea blong yumi i no spolem tingting blong ol man long komuniti o long kongregesen?
?Wanem stael blong klos mo hea we i popiula long ples blong yu?
?Yu ting se sam long ol stael ya i no stret blong wan Kristin i folem? ?From wanem yu talem olsem?
I gat plante gudfala stael blong klos mo hea we yumi save jusum, we Jehova i glad long hem
SAM MAN OLI SE: “Mi mi gat raet blong werem eni samting we mi wantem.”
?Yu yu agri long toktok ya? ?From wanem yu talem olsem?
SAMARI
Taem yumi jusum gud stael blong klos mo hea, yumi soem respek long Jehova mo ol narafala.
Tingtingbak
?From wanem Jehova i tinghae long fasin blong yumi blong jenis?
?Wanem sam rul long Baebol we i save halpem yumi blong jusum gud ol stael blong klos mo hea?
?Olsem wanem klos mo hea blong yumi i save afektem tingting blong ol narafala long saed blong tru wosip?
FAENEMAOT
Faenemaot tingting we ol narafala oli save gat taem oli luk ol klos blong yu.
Lanem from wanem i waes blong tingting gud bifo we yu mekem wan tatu.
Makem sam moa advaes we i save halpem yu blong mekem ol gudfala desisen.
“?Klos Blong Yu i Leftemap Nem Blong God?” (Wajtaoa, Septemba 2016)
Luk olsem wanem wan woman i akseptem fasin blong ol narafala blong jusum klos blong olgeta.
“Dress and Grooming Was My Stumbling Block” (Wekap!, 22 Disemba 2003)