Vbọzẹ Nọ Na Khẹke Nu Ye Gha Ruẹ Emwi sayọ Vbekpae Jehova?

1. De ere nu khian miẹn vbọ deghẹ u ma dobọ iruẹmwi ọghe Baibol yi?

Vbe nai na gbawawẹ, avbe olika ẹmwẹ nọ rre iruẹmwi ọghe Baibol na wa guan kaẹn kherhe na, wa yae wegbe ahoẹmwọmwa ne u mwẹ dae Jehova. Ọ khẹke na hia, na giẹ wegbe sayọ ighẹ ahoẹmwọmwa na. (1 Pita 2:2) Ayayẹro ọghe arrọọ etẹbitẹ nu mwẹ, keghi hẹnhẹn egbe yan a sikẹ egbe nu gu Osanobua mwẹ, lekpae ẹmwẹ ọghẹe nu ruẹ.—Tie Jọn 17:3; Jud 21.

Zẹvbe nu ya mwẹ alaghodaro vbuwe irẹnmwi ọghe Osanobua, amuẹtinyan ọghuẹ ghi do khian nọ wegbe sayọ. Amuẹtinyan gha ru iyobọ nuẹ, nu ya gha ru emwi nọ gha ye ẹko rhiẹnrhiẹn Osanobua. (Hibru 11:1, 6) Ọ gha gua ruẹ kpa nu ya ru afiwerriẹ nọ gha rhie afiangbe nuẹ vbe arrọọ ọghuẹ.—Tie Iwinna 3:19.

2. De vbene emwa ọvbehe khian ya miẹn afiangbe hẹ vbe irẹnmwi ọghe Osanobua nu mwẹ?

Vbe odẹ ọghe abiọmwabiẹ, ọ gha wa yẹẹ ruẹ nu tama emwa ọvbehe emwi nu he ruẹ. Ọ keghi re emwi nọ ye ima sọyẹnmwẹ, na gha na iyẹn nọma. Zẹvbe nu ya ruẹ e Baibol sayọ, u ghi do ruẹ vbene a ya loo e Baibol ya rhan otọre hẹ, amuẹtinyan nu mwẹ yan Jehova kevbe ne iyẹn nọma.—Tie Rom 10:13-15.

Avbe ọse kevbe ẹgbẹe, ẹre nibun ni da suẹn ikporhu ka kporhu ma. Gha re nọ gua mu ẹmwẹ ye owa. Ghẹ wa gha tama iran wẹẹ, ugamwẹ ohoghe iran ye, sokpan gha tama iran vbekpae avbe eyan ọghe Osanobua. Deba ọni, u ghi yerre wẹẹ, uyinmwẹ esi nu yin, ẹre ọ yẹẹ emwa sẹ ẹmwẹ nu ta.—Tie 2 Timoti 2:24, 25.

3. De aguegbe muobọ nu gha sẹtin gu Osanobua gha mwẹ, ne ọ gha ya ruẹ sọyẹnmwẹ?

Evba gbẹn nọhuanrẹn na ruẹ, gha ru iyobọ nuẹ nu ya gha mwẹ alaghodaro vbe odẹ ọghe orhiọn. Ọ gha sẹtin sunnu wẹẹ, u do gha gu Osanobua mwẹ aguegbe muobọ ne kpataki. U gha sẹtin do gha re ọkpa vbe ẹgbẹe ọghẹe.—Tie 2 Kọrinti 6:18.

4. De vbene u khian ya gha mwẹ alaghodaro hẹ vbe ẹghẹ hia?

U gha sẹtin gha mwẹ alaghodaro vbe odẹ ọghe orhiọn, adeghẹ u na gha ruẹ ẹmwẹ ọghe Osanobua. (Hibru 5:13, 14) Tama ọkpa vbuwe avbe Osẹe Jehova, nọ ye ne ebe What Can the Bible Teach Us? gu ruẹ gha ruẹ e Baibol. Zẹvbe nu ya ruẹ ẹmwẹ ọghe Osanobua sayọ, erriọ u khian vbe ya gha mwẹ alaghodaro sayọ vbe arrọọ ọghuẹ.—Tie Psalm 1:1-3; 73:27, 28.

Obọ e Jehova ne Osanobua nọ mwẹ oghọghọ ẹre ne iyẹn nọma ke rrẹ. U gha sẹtin sikẹ irẹn, lekpae nu gha sikẹ emwa ọghẹe. (Hibru 10:24, 25) Adeghẹ u na gha hia sayo, nu ye ẹko rhiẹnrhiẹn e Jehova, te uwẹ ghi khuẹ khian arrọọ ọghe etẹbitẹ. Emwi nọ ghi maan sẹ nu gha ru, ọre nu sikẹ Osanobua.—Tie 1 Timoti 1:11; 6:19.