En Blong Wol—?Bambae i Kam Wetaem?
Ansa we Baebol i givim
Blong save wetaem en blong wol ya bambae i kam, fastaem i gud blong kasemsave olsem wanem Baebol i yusum tok ya “wol.” Grik wod ya koʹsmos, we oli transletem se “wol,” plante taem i minim ol man, speseli ol man we oli no stap mekem wil blong God. (Jon 15:18, 19; 2 Pita 2:5) Samtaem oli yusum wod ya koʹsmos blong minim ol samting we ol man oli stap mekem, olsem politik, bisnes, mo relijen.—1 Korin 7:31; 1 Jon 2:15, 16.a
?Wanem ya “en blong wol”?
Tok ya “en blong wol,” we i stap long plante Baebol translesen, oli tanem tu se “lashaf blong sistem blong wol,” o “en blong wan taem.” (Matiu 24:3; English Standard Version) Ol tok ya oli no min se wol ya o olgeta man bambae oli lus, be hem i en blong ol samting we ol man oli stap mekem.—1 Jon 2:17.
Baebol i tijim se “ol man nogud bambae oli lus olgeta,” nao ol gudfala man oli save enjoem laef long wol ya. (Ol Sam 37:9-11) Ol man nogud ya bambae oli lus long taem blong “bigfala trabol,” hemia long taem blong faet blong Amagedon.—Matiu 24:21, 22; Revelesen 16:14, 16.
?Wetaem en blong wol bambae i kam?
Jisas i talem se: “Dei mo aoa blong samting ya, i no gat man i save. Ol enjel long heven mo Pikinini blong God, be olgeta tu oli no save. Papa nomo i save.” (Matiu 24:36, 42) Hem i talem tu se samting ya bambae i kamtru long taem we man i no ekspektem, “long taem we [man] i no tingbaot.”—Matiu 24:44.
Nating se yumi no save stret dei mo aoa, be Jisas i talemaot “saen,” ok ol samting we bambae oli hapen blong soemaot se en blong wol i klosap. (Matiu 24:3, 7-14) Baebol i tokbaot taem ya se “taem blong en,” “en blong ol taem,” mo “ol las dei.”—Daniel 12:4; God’s Word Bible; 2 Timoti 3:1-5.
?Olsem wanem? ?Bambae i gat sam samting i stap yet afta long en blong wol?
Yes. Wol ya bambae i stap yet, from we Baebol i talem se: “Bambae i no gat wan samting i save muvumaot hem long ples blong hem, bambae hem i stap gogo i no save finis.” (Ol Sam 104:5) Mo wol ya bambae i fulap long ol man, olsem we Baebol i bin promes, se: “Ol stret man bambae oli tekem wol ya i blong olgeta, mo bambae oli stap long hem blong olwe.” (Ol Sam 37:29) God bambae i mekem evri samting folem plan we hem i gat long stat:
Paradaes.—Aesea 35:1; Luk 23:43.
Pis mo gudfala laef.—Maeka 4:4.
Ol man bambae oli harem gud long ol wok blong olgeta.—Aesea 65:21-23.
I no moa gat sik mo fasin blong kam olfala.—Job 33:25; Aesea 33:24.
a Mo tu, long sam Baebol oli transletem Grik wod ya ai·onʹ se “wol.” Taem oli mekem olsem, wod ya ai·onʹ i gat sem mining olsem wod ya koʹsmos we i blong minim ol samting we ol man oli stap mekem.