Ghẹ De Ye Avbe Ifi Na Vbe U Gha Gu Ọmwa Ruẹ E Baibol

Na Gha Talọ Gbe: Ghẹ wa gha hoo ne u rhan otọ emwi hia fẹrẹ. Jesu keghi loo inọta ya ru iyobọ ne emwa ya rẹn eke ne ẹmwẹ rrie. (Mat 17:24-27) Ọta na nọ keghi ya iruẹmwi rhiẹnrhiẹn kevbe ọ ghi vbe ru iyobọ nuẹ ya rẹn emwi ne ọmwa nu gu ruẹ e Baibol yayi. (be 253 okhuẹn 3-4) Vbe u gha nọ ọta, u ziengbe nọ zẹ ewanniẹ. Adeghẹ ewanniẹ nọ zẹ ma gba, nọ ọta ọvbehe nọ gha yae zẹ ewanniẹ nọ gbae, ne u gha te wa ya tobọ ruẹ zẹ ewanniẹ nọ khẹke. (be 238 okhuẹn 1-2) Fẹko gha guan vbe odẹ ne ọmwa ne u gu ruẹ e Baibol khian ya rẹn otọ emwi ne u ma re.—be 230 okhuẹn 4.

Na Ya Emwi Hia Gbakinnọ: Ghẹ wa talọ emwi hia ne u rẹnrẹn vbekpa uhunmwuta ne uwa guan kaan. (Jọn 16:12) Rhie uhunmwu ẹmwẹ nọ rre ne okhuẹn ladian. (be 226 okhuẹn 4-5) Adeghẹ a na ta ẹmwẹ nọ bun gbe, ai ghi sẹtin miẹn uhunmwu ẹmwẹ nọ rrọọ, ọ gha khọnrẹn wẹẹ ẹmwẹ nii te rhiẹnrhiẹn. (be 235 okhuẹn 3) Ọmwa ne u ma re emwi gha rẹn otọe uhunmwu ẹmwẹ nọ rrọọ nẹ, gberra ghee okhuẹn nọ lelẹe.

Na Wa Tiẹre Kẹkan: Evbọ ya ima ma emwa emwi ọre ne ẹmwẹ ne ima ta sẹ iran ekhọe, ẹi re na wa gha tie ebe kẹkan. (Luk 24:32) Loo ẹtin nọ rre Ẹmwẹ ọghe Osanobua lekpae ne u gha rhie aro tua avbe ako evbagbẹn nọhuanrẹn ni rre ako iruẹmwi nii, ni rhie uhunmwu ẹmwẹ nọ rrọọ ladian. (2 Kọr 10:4; Hib 4:12; be 144 okhuẹn 1-3) Loo igiemwi nẹi lọghọ na rẹn otọre. (be 245 okhuẹn 2-4) Muẹn roro ighẹ isievẹn ne ọmwa ne u gu ruẹ e Baibol werriẹ aro daa kevbe emwi nọ yayi, u ghi rhan otọe vbene iruẹmwi nii ya dekaan rẹn hẹ. Nọ rẹn avbe inọta vbenia: “Vbe uwẹ a ghee ẹre hẹ ighẹ emwi ne u ruẹ na?” “De emwi ne ọna ma ima re vbekpae Jehova?” “De ere ne u khian miẹn vbe u gha lele ibude na?”—be 238 okhuẹn 3-5; 259 okhuẹn 1.