YA EMWA KHIAN ERHUANEGBE
IRUẸMWI 11
Gha Loo Ẹmwẹ Nọ Gia Rẹn Otọ Re
Ilele: “Vbe ẹ i re te a miẹn wẹẹ ẹmwẹ nọ gia rherhe rẹn otọ re, ẹre ọ ladian vbe unu uwa, vbe a khian ya rẹn ẹmwẹ ne uwa ta hẹ?”—1 Kọr 14:9.
Emwi Ne Jesu Ru
1. Ghee VIDIO na, ra u ghi tie Matiu 6:25-27. Iyeke ọni, u ghi mu avbe inọta na roro:
De vbene Jesu ya gie vbene Jehova ya gbaroghe ima hẹ?
Agharhemiẹn wẹẹ e Jesu wa rẹn emwi nibun vbekpa avbe ahianmwẹ, de emwi nọ ma mobọ lọghọ gbe na rẹn otọ re ne irẹn tae vbekpa iran? Vbọzẹ ne ọna na re odẹ nọ maan, na ya ma emwa emwi?
Vbe Ima Miẹn Ruẹ Vbe Obọ E Jesu?
2. Adeghẹ ima na gha ma emwa emwi vbe odẹ ne iran gha ya rherhe rẹn otọ re, iran i khian mianmian emwi ne iran ruẹ re, erriọ ẹre emwi ne iran ruẹ khian vbe ya mu iran ekhọe.
Ya Egbe Taa E Jesu
3. Ghẹ ta ẹmwẹ nọ bun gbe. Ne u gha te ya ta emwi hia ne u rẹnrẹn vbekpa uhunmwuta ne uwa zẹ iro yan, gi emwi ne u khian ta, gha re nọ ladian vbe ebe ne u loo ya ma ọmwa nii emwi. Adeghẹ u na nọ ọmwa ne u gu ruẹ emwi ọta, rhie ẹghẹ nẹẹn nọ ya rhie ewanniẹn ye inọta nii. Adeghẹ ọ ma rẹn ewanniẹn ọghe inọta ne u nọ re, ra ọ ta emwi nọ ma gu e Baibol ro, u ghi fẹko nọ rẹn ọta ọvbehe ne u ya ru iyobọ nẹẹn ya rẹn ehe ne ẹmwẹ rrie. Ọ gha wa rẹn otọ emwi na hoo na guan kaẹn vbe eke ne uwa tie nẹ, wa ghi gha rhie nọ lelẹe.
4. Loo emwi ne ọmwa ne u gu ruẹ e Baibol ka rẹn ya ru iyobọ nẹẹn ya rẹn otọ emwi ọgbọn. Vbe igiemwi, wa ke la iruẹmwi nọ guan kaan arhiọkpaegbe, u sẹtin loo ovbi ẹghẹ kherhe ya nọ rẹn ọta eso vbekpa emwi nọ ka ruẹ vbe nọ dekaan emwi nọ sunu daa emwa ni wu nẹ.
5. Hannọ igiemwi ne u khian loo. U ke loo igiemwi rhọkpa, u ghi nọ egbuẹ wẹẹ:
‘Igiemwi na, lọghọ na rẹn otọ re ra?’
‘Ọmwa ne I gu ruẹ e Baibol gha rherhe rẹn otọ re ra?’
‘Igiemwi na, gha ru iyobọ nẹẹn ya ye avbe olika ẹmwẹ ni rre iruẹmwi na rre ra? Ra igiemwi na ọkpa ẹre ọ khian gha yerre?’