?Ol Witnes blong Jehova oli wanem kaen man?

Ol Witnes blong Jehova, hemia wan skul we i stap long olgeta ples long wol, mo i no sem mak long ol narafala skul. Hedkwota blong olgeta i stap long Amerika, be bighaf blong ol Witnes oli stap long ol narafala kantri. I gat samwe long 8 milian Witnes long bitim 230 kantri, mo oli stap tijim ol man long Baebol. Oli folem tok ya blong Jisas se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man.”—Matiu 24:14.

Nomata weples ol Witnes oli stap long hem, oli obei long loa blong kantri, be oli no joen long politik. Hemia from we oli folem tok we Jisas i talem long ol Kristin, se oli “no man blong wol ya.” Ale, oli no joen long ol wok blong politik mo oli no joen long ol faet. (Jon 15:19; 17:16) Long Wol Wo Tu, ol man oli sakem ol Witnes blong Jehova long kalabus, oli mekem olgeta oli harem nogud long bodi blong olgeta, mo oli kilim samfala oli ded, from we ol Witnes ya oli no wantem joen long faet. Wan bisop long Jemani bifo, i talem se: “I no gat wan narafala bigfala grup olsem [ol Witnes], we ol Nasi oli mekem i nogud long olgeta from we oli stanap strong long bilif blong olgeta, mo oli no joen long ami.”

Ol Witnes blong Jehova oli no stap olgeta nomo, longwe long ol narafala man. Jisas i prea from ol man blong hem, i se: “Mi mi no askem long yu blong yu tekemaot olgeta long wol ya.” (Jon 17:15) Taswe yu save luk olgeta long ples blong yu, taem oli stap wok, mo oli stap skul, mo oli go long stoa.