Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
MAY 6-12
EMWI EWE NI RRE UWU ẸMWẸ ỌGHE OSANOBUA | 2 KỌRINTI 4-6
“Ma I Khian Gi Ẹtin Fo Ima”
(2 Kọrinti 4:16) Ọna ẹre ọ si ẹre ne ẹtin i na fo mwa. Agharhemiẹn wẹẹ ikinnegbe mwa hẹko wiẹghua khian, sokpan, orhiọn mwa ghi gha khian ọgbọn yọ ẹdẹgbegbe.
w04 8/15 25 okhuẹn 16-17
Egbe Wọọ Ima Sokpan Ẹtin I Khian Fo Ima
16 Ọ wa khẹke ne ima gha gbaroghe egbe ima, ne ima ghẹ mieke na gha khuọnmwi vbe odẹ ọghe orhiọn. Adeghẹ ima na gha gu Osanobua ne Jehova mwẹ asikẹgbe ne khuankhuankhuan, ugbẹnso egbe sẹtin wọọ ima vbe odẹ ọghe ikpakpa, sokpan egbe ugamwẹ ne ima rhie ne Jehova i khian wọọ ima. E Jehova “ẹre ọ rhie ẹtin ne iran ne ẹtin fo kevbe ne egbe wọọ re.” (Aizaia 40:28, 29) Emwi ne ukọ e Pọl miẹn vbe agbọn keghi yae rẹn wẹẹ, ẹmwata ẹre Aizaia tae; e Pọl keghi gbẹn wẹẹ: “Ọna ẹre ọ si ẹre ne ẹtin i na fo mwa. Agharhemiẹn wẹẹ ikinnegbe mwa hẹko wiẹghua khian, sokpan, orhiọn mwa ghi gha khian ọgbọn yọ ẹdẹgbegbe.”—2 Kọrinti 4:16.
17 Vbe ako na, e Pọl keghi kha wẹẹ “ẹdẹgbegbe.” Ọna rhiema wẹẹ, te ima khian gha loo emwi hia ne Jehova kpemehe ẹre ne ima, ke ẹdẹ ya fi ẹdẹ. Ọ mwẹ ọtẹn nokhuo ọkpa nọ ghaa re arọndẹ na gie yo isi; ukpo 43 ẹre ọ ya ru iwinna na. Ọ ghaa mwẹ ẹghẹ eso ne egbe ya wọọ re kevbe ne iro vbe ya han rẹn. Sokpan ọ ma gi ẹtin fo ẹre. Ọtẹn nokhuo na keghi kha wẹẹ: “I keghi hia ne I gha rherhe rhiọrre vbe ẹdẹgbegbe ne I mieke na sẹtin gha na erhunmwu gie Jehova kevbe ne I gha tie Baibol, I ke suẹn iwinna rhọkpa vbe owiẹ. Ne I na lele emwamwa na vbe ẹdẹgbegbe, ẹre ọ si ẹre ne I na sẹtin mwẹ ẹbo izinegbe do fi ebanban.” Ma gha sẹtin gha mwẹ ilẹkẹtin wẹẹ, “ẹdẹgbegbe” ẹre Jehova khian ya gha rhie ẹtin ye ima iwu deghẹ ima na gha na erhunmwu gie ẹre, kevbe deghẹ ima na gha ru erria yan avbe eyan ọghẹe kevbe akpa ọghẹe ni hionkhuan.
(2 Kọrinti 4:17) Ọlọghọmwa kherhe nọ rhie gberra khian ne ima ye na, gha rhie uyi nọkhua ọghe etẹbitẹ nọ kpọlọ sẹ ọlọghọmwa na ẹsẹse gie ima.
it-1 724-725
Izinegbe
Ọ ma khẹke hiehie ne ima mianmian ayayẹro ne ima mwẹ zẹvbe Ivbiotu e Kristi, ọni ọre arrọọ ọghe etẹbitẹ ne ima khian sọyẹnmwẹ ọnrẹn zẹvbe emwa ni gbae. Ọ gha khọnrẹn ne eghian ọghe ẹmwata gbele ima rua, emwi rhọkpa i khian sẹtin mu idobo yọ ne emwi ne ima yaro yi ghẹ mwẹ amusẹ. (Rom 5:4, 5; 1 Tẹs 1:3; Arhie 2:10) Te oya ne ima re vbe ẹdẹnẹrẹ ye kherhe vbe ima gha yae taa emwi ne ima yaro yi vbe odaro. (Rom 8:18-25) Ọlọghọmwa ughughan ẹre ima werriẹ aro daa vbe ẹdẹnẹrẹ, eso keghi re ọlọghọmwa nọ wegbe, vbọrhirhighayehẹ, ma rẹnrẹn wẹẹ te avbe ọlọghọmwa na ye “kherhe,” kevbe wẹẹ, te ọ “rrie gberra khian,” vbe a gha yae taa arrọọ ọghe etẹbitẹ ne ima khian sọyẹnmwẹ ọnrẹn vbe agbọn ọgbọn nọ dee. (2 Kọr 4:16-18) Adeghẹ ima na gha yerre vbe ẹghẹ hia wẹẹ ọlọghọmwa ne ima werriẹ aro daa vbe ẹdẹnẹrẹ keghi re ọghe ovbiẹghẹ kherhe, kevbe wẹẹ, deghẹ ima ma mianmian ayayẹro ne ima mwẹ zẹvbe Ivbiotu e Kristi, ọ gha ru iyobọ ne ima ya da imudiase ọghe ima yi kevbe ne iro ghẹ han ima.
(2 Kọrinti 4:18) Rhunmwuda, ẹi re emwi ne a dẹghe ma rhie aro daa, sokpan avbe emwi nai dẹghe nọ. Emwi ne a sẹtin dẹghe, ovbi ẹghẹ kherhe ẹre ọ ya vbe otọ, sokpan emwi nai dẹghe ẹre ọ rrọọ ẹdẹdẹmwẹdẹ.
Gualọ Emwi Ewe Ọghe Orhiọn
(2 Kọrinti 4:7) Sevba, ma ni mwẹ emwi ighobioye orhiọn na, te ima yevbe akhe kẹkan ne a ya obuẹ ma, ne a miẹn ehe na rhiema wẹẹ, ẹtin nọ sẹ ehia, ọghe Osanobua nọ, ighẹ ẹi re ọghomwa.
w12 2/1 28-29
“Gha Ru Emwi Nọ Gha Ya E Jehova Gha Sọyẹnmwẹ”
Ọtẹn Nokpia David Splane nọ re ọkpa vbe Ẹbu Nọ Su ẹre ọ guan yan uhunmwuta nii nọ ladian vbe Evbagbẹn Nọhuanrẹn. (2 Kọrinti 4:7) Vbọ re emwi ighobioye na? Irẹnmwi ra ẹwaẹn ẹre a guan kaan ra? Ọtẹn Nokpia David Splane keghi kha wẹẹ, “Hiehie.” Ọ na vbe kha wẹẹ, “Emwi ighobioye ne ukọ e Pọl ghaa guan kaan ọre ‘iwinna’ ne Osanobua waa ima re, ọghe na ru iyobọ ne emwa ‘ya rẹn ẹmwata’ nọ rre uwu ẹmwẹ ọghe Osanobua.” (2 Kọrinti 4:1, 2, 5) Ọtẹn Nokpia Splane keghi tama etẹn ni khian ghi ladian vbe Owebe Ọghe Gilead wẹẹ, uki isẹn ne iran ya ruẹ emwi keghi re ne a ya mu iran egbe khẹ iwinna ne kpataki vbe ugamwẹ ọghe Jehova. Ọ na wẹẹ aro nọ ghaan ẹre ọ khẹke ne iran ya gha ghee iwinna na.
Ọ na kha wẹẹ, “akhe . . . na ya obuẹ ma” keghi mudia ye ihe ikinnegbe ọghe ima. Ọ na vbe guan kaan alughaen nọ rre akhe na ya obuẹ ma kevbe akhe ọghe igoru. Ai mobọ loo akhe ọghe igoru. Avbe akhe na ya obuẹ ma, ẹre a loo ya winna. Adeghẹ ima na mu emwi ighobioye ye akhe ọghe igoru, ẹghẹ nii, aro ọkpa ẹre ima khian ya gha ghee akhe nii kevbe emwi ighobioye nọ rre uwu ẹre. Ọtẹn Nokpia Splane keghi tama iran wẹẹ, “Zẹvbe arọndẹ na gie yo isi, ọ ma khẹke ne uwa gha ru emwi ne emwa mieke na gha tian uwa. Ọ khẹke ne uwa rẹn wẹẹ e Jehova ẹre egbe etian vberriọ khẹke. Akhe na ya obuẹ ma ẹre uwa khin.”
(2 Kọrinti 6:13) Te I wa gu uwa guan na zẹvbe ivbi mwẹ, wa vbe gha mwẹ ẹnina ne ima mwẹ ghe uwa ghe ima. Wa fannọ otọ ẹko uwa ma ima.
w09 11/15 21 okhuẹn 7
Gi Ahoẹmwọmwa Ne Uwa Mwẹ Ne Etẹn Gha Wegbe Yọ
7 Ma vbe vbo? De vbene ima khian ya “fannọ otọ ẹko” ima hẹ vbe ahoẹmwọmwa na mwẹ ne etẹn? Emwa ni re ihegbe, ra ni ke ẹvbo ọkpa rre rherhe guobọ egbe. Emwa ni koko ku iku isasegbe ọkpa, ra emwa ni mwẹ emwi ọvbehe ni yẹẹ iran, ne iran gba ru, ẹre ọ mobọ ru emwi kugbe. Adeghẹ emwi eso rrọọ ni yẹẹ ima, ne ima vbe etẹn eso vbuwe iko gba ru, nọ ya ima wannọ egbe hin uwu ẹbu etẹn nikẹre rre, ọ khẹke ne ima “fannọ otọ ẹko” rua, ne ima mieke na sẹtin gu etẹn hia gha mu obọ. Ọ khẹke ne ima nọ egbe ima wẹẹ: ‘Etẹn nikpia kevbe etẹn nikhuo ne I gu obọ re ọkpa ẹre I mobọ lele yo ikporhu ra? Iran ọkpa ẹre imẹ vbe mobọ gu sọyẹnmwẹ egbe ra? Vbe I ghaa rre Ọgua Arriọba, mẹ kinnegbe vbe egbe emwa ni da suẹn gha yo iko ra, ne I gha roro ẹre wẹẹ iran ma he sẹ ne I khian gu gha ru ọse kevbe wẹẹ, iran ke sẹtin gha re ọse mwẹ, ọ gha rhie ẹghẹ? Mẹ tuẹ emwa hia vbuwe iko ra, ke avbe eniwanrẹn kevbe igbama?’
E Baibol Na Tie
(2 Kọrinti 4:1-15) Te Osanobua, vbe uwu itohan rẹn waa iwinna na ne ima, rhunmwuda ọni, ẹtin i fo mwa. 2 Ma ghi ban emwi ẹkhokho kevbe emwi ekhue hia ye efẹn ọkpa, ma i ya erẹrẹ ru emwi, ra ne a gha ya ẹmwẹ Osanobua khian ohoghe. Vbe uwu uwanmwẹ nọ wa mu otọ fo ọghe ẹmwata, ma ghi gha yin vbe odaro Osanobua, ma ghi gha hia ne a rhie egbe mwa ye egbe ihe ne ekhọe emwa hia gha na gha ta ẹmwẹ ima nọ maan. 3 Rhunmwuda, adeghẹ iyẹn nọ maan ne ima kporhu ẹre, re emwi ne a rhie lẹre, obọ iran ni ra fuan ẹre ọ na re emwi ne a rhie lẹre. 4 Iran ma yayi, rhunmwuda ẹbọ dan ọghe agbọn na mu ekhọe iran dee ye uwu ebiebi nẹ. Ọ ma gie iran bẹghe uwanmwẹ nọ wan mu iran, uwanmwẹ nọ ke iyẹn nọ maan vbekpa uyi e Kristi rre, ọmwa ne ọ re ama ne a ya gie Osanobua dandan an dan. 5 Rhunmwuda, ẹi re egbe ima ma kporhu ẹre, ma kporhu e Jesu Kristi zẹvbe Nọyaẹnmwa, kevbe ima tobọ mwa zẹvbe eguọmwadia uwa vbekpae Jesu. 6 Osanobua ne ọ khare wẹẹ, “Uwanmwẹ gha wan ke uwu ebiebi ladian,” ẹre ọ vbe wan uwanmwẹ ọnrẹn ye ima ekhọe, ne ọ rhie uwanmwẹ ọghe a rẹn uyi Osanobua ne ima, zẹvbe ne ọ wan ladian vbe ugbaro e Kristi. 7 Sevba, ma ni mwẹ emwi ighobioye orhiọn na, te ima yevbe akhe kẹkan ne a ya obuẹ ma, ne a miẹn ehe na rhiema wẹẹ, ẹtin nọ sẹ ehia, ọghe Osanobua nọ, ighẹ ẹi re ọghomwa. 8 Ẹghẹ hia ẹre a ya rueghe mwa, sokpan a ma rẹnkhẹn mwa an, ma zẹdia bi iro eva, sokpan iro ma han mwa. 9 Eghian wa bun ẹsẹse, sokpan ma i re nẹi mwẹ ọse, a rhe fian ima ẹwẹn nọ da ugbẹnso, sokpan a ma miẹn ima uhunmwu. 10 Ẹghẹ hia ma ya dada uwu e Jesu khian vbe egbe ne ọ sẹtin wu ọghomwa na, ne a mien ehe na vbe gha dẹghe uyinmwẹ ọghẹe vbe egbe mwa. 11 Vbe ẹdẹ agbọn mwa hia, ma rhie uhunmwu da uwu, rhunmwuda Jesu, ne arrọọ ọghẹe miẹn ehe na rhie egbe ma vbe egbe nọ sẹtin wu ọghe ima na. 12 Ọna rhiema wẹẹ, uwu winna vbe uwu ima, sokpan arrọọ winna vbe uwu uwa. 13 Ebe khare wẹẹ, “I guan rẹn rhunmwuda ighẹ I yayi.” Vbe uwu ekhọe iyayi vberriọ, ma vbe guan rhunmwuda ighẹ ma yayi. 14 Rhunmwuda ma rẹnrẹn wẹẹ, Osanobua ne ọ huẹn Nọyaẹnmwa Jesu ye agbọn, gha vbe huẹn ima kpaegbe ba e Jesu. Ọ ghi viọ ima kevbe uwa gha die odaro irẹn. 15 Rhunmwuda uwa ẹre ena hia khin, zẹ vbene ẹsọhẹ Osanobua ya sẹ egbe emwa nibun, erriọ iran gha vbe ya gha na erhunmwu sayọ ba ekpọnmwẹ ne uyi Osanobua.
MAY 13-19
EMWI EWE NI RRE UWU ẸMWẸ ỌGHE OSANOBUA | 2 KỌRINTI 7-10
“Iwinna Ọghe Iyobọ Na Ru Ne Etẹn Ni Rre Uwu Ọlọghọmwa”
(2 Kọrinti 8:1-3) Etẹn mwẹ, ma hoo ne uwa rẹn iwinna ne ẹsọhẹ Osanobua he winna vbe esọsi nọ rre Masidonia. 2 Ọlọghọmwa ne iran miẹn wa danmwẹ iran ghee ẹsẹsẹmwẹse, sokpan ẹko keghi ye rhiẹnrhiẹn iran sẹrriọ wẹẹ iran keghi ye zẹ emwi obọ ya ru ẹse wọrhọ wọrhọ, egbe ne a ya miẹn wẹẹ iran rre uwu ai mwẹ. 3 Ne I tama uwa wẹẹ, ekhọe obọ iran ẹre iran ya rhie emwi ladian vbene ẹtin iran sẹ, uhiẹn gberra vbene obọ iran sẹ.
w98 11/1 25 okhuẹn 1
“Ọmwa Nọ Ya Ekhọe Ọyẹnmwẹ Ru Ẹse, Ẹre Osanobua Hoẹmwẹ Ọnrẹn”
Vbe okaro, e Pọl keghi tama etẹn ni rre Kọrinti vbekpae igiemwi esi ọghe etẹn ni rre Masidonia vbe nọ dekaan na gha ru iyobọ ne etẹn ni rre uwu ọlọghọmwa. E Pọl keghi kha wẹẹ, “Ọlọghọmwa ne iran miẹn wa danmwẹ iran ghee ẹsẹsẹmwẹse, sokpan ẹko keghi ye rhiẹnrhiẹn iran sẹrriọ wẹẹ iran keghi ye zẹ emwi obọ ya ru ẹse wọrhọ wọrhọ, egbe ne a ya miẹn wẹẹ iran rre uwu ai mwẹ.” A ma kpikpi Ivbi e Masidonia iran ke ru iyobọ ne iran ru. Sokpan e Pọl keghi kha wẹẹ, “Iran rinmwian ima, iran keghi tua unu muẹn wẹẹ ne a rhie otọ ne iran vbe ya gha mwẹ obọ vbe uwu iyobọ ne a gha ru gie iran, ne emwa Osanobua ni rre Judia.” Nọ ghi kpa ọmwa odin sẹ vbe iyobọ ne Ivbi e Masidonia ru, ọre wẹẹ iran na ye sẹtin ru iyobọ ne etẹn iran, “egbe na ya miẹn wẹẹ iran rre uwu ai mwẹ” ra ivbabọ.—2 Kọrinti 8:2-4.
kr 209 okhuẹn 1
Iwinna Ọghe Iyobọ Na Ru Ne Etẹn Ni Rre Uwu Ọlọghọmwa
VBE odẹ ukpo 46 C.E., ukhunmwu kegha fi vbe Judia. Rhunmwuda ne evbare na ghi khian aghanghan, te ọ wa gha lọghọ ne Ivbi e Ju ni ghaa re Ivbiotu e Kristi sẹtin gha dẹ evbare nọ gha sẹ iran re. Obọ ohanmwẹ da iran sẹrriọ wẹẹ, aro iran na do dinmwi la uwu ẹre. Sokpan e Jehova keghi bu iran rre, ọ na do ru iyobọ ne iran vbe odẹ nọ lughaẹn ne vbene ọ ka ya ru iyobọ ne eguọmwadia re. Vbọ ghi sunu?
(2 Kọrinti 8:4) Iran rinmwian ima, iran keghi tua unu muẹn wẹẹ ne a rhie otọ ne iran vbe ya gha mwẹ obọ vbe uwu iyobọ ne a gha ru gie iran, ne emwa Osanobua ni rre Judia.
kr 209-210 okhuẹn 4-6
Iwinna Ọghe Iyobọ Na Ru Ne Etẹn Ni Rre Uwu Ọlọghọmwa
4 Vbe ebe nogieva ne Pọl gbẹn gie etẹn ni rre Kọrinti, ọ keghi guan kaan iwinna eva na mu ne Ivbiotu e Kristi. Agharhemiẹn wẹẹ Ivbiotu e Kristi na hannọ zẹ ẹre Pọl ghaa gu guan vbe elẹta nọ gbẹn, ẹmwẹ nọ tae wa vbe dekaan “avbe ohuan ọvbehe” ni rrọọ vbe ẹdẹnẹrẹ. (Jọn 10:16) Ọkpa vbe iwinna ne Osanobua mu ne ima ọre na “ya emwa ọvbehe khian esiọre,” ọni ọre iwinna ikporhu iyẹn nọ maan kevbe iwinna imamwaemwi ne ima ru. (2 Kọr 5:18-20; 1 Tim 2:3-6) Iwinna nogieva ne Osanobua mu ne ima keghi dekaan iyobọ ne ima ru ne etẹn ne ima gba ga. Iwinna na, ẹre Pọl tiẹre ‘iwinna ọghe iyobọ na ru ne etẹn ni rre uwu ọlọghọmwa.’ (2 Kọr 8:4) Ẹmwẹ e Grik ọkpa nọ re di·a·ko·niʹa ẹre a ke zedu ẹre ladian ighẹ ẹmwẹ na nọ re “iwinna” vbe ifiẹmwẹ eva na nọ re ‘iwinna ọghe na ya emwa ọvbehe khian ọsie Osanobua’ kevbe ‘iwinna ọghe iyobọ na ru ne etẹn ni rre uwu ọlọghọmwa.’ Vbọzẹe ne ọ na khẹke na yi ọna ẹro?
5 Ne Pọl na loo ẹmwẹ e Grik ọkpa ye iwinna eva na, te Pọl ghaa ka iwinna ọghe na ru iyobọ ne etẹn ni rre uwu ọlọghọmwa ba iwinna ọvbehe ne Ivbiotu e Kristi ru. Vbe ebe nọ ka gbẹn gie Ivbiotu e Kristi ni rre Kọrinti, ọ keghi kha wẹẹ: “Odẹ ne a la ga ughughan ẹre ọ rrọọ, sokpan e Nọyaẹnmwa ọkpa ẹre a yae ga. Ẹrhiọn ne a ya winna ughughan ẹre ọ rrọọ, . . . Sokpan orhiọn ọkpa nii ẹre ọ ru avbe emwi na hia.” (1 Kọr 12:4-6, 11) Vbene ẹmwata, e Pọl keghi gie iwinna ughughan na ru vbe iko ọghe Ivbiotu e Kristi zẹvbe “ugamwẹ ẹmwata.” (Rom 12:1, 6-8) Ẹi khabe ne Pọl na ghee ẹre wẹẹ, ọ khẹke ne irẹn loo ẹghẹ ọghe irẹn ya ru iyobọ ne “emwa Osanobua”!—Rom 15:25, 26.
6 E Pọl keghi ru iyobọ ne etẹn ni rre Kọrinti ya rẹn wẹẹ, iwinna ọghe iyobọ na ru ne etẹn ni rre uwu ọlọghọmwa, keghi re abọ ọkpa vbe ugamwẹ ne iran rhie ne Jehova. Emwi nọ ghaa mwẹ vbe ekhọe ọre wẹẹ: Evbọzẹe ne Ivbiotu e Kristi na ru iyobọ ne etẹn ni rre uwu ọlọghọmwa ọre wẹẹ, iran hoo ne iran lele “ẹmwẹ iyẹn nọ maan ọghe Kristi” vbe arrọọ ọghe iran. (2 Kọr 9:13) Ivbiotu e Kristi keghi ru iyobọ ne etẹn ne iran gba ga, rhunmwuda ne iran na hoo ne iran gha ya imamwaemwi ọghe Kristi ru emwi vbe arrọọ ọghe iran. E Pọl keghi kha wẹẹ, emwi esi ne iran ru ne etẹn iran, keghi re “ẹsọhẹ ne ai miẹn egbọre ne Osanobua rhiema” emwa rẹn. (2 Kọr 9:14; 1 Pit 4:10) Vbe The Watchtower ọghe December 1, 1975 ghi guan kaan iyobọ na ru ne etẹn ni rre uwu ọlọghọmwa, ọ na wẹẹ: “Ọ ma khẹke ne ima zẹdẹ gha roro ẹre wẹẹ, Osanobua ne Jehova kevbe Ovbi ẹre ighẹ Jesu Kristi i ka iwinna na yọ.” Ẹmwata nọ rrọọ ọre wẹẹ, iwinna ọghe iyobọ na ru ne etẹn ni rre uwu ọlọghọmwa keghi re abọ ọkpa ne kpataki vbe ugamwẹ ne ima rhie ne Osanobua.—Rom 12:1, 7; 2 Kọr 8:7; Hib 13:16.
(2 Kọrinti 9:7) Rhunmwuda ọni, wẹẹ ne dọmwade ọghẹe zẹ ọhẹ vbene ọ ya ekhọe ẹre mwamwaẹn, ẹi re ne a ru viẹ, ra ọghe te a ya tọn mwẹ, rhunmwuda, ọmwa nọ ya ekhọe ọyẹnmwẹ ru ẹse, ẹre Osanobua hoẹmwẹ ọnrẹn.
kr 196 okhuẹn 10
Vbene Ima Ya Miẹn Igho Na Loo Vbe Iwinna Arriọba
10 Nokaro, ma keghi ya ekhọe obọ ima ru izọhẹ rhunmwuda ne ima na hoẹmwẹ e Jehova kevbe wẹẹ, “emwi nọ rhirhi yẹẹ ọre ẹre ima ru.” (1 Jọn 3:22) Ọ keghi yẹẹ e Jehova deghẹ ọguọmwadia ọghẹe na gha ya ekhọe obọ re ru izọhẹ. Gia guan kaan emwi ne ukọ e Pọl tae vbekpae izọhẹ ne Ivbiotu e Kristi ru. (Tie 2 Kọrinti 9:7.) Ai kpikpi Ovbiotu e Kristi ọghe ẹmwata nọ ru izọhẹ, ẹi vbe ya umaro umaro ru ẹre. Nọghayayerriọ, ọ keghi ru izọhẹ zẹ “vbene ọ ya ekhọe ẹre mwamwaẹn.” Ọni rhiema wẹẹ, ọmwa vberriọ gha ghi zomwa rẹn nẹ wẹẹ, a gualọ iyobọ, ọ ghi ya ekhọe obọ re ru izọhẹ. Aro nọ ghaan ẹre Jehova ya ghee ọmwa vberriọ, “rhunmwuda, ọmwa nọ ya ekhọe ọyẹnmwẹ ru ẹse, ẹre Osanobua hoẹmwẹ ọnrẹn.” E Baibol ọvbehe na zedu ẹre keghi kha wẹẹ: “Osanobua hoẹmwẹ emwa ni hoo ne iran gha rhie ladian.”
Gualọ Emwi Ewe Ọghe Orhiọn
(2 Kọrinti 9:15) Wa gie a kpọnmwẹ Osanobua ye ẹse ẹre ne ai sẹtin fian ive yi.
w16.01 12 okhuẹn 2
Gi Ẹse Ọghe Osanobua “Ne Ai Sẹtin Fian Ive Yi” Gha Gua Ruẹ Kpa
2 E Pọl rẹnrẹn wẹẹ izọese nọ gbae ne Kristi ru, ẹre ọ suigiẹ yọ wẹẹ eyan ọghe Osanobua hia ni hionkhuan gha mwẹ amusẹ. (Tie 2 Kọrinti 1:20.) Emwi esi hia ne Jehova loo Jesu ya ru ne ima, kevbe odẹ nọ ya rhiẹre ma wẹẹ irẹn mwẹ ahoẹmwọmwa nẹi beghe daa ima, keghi rre usun ẹse ọghe Osanobua “ne ai sẹtin fian ive yi.” Vbene ẹmwata, ẹse na keghi yan ọmwa unu rua sẹrriọ wẹẹ, ai miẹn ẹmwẹ ọkpa na khian ya sẹtin gie ẹre. Vbọ khẹke nọ gha ye ima hẹ ighẹ ẹse ne kpataki na? De emwi nọ khẹke ne ẹse na gua ima kpa ya ru, zẹvbe ne ima ya mu egbe khẹ Ugie Ayere ọghe Uwu e Kristi na khian do vbe ẹdẹ Wẹnẹsde vbe March 23, 2016?
(2 Kọrinti 10:17) Sokpan zẹvbe ne ebe khare, “Ọmwakọmwa ne ọ hoo ne ọ gha rhuọ, wẹẹ ne ọ gha ya iwinna ne Nọyaẹnmwa winnaẹn rhuọ.”
g99 7/8 20-21
Emwi Dan Nọ Deghẹ Ọmwa Na Gha Hio Ra?
Vbe abọ ọghe Evbagbẹn Nọhuanrẹn Na Ya E Grik Gbẹn, emwi na ya ẹmwẹ ọghe Grik nọ re kau·khaʹo·mai kha ọre, “na gha hio, na gha ghọghọ, na gha rhuọ,” a sẹtin loo ẹmwẹ e Grik na ye emwi nọ maan kevbe emwi nẹi maan. Vbe igiemwi, e Pọl khare wẹẹ, “te ima ghi ghọghọ vbe idanmwehọ wẹẹ ma gha ghae vbe uwu uyi ọghe Osanobua.” Ọ na vbe rhie ibude ne Ivbiotu e Kristi wẹẹ: “Ọmwakọmwa ne ọ hoo ne ọ gha rhuọ, wẹẹ ne ọ gha ya iwinna ne Nọyaẹnmwa winnaẹn rhuọ.” (Rom 5:2; 2 Kọrinti 10:17) Ọna rhiema wẹẹ, ne ima gha hio rhunmwuda ne Jehova na re Osanobua ọghe ima, ma ghi vbe gha ghọghọ rhunmwuda eni esi ne Osanobua mwẹ.
E Baibol Na Tie
(2 Kọrinti 7:1-12) Emwi na hia ẹre a ve ima ẹre, wa ne ọse mwẹ ni ghaan. Rhunmwuda ọni, wa gie ima khuẹ egbe mwa huan hin emwi nọ sẹtin ya egbe ra orhiọn khian nọ ma huan, wa gie ima hia ne ima gha re nọhuanrẹn fẹẹrẹ, vbekpa ne ima gha na gha rrọọ vbe a mu ohan Osanobua. 2 Wa rhie otọ ne ima vbe uwu ekhọe uwa. Ne ima ru ẹre emwi khọọ i rre uwu uwa, ma ma fuẹn ọmwa rhọkpa rua, ma ma ru ọmwa rhọkpa re. 3 I ma ta ọna ne I ya zan uwa, rhunmwuda, zẹ vbene I ka kha yi, wa ghaan ne ima sẹrriọ wẹẹ, ihe ọkpa ma gha ye ẹghẹ hia, te a rre agbọn ra te a wulo. 4 Aro mwẹ da ọna sẹrriọ wẹẹ, te I ye uwa ghan. Vbe uwu ọlọghọmwa ne ima ye hia, te udu ye hu mwẹ, ẹko mwẹ vuọn ne ọyẹnmwẹ. 5 Uhiẹn vbe ima sẹ Masidonia nẹ, ma ma ye hẹwẹ, orueghe gba ehe hia, ẹzọ ne a gu emwa ọvbehe gui, afianma nọ fian ọmwa vbe ekhọe. 6 Sokpan, Osanobua ne ọ rhie ẹtin ne ne egbe wọọ fo nẹ, keghi ye urremwẹ e Taitọs rhie ẹtin ye ima iwu. 7 Ẹi re urremwẹ ọnrẹn ọkpa, sokpan kevbe iyẹn nọ do na ọghe vbene uwa rhie igiọdu ne iran hẹ. Ọ tama ima vbene uwa wa hoo ne uwa miẹn mwẹ hẹ, vbene ọ da uwa hẹ, vbene uwa mu egbe ne uwa gbinna mẹ hẹ, ẹko keghi rhiẹnrhiẹn mwẹ ẹsẹse sayọ nian. 8 Rhunmwuda, adeghẹ ebe ne I gbẹn gie uwa nii gele lughu uwa ẹko, I ma gbe I ma rẹn I ghẹ gbẹn ọnrẹn. Te ọ gha te da mwẹ vbe I miẹn wẹẹ ebe nii rhia uwa ẹko rua vbe ovbi ẹghẹ kherhe. 9 Sokpan banbanna nian, ẹko wa rhiẹnrhiẹn mwẹ, ẹi re rhunmwuda ighẹ I rhia uwa ẹko rua, sokpan rhunmwuda wẹẹ, ẹko ne ọ rriara uwa ye uwa fi obọ werriẹ. Osanobua loo ẹko nọ rriara uwa nii, rhunmwuda ọni, ma ma ru uwa emwi dan. 10 Rhunmwuda ẹko nọ rriara ọmwa ne Osanobua loo ro, keghi rhie a fi ekhọe werriẹ ghee imiẹnfan rre. Ai vbe gbe I ma rẹn ye ọni hiehie. Sokpan te ẹko ne ọ rriara ọmwa ọghe agbọn na si uwu. 11 Wa ghe emwi ne Osanobua ye ẹko nọ rriara uwa na ru, vbene uwa ghi mu aro ye emwi hẹ, vbene uwa ghi ziga hẹ ne uwa rhiema ighẹ, wa ma rẹn ọkpa wa ma rẹn eva. Egbe ohu nọkhua vberriọ, egbe utumwẹ wa bu rre vberriọ, a mu emwi roro, a mu aro ye emwi, a mu egbe ne a ya gbe ọmwa hin ọkhọ rre! Wa keghi wa rhie egbe uwa zẹ vbe ọmwa ne ọ ma rri abe rhọkpa vbe uwu ẹmwẹ na. 12 Erriọ nọ, I gha rhe gbẹn ebe nii, ẹi re rhunmwuda nọ rukhọ ra ọmwa na rukhọ ẹre I na gbẹn ọnrẹn. Sokpan te I gbẹn ọnrẹn ne I miẹn ehe na rhiema uwa, vbe odaro Osanobua, vbene uwa kakabọ mu aro ye ẹmwẹ emwi ima hẹ.
MAY 20-26
EMWI EWE NI RRE UWU ẸMWẸ ỌGHE OSANOBUA | 2 KỌRINTI 11-13
“‘Igban’ Nọ Ghaa Solo E Pọl Vbuwe Egbe”
(2 Kọrinti 12:7, NW) Sokpan, ne ọ miẹn ehe na kie mwẹ ukpẹ ọre, ne emwi ọyunnuan ne aro mwẹ sẹ na ghẹ mieke na gha ya mwẹ tọn ifuẹn mu, ọ keghi rhie igban yọ mwẹ egbe nọ gha solo mwẹ vbuwe egbe, ne ọ gha yevbe odibo ọghe Setan, ne ọ gha kinmwi mwẹ, nọ da mwẹ obọ uhiomwẹ yi.
w08 6/15 3-4
Ẹghẹ Ne I Ya Vburriẹ Ẹre I Ya Mwẹ Ẹtin
Ọguọmwadia Osanobua ọvbehe keghi rinmwian e Jehova nọ rhie ‘igban nọ solo ẹre vbuwe egbe’ hin, ọni ọre ọlọghọmwa nọ ma fo vbe otọ ne irẹn ghaa werriẹ aro daa. Igba eha ẹre ukọ e Pọl rinmwian Osanobua nọ rhie ọlọghọmwa nii hin irẹn egbe rre. Ma ma wa rẹn emwi ne ọlọghọmwa nii ghaa khin, sokpan te ọ yevbe na ghee igban nọ ghaa solo ẹre vbuwe egbe, ọ gha kẹ, ọlọghọmwa na ma ghi gi e Pọl gha sọyẹnmwẹ vbe iwinna ugamwẹ ọghe Jehova. E Pọl keghi kha wẹẹ, te ọ yevbe na miẹn wẹẹ te a fi irẹn ubi vbe ẹghẹ hia. E Jehova khian ghi wanniẹn e Pọl, ọ na tama rẹn wẹẹ: “Ẹsọhẹ mwẹ ọkpa ọrọre emwi ne ọ khẹke ne u gha mwẹ, rhunmwuda ẹghẹ ne uwẹ ma na wo vbe egbe, ẹre ẹtin imẹ na wo vbe egbe sẹ.” Sokpan e Jehova ma rhie ọlọghọmwa nii hin. E Pọl keghi fẹko mwẹ ẹbo izinegbe, ọ na kha wẹẹ: “Ẹghẹ ne I ma na wo vbe egbe ẹre I na mwẹ ẹtin.” (2 Kọr 12:7-10) Vbe ọ ya ẹmwẹ na kha?
(2 Kọrinti 12:8, 9) Igba eha ẹre I na erhunmwu ghe Nọyaẹnmwa ba ẹre, I na rinmwiaẹn ne ọ rhie ẹre hin mwẹ egbe rre. 9 Ewanniẹn nọ rhie mẹ ọrọre wẹẹ, “Ẹsọhẹ mwẹ ọkpa ọrọre emwi ne ọ khẹke ne u gha mwẹ, rhunmwuda ẹghẹ ne uwẹ ma na wo vbe egbe, ẹre ẹtin imẹ na wo vbe egbe sẹ.” Rhunmwuda ọni, te ọyẹnmwẹ ghi sẹ mwẹ ne I gha ye a ma wo vbe egbe rhuọ, ne I miẹn ehe na gha họn ẹmwẹ ifuẹn ne ẹtin e Kristi tan gue mwẹ.
w06 12/15 24 okhuẹn 17-18
E Jehova Keghi “Rhie Orhiọn Nọhuanrẹn Ne Iran Hia Nọ Vbu Vbe Obọ Ẹre”
17 Vbe Pọl ghi na erhunmwu gie Osanobua, Osanobua keghi wanniẹn ọnrẹn wẹẹ: “Ẹsọhẹ mwẹ ọkpa ọrọre emwi ne ọ khẹke ne u gha mwẹ, rhunmwuda ẹghẹ ne uwẹ ma na wo vbe egbe, ẹre ẹtin imẹ na wo vbe egbe sẹ.” Ẹre Pọl na ghi kha wẹẹ: “Rhunmwuda ọni, te ọyẹnmwẹ ghi sẹ mwẹ ne I gha ye a ma wo vbe egbe rhuọ, ne I miẹn ehe na gha họn ẹmwẹ ifuẹn [ra ibọkpọ, NW ] ne ẹtin e Kristi tan gue mwẹ.” (2 Kọrinti 12:9; Psalm 147:5) E Pọl keghi bẹghe ẹre wẹẹ, te Osanobua loo e Kristi ya gbogba ga irẹn, vbene a miẹn wẹẹ te ọ tan ibọkpọ gue irẹn. Vbe ẹdẹnẹrẹ, e Jehova vbe họn erhunmwu ọghe ima vbe odẹ vbenia. Ọ keghi gbogba ga eguọmwadia ọghẹe vbene a miẹn wẹẹ, te ọ tan ibọkpọ gue iran.
18 Adeghẹ ọmwa na gha rre uwu ibọkpọ, ibọkpọ nii i khian sẹtin dobọ ẹre yi ne amẹ ghẹ ghi rhọọ ra ne ẹhoho ghẹ ghi hoho; sokpan ibọkpọ nii gha sẹtin gbogba ga ọmwa nọ rre uwu ẹre ne amẹ ra oni ghẹ gbe ẹre. Erriọ vbe ye, ugue ne ima miẹn vbe obọ “ẹtin e Kristi” i khian dobọ ẹre yi ne edanmwẹ ra ọlọghọmwa ghẹ sẹ eke ne ima ye. Sokpan, ọ keghi gbogba ga ima ne ọlọghọmwa ọghe agbọn na kevbe ọmwa nọ kha yan rẹn nọ re Setan, ghẹ kuan ima ose yotọ vbe odẹ ọghe orhiọn. (Arhie Maan 7:9, 15, 16) Nọnaghiyerriọ, deghẹ u na gha werriẹ aro daa ọlọghọmwa nọ ma ‘fo vbe otọ,’ gha mwẹ ilẹkẹtin wẹẹ e Jehova rẹn ọlọghọmwa ne u la gberra, kevbe wẹẹ, ọ gha họn vbe u gha “tu bu ẹre ya nọ iyobọ.” (Aizaia 30:19; 2 Kọrinti 1:3, 4) E Pọl keghi gbẹn wẹẹ: “Osanobua gha yan, te ọ muẹn sẹ, ẹi ra kue ne a danmwẹ uwa ghe gberra vbene ẹtin uwa sẹ, sokpan ẹghẹ ne a na danmwẹ uwa ghe nii, ọ gha rhie ẹtin ne uwa ya ya egbe miẹn ẹnrẹn, ne uwa miẹn ehe na sẹtin do ẹre fe.”—1 Kọrinti 10:13; Filipai 4:6, 7.
(2 Kọrinti 12:10) Ẹko ẹre vuọn mwẹ ighẹ ne I ma na wo vbe egbe, ne a na tie ẹbọ mẹ, ẹsọn, ukpokpo, kevbe orueghe rhunmwuda e Kristi. Rhunmwuda, ẹghẹ ne I ma na wo vbe egbe ẹre I na mwẹ ẹtin.
“Irẹn Ẹre Ọ Rhie Ẹtin Ne Iran Ne Ẹtin Fo”
8 Tie Aizaia 40:30. Ẹi mwẹ vbene ima fuẹro sẹ hẹ, emwi nibun rrọọ ne ima i sẹtin ya ẹtin obọ ima fian gbua. Ọ khẹke ne ima hia rẹn ọna. Agharhemiẹn wẹẹ ọmwa nọ wẹro ẹre ukọ Pọl ghaa khin, ẹi re emwi hia ne ọ hoo nọ ru, ẹre ọ sẹtin gha ru. Ọ ghi fannọ otọ ẹko ẹre ma Osanobua, Osanobua na tama rẹn wẹẹ: “Ẹsọhẹ mwẹ ọkpa ọre emwi ne ọ khẹke ne u gha mwẹ.” E Pọl wa rẹn emwi ne Osanobua ya ẹmwẹ na kha, ọna ẹre ọ zẹe ne Pọl na kha wẹẹ: “Ẹghẹ ne I ya vburriẹ ẹre I ya mwẹ ẹtin sẹ.” (2 Kọr 12:7-10, NW ) De emwi ne Pọl ya ẹmwẹ na kha?
9 Ọ keghi wa vẹẹ ne Pọl rẹn wẹẹ, emwi bun ne irẹn i khian sẹtin ya ẹtin obọ irẹn ru vbe ẹi re te Osanobua ru iyobọ nẹẹn. Orhiọn nọhuanrẹn ọghe Osanobua ẹre Pọl ghaa hẹnhẹn egbe yan vbe ẹghẹ ke ẹghẹ ne ẹtin ya fuẹ. Orhiọn nọhuanrẹn ẹre Osanobua vbe ya gha ru iyobọ ne Pọl, nọ mieke na sẹtin ru iwinna ne ẹi ghẹ sẹtin ya ẹtin obọ re ru. Erriọ vbe ye ne ima. Ma gha hẹnhẹn egbe yan e Jehova, ọ gha vbe ya ima deziẹn vbe ẹtin gha fo ima.
Gualọ Emwi Ewe Ọghe Orhiọn
(2 Kọrinti 12:2-4) I rẹn ovbi iyayi ọkpa ne okpia, ne a gua rhie gha rrie ẹrinmwi ne ọ yo sẹ [ra ẹrinmwi ne ukpogieha, NW ] vbe ukpo iwenẹ nọ lae (I ma rẹn deghẹ te emwi na wa sunu ra deghẹ umian ẹre ọ na miẹn ọnrẹn, Osanobua ọkpa ẹre ọ rẹnrẹn.) 3 Ne I dọlegbe tae, I rẹnrẹn wẹẹ te a wa gua okpia na rhie gha rrie Paradais (erriọ ye nọ, I ma rẹn deghẹ te emwi na sunu vberriọ ra deghẹ umian ẹre ọ na miẹn ọnrẹn, Osanobua ọkpa ẹre ọ rẹnrẹn.) 4 Evba ẹre ọ na họn ẹmwẹ ne a i sẹtin ta, emwi ne ọmwa nagbọn ma kei ne ọ gha gbe unu yi.
Inọta Ne Emwa Nọ
Ọ khọ wẹẹ “ẹrinmwi ne ukpogieha” ne Pọl ya unu kaẹn vbe 2 Kọrinti 12:2, ọre Arriọba e Mẹzaia ne Jesu kevbe 144,000 khian na gha kha zẹvbe ọba. Jesu kevbe etẹn na hannọ zẹ ọre nene “ẹrinmwi ọgbọn” na guan kaẹn na.—2 Pit 3:13.
A keghi tie ẹre “ẹrinmwi ne ukpogieha” rhunmwuda, Arriọba nọ ghi hiunsi sẹ arriọba hia nikẹre nọ.
E “paradais” na gua ukọ Pọl gha rrie sẹtin gha re (1) Paradais nọ khian gha rre uhunmwu otagbọn vbe odaro, (2) ọfunmwegbe ne eguọmwadia Osanobua mwẹ vbe ugamwẹ ọghẹe nia kevbe ọfunmwegbe ne iran khian gha mwẹ vbe uhunmwu otagbọn hia vbe ẹghẹ nọ dee vbe odaro (3) e paradais ọghe Osanobua nọ rre ẹrinmwi, nọ khian gha rrọọ vbe ẹghẹ ne agbọn na khian ya khian ọghe ọgbọn.
(2 Kọrinti 13:12) Wa gba ya isoso unu etẹn tuẹ egbe. Emwa Osanobua hia gie tuẹ uwa
it-2 177
Isoso Unu
“Isoso Unu Etẹn.” Vbe orre nokaro, a ghaa miẹn “isoso unu etẹn” (Rom 16:16; 1 Kọr 16:20; 2 Kọr 13:12; 1 Tẹs 5:26) ra “isoso unu ahoẹmwọmwa” (1 Pit 5:14) vbuwe ẹbu Ivbiotu e Kristi; ọ gha kẹ, ikpia ikpia kevbe ikhuo ikhuo ẹre ọ ghaa mu unu soso egbe. Ivbiotu e Kristi ni ghaa rrọọ vbe orre nokaro kegha ya isoso unu tuẹ egbe vbene Ivbi e Hibru ni ghaa rrọọ vbe ẹghẹ nẹdẹ vbe gha ru ẹre. Agharhemiẹn wẹẹ Evbagbẹn Nọhuanrẹn ma wa rhan otọ emwi ne “isoso unu etẹn” ra “isoso unu ahoẹmwọmwa” demu, ọ khọ wẹẹ, akugbe kevbe ahoẹmwọmwa ne Ivbiotu e Kristi ni ghaa rrọọ vbe ẹghẹ nii ghaa mwẹ, ẹre ọ si ẹre ne iran na gha tuẹ egbe vbe odẹ vbenia.—Jọn 13:34, 35.
E Baibol Na Tie
(2 Kọrinti 11:1-15) Akpawẹ wa gha sẹtin mwẹ izinegbe mẹ nian, uhiẹn adeghẹ I rhe ru emwi ukọnmwẹ kherhe. Lahọ wa zin ẹnrẹn. 2 Ẹmwẹ uwa ẹre ọ da mwẹ zẹ vbene ẹmwẹ uwa vbe da Osanobua, rhunmwuda te uwa yevbe uvbi ne ọ ma he sankan ne imẹ ya ne okpia ọkpa kẹkan, ọni nọ wẹẹ e Kristi tobọ ẹre. 3 Afianma fian mwẹ ne iran ghẹ ya ruẹn ẹmwẹ ye uwa ekhọe muẹn rhia, wa ghi zobọ vbe ne uwa na te wa guobọ e Jesu vbe nai gbe ikhan yi, zẹ vbene ẹyẹn ye ẹkẹ vbe ero, rẹrẹ Ivi. 4 Rhunmwuda, ẹkorhiẹnrhiẹnmwẹ ẹre uwa ya rhie ẹghẹ ne ọmwakọmwa ne ọ rre do kporhu e Jesu ọvbehe ma uwa, ẹi re ne ima kporhu ẹre, wa ghi vbe gha rhan obọ miẹn orhiọn kevbe iyẹn nọ maan nọ lughaẹn ne orhiọn kevbe iyẹn nọ maan ne uwa rhie vbe obọ ima! 5 Mẹ ma yayi wẹẹ odẹ ọkpa rrọọ ne imẹ ma ya vba avbe “ogiete ukọ” ọghe uwa nii. 6 Ọ gha kẹ, I ma he guẹ ẹmwẹ ne a guan, sokpan, ẹi yerriọ vbe ọghe irẹnmwi, ma wa rhie ọna ma uwa nẹ vbe ẹghẹ hia kevbe ihe hia. 7 I ma miẹn uwa emwi rhọkpa vbe I do kporhu iyẹn nọ maan ọghe Osanobua ma uwa. Mẹ keghi mu egbe mwẹ rrie otọ ne I miẹn ehe na ye uwa khian ni kpọlọ. Abakuru ọni khin mwẹ re ra? 8 Ẹghẹ ne I na gha winna vbe ehe ne uwa ye, avbe esọsi ọvbehe ẹre ọ ghaa ha osa mẹ, ne a wa kha wẹẹ, mẹ kegha do iran emwi hẹ, ne I ya gha ye uwa obọ. 9 Ẹghẹ ne I na gha rre ehe ne uwa ye, adeghẹ igho i gue mwẹ, I ma vbe ya ye uwa egbe, rhunmwuda, etẹn ni ke Masidonia rre viọ emwi ne I i te mwẹ hia gu mwẹ. Zẹ vbe ne I ka ru ẹre vbe ẹghẹ nọ gberra, erriọ I ra ye gha ru ẹre vbe ẹghẹ nọ dee. I i ra kun enegbe mwẹ yan uwa. 10 Vbekpa ẹmwata e Kristi nọ rre uwu imẹ, I tae wẹẹ orhiọnkpa nọ gha gbe eta orhuọ na yọ mwẹ unu, ẹi rre otọ e Gris, vbe ehe ne ọ sẹ kevbe ehe ne ọ rhanmwẹ. 11 Vbe ọ ya mwẹ ta ẹmwẹ na yi? Rhunmwuda ighẹ I i hoẹmwẹ uwa nọ ra? Osanobua rẹnrẹn ighẹ I hoẹmwẹ uwa. 12 I gha wa gha ru ẹre khian vbene I ru ẹre na, ne I miẹn ehe na dobọ ẹre yi, ighẹ emwi nii ne avbe “ukọ” nekpa nii, gha te miẹn ya gha rhuọ wẹẹ, vbe ne ima ya winna erriọ ẹre iran vbe ya winna. 13 Avbe emwa nii i re ukọ ne ukọ, ukọ ohoghe iran khin, iran ni vbe ta ohoghe ye iwinna iran, iran ghi fi egbe werriẹ, ne iran ba do ye vbe ukọ ne ukọ ọghe Kristi. 14 Ọsughe i rre emwa hiehie, uhiẹn ighẹ Setan tobọ ẹre sẹtin fi egbe werriẹ do gha yevbe odibosa uwanmwẹ. 15 Rhunmwuda ọni, ẹi re ogiemwi hiehie, adeghẹ, avbe eguọmwadia ẹre fi egbe werriẹ do gha yevbe avbe eguọmwadia ẹmwata. Vbe okiekie, iran gha miẹn emwi ne ọ ma iran ye avbe emwi ne iran ru na.
MAY 27–JUNE 2
EMWI EWE NI RRE UWU ẸMWẸ ỌGHE OSANOBUA | GALATIA 1-3
“I Keghi ‘Gu Ẹre Gui’ Ghee Mwẹ Ghee Ruẹ”
(Galatia 2:11-13) Ugbẹnvbe Pita sẹ Antiọk, uwu ẹbu ẹre I na gha gu ẹre gui, rhunmwuda, emwi ne ọ ru ma kei hiehie. 12 Ẹghẹ ne emwa ne Jems gie rre na ma he rre, e Pita kegha gu iran ne etẹn mwa ne ẹi re Ju rri evbare. Sokpan, ugbẹnvbe iran na ghi rre nẹ, ọ na ban rrie, ọ ma ghi gu iran rri evbare, rhunmwuda, ohan avbe iran ne ọ hoo ne a gha rhuẹ iran nẹi re Ju muẹn. 13 Iran ne Ju, ne etẹn mwẹ nekpa keghi vbe suẹn gha ru emwi avbiẹrẹ deba e Pita. Uhiẹn ighẹ te nene uyinmwẹ avbiẹrẹ iran vbe sẹ egbe Banabas.
w17.04 27 okhuẹn 16
Uwẹ Ya Egbe Tae Jehova Vbe Odẹ Ne Ọ Ya Bu Ohiẹn Ata Ra?
16 Tie Galatia 2:11-14. E Pita kegha mu ohan emwa nagbọn. (Itan 29:25) Agharhemiẹn wẹẹ, e Jehova ka gi e Pita rẹn aro ne irẹn ya ghee ẹmwẹ na, e Pita kegha mu ohan emwi ne iran khian ta ighẹ Ivbi e Ju ni re Ivbiotu e Kristi ni rre Jerusalẹm ni rhuẹ nẹ. Ukọ e Pọl nọ vbe gha rre iko ne avbe ukọ kevbe ediọn do vbe Jerusalẹm vbe ukpo 49 C.E., keghi gu e Pita gui, ọ na gi e Pita rẹn wẹẹ uyinmwẹ agabagebe ẹre ọ yinrin. (Iwinna 15:12; Gal 2:13) De emwi ne Ivbiotu e Kristi nẹi re Ju khian ghi ru, ugbẹnvbe iran ghi miẹn abakuru ọghe Pita? Te iran khian ghi kue ne abakuru ọghe Pita rhua iran owẹ vbe odẹ ọghe orhiọn ra? Te ukpamuyọmọ eso ni hiunsi ne Pita mwẹ khian ghi wii ẹre, rhunmwuda abakuru nọ ru ra?
(Galatia 2:14) Ugbẹnvbe I ghi miẹn wẹẹ iran ma lele uviẹn ẹmwata, zẹvbe nọ gha gu ẹmwata iyẹn nọ maan ro, I keghi tama e Pita vbe sirra iran hia wẹẹ, “E Ju ẹre uwẹ khin, sevba, ke ẹghẹ nii gha dee, uyinmwẹ ọmwa nẹi re Ju ẹre u ghaa yin, ẹi re ọghe Ju. Vbua ghi na hoo hẹ nian, ne u ye obọ yẹn ọmwa nẹi re Ju ẹho, ne ọ do gha ru emwi avbe Ju?”
w13 3/15 5 okhuẹn 12
Nọ Ne Emwa Ni Hoẹmwẹ E Jehova, “Emwi Nọ Gha Sẹtin Mu Iran Gbotọ I Rrọọ”
12 E Pita kegha mu ohan emwa nagbọn, ẹi re avbiẹ inugba ẹre ọ rhua owẹ vbe odẹ ọghe orhiọn; ọrheyerriọ, ọ ma sẹ e Jehova vbe Jesu rae. Vbe igiemwi, igba eha ẹre Pita wa siẹn Enọyaenmwa ighẹ Jesu vbe idagbo. (Luk 22:54-62) Vbe ẹghẹ ghi zẹ khian, e Pita keghi yin uyinmwẹ eso nọ ma khẹke Ovbiotu e Kristi; obọ nọ ya gha mu Ivbiotu e Kristi ni re Ivbi e Ju, ni vbe rhuẹ nẹ, keghi lughaẹn ne obọ nọ ya gha mu etẹn nẹi re Ivbi e Ju, ọ na yevbe na miẹn wẹẹ etẹn nẹi re Ivbi e Ju i re ọre. Ukọ e Pọl keghi bẹghe ẹre wẹẹ uyinmwẹ vberriọ ma deyọ, rhunmwuda, ọ ma khẹke ne ighaegbe gha rre uwu iko ọghe Ivbiotu e Kristi. Uyinmwẹ ne Pita yinrin ma zẹdẹ khẹke. Ne uyinmwẹ e Pita ghẹ do mu iko ọghe Ivbiotu e Kristi rhia, e Pọl keghi gu ẹre gui ghee mwẹ ghee ruẹ. (Gal 2:11-14) Te Pita ghi rhunmwuda itengbemu kha wẹẹ, irẹn khian dobọ ulẹ ọghe arrọọ yi ra? Hiehie. Ọ keghi rhie ude ọghe Pọl, ọ na ye gha rre odẹ ọghe arrọọ.
Gualọ Emwi Ewe Ọghe Orhiọn
(Galatia 2:20) Ẹre a ghi na miẹn nian wẹẹ, ẹi re imẹ ẹre ọ ghi rre agbọn ọvbehe, sokpan e Kristi ẹre ọ rre agbọn vbe uwu imẹ, vbene I ghi ya rre agbọn na nian, iyayi ẹre I ghi ya rrọọ vbe uwu Ovbi Osanobua, ọmwa ne ọ hoẹmwẹ mwẹ, ọ na rhie ẹdẹ agbọn rẹn mẹ.
w14 9/15 16 okhuẹn 20-21
Ye Gha Ga E Jehova Agharhemiẹn Wẹẹ U Werriẹ Aro Daa “Ukpokpo Nibun”
20 De emwi ne ima khian ru, vbe ima ghaa werriẹ aro daa ukpokpo nẹi rherhe vẹ na rẹn? Vbe igiemwi, vbe ima khian ru, deghẹ iro na han ima? Emwi ọkpa ne kpataki nọ gha ru iyobọ ne ima ọre ne ima gha ru erria yan izọese adẹwerriegbe ọghe Jesu. Erriọ ukọ e Pọl ru ẹre zẹẹ. Ọ ghaa mwẹ ẹghẹ ne iro ya han rẹn, ọ na gha gbe ọsumẹ segbe. Sokpan ukọ e Pọl rẹnrẹn wẹẹ, emwa orukhọ ẹre Jesu wu na, ẹi re emwa ni gbae. Ọkpa vbe usun emwa orukhọ ne Jesu wu na ẹre irẹn ghaa khin. E Pọl keghi kha wẹẹ: “Iyayi ẹre I ghi ya rrọọ vbe uwu Ovbi Osanobua, ọmwa ne ọ hoẹmwẹ mwẹ, ọ na rhie ẹdẹ agbọn rẹn mẹ.” (Gal 2:20) Te Pọl wa gele miẹn adẹwerriegbe ọghe Jesu yi. Ọ kegha ghee ẹre vbene a miẹn wẹẹ, irẹn ẹre Jesu wa wu na.
21 Adeghẹ u na vbe gha ghee izọese adẹwerriegbe zẹvbe ẹse ne Jehova ru ne uwẹ, ọ gha ru iyobọ nuẹ ẹsẹsẹmwẹse. Ọna ma rhiema wẹẹ, iro i khian zẹdia gha han ruẹ. Ẹmwata nọ rrọọ ọre wẹẹ, te eso vbuwe ima khian ye gha werriẹ aro daa emwi eso nọ ya iro han ọmwa, a te miẹn wẹẹ, agbọn ọgbọn rre. Sokpan yerre wẹẹ: Emwa ni ma gi ẹtin fo iran ẹre ive ne Osanobua yan rẹn khian sẹ ọre obọ. Vbene ẹdẹ ya gbe, erriọ ẹre ima ya sikẹ ẹghẹ ne Arriọba Osanobua khian ya rre, ẹghẹ nii, ọfunmwegbe ghi do gha rre agbọn na, emwa esi hia ghi vbe do khian emwa ni gbae. Gi ẹre gha re atamuolọyan ọghuẹ wẹẹ u gha la Arriọba nii, ọ gha khọnrẹn wẹẹ, ne u miẹn “ukpokpo nibun.”
(Galatia 3:1) Wa ne emwa Galatia ne akpa! Gha ọ rhuan uwa yi? Vbe odaro uwa zẹ, wa miẹn vbene a wa gie ẹre hẹ ighẹ uwu ne Jesu Kristi wu vbe [uhunmwu erhan, NW ].
it-1 880
Ebe Ne Pọl Gbẹn Gie Emwa E Galatia
Ẹi re Ivbi e Gaul ọkpa ni rre odẹ okuọ ọghe Galatia ẹre Pọl ghaa mwẹ vbe ekhọe vbe ẹghẹ ne ọ na kha wẹẹ, “Wa ne emwa Galatia ne akpa!” (Gal 3:1) Sokpan, te Pọl ghaa gu etẹn eso ni rre iko e Galatia gui, rhunmwuda ne iran na gha ya egbe taa uyinmwẹ ọghe Ivbi e Ju eso ni rre uwu ẹbu iran ni rhikhan mu Uhi e Mosis; Ivbi e Ju na kegha ghee egbe iran wẹẹ, emwa imudiase ẹre iran khin rhunmwuda wẹẹ, iran lele Uhi e Mosis, vbe ne iran na mianmian wẹẹ amuẹtinyan ne ọmwa mwẹ dae Jesu ẹre ọ yae khian ọmwa imudiase. (2:15–3:14; 4:9, 10) Ivbi e Ju kevbe emwa nẹi re Ivbi e Ju ni ghaa rre uwu iko “ni rre Galatia” (1:2) ẹre Pọl gbẹn ebe na gie; etẹn eso nẹi re Ivbi e Ju rrọọ ni rhuẹ re iran ke khian Ivbiotu e Kristi, eso vbe rrọọ ni ma rhuẹ, Ivbi e Celt eso vbe gha rre iko nii. (Iwinna 13:14, 43; 16:1; Gal 5:2) Ivbiotu e Kristi ni rre Galatia ẹre a ghaa tie iran hia, rhunmwuda e Galatia ẹre a tie ẹdogbo ne iran ghaa ye. Ma gha gbarokotọ ghee elẹta ne Pọl gbẹn na, ma gha bẹghe ẹre wẹẹ etẹn ne ọ ka gu obọ ẹre ni rre odẹ ahọ vbe Galatia, nọ rre ototọ arriọba ọghe Rom ẹre Pọl gbẹn ebe na gie, ẹi re emwa ni rre odẹ okuọ ne irẹn ma ka rẹn; ọ gha kẹ, e Pọl ma he ka sẹ evba ẹdẹ.
E Baibol Na Tie
(Galatia 2:11-21) Ugbẹnvbe Pita sẹ Antiọk, uwu ẹbu ẹre I na gha gu ẹre gui, rhunmwuda emwi ne ọ ru ma kei hiehie. 12 Ẹghẹ ne emwa ne Jems gie rre na ma he rre, e Pita kegha gu iran ne etẹn mwa nẹi re Ju rri evbare. Sokpan, ugbẹnvbe iran na ghi rre nẹ, ọ na ban rrie, ọ ma ghi gu iran rri evbare, rhunmwuda, ohan avbe iran ne ọ hoo ne a gha rhuẹ iran nẹi re Ju muẹn. 13 Iran ne Ju, ne etẹn mwẹ nekpa keghi vbe suẹn gha ru emwi avbiẹrẹ deba e Pita. Uhiẹn ighẹ te nene uyinmwẹ avbiẹrẹ iran vbe sẹ egbe Banabas. 14 Ugbẹnvbe I ghi miẹn wẹẹ iran ma lele uviẹn ẹmwata, zẹ vbe nọ gha gu ẹmwata iyẹn nọ maan ro, I keghi tama e Pita vbe sirra iran hia wẹẹ, “E Ju ẹre uwẹ khin, sevba, ke ẹghẹ nii gha dee, uyinmwẹ ọmwa nẹi re Ju ẹre u ghaa yin, ẹi re ọghe Ju. Vbe u a ghi na hoo hẹ nian ne u ye obọ yẹn ọmwa nẹi re Ju ẹho ne ọ do gha ru emwi avbe Ju?” 15 Vbe ẹmwata, ivbi eseserese vbe uwu e Ju ma khin ighẹ ẹi re emwa orukhọ nẹi re Ju. 16 Sevba ma rẹnrẹn wẹẹ, iyayi vbe uwu e Kristi ọkpa ẹre a sẹtin ya ya ọmwa khian ne ọ mudia ẹse vbe odaro Osanobua, ighẹ ẹi re na na ru zẹ vbene nene Uhi khare. Ma tobọ mwa, te ima ya e Kristi Jesu yi, ne a miẹn ehe na lekpa iyayi ne ima ya e Jesu yi, ya ima khian ne ọ mudia ẹse vbe odaro Osanobua, ighẹ ẹi re na na ru vbene nene Uhi khare. 17 Adeghẹ vbe uwu ne a na hia ne a lekpa a ya egbe ba e Kristi ya ima khian ni mudia ẹse vbe odaro Osanobua, a do miẹn wẹẹ, emwa orukhọ ma wa khin, zẹ vbene avbe iran nẹi re Ju vbe ye, te ọni ghi rhiema ra ighẹ te Kristi ye orukhọ obọ? Hiehie. 18 Deghẹ imẹ ghi vbe dọlegbe gha bọ emwi ne imẹ ka siẹn sẹ otọ nẹ, ọni rhiema wẹẹ, te imẹ rra nene Uhi. 19 Vbene ọ rhirhi gha ye hẹ, vbe ọghe emwi nọ dekaan nene Uhi, mẹ wu nẹ, nene Uhi tobọ re ẹre ọ vbe gbe mwẹ uan, ne I miẹn ehe na gha rre agbọn ne Osanobua. A gbe mwẹ uan bae Kristi nẹ vbe uhunmwu ugbugbe ẹre. 20 Ẹre a ghi na miẹn nian wẹẹ, ẹi re imẹ ẹre ọ ghi rre agbọn ọvbehe, sokpan e Kristi ẹre ọ rre agbọn vbe uwu imẹ vbene I ghi ya rre agbọn na nian, iyayi ẹre I ghi ya rrọọ vbe uwu Ovbi Osanobua, ọmwa ne ọ hoẹmwẹ mwẹ, ọ na rhie ẹdẹ agbọn rẹn mẹ. 21 I ma he ẹseọhẹ Osanobua. Adeghẹ ekpa nene Uhi ẹre a ya ye ọmwa khian ne ọ mudia ẹse vbe odaro Osanobua, ọni rhiema ighẹ uwu ne Kristi wu, kẹkan ẹre nọ.