Odẹ Ne U Khian Ya Gha Tie Baibol Ne Egbuẹ Ne U Mieke Na Gha Sọyẹnmwẹ Ọnrẹn Sayọ

E Jọsua gha tie Uhi Osanobua; Vbe ogba nọ lẹgae Jeriko guọghọ, owa e Rehab ma guọghọ; E Jọsua tọn obọ eveva mu ghee odukhunmwu gha na erhunmwu

E JỌSUA keghi werriẹ aro daa isievẹn nọkhua. Irẹn ẹre Osanobua wẹẹ nọ su Ivbi Izrẹl la Otọ Na Ru Eyan Rẹn. Ọna i re iwinna ne kherhe, rhunmwuda ọni, e Jehova keghi rhie igiọdu na ne Jọsua: ‘U ghi wegbe ne u vbe kakabọ din; ne u vbe miẹn wẹẹ, u lele uhi mwẹ hia. U ghi gha tie ẹre asọn vbe avan ne u mieke na sẹtin ya emwi hia ne a gbẹnnẹ yọ ru emwi. Ẹghẹ nii, agbọn ghi maan ruẹn, u ghi vbe gha ru na gbaan.’—Jọs 1:7, 8.

Te ima khian vbe gha werriẹ aro daa isievẹn nọ wegbe vbe “ẹdẹ okiekie” ne ima ye na. (2 Tim 3:1) Deghẹ ima hoo ne ima musọe, te ọ khẹke ne ima lele adia ne Jehova rhie ne Jọsua. De odẹ nọkhin? Ma ghi gha tie Baibol vbe ẹghẹ hia, ma vbe gha ya emwi ne ima tie ru azẹ nọ gua ilele ọghe Baibol ro vbe ima gha werriẹ aro daa edanmwẹ.

Vbọrhirhighayehẹ, ebe ne a tie ne egbe ọmwa keghi lọghọ ima nibun, ọrheyerriọ, te ọ khẹke ne ima gha tie Baibol rhunmwuda emwi nọ ru ekpataki nọ. U gha miẹn adia eso nọ gha ya ruẹ gha sọyẹnmwẹ e Baibol ne a tie vbe ẹkpẹti nọ mwẹ uhunmwuta nọ khare wẹẹ: “Danmwẹ Avbe Azẹvbiro Na Ghee.”

Ọsian keghi kha wẹẹ: “Gu mwẹ gha mu uhi ruẹ sẹ, rhunmwuda I miẹn ẹko rhiẹn rhiẹnmwẹ vbe uwu iran.” (Psm 119:35) Ma ghaa tie Ẹmwẹ Osanobua, te ọyẹnmwẹ khian vbe gha sẹ ima. Emwi ewe nibun ọghe orhiọn ne ima ma he miẹn ẹdẹ, ẹre ima khian gha miẹn, zẹ vbene ima ya tie Baibol.

Agharhemiẹn wẹẹ ima i khian su agbẹnvbo la Otọ Na Ru Eyan Rẹn vbene Jọsua ru ẹre, dọmwadẹ ima mwẹ isievẹn ne ima werriẹ aro daa. Ne ima mieke na musọe, ọ khẹke ne ima ya egbe tae Jọsua. Ma ghi gha tie Ẹmwẹ Osanobua, ma vbe gha lele adia ni rre uwu ẹre. Ma gha ru vberriọ, emwi ghi dunna ne ima.

DANMWẸ AVBE AZẸVBIRO NA GHEE

Na Erhunmwu u ke suẹn. Iziro ọghe Osanobua ẹre ọ rre Baibol. Te a gbẹn ọnrẹn yotọ ne ima mieke na miẹn ere vbọ. Nọnaghiyerriọ, u gha khian tie Baibol, nọ e Jehova nọ ru iyobọ nuẹn ya rẹn otọ re, ne u gha ye emwi ne u tie rre kevbe ne u sẹtin gha loo ẹre vbe arrọọ ruẹ.—Ẹzra 7:10.
Nọ ẹgbuẹ ọta eso vbe u ghaa tie Baibol kevbe avbe ebe ne otu gbẹnnẹ ladian. ‘De emwi ne ako na maa mwẹ re vbekpae Jehova? De vbene ako na ya rhilo ginna uhunmwuta ọghe Baibol hẹ? Vbia khian ya sẹtin ya emwi ne ruẹ re vbe ako na ru iyobọ ne emwa ọvbehe hẹ?’
Gha ru erria yaẹn emwi ne u tie. U vbe gbamẹ sawọn ne u ru erria yaẹn ako ne u tie. U sẹtin vbe nọ egbuẹ ọta vbenian: De vbene ako na ya kaẹn arrọọ mwẹ hẹ? Vbọ ya dekaẹn emwi eso nọ sunu daa mwẹ vbe ẹghẹ eso nọ gberra? De vbene ọ ya kaẹn arrọọ mwẹ hẹ nian kevbe ẹghẹ nọ dee vbe odaro? Vbia khian ya loo adia na kevbe ilele ni rre ako na vbe arrọọ ọghomwẹ mwẹ? (Job 23:5; Psm 49:3) U ghaa ru erria, u sẹtin hia ne u rhan otọ evbọzẹe ne Jehova na wẹẹ ne emwa rẹn ghẹ yin uyinmwẹ eso vbe ẹghẹ nẹdẹ kevbe emwi nọ gha te kẹrikian deghẹ iran ma lele adia ọghe Jehova.—Diut 32:28, 29.
Gha loo aro ekhọe ruẹ vbe u ghaa tie okha ni rre Baibol. Vbe igiemwi, u ghaa tie okha ọghe Josẹf, hia ne u ya aro ekhọe bẹghe vbene ẹtien ọnrẹn ya khiẹn ọnrẹn ne Ivbi Ismẹl hẹ. (Gẹn 37:18-28) U ghaa tie okha vbenian, hia ne u ya ekhọe zẹ ọmwa rẹn vbene a miẹn wẹẹ u gu iran ni rre nene okha rre evba. Odẹ vbenian, ọ ye vbe ne u bẹghe iran ra u họn ẹmwẹ ne iran gele taa. U ghaa loo aro ekhọe ruẹ vbenian vbe u ghaa tie Baibol ẹre u khian na miẹn ere vbọ sẹ.
Gha loo avbe emadogua ne otu kpemehe ẹre ya ru ezanzan. Ruẹ vbene a ya loo avbe emadogua na zedu ẹre ghee urhuẹvbo ruẹ ni rre websait ọghomwa kevbe ne a printi ladian. Emwa ọvbehe sẹtin maa ruẹ re vbene a ya loo ẹre hẹ. Vbe igiemwi, Watch Tower Publications Index ra Research Guide for Jehovah’s Witnesses gha sẹtin ru iyobọ nuẹn. U gha sẹtin yae gualọ ebe na he ka gbennẹ ladian ni mwẹ uhunmwuta ughughan. Ọ gha vbe ru iyobọ nuẹn ya rẹn vbene otu ya rhan otọe ako Evbagbẹn Nọhuanrẹn nibun. Gha loo appendix ni rre New World Translation of the Holy Scriptures ọghe urhuẹvbo ne u gua tie. Avbe ayahọmwaehọ na gha ru iyobọ nuẹn ya rẹn vbekpae ihe eso ne emwi na sunu, ẹghẹ ne iran ya sunu, omwa ne a ya mwaan emwi vbe ẹghẹ nii kevbe emadogua ne a ya rẹn vbene emwi khua sẹ hẹ.
Ru ogbewerriẹ yaẹn avbe olika ẹmwẹ ni rre ako ne u tie re, ne u mieke na sẹtin gha ye ẹre rre. Ọ ma de emwi nọ rhiae vbe u gha ya emwi ne u tie re na iyẹn ma emwa ọvbehe. U sẹtin nọ egbuẹ wẹẹ: Vbia miẹn ruẹ vbe ako na, nọ gha ru iyobọ mẹ vbe ikporhu iyẹn nọ maan? Odẹ vbenian, u i khian mianmian emwi ne u ruẹ re. U ghi vbe sẹtin yae gha ru iyobọ ne emwa ọvbehe.