APẸNDIS C
Vbene A Ya Loo Ebe Na Tie Ẹre Sọyẹnmwẹ Arrọọ Vbe Etẹbitẹ! Ya Gu Emwa Ruẹ E Baibol
A te miẹn wẹẹ, a rhie ebe na tie ẹre Sọyẹnmwẹ Arrọọ Vbe Etẹbitẹ! ladian, ẹ i re iwinna kherhe ẹre etẹn ni ghaa mwẹ obọ vbọ winnaẹn, a i sẹtin vbe ka inugba ne iran na erhunmwu; erriọ ẹre iran vbe ya ru ezanzan. Ne u miehe na sẹtin loo ebe na ẹse, vbe u ghaa gu ọmwa ruẹ e Baibol, lele obẹlẹ ni rre ototọ mwa.
A te miẹn wẹẹ u ya gu ọmwa ruẹ e Baibol
1. Mu egbe iruẹmwi nii yotọ ẹse. Zẹvbe ne u ya ru vberriọ, hia ne u muẹn roro, odẹ eso ne u gha ya ru iyobọ ne ọmwa ne u gu ruẹ e Baibol ya gha mwẹ alaghodaro, ra emwi eso nọ la gberra, u ghi vbe hia ne u rẹn emwi nọ yayi. Vbe hia ne u rẹn ako eso vbe ebe ne uwa tie, ne u rẹnrẹn wẹẹ, ẹ i khian rherhe rẹn otọ re ra ne u rẹnrẹn wẹẹ, ọ gha lọghọ ọre na rhie ye uyinmwẹ. U ghi muẹn roro, vbene abọ na tie ẹre “Ruẹ Sayọ” gha ya sẹtin ru iyobọ ne ọmwa ne u gu ruẹ e Baibol hẹ, u ghi vbe mu egbe ne u ya loo abọ na vbe u ghaa gu ẹre ruẹ emwi, deghẹ esa na gha rrọọ.
Vbe u ghaa gu ẹre ruẹ e Baibol
2. Ya erhunmwu suẹn iruẹmwi nii, u ghi vbe ya erhunmwu khui ẹre, ọni ọre deghẹ ọmwa ne u gu ruẹ emwi na kue yọ.
3. Ghẹ ta ẹmwẹ nọ bun gbe. U ghi gi emwi ne u ma ọmwa nii re gha re nọ ke ebe nii rre, u ghi vbe gi ẹre ta emwi nọ rre ọre ekhọe.
4. Adeghẹ uwa khian la abọ (section) ọvbehe, u ghi tie olika ẹmwẹ ni rrọọ ladian, u ghi vbe ya unu kaẹn iruẹmwi eso ni rre abọ nii.
5. Adeghẹ uwa na ruẹ abọ ne uwa ye fo nẹ, u ghi loo ogbewerriẹ ọghe abọ nii ya ru iyobọ ne ọmwa ne u gu ruẹ e Baibol, nọ ya ye emwi nọ ruẹ re rre.
6. Zẹvbe ne u ya gu ọmwa ne u gu ruẹ e Baibol ruẹ edọmwadẹ iruẹmwi, u ghi ru emwi na khian sunu yi na:
Tie dọmwadẹ okhuẹn ni rre iruẹmwi nii.
Tie ebe nọhuanrẹn hia na we na “Tie.”
Tie ebe nọhuanrẹn ọvbehe nọ rrọọ deghẹ u hoo ne u ru vberriọ.
Kpee vidio hia na we na “Kpee” (deghẹ u na gha mwẹ ọnrẹn).
Nọ ọmwa ne u gu ruẹ e Baibol dọmwadẹ inọta nọ rre ebe nii.
Tama ọmwa ne u gu ruẹ e Baibol nọ ghee efoto nọ rre abọ na tie ẹre “Gualọ Otọ Re Sayọ”; iyeke ọni, u ghi tama rẹn nọ guan yan nene efoto.
Loo abọ na tie ẹre “Emwi Ne U Gha Ru” ya ru iyobọ ne ọmwa ne u gu ruẹ e Baibol ya rẹn vbene ọ he mwẹ alaghodaro sẹ hẹ. U sẹtin tama rẹn, nọ ru emwi na gbẹn ye abọ na tie ẹre “Emwi Ne U Gha Ru” ra nọ tobọre gbẹn emwi ọvbehe nọ hoo nọ ru ye ako na gbẹn ọnrẹn yi, ra u ghi we nọ wa ru eveva.
Nọ ọmwa ne u gu ruẹ e Baibol, deghẹ ọ mwẹ uhunmwuta eso ra e vidio eso ni rre abọ na tie ẹre “Ruẹ Sayọ” nọ kakabọ mu ẹre ekhọe, vbe ẹghẹ nọ na gha mu egbe iruẹmwi nii.
Hia ne uwa ruẹ iruẹmwi ọkpa fo vbe ẹdẹ ọkpa.
Vbe uwa gha ruẹ emwi fo nẹ
7. Gi ẹmwẹ ọmwa ne u gu ruẹ e Baibol gha rrọ ruẹ orhiọn vbe ẹghẹ hia. Rinmwian e Jehova nọ ru iyobọ ne ọmwa ne u gu ruẹ e Baibol ya gha mwẹ alaghodaro, u ghi vbe rinmwiaẹn nọ rhie ẹwaẹn nuẹn, ne u miehe na rẹn vbene u khian ya ru iyobọ ne ọmwa ne u gu ruẹ e Baibol.