Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
AUGUST 5-11
EMWI EWE NI RRE UWU ẸMWẸ ỌGHE OSANOBUA | 2 TIMOTI 1-4
“Orhiọn Ne Osanobua Rhie Ne Ima I Re Ọghe Avbiẹrẹ”
(2 Timoti 1:7) Rhunmwuda, orhiọn ne Osanobua rhie ne ima, ẹi re nọ ya ima vbiẹrẹ sokpan, te orhiọn rẹn ya ẹtin vuọn ima kevbe ahoẹmwọmwa kevbe izinegbe.
w09 5/15 15 ¶9
Avbe Igbama—Wa Gi Alaghodaro Ọghe Uwa Vẹ Ne Emwa Hia Rẹn
9 E Pọl keghi rhie igiọdu ne Timoti wẹẹ: “Orhiọn ne Osanobua rhie ne ima, ẹi re nọ ya ima vbiẹrẹ sokpan, te orhiọn rẹn ya ẹtin vuọn ima kevbe ahoẹmwọmwa kevbe izinegbe [ra ẹwaẹn na ya roro emwi ẹse, NW].” (2 Tim 1:7) Adeghẹ a na kha wẹẹ, ọmwa mwẹ ẹwaẹn na ya “roro emwi ẹse,” ọ rhiema wẹẹ ọmwa nii mwẹ iziro nọ gbae. Ọmwa vbenia keghi ya aro nọ khẹke ghee emwi vbe nẹi na rẹrẹ egbe ẹre. Igbama eso keghi rhiẹre ma wẹẹ emwa avbiẹrẹ ẹre iran khin. De odẹ nọ khin? Ne iran gha te ya gualọ odẹ ne iran khian ya sọfurre ye ọlọghọmwa ne iran werriẹ aro daa, iran ghi gha vbiẹ ovbe ọghe ọmwa ne ọ ma rẹn enegbe, iran ghi gha ghee TV gberra egbe, iran ghi gha loo ikpe ukhunmwu ni wegbe, iran ghi gha da ayọn gbe egbe, iran ghi gha yo iku vbe ẹghẹ hia, iran ghi vbe gha yin uyinmwẹ esakan. Sokpan, a keghi rhie igiọdu ne Ivbiotu e Kristi ne iran “zobọ vbe avbe uyinmwẹ nẹi re ọghe Osanobua, kevbe orriarria emwi agbọn na hia, ne a gha yin uyinmwẹ ai balọ egbe, [na] mudia ẹse, kevbe uyinmwẹ nọ khọ ọghe Osanobua vbe agbọn na.”—Taitọs 2:12.
(2 Timoti 1:8) Rhunmwuda ọni, ghẹ gie ekhue ẹmwẹ Nọyaẹnmwa ne a ta muẹn, erriọ, ghẹ vbe gie ekhue imẹ ne oleghan rẹn muẹn, sokpan vbe ghae vbuwe oya ne a re ba ẹmwẹ nene iyẹn nọ maan zẹvbe ne Osanobua rhie ẹtin nuẹn sẹ ya rri ọre.
w03 3/1 9 ¶7
‘Wegbe Ne U Vbe Din!’
7 Vbe elẹta ne ukọ e Pọl gbẹn gie Timoti, ọ keghi tama rẹn wẹẹ: “Rhunmwuda, orhiọn ne Osanobua rhie ne ima, ẹi re nọ ya ima vbiẹrẹ sokpan, te orhiọn rẹn ya ẹtin vuọn ima . . . Rhunmwuda ọni, ghẹ gie ekhue ẹmwẹ Nọyaẹnmwa ne a ta muẹn.” (2 Timoti 1:7, 8; Mak 8:38) Nọnaghiyerriọ, ọ khẹke ne ima nọ egbe ima wẹẹ: ‘Ekhue emwi ne I yayi mu mwẹ ra, ra I ye udinmwẹ yẹrike? Vbe I ghaa rre isiwinna ra owebe, I gi emwa rẹn wẹẹ Osẹe Jehova ẹre I khin ra, ra te I muẹn lẹre? Ọmwa ne ọ hoo ne ọ gua usun ro ẹre imẹ khin ra, ọ gha khọnrẹn wẹẹ ọ gha ya mwẹ mu imudiase ọghomwẹ fua ra?’ Adeghẹ ikporhu iyẹn nọ maan na gha lọghọ ima, ra ima i hoo ne ima gha re emwa ni lughaẹn vbuwe ẹbu, ọ khẹke ne ima yee ibude ne Jehova rhie ne Jọsua rre, vbe ọ tama rẹn wẹẹ: “Wegbe ne u vbe din.” Ọ khẹke ne ima gha yerre vbe ẹghẹ hia wẹẹ, ẹi re aro ne emwa vbe isiwinna ra emwa vbe owebe ya ghee ima, ẹre ọ ru ekpataki sokpan aro ne Jehova kevbe Jesu Kristi ya ghee ima ẹre ọ ru ekpataki.—Galatia 1:10.
Gualọ Emwi Ewe Ọghe Orhiọn
(2 Timoti 2:3, 4) Ghae vbuwe oya, zẹvbe ovbiyokuo ne ọ guobọ e Kristi. 4 Ovbiyokuo ne ọ ye yo igbinna, te ọ gha hoo ne ọ ru emwi nọ gha yẹẹ arowa ne ọ gbaroghe iran, rhunmwuda ọni, ẹi khian gha gbe egbe avbe emwi ne emwa kẹkan ni rre ẹvbo ru.
Gha Khu Ẹfe Ne Ẹfe Khian
13 E Timoti kegha re ọmwa vberriọ. E Pọl keghi tie ẹre “ovbiyokuo ne ọ gu obọ e Kristi.” Vbe iyeke ọni, ọ na tama rẹn wẹẹ: “Ovbiyokuo ne ọ ye yo igbinna, te ọ gha hoo ne ọ ru emwi nọ gha yẹẹ arowa ne ọ gbaroghe iran, rhunmwuda ọni, ẹi khian gha gbe egbe avbe emwi ne emwa kẹkan ni rre ẹvbo ru.” (2 Tim 2:3, 4) Avbe Osẹe Jehova vbe ẹdẹnẹrẹ kevbe etẹn ni gberra ẹbo ọkpa ni rre ugamwẹ ọghe ẹghẹ hia keghi hia vbe odẹ ke odẹ ne iran ya ibude ọghe Pọl ru emwi. Iran keghi gban egbe ne emwi oyọnyọn ni rhie aro re vbe agbọn Esu rhunmwuda iran rẹn ilele nọ rre ẹmwẹ na: “Ọviẹn ọmwa ne u mọmọ ẹre igho ọre u khin.” (Itan 22:7) E Setan keghi hoo ne ima gha ya ẹtin kevbe ẹghẹ ọghomwa hia gha khu igho khian. Emwa eso keghi mọmọ igho ọrhẹnrhẹn rhunmwuda iran khian bọ owa, iran khian dẹ imọto, iran khian hae igho e skul ra iran khian ru orọnmwẹ. Deghẹ ima ma begbe, emwi vbenia sẹtin ya ima gha rre uwu osa vbe ọwara ukpo nibun. Ma gha ye arrọọ ọghe ima khian ne khuẹrhẹ, ma na si obọ zẹ vbe odẹ ne ima ya loo igho kevbe deghẹ ima na da obọ igho na mọmọ yi, te ima loo ẹwaẹn vbe odẹ nọ khẹke. Ọna ẹre ọ ghi kie ẹkpotọ yọ ne ima ya gha ga e Jehova ne ima gha te ya gha khu igho khian.—1 Tim 6:10.
(2 Timoti 2:23) Sokpan, gha lẹẹ ne igbagbanmwẹ akpa vbe abobo, u rẹnrẹn ighẹ ẹzọ ẹre a ya muẹn yotọ.
w14 7/15 14 ¶10
Eguọmwadia E Jehova Keghi “Zobọ Vbe Emwi Dan”
10 Vbe ẹdẹnẹrẹ, ai mobọ miẹn emwa okeke vbuwe iko ọghe Jehova. Ọrheyerriọ, ọ khẹke ne ima gha gban egbe ne imamwaemwi ke imamwaemwi ni ma gua evbagbẹn nọhuanrẹn ro. Ọ ma khẹke ne ima gha gu emwa okeke gbe agbanmwẹ vbe ima gha dekun iran, ra ne ima gha guan ye iran ẹmwẹ vbe intanẹt. Evbagbẹn Nọhuanrẹn gi ima rẹn wẹẹ, ọ ma zẹdẹ khẹke ne ima gha gu egbe emwa vberriọ guan, ọ gha khọnrẹn wẹẹ, te ima te hoo ne ima ru iyobọ ne iran. Zẹvbe eguọmwadia e Jehova ne ima khin, te ima gha hia vbe odẹ ke odẹ ne ima gban egbe ne emwa okeke.
E Baibol Na Tie
(2 Timoti 1:1-18) E Pọl ne ukọ e Kristi Jesu vbekpa iho ọghe Osanobua, ọmwa ne a gie ne ọ ya kporhu arrọọ ne a ve ima re, ne ima mwẹ vbuwe a ya egbe bae Kristi Jesu. 2 Gie Timoti, ovbi mwẹ ne ọ ghaan: Osanobua ne Erha kevbe Kristi Jesu ne ọ rhie ẹse ọhẹ nuẹn kevbe itohan kevbe ọfunmwegbe. 3 I kpọnmwẹ Osanobua, ọmwa ne I ya ekhọe sẹẹnrẹn ga, zẹvbe ne avbe erha mwa odede vbe ru. I ghi gha kpọnmwẹ ọnrẹn vbe ẹghẹ hia ne I ya ye ruẹ rre vbe erhunmwu mwẹ, asọn kevbe avan. 4 I ye ameve ruẹ rre, I wa hoo ne I miẹn ọnrẹn ẹsẹse, ne a miẹn ehe na ya oghọghọ sẹ mwẹ ọkẹn. 5 I yee iyayi ẹmwata ne u mwẹ rre, egbe ne edede ruẹ ghaa mwẹ ighẹ Luis, kevbe Yunis ne iyuẹ vbe gha mwẹ, mẹ yayi ighẹ wẹ vbe mwẹ ọnrẹn. 6 Rhunmwuda ọnọna, ẹre I na yee ruẹ rre ne u ya obọ dae yi gbain ighẹ ọhẹ ne Osanobua ya wuẹ vbe ẹghẹ ne I na viọ obọ yan ruẹn uhunmwu. 7 Rhunmwuda, orhiọn ne Osanobua rhie ne ima, ẹi re ne ọ ya ima vbiẹrẹ sokpan, te orhiọn rẹn ya ẹtin vuọn ima kevbe ahoẹmwọmwa kevbe izinegbe. 8 Rhunmwuda ọni, ghẹ gie ekhue ẹmwẹ Nọyaẹnmwa ne a ta muẹn, erriọ, ghẹ vbe gie ekhue imẹ ne oleghan rẹn muẹn, sokpan vbe ghae vbuwe oya ne a re ba ẹmwẹ nene iyẹn nọ maan zẹvbe ne Osanobua rhie ẹtin nuẹn sẹ ya rri ọre. 9 Ọ miẹn ima fan, ọ kevbe tie mwa ne a do gha re emwa irẹn, ẹi re rhunmwuda emwi ne ima ru, sokpan vbe ọghe ekhọe obọ ẹre kevbe ẹse ọhẹ. Ọ rhie ẹse ọhẹ na ne ima nẹ, vbuwe Kristi Jesu, ẹghẹ te do suẹn. 10 Sokpan banbanna nian, te a ghi do rhiẹre ma ima, vbuwe urremwẹ e Kristi Jesu, ne Ọmiọnmwafan mwa. Rhunmwuda, e Kristi khuọn ẹtin uwu rua nẹ, ọ keghi vbe lekpa nene iyẹn nọ maan rhie agbọn ai wu ẹdẹ ma emwa. 11 Osanobua zẹ mwẹ, ne I gha kporhu nene iyẹn nọ maan, zẹvbe ukọ kevbe ọmaemwaemwi. 12 Ọni ẹre ọ zẹ ne I na rri oya emwi na hia. Sokpan ekhọe mwẹ ma he beghe hiehie, rhunmwuda, mẹ rẹn ọmwa ne I mu ẹtin yan, aro mwẹ dae wẹẹ, ọ gha sẹtin rhiẹre mwẹ vbe ne ai na mwẹ ẹbe ighẹ emwi ne ọ ka yọ mwẹ obọ, rhinrin ya sẹ ẹdẹ ne ẹdẹrriọ. 13 Wẹ gha rhie owẹ lele ẹmwẹ ẹmwata ne I ma ruẹ re, zẹvbe igiemwi ne u gha lele, u ghi mudia ye uwu iyayi kevbe ahoẹmwọmwa nọ re ọghomwa vbuwe a ya egbe bae Kristi Jesu. 14 Viọ iran mwẹ ighẹ avbe emwi esi ne a ka yuẹ obọ, vbekpa ẹtin ọghe orhiọn nọhuanrẹn nọ rre uwu ima. 15 Deghẹ u rẹnrẹn ighẹ emwa hia ni rre ikinkin Esia lẹẹ sẹ mwẹ rae nẹ, uwu iran ẹre ọ ye ighẹ Figelus kevbe Hẹmogẹnẹs. 16 Enọyaẹnmwa ne ọ tohan igiowa Onisiforọs, rhunmwuda, ẹghẹ hia ẹre ọ do ya gha mu mwẹ aro ze. Ekhue eghan ni ye ma muẹn. 17 Ọwarọkpa vbe ọ wa sẹ e Rom, ọ kegha gualọ mwẹ khian rhinrin ọ te do miẹn mwẹ. 18 Enọyaẹnmwa ne ọ gi ẹre miẹn itohan Enọyaẹnmwa rhie vbe ẹdẹ ne ẹdẹrriọ. U vbe rẹn ẹsẹse vbene ọ yọ mwe obọ hẹ vbe Ẹfisọs.
AUGUST 12-18
EMWI EWE NI RRE UWU ẸMWẸ ỌGHE OSANOBUA | TAITỌS 1–FAILIMỌN
“Gha Zẹ Ediọn Ye Dọmwadẹ Iko”
(Taitọs 1:5-9) Te I sẹ ruẹ rae vbe Kret ne u miẹn ehe na dọlọ avbe emwi ne a ma he ru fo vbe evba nii yi, kevbe ne u vbe gha zẹ ediọn esọsi ye dọmwadẹ esọsi. U ghi yerre vbene I tae hẹ: 6 ọ kere ne ọmwa ne ọre ọdiọn gha re ne ẹi mwẹ abakuru, okhuo ọkpa ẹre ọ kere ne ọ gha mwẹ, ivbi ẹre ghi vbe gha re emwa ni yayi, ẹi re ne a ta ẹmwẹ ọnrẹn khian wẹẹ iran wa kan ye ẹvbo ra nẹi họn ẹmwẹ. 7 Rhunmwuda, ugbẹnvbe a miẹn wẹẹ, irẹn ọrọre ne ọ gbaroghe iwinna Osanobua, ọ kere ne ọkaolotu esọsi gha re nẹi mwẹ abakuru. Ọ ma kei ne ọ gha re ọmwa ne ọ tọn egbe mu, ra ne egbe balọ, ra ne ọ da ayọn gbe egbe, ra ọmwa ne ọ khọọ ra ne ọ zuan. 8 Ọ kere ne ọ gha re ọmwa ne obọ ẹse tọlọ, kevbe ne emwi nọ maan yẹẹ, ọ ghi gha re ọmwa ne ọ rẹn enegbe, ne ọ mudia ẹse, ne ọ huanrẹn, kevbe ne a maa ẹre emwi. 9 Ọ ghi gha re ne ọ ya obọ da ẹmwẹ nii yi gbangbangban, ẹmwẹ nii ne ọ gia mu ẹtin yan kevbe ne ọ gu iruẹmwi nii ro. Odẹ vberriọ ẹre ọ gha na sẹtin ya iruẹmwi ẹmwata nii rhie igiọdu ne emwa ọvbehe, ọ ghi vbe sẹtin rhie ehe ne iran ni gbe odan yọ, na ba odẹ ku ma agbọn.
w14 11/15 28-29
Inọta Ne Emwa Nọ
Agharhemiẹn wẹẹ Evbagbẹn Nọhuanrẹn ma wa gbe ẹre ẹho rua ma ima vbene a ya gha zẹ etẹn nikpia zẹvbe ediọn kevbe eguọmwadia iwinna vbe orre nokaro, emwi eso ne Baibol tae ya ima rẹn vbene a ya gha ru ẹre hẹ. E Baibol tama ima wẹẹ, vbe Pọl vbe Banabas ghi rrie owa, iyeke vbe iran ghi kporhu fo nẹ vbe dọmwadẹ ẹvbo ne iran ka gha mu okhian la, “iran keghi zẹ ediọn ye dọmwadẹ iko. Iran keghi ye aguẹ kevbe erhunmwu mu iran ye obọ e Jehova nọ re ọmwa ne iran mu ẹtin yan.” (Iwinna 14:23, NW ) Vbe ukpo eso ghi gberra nẹ, e Pọl keghi tama e Taitọs ne irẹn vbe ọre gba gha mu okhian lele dọmwadẹ ẹvbo wẹẹ: ‘Te I sẹ ruẹ rae vbe Kret ne u miẹn ehe na dọlọ avbe emwi ne a ma he ru fo vbe evba nii yi, kevbe ne u vbe gha zẹ ediọn ye dọmwadẹ iko. U ghi yerre vbene I tae hẹ.’ (Taitọs 1:5) Ọ khọ wẹẹ, e Timoti nọ vbe deba ukọ e Pọl gha mu okhian lele dọmwadẹ ẹvbo vbe gha zẹ ediọn ye dọmwadẹ iko. (1 Tim 5:22) Ena hia ya ima rẹn wẹẹ, ẹi re avbe ukọ ra ediọn ni ghaa rre Jerusalẹm ẹre ọ ghaa zẹ ediọn ye dọmwadẹ iko, sokpan etẹn ni ghaa mu okhian lele dọmwadẹ iko ẹre ọ ghaa ru ẹre.
Igiemwi na, ẹre ọ ya Ẹbu Nọ Su Ọghe Avbe Osẹe Jehova ru afiwerriẹ ye odẹ na ya zẹ ediọn kevbe eguọmwadia iwinna ye uwu iko. Ke September 1, 2014 kpa, odẹ na ghi ya zẹ ediọn kevbe eguọmwadia iwinna ye uwu iko ọre: Ọgbaroghe ọghe otako ghi mu ukpa mu uwerhẹn ghee emwi ne ediọn ni rre otako ne ọ gbaroghe tae, vbekpa etẹn nikpia ne iran hoo ne irẹn zẹ zẹvbe ediọn ra eguọmwadia iwinna. Ọ gha ghi mu otuẹ yo edọmwadẹ iko, ọ ghi hia ne ọ rẹn etẹn nikpia na sayọ, ọ sẹtin vbe gu iran winna vbe ikporhu deghẹ ẹkpotọ na gha rrọọ. Vbe ọgbaroghe ọghe otako gha ghi gu ediọn ni rre uwu iko ziro vbekpa emwi ne iran tae vbe nọ dekaan etẹn nikpia ne iran hoo nọ gha ga zẹvbe ediọn ra eguọmwadia iwinna, ọgbaroghe ọghe otako ẹre ọ ghi bi yọ re izabọ nọ zẹ etẹn nikpia na, deghẹ iran na gbegba. Odẹ vbenia ẹre ima ya lele igiemwi ne Ivbiotu e Kristi ni ghaa rrọọ vbe orre nokaro rhie yotọ.
De emwa ni mwẹ obọ vbe emwamwa na? Ma rẹnrẹn wẹẹ, ‘ọviẹn nọ gia mu ẹtin yan kevbe nọ fuẹro’ ẹre ọ ya evbare orhiọn koko igiowa ọghe Osanobua. (Mat 24:45-47) Odẹ ne iran ya ru ọna ọre ne iran na ru ezanzan yan Evbagbẹn Nọhuanrẹn, iran ghi vbe na erhunmwu ne Osanobua rhie orhiọn nọhuanrẹn ne iran ya rẹn ototọ evbagbẹn nọhuanrẹn sayọ, ẹghẹ nii, iran ghi sẹtin rhie adia nọ ke uwu evbagbẹn nọhuanrẹn ladian ne iko; adia na ẹre ọ si ẹre ne a na sẹtin ru emwi hia hẹnnẹhẹnnẹ vbe otu ọghe Jehova. Ọviẹn nọ gia mu ẹtin yan, ẹre ọ vbe zẹ etẹn ni ga zẹvbe ọgbaroghe ọghe otako kevbe etẹn ni khian gha rre Agbaziro Ọghe Abotu. Abotu ẹre ọ ghi ru iyobọ ne etẹn ya gha lele adia nọ ke obọ Ẹbu Nọ Su rre. Ediọn ni rre dọmwadẹ iko ghi kakabọ ghee ẹre deghẹ etẹn nikpia ne iran hoo nọ gha re ediọn ra eguọmwadia iwinna gele gbegba zẹvbe ne Evbagbẹn Nọhuanrẹn ya rhan otọre. A te miẹn wẹẹ ọgbaroghe ọghe otako kpasẹ yọ ne ọtẹn do gha ga zẹvbe ọdiọn ra ọguọmwadia iwinna vbuwe iko, ọ khẹke ne ọ ka mu ukpa mu uwerhẹn ghee emwi ne ediọn tae vbekpa ọtẹn nii, ọ ghi vbe na erhunmwu vbekpa ẹre.
Gualọ Emwi Ewe Ọghe Orhiọn
(Taitọs 1:12, NW) Ọkpa vbuwe akhasẹ ọghe iran keghi kha wẹẹ: “Emwa Kret keghi re emwa ni ta ohoghe vbe ẹghẹ hia, aranmwẹ dan ni khọọ kevbe emwa oregbe ne obẹrue ẹre iran khin.”
w89 5/15 31 ¶5
Inọta Ne Emwa Nọ
Ẹi re te Pọl deba emwa ni ghaa ya aro gbe Ivbi e Kret re. Emwi nọ suigiẹ ye ọna ọre wẹẹ, e Pọl rẹnrẹn wẹẹ Ivbiotu e Kristi ni mudia ẹse, ne Osanobua vbe ya orhiọn nọhuanrẹn hannọ zẹ ghaa rre Kret. (Iwinna 2:5, 11, 33) Ivbiotu e Kristi wa gha bun vbe Kret, iran bun sẹrriọ wẹẹ iko nibun ghaa rre evba. Ẹmwata nọ wẹẹ, etẹn ni ma gba ẹre Ivbiotu e Kristi ni rre Kret ghaa khin, sokpan iran ma gha re emwa ni ta ohoghe ra emwa oregbe ne obẹrue; akpawẹ emwa vberriọ ẹre iran ghaa khin, Osanobua i ghẹ te miẹn iran yi. (Filipai 3:18, 19; Arhie Maan 21:8) Zẹvbe nọ vbe ye vbe dọmwadẹ ẹvbo vbe ẹdẹnẹrẹ, ẹi mwẹ emwa ni mwẹ ẹkoata, ni ma gha ghọghọ ye uyinmwẹ esakan ma gha rre Kret.—Ẹzikiẹl 9:4; yae taa Iwinna 13:48.
(Failimọn 15, 16) Ọ gha kẹ, te Onisimọs kpa sẹ ruẹ rae vbe ẹghẹ kherhe, ne ọ miẹn ehe na bu ruẹ rre do gha re ọghuẹ rhinrin ẹdẹ. 16 Rhunmwuda, vbe wanwanna nian, ẹi ghi re ọviẹn kẹkan, ọ sẹ ọni nẹ, ọtẹn ne ọ ghaan vbuwe Kristi ghi nọ. U miẹn ehe ne ọ ghi ye mẹ nian! Inuinu ẹre ehe ne ọ ye ne uwẹ gha ya sẹ, zẹvbe ọviẹn kevbe zẹvbe ọtẹn vbuwe Nọyaẹnmwa!
w08 10/15 31 ¶4
Avbe Olika Ẹmwẹ Ni Rre Ebe Ne Pọl Gbẹn Gie Taitọs, Failimọn Kevbe Ivbi e Hibru
15, 16—Vbọzẹe ne Pọl ma na tama e Failimọn wẹẹ ne ọ fan Onisimọs? Te Pọl ghaa hoo ne ọ mu aro ye iwinna na waa re, ọni ọre ‘iwinna ikporhu iyẹn nọ maan ọghe arriọba Osanobua kevbe ne ọ gha maa emwa emwi vbekpae Nọyaẹnmwa Jesu Kristi.’ Rhunmwuda ọni, ọ ma gha hoo nọ fi ukpẹ ye ẹmwẹ nọ ma kaan rẹn, vbe na ghee ẹmwẹ nọ rre uwu ẹkpo ọviẹn kevbe arowa ẹre.—Iwinna 28:31.
E Baibol Na Tie
(Taitọs 3:1-15) Ye avbe emwa ruẹn ẹre rre, ne iran gha gbe uhunmwu ke otọ ne iran ni rre asẹ kevbe ọdakha, ne iran gha họn ẹmwẹ ne iran, ne iran mu egbe ne iran gha ya gha ru emwi nọ maan vbe ẹghẹ hia. 2 Tama iran ne iran ghẹ ta ọmwaikọmwa ọtakhọ, sokpan ne iran gha re ne ọ hoẹmwẹ ọfunmwegbe, kevbe ne ọ gu emwa hia ru ọse, kevbe ne iran gha gu emwa hia yin uyinmwẹ ọmẹhẹ. 3 Rhunmwuda ẹghẹ ọkpa rrọọ ne ima tobọ ima na te vbe kọn, ai họn ẹmwẹ, a keghi vbe ba emwi ku ru. Orriarria kevbe emwi ni rhiẹnrhiẹn ughughan keghi mu ima oghunmwu. A ke gha loo ẹdẹ mwa hia vbuwe ikhẹko, kevbe oya ọmwa da ọmwa, emwa eso kegha khuiwu mwa, ma keghi vbe gha khẹko iran. 4 Sokpan ugbẹnvbe itohan kevbe ahoẹmwọmwa Osanobua kevbe Ọmiọnmwafan mwa ghi rhiegbe ma nẹ. 5 Ọ keghi mien ima fan. Ẹi re rhunmwuda iwinna esi ne ima tobọ mwa winna, sokpan, rhunmwuda itohan rẹn ẹre ọ na miẹn ima fan, vbekpa akhuẹ ne orhiọn nọhuanren ya dọlọ mwa biẹ, ọ na vbe rhie arrọọ ọghe ọgbọn ne ima. 6 Te Osanobua wa mobọ tue orhiọn nọhuanrẹn yan ima ẹsẹse, lekpae Jesu Kristi Ọmiọnmwafan mwa. 7 Ne a sẹtin lekpa ẹse ọhẹ ọghẹe dọlọ ima kugbe ba Osanobua, ne ẹfe etẹbitẹ ne ima danmwehọ ẹre miẹn ehe na sẹ ima obọ. 8 Ẹmwata ẹre ẹmwẹ na khin. I hoo ne u kakabọ tua unu mu ẹmwẹ na, ne iran ni ya Osanobua yi miẹn ehe na mu aro ye ẹmwẹ iwinna esi ne a winna. Ẹna ọrọre emwi nọ maan kevbe nọ ke ne emwa. 9 Sokpan wẹ ghi gha lẹẹ ne imuan ẹmwẹ oya, eni ne lọghọ ọghe erha odede ne ọ biẹ erha odede, ẹzọ, okhọn ne a khọn ba ẹmwẹ nene Uhi. Emwi oya ne ẹi mwẹ esa ẹre ehia khin. 10 Ọmwa ne ọ si iwannegbe rre, u ghi tie ẹre gu ẹre guan igba eva, vbe iyeke ọni, u ghi wa zobọ vbe egbe ẹre fẹẹrẹ. 11 Rhunmwuda, u rẹnrẹn ighẹ te ọmwa vberriọ sankan an, orukhọ ẹre ọ vbe rhiema ighẹ te ọ ba odẹ ku. 12 I gha gie Atẹmas ra Taikikọs bu ruẹ gha dee, u ghi hia ne u bu mwẹ gha die Nikopolis, rhunmwuda, evba ẹre I wẹẹ I ra na gbe ẹghẹ okhuakhua. 13 Hia ne u ru iyobọ ne Zenas ne ulaya, kẹ kevbe Apọlọs, ne iran ya suẹn okhian iran, u ghi miẹn wẹẹ, a viọ emwi ne iran gha loo hia ne iran. 14 Ma emwa ima ẹre ne iran gha loo ẹghẹ iran ya winna iwinna esi, ne iran gha khuan ye emwi nọ kere ne a gha mwẹ. Wẹẹ ne iran ghẹ gha rre agbọn ọrhiae. 15 Iran hia ni rre ehe ne I ye, wẹẹ ruẹ do. Wẹẹ avbe ọse ima vbuwe iyayi hia do. Te ẹse ọhẹ Osanobua gha gu uwa hia gha rrọọ.
AUGUST 19-25
EMWI EWE NI RRE UWU ẸMWẸ ỌGHE OSANOBUA | HIBRU 1-3
“Gi Emwi Esi Na Ru Gha Yẹẹ Ruẹ, U Ghi Gi Emwi Dan Na Ru Gha Sọnnọ Ruẹ”
(Hibru 1:8, NW) Sokpan ọ ghi ra guan vbekpa Ọmọ, ọ wẹẹ, “Osanobua ọre ẹkete ruẹ vbe ẹdẹdẹmwẹdẹ. Ẹmwata na ta, ẹre u ra ya rriọba yan emwa ruẹn.
w14 2/15 5 ¶8
Rhie Uyi Ne Kristi Ne Ọba!
8 Ukpo 1914 ẹre Jehova ma Ovbi ẹre Ọba vbe ẹrinmwi. E Baibol tama ima wẹẹ, ẹmwata na ta ẹre Jesu khian ya khaevbisẹ, ọna rhiema wẹẹ, Ọba ne ọ bu ohiẹn ata, nẹi ya aro gbe ọmwa rhọkpa re, ẹre Jesu khian gha khin. E Baibol vbe gi ima rẹn wẹẹ ‘Osanobua ọre ẹkete ọghẹe.’ Ọna rhiema wẹẹ obọ e Jehova ẹre ọdakha ọghẹe ke rre. Yevbe sẹ ọni, te ẹkete ọghe Jesu khian gha rrọọ vbe “ẹdẹdẹmwẹdẹ.” Ọ keghi re ukpamuyọmọ nọkhua ne ima na ga e Jehova kevbe ne ima na rẹn wẹẹ e Jehova tobọre ẹre ọ hannọ Ọba ọghe ima zẹ!
(Hibru 1:9) U hoẹmwẹ emwi ne a ru ẹse, u sọnnọ emwi ne a ma ru ẹse. Ọni ẹre ọ si ẹre ne Osa, Osanobua ruẹ na hannọ ruẹ zẹ, ọ na rhie oghọghọ uyi nọ sẹ ne ọ rhie ne ihua ẹsẹse nuẹn.”
w14 2/15 4-5 ¶7
Rhie Uyi Ne Kristi Ne Ọba!
7 Tie Psalm 45:6, 7. Emwi esi na ru keghi yẹẹ Jesu, sokpan emwi ke emwi nọ gha sa ọrho ye eni Erhae keghi sọnnọ rẹn, rhunmwuda ọni e Jehova keghi zẹ ọre ne ọ gha re Ọba ọghe Arriọba e Mẹzaia. Uyi ne Jehova mu ye Jesu egbe sẹ uyi ne ọ mu ye iran egbe ighẹ ọba nikẹre ni ke uniẹn e Devid rre. De odẹ ne Jehova ya ru ọna? Odẹ ọkpa ne Jehova ya ru ọna ọre wẹẹ, irẹn tobọre ẹre ọ hannọ Jesu zẹ. Ẹi vbe re ọni ọkpa, e Jehova keghi hannọ rẹn ne ọ gha re Ọba kevbe Ogie Ohẹn. (Psm 2:2; Hib 5:5, 6) Deba ọni, ei re ofigbọn ẹre Jehova ya hannọ Jesu, sokpan orhiọn nọhuanrẹn ẹre ọ loo ro, uhiẹn, ẹkete ọghe Jesu i rre uhunmwu otagbọn na, sokpan ẹrinmwi ẹre ọ ye.
Gualọ Emwi Ewe Ọghe Orhiọn
(Hibru 1:3) Awanwan ọghe uyi Osanobua ẹre irẹn ya fi wainwain, irẹn ọrọre ama ọghe vbene Osanobua wa ye zẹẹ, ọ keghi vbe ya ẹmwẹ unu ọghẹe ne ọ mwẹ ẹtin mu agbọn vbe ẹrinmwi mwẹ. Ọ ghi kpe emwa nagbọn huan hin orukhọ iran rre nẹ, ọ keghi ya tota vbe ẹrinmwi vbe obọ erha ọmwa Osanobua ne ẹtin nọ sẹ ehia.
it-1 1185 ¶1
Ukhọmwẹ
Odẹ ne Jesu ya rhie akpa ọghe erhae ma vbe ọ rre agbọn na, ẹre ọ ya rhiẹre ma vbe ẹrinmwi ra?
Ọmọdiọn ọghe Osanobua na ghi do rẹn ye Jesu vbe ọkiekie keghi khọ Erhae. (2 Kọr 4:4) Ọmọ na ẹre Osanobua ghaa gu guan vbe ọ khare wẹẹ, “Banbanna nian, ma gha do ma emwa nagbọn, iran gha yevbe ima, iran ghi khọ [ima],” ọna ya ima rẹn wẹẹ, te Ọmọ na wa khọ Osanobua ke otọ gha dee. (Gẹn 1:26; Jọn 1:1-3; Kọl 1:15, 16) Vbe ẹghẹ ne Jesu na gha rre uhunmwu otagbọn na, te ọ wa gha rhie akpa ọghe Erhae ma vbene ẹtin ẹnrẹn sẹ zẹvbe ọmwa nagbọn ne irẹn ghaa khin, ọni ẹre ọ si ẹre ne ọ na sẹtin kha wẹẹ, “Ọmwaikọmwa ne ọ miẹn mwẹ nẹ, ọ vbe miẹn Evbavba nẹ.” (Jọn 14:9; 5:17, 19, 30, 36; 8:28, 38, 42) Sokpan vbe Jesu ghi sẹ ẹrinmwi, vbe Jehova ghi “rhie ẹtin hia ni rre ẹrinmwi kevbe agbọn” nẹẹn nẹ, ọ keghi do khọ Erhae sayọ. (1 Pit 3:18; Mat 28:18) Ne Osanobua na “rhie [Jesu] ye ehe nọ yo sẹ,” Jesu na ghi do khọ Erhae vbe odẹ nọ sẹ vbene ọ ka ya khọ ẹre, ọ ke gha die uhunmwu otagbọn na. (Fil 2:9; Hib 2:9) Sokpan vbe ẹghẹ na nia, Jesu “ọrọre ama ọghe vbene Osanobua wa ye zẹẹ.”—Hib 1:2-4.
(Hibru 1:10-12, NW) Ọ keghi rhie tẹ wẹẹ, “Uwẹ ne Nọyaẹnmwa yi agbọn na vbe omuhẹn, obọ ruẹ ẹre u ya yi ẹrinmwi, 11 A gha ho ehia bẹkun, sokpan uwẹ a gha rrọọ. Ehia gha vbe khian ọmaẹn zẹvbe ukpọn. 12 Uwẹ gha vbuẹ iran zẹvbe ẹwu. A ghi vbe fi iran werriẹ zẹvbe ukpọn. Sokpan vbene u ye, erriọ ẹre u ye, uwẹ i khian ọmaẹn.”
it-1 1063 ¶7
Ẹrinmwi
Osanobua ne Jehova ẹre ebe Psalm 102:25, 26 guan kaẹn, sokpan ukọ e Pọl keghi loo ẹmwẹ nọ rre ako na, vbe ọ ghi guan kaẹn Jesu. Emwi nọ si ẹre ne ọ na ru vberriọ ọre wẹẹ, Jesu ẹre Osanobua loo ro ya yi emwi hia ni rre agbọn kevbe ẹrinmwi. E Pọl keghi kha wẹẹ, e Jehova sẹtin vbuẹ evbayi zẹvbe ẹwu, ọ sẹtin vbe fi iran werriẹ zẹvbe ukpọn deghẹ ọ na gha hoo nọ ru vberriọ, sokpan te Jesu khian gha rrọọ vbe ẹdẹdẹmwẹdẹ.—Hib 1:1, 2, 8, 10-12; yae taa 1 Pit 2:3.
E Baibol Na Tie
(Hibru 1:1-14) Vbe ẹghẹ nọ gberra, odẹ ughughan kevbe ẹghẹ nibun ẹre Osanobua ya gha gu avbe erha mwa odede guan, vbene ọ na gie avbe akhasẹ gie iran. 2 Sokpan, vbe ẹdẹ okiekie na nian, Ovbi ẹre ẹre ọ ghi gie do gu mwa guan. Irẹn nii ọrọre ọmwa ne Osanobua la obọ ẹre yi agbọn vbe ẹrinmwi, ọmwa ne Osanobua zẹ wẹẹ, ọ gha do yan emwi hia vbe ufomwẹ a rre nẹ. 3 Awanwan ọghe uyi Osanobua ẹre irẹn ya fi wainwain, irẹn ọrọre ama ọghe vbene Osanobua wa ye zẹẹ, ọ keghi vbe ya ẹmwẹ unu ọghẹe nọ mwẹ ẹtin mu agbọn vbe ẹrinmwi mwẹ. Ọ ghi kpe emwa ne agbọn huan hin orukhọ iran rre nẹ, ọ keghi ya tota vbe ẹrinmwi vbe obọ erha ọmwa Osanobua ne ẹtin nọ sẹ ehia. 4 A keghi ye Ọmọ kpọlọ sẹ avbe odibo Osa, zẹvbe ne eni ne Osanobua mu nẹẹn vbe kpọlọ sẹ ọghe iran. 5 Rhunmwuda, ọkpa i rrọọ vbuwe avbe odibosa ẹre ne Osanobua tama wẹẹ, “Wẹ ọrọre Ovbi mwẹ, ẹdẹnẹrẹ na, I khian Erhaa.” Ra ne ọ vbe kha vbekpa odibosa rhọkpa, “I gha khian Erhae, irẹn ghi vbe gha re Ovbi mwẹ.” 6 Osanobua ghi ra gie Ọmọdiọn rẹn gha die agbọn, ọ keghi kha wẹẹ, “Te avbe odibo Osa hia gha ya uhunmwu rhanmwẹ otọ nẹẹn.” 7 Emwi ne Osanobua tae vbekpa avbe odibo Osa ẹre ọna khin wẹẹ, “Osanobua yi avbe odibo Osa ẹre ẹhoho. Ọ keghi vbe ru avbe eguọmwadia ẹre aranmwẹ erhẹn.” 8 Sokpan ọ ghi ra guan vbekpa Ọmọ, ọ wẹẹ, “Osanobua, ẹkete ruẹ a gha rrọọ ẹdẹdẹmwẹdẹ. Ẹmwata ne a ta, ẹre u ra ya rriọba yan emwa ruẹn 9 U hoẹmwẹ emwi ne a ru ẹse, u sọnnọ emwi ne a ma ru ẹse. Ọni ẹre ọ si ẹre ne Osa, Osanobua ruẹ na hannọ ruẹ zẹ, ọ na rhie oghọghọ uyi nọ sẹ ne ọ rhie ne ihua ẹsẹse nuẹn.” 10 Ọ kevbe rhie tẹ ba ẹre wẹẹ, “Wẹ Nọyaẹnmwa yi agbọn vbe omuhẹn, obọ ruẹ ẹre u ya yi ẹrinmwi, 11 A gha ho ehia bẹkun, sokpan wẹ a gha rrọọ. Ehia gha vbe khian ọmaẹn vbe ukpọn. 12 Wẹ gha vbuẹ iran zẹvbe ẹwu. A ghi vbe fi iran werriẹ zẹvbe ukpọn. Sokpan abọ ọkpa nii uwẹ ye, uwẹ i khian ọmaẹn.” 13 Osanobua ma khama odibo Osa rhọkpa wẹẹ, “Tota ye obọ erha ọmwa mwẹ vbe emwa na, rhinrin mẹ to do ya avbe eghian ruẹ ru ukhuerhe ne u gha viọ owẹ yan.” 14 De emwi ne avbe odibo Osa khin yi khekherriọ? Avbe ẹrinmwi ni ga Osanobua, irẹn ghi vbe gha gie iran, ne iran ya gha ye emwa ni gha miẹn imienfan obọ.
AUGUST 26–SEPTEMBER 1
EMWI EWE NI RRE UWU ẸMWẸ ỌGHE OSANOBUA | HIBRU 4-6
“Hia Vbe Odẹ Ke Odẹ Ne U Lae Ikẹtin Ọghe Osanobua”
(Hibru 4:1) Banbanna nian, Osanobua tama ima yotọ nẹ wẹẹ ima sẹtin la owa ne a ya gu ẹre kẹtin. Rhunmwuda ọni wa gie ima gha mwẹ imuohan, ne a ghẹ miẹn wẹẹ, a miẹn orhiọnkpa vbuwe uwa ne ọ ma sẹtin la uwu ikẹtin nii.
(Hibru 4:4) Rhunmwuda vbuwe ebe, iran guan kaan ikpẹdẹ nogie ihinrọn, “Osanobua keghi hẹwẹ vbe iwinna rẹn hia.”
w11 7/15 24-25 ¶3-5
Vbọ Re Ikẹtin Ọghe Osanobua?
3 Emwi eva rrọọ nọ ya ima rẹn wẹẹ, ikpẹdẹ nogie ihinrọn nii ma he sẹ ufomwẹ vbe orre nokaro. Nokaro ọre emwi ne Jesu tama emwa ni ghaa zaan rẹn, rhunmwuda ne ọ na mu ọmwa egbe rran vbe Ẹdẹ Ikẹtin; iran na gha kha wẹẹ te Jesu winna vbe Ẹdẹ Ikẹtin. Jesu keghi tama iran wẹẹ: “Te erha mwẹ wa winna ẹghẹ hia, ẹi mwẹ imẹ ma vbe gha winna.” (Jọn 5:16, 17) Vbe Jesu a ya ẹmwẹ na kha? Te iran ba Jesu ifi ẹzọ wẹẹ ọ winna vbe Ẹdẹ Ikẹtin. Ne Jesu na wanniẹn iran wẹẹ: “Te erha mwẹ wa winna ẹghẹ hia,” ọ na yevbe na miẹn wẹẹ, te Jesu tama iran wẹẹ: ‘Iwinna ọkpa ẹre imẹ vbe Erha mwẹ winna. Ugbẹnvbe a miẹn wẹẹ, ẹghẹ ne Ẹdẹ Ikẹtin ọghe Erha mwẹ ya suẹn ne ẹkpo i mwẹ arhia gha dee, ẹre Erha mwẹ ke winna, mẹ tobọ mwẹ gha vbe sẹtin winna vbe ẹdẹ nọ rhirhi gha khin, ọ gha khọnrẹn nọ gha re Ẹdẹ Ikẹtin.’ Ọna rhiema wẹẹ, vbe nọ dekaan emwamwa ne Osanobua mwẹ ne agbọn na, ikpẹdẹ nogie ihinrọn nii, nọ re Ẹdẹ Ikẹtin nọkhua ọghe Osanobua, ma sẹ ufomwẹ vbe ẹghẹ ne Jesu na gha rre agbọn na.
4 Emwi nogieva nọ sosẹ ye ọna, ọre emwi ne ukọ e Pọl tae. Vbe Pọl ghi sunu ye emwi nọ rre ebe Gẹnẹsis 2:2 vbe ẹghẹ ne ọ na guan kaẹn ikẹtin ra ihẹwẹ ọghe Osanobua, orhiọn nọhuanrẹn keghi loo ẹre ya gbẹn wẹẹ: “Ma ne ọ rhan obọ miẹn rẹn, ma gha la owa ya gu Osanobua hẹwẹ.” (Hib 4:3, 4, 6, 9) Ọna rhiema wẹẹ ikpẹdẹ nogie ihinrọn nii ma he sẹ ufomwẹ vbe ẹghẹ ọghe Pọl. Inu ẹghẹ ẹre ikpẹdẹ nogie ihinrọn na khian ghi ya vbe otọ?
5 Ne ima mieke na sẹtin rhie ewanniẹn ye inọta na, ọ khẹke ne ima yerre esa ne ikpẹdẹ nogie ihinrọn na ye. Ebe Gẹnẹsis 2:3 keghi rhan otọre wẹẹ: “Irẹn keghi fiangbe ikpẹdẹ nogie ihinrọn, ọ keghi zọe yotọ zẹvbe ẹdẹ kpataki [ra ẹdẹ nọhuanrẹn, NW ].” Te Jehova zẹ ẹdẹrriọ zẹvbe ẹdẹ ne kpataki ra ẹdẹ nọhuanrẹn ne ọ ya mu emwamwa ọghẹe sẹ. Emwamwa ọghe Osanobua ọre ne emwa ni họn ẹmwẹ ne irẹn yin agbọn na vbe etẹbitẹ, iran ghi vbe gha gbaroghe emwi hia ne ọ yi ye agbọn na. (Gẹn 1:28) Emwamwa na ẹre ọ si ẹre ne Osanobua ne Jehova kevbe Jesu Kristi nọ re ‘Arowa ọghe ẹdẹ ikẹtin’ na winna do sẹ vbene a guan na. (Mat 12:8) Ẹdẹ ikẹtin ọghe Osanobua gha sẹ ufomwẹ, vbe ẹghẹ ne emwamwa ọghe Osanobua khian ya mwẹ amusẹ vbe iyeke Ukpo Arriaisẹn Ọkpa Ne Kristi Khian Ya Kha.
(Hibru 4:6) Iran ni ka họn iyẹn nọ maan na, ma la owa ya gu Osanobua hẹwẹ, rhunmwuda iran ma yayi. Rhunmwuda ọni, emwa ọvbehe rrọọ khekherriọ ne a ghi gi ẹre la owa ya gu Osanobua hẹwẹ.
w11 7/15 25 ¶6
Vbọ Re Ikẹtin Ọghe Osanobua?
6 Osanobua keghi gi Adam vbe Ivi rẹn vbekpa emwamwa ọghe irẹn, sokpan iran ma ku obọ gbe ba re. Adam vbe Ivi ẹre ọ ghaa re emwa ni ka gha sọtẹ daa Osanobua. Ke ẹghẹ nii gha dee, ẹbo ọghe emwa nibun keghi deba iran vbe uyinmwẹ isọtẹ ọghe iran. Uhiẹn, te agbẹnvbo ọghe Ivbi Izrẹl ni re agbẹnvbo ne Osanobua hannọ zẹ sọtẹ daa Osanobua. Ẹi khabe ne Pọl na ya obọ sekhae ne Ivbiotu e Kristi ni ghaa rrọọ vbe orre nokaro wẹẹ ne iran gha begbe, rhunmwuda, emwi nọ rhuan Ivbi Izrẹl nẹdẹ sẹtin vbe rhuan iran. Ọ keghi khama iran wẹẹ: “Rhunmwuda ọni, wa gie ima ziga ne a la owa ya gu Osanobua hẹwẹ. Wa ghẹ gie ima rhọkpa yin ehọ, zẹvbe ne iran ru, ne iran ma na ghi la owa.” (Hib 4:11) Ukọ e Pọl keghi kha wẹẹ ne Ivbi Izrẹl ma na họn ẹmwẹ ne Osanobua ẹre ọ si ẹre ne iran ma na sẹtin lae ikẹtin ọghe Osanobua. De emwi ne ọna ghi maa ima re? Ọ khẹke ne ima nọ egbe ima wẹẹ, deghẹ ima na sọtẹ daa Osanobua ma gha ye sẹtin lae ikẹtin ọghẹe ra? Ewanniẹn ọghe inọta wa kakabọ ru ekpataki ne ima, rhunmwuda ọni, ma gha ye ziro yan rẹn sayọ. Sokpan gi ima ka ziro yan emwi ne ima miẹn ruẹ vbe igiemwi ọghe Ivbi Izrẹl ni ma ghi sẹtin lae ikẹtin ọghe Osanobua rhunmwuda isọtẹ ọghe iran.
(Hibru 4:9-11) Vbene ọ rhirhi gha ye hẹ, vbene ọ ghi ye na nian, ọrọre wẹẹ, ikẹtin ọkpa ye rrọọ ne emwa Osanobua, nọ vbe khọ vbene Osanobua [ya] hẹwẹ vbe ikpẹdẹ nogie ihinrọn. 10 Rhunmwuda, ọmwaikọmwa ne ọ la owa ya gu Osanobua hẹwẹ, gha zobọ vbe iwinna ne ọ winna, zẹvbe ne Osanobua vbe zobọ vbe iwinna ọghẹe. 11 Rhunmwuda ọni, wa gie ima ziga ne a la owa ya gu Osanobua hẹwẹ. Wa ghẹ gie ima rhọkpa yin ehọ, zẹvbe ne iran ru, ne iran ma na ghi la owa.
w11 7/15 28 ¶16-17
Vbọ Re Ikẹtin Ọghe Osanobua?
16 Ọ gha lọghọ a ke miẹn Ovbiotu e Kristi vbe ẹghẹ ọghe ima, nọ gha kha wẹẹ, na gha lele Uhi e Mosis ẹre ọ khian ya ọmwa miẹn imiẹnfan. Ẹi khabe ne Osanobua na loo e Pọl ya tama etẹn ni rre Ẹfisọs wẹẹ: “Rhunmwuda, ẹse ọhẹ ọghe Osanobua ẹre a ya miẹn uwa fan vbekpa iyayi, ẹi re emwi ne uwa ru, sokpan ẹse Osanobua nọ. Emwi ne a ya rhuọ i rre emwa na, ugbẹnvbe a miẹn wẹẹ, ẹi re ẹtin obọ ruẹ ẹre ọ ya gha yerriọ.” (Ẹfis 2:8, 9) Vbe a ghi yae kha deghẹ a na wẹẹ ne Ivbiotu e Kristi lae ikẹtin ọghe Osanobua? Te Jehova zẹ ikpẹdẹ nogie ihinrọn nii, nọ re ẹdẹ ikẹtin ọghẹe ne ọ ya mu emwamwa nọ mwẹ ne uhunmwu otagbọn na sẹ. Ma gha sẹtin lae ikẹtin ọghe Jehova deghẹ ima na gha họn ẹmwẹ nẹẹn kevbe deghẹ ima na gha yin vbe odẹ nọ gua emwamwa ọghẹe ro; otu ọghe Jehova keghi ya ima rẹn emwamwa na.
17 Sokpan deghẹ ima na gha ya aro tila adia nọ ke Baibol rre, ne ọviẹn nọ gia mu ẹtin yan kevbe nọ fuẹro rhie ne ima, ma na do gha ya emwi nọ rre ima ekhọe ru emwi, te ima ghi gbodan ghee emwamwa ọghe Osanobua vberriọ. Ọna sẹtin mu asikẹgbe ne ima gu e Jehova mwẹ rhia. Vbe ako iruẹmwi nọ lele ọna, ma gha ziro yan emwi eso nọ gha sẹtin de rre vbe arrọọ ọghe ọguọmwadia Osanobua, ma gha vbe guan kaan vbene azẹ ne ima ru, ya rhiẹre ma deghẹ ima gele lae ikẹtin ọghe Osanobua nẹ.
Gualọ Emwi Ewe Ọghe Orhiọn
(Hibru 4:12) Rhunmwuda, ekpakpasusu ẹre ẹmwẹ Osanobua khin. Ọ mu sẹ agbada ke agbada ne ọ mwẹ unu eva, te ọ fiaẹn la ehia fo, ya sẹ ehe ne orhiọn kevbe ekhọe na sikan mu egbe, kevbe ehe ne akhuẹn kevbe efun nọ rre uwu ugboloko na vba egbe. Irẹn ẹre ọ ta vbene iziro kevbe ahoo ekhọe emwa nagbọn ye hẹ.
w16.09 13
Inọta Ne Emwa Nọ
Vbọ re “Ẹmwẹ Osanobua” ne ebe Hibru 4:12 tiẹre “ekpakpasusu”?
▪ Emwi ne ukọ e Pọl ta sẹ evba ya ima rẹn wẹẹ, igiuhunmwu ọghe Osanobua nọ rre uwu e Baibol nọ dekaan emwamwa ọghẹe ẹre ọ ghaa guan kaẹn.
Ebe ọghe ima mobọ loo ebe Hibru 4:12 ya rhiẹre ma wẹẹ, e Baibol mwẹ ẹtin nọ ya fi ọmwa werriẹ; deghẹ ima na rhan otọ ako evbagbẹn nọhuanrẹn na vbe odẹ vbenia, te ọ wa gbe ye uviẹn. Sokpan, ọ khẹke ne ima rẹn emwi na gele ta sẹ evba. Te Pọl ghaa rhie igiọdu ne Ivbiotu e Kristi ni re Ivbi e Hibru ne iran gha ku obọ gbe ba emwamwa ọghe Osanobua. Ọ na gi iran rẹn wẹẹ, emwamwa na keghi rre evbagbẹn nọhuanrẹn. E Pọl keghi ya Ivbi Izrẹl ne Jehova miẹn fan vbe otọ Igipt ya ru igiemwi ne iran. Ẹkpotọ keghi kie ne iran ya lae otọ na ru eyan rẹn nii, ọni ọre “otọ nọ maan emwiokọ kevbe nọ vbẹ aro,” evba nii, ẹre iran khian na miẹn agbẹkunsotọ ra ikẹtin ọghe ẹmwata.—Ẹks 3:8; Diut 12:9, 10.
Ọna ẹre ọ ghaa re emwamwa ọghe Osanobua ne Ivbi Izrẹl. Ọrheyerriọ, Ivbi Izrẹl na ye zẹ utun vbe ehọ, iran ma vbe gha mwẹ amuẹtinyan daa Osanobua, rhunmwuda ọni, iran nibun ma ghi sẹtin lae ikẹtin ọghe Osanobua. (Nọm 14:30; Jọs 14:6-10) Vbọrhirhighayehẹ, ukọ e Pọl na ye kha wẹẹ, “Osanobua tama ima yotọ nẹ wẹẹ, ma sẹtin la owa ne a ya gu ẹre kẹtin.” (Hib 3:16-19; 4:1) Ẹmwẹ ne “Osanobua tama ima yotọ” na keghi re abọ ọkpa vbe emwamwa ọghe Osanobua. Zẹvbe ne Ivbiotu e Kristi ni re Ivbi e Hibru ru ẹre, ọ khẹke ne ima gha tie vbekpa emwamwa ọghe Osanobua nọ rre evbagbẹn nọhuanrẹn, ma ghi vbe gha ku obọ gbe ba re. E Pọl keghi sunu yi emwi nọ rre ebe Gẹnẹsis 2:2 kevbe ebe Psalm 95:11 ne ọ ya rhiẹre ma wẹẹ eyan na rre evbagbẹn nọhuanrẹn.
Vbene ẹmwata, ọ khẹke ne ima gha ghọghọ wẹẹ ẹkpotọ ye kie ne ima, ne ima ya “gu [Osanobua] kẹtin.” Ma mwẹ ilẹkẹtin wẹẹ ima gha gele sẹtin lae ikẹtin ọghe Osanobua, ọni ẹre ọ si ẹre ne ima vbe zẹ owẹ nọ khẹke ne ima mieke na sẹtin laọ. Na gha lele Uhi ọghe Mosis, ra na gha winna iwinna ọvbehe ẹre ọ khian ya ima lae ikẹtin ọghe Osanobua ra? Hiehie! Nọghayayerriọ, ma keghi rhiẹre ma wẹẹ ima hoo ne ima lae ikẹtin ọghe Osanobua lekpae amuẹtinyan ne ima mwẹ daa Osanobua kevbe ne ima na ku obọ gbe ba emwamwa ọghẹe. Deba ọni, zẹvbe ne ima ka tae ban, emwa ni gberra arriaisẹn nibun, suẹn gha ruẹ vbekpa emwamwa ọghe Osanobua nẹ vbuwe Baibol. Emwi ne iran ruẹ vbe Baibol keghi gua iran kpa ya ru afiwerriẹ nọ khẹke vbe arrọọ ọghe iran, te iran ghi vbe mwẹ amuẹtinyan daa Osanobua, iran nibun vbe dinmwiamẹ nẹ. Afiwerriẹ ne iran ru vbe arrọọ ọghe iran rhiẹre ma wẹẹ, “ekpakpasusu ẹre ẹmwẹ Osanobua khin” kevbe wẹẹ, ọ wa mwẹ ẹtin. Emwamwa ọghe Osanobua ne Baibol guan kaẹn fi arrọọ ọghe ima werriẹ nẹ, te ọ khian vbe gha mwẹ iyobọ nọkhua nọ ye ne ima vbe arrọọ ọghe ima.
(Hibru 6:17, 18) Osanobua keghi hoo ne ọ rhie ma emwa ne emwi ne irẹn ve gha sẹ ọre obọ hia wẹẹ, irẹn i ra fi ekhọe werriẹ: rhunmwuda ọni, ọ na ya eyan na yẹrikẹ. 18 Rhunmwuda ọni khekherriọ, emwi eva na ẹre ọ rrọọ nẹi sẹtin fiwerriẹ, kevbe vbekpa ne Osanobua i na sẹtin ta ohoghe. Rhunmwuda ọni, te ọna rhie igiọdu ne ima ni lẹẹ fe ye ehe ne ọ ye nẹ, ne ima daeyi gbain ighẹ idaehọ ne a rhie ima aro yi.
it-1 1139 ¶2
Ayayẹro
Ayayẹro ọghe arrọọ etẹbitẹ ne emwa ni khian yin agbọn na mwẹ kevbe ayayẹro ọghe egbe nẹi sẹtin kẹkẹ ne “emwa ne Osanobua [tiere]” mwẹ (Hib 3:1) i re ayayẹro nẹi mwẹ ẹzi. Emwi nọ ya ima rẹn wẹẹ ayayẹro na i re ọtakua na tisẹ ọre wẹẹ, ọ keghi re emwi ne Osanobua nẹi sẹtin ta ohoghe ru eyan rẹn kevbe emwi nọ ve; deba ọni, e Kristi nọ re ọmwa ne eyan na khian la obọ re mwẹ amusẹ rre ẹrinmwi nẹ zẹvbe ọmwa nẹi sẹtin wu. Ẹi khabe ne Baibol na gie ayayẹro na zẹvbe “okpo nọ da owa yi ọghe ekhọe mwa, ẹbe i rrọọ, te ọ vbe deziẹn gbain, ọ kevbe la ukpọn ne a ya fian ọgua Osa gberra gha rrie ehe ne ogiukpo nọkhua ye [zẹvbe ne ogie ohẹn ya la Ehe Nọ Huan Sẹ vbe Ẹdẹ Irinmwian]. Jesu ka ke odaro nẹ, gha rrie evba nii, ne ima. Irẹn keghi vbe khian ogie ohẹn etẹbitẹ lele uviẹn ọghe Mẹlkizẹdẹk.”—Hib 6:17-20.
E Baibol Na Tie
(Hibru 5:1-14) Ogie ohẹn ke ogie ohẹn, ọkpa vbuwe emwa nii, ẹre a na zẹ ọre ne ọ do gha ga Osanobua ne iran hia. Irẹn ghi gha yo imuohan, ọ ghi vbe gha zọ ese ye orukhọ. 2 Rhunmwuda ighẹ odẹ nibun ẹre irẹn ma na gba, irẹn tobọ ẹre ọ ghi gha ya obọ nekhuẹrhẹ mu iran ni ma rẹn ne a ye, kevbe ni ba emwi ku ru. 3 Kevbe rhunmwuda ighẹ ọ ma vbe khia ne irẹn fo, ọ ghi gha zọ ese, ẹi ghi re ọghe orukhọ avbe emwa nii ọkpa, sokpan kevbe ọghe irẹn tobọ ẹre. 4 Orhunmwu ọkpa ne ọ tobọ ẹre mu ọghọ akpa ogie ohẹn yọ egbe ẹre, ẹi rrọọ. Osanobua ẹre ọ zẹ ọmwa ne a ya ma ogie ohẹn, zẹ vbene a zẹ Errọn. 5 Erriọ vbe nọ zẹẹ, ẹi re te Jesu wa tobọ ẹre tọn uyi ogie ohẹn mu yan egbe ẹre. Sokpan te Osanobua tama rẹn wẹẹ “Ovbi mwẹ ẹre u khin, Ẹdẹnẹrẹ na I khian Erhaa.” 6 Ọ keghi vbe tae vbe ehe ọvbehe wẹẹ, “Ohẹn ẹre u khian gha khin ẹdẹdẹdẹ, vbe uniẹn ohẹn ọghe Mẹlkizẹdẹk.” 7 Vbe ẹghẹ ne Jesu na gha rre agbọn na, utumwẹ nọkhua kevbe ameve ẹre ọ ya gha nọ emwi vbe obọ Osanobua ne ọ gha sẹtin fan irẹn ye otọ vbe obọ uwu. Rhunmwuda ighẹ ọ mu egbe rri otọ, ọ keghi vbe mu aro yọ. Osanobua keghi họn erhunmwu ẹnrẹn 8 Agharhemiẹn wẹẹ, ovbi Osanobua ẹre irẹn gha khin sẹ evba, te ọ ye lekpa oya nọ re, ruẹ vbene a họn emwe hẹ. 9 Ugbẹnvbe a ghi yae khian enọgbae na nẹ, irẹn keghi do khian ehe ne imiẹnfan etẹbitẹ ke rre ne iran hia ni họn ẹmwẹ nẹẹn. 10 Osanobua keghi tie ẹre ogie ohẹn vbe uviẹn ọghe Mẹlkizẹdẹk. 11 Emwi wa rrọọ ne a gha guan yan ẹmwẹ na ẹsẹse, sokpan ọ wa lọghọ ne a rhan otọ ẹre ma uwa, rhunmwuda, wa i rherhe rẹn otọ emwi. 12 Ẹghẹ te sẹ nẹ ne uwa tobọ uwa gha ya gha re emamwaemwi, sokpan te uwa ye gualọ ọmwa ne ọ gha ma uwa ikporhu ẹmwẹ Osanobua. Ne uwa gha na gha rri evbare ne evbare, ewẹn uwa ye wẹn. 13 Ọmwaikọmwa nọ wẹn ewẹn, ọvbokhan he ye nọ, ne ọ ma kue rẹn enaye vbe a gha ta ẹmwẹ emwi nọ gbae ra nọ ma gba. 14 Evbare ne ọ wo vbe egbe, ọghe avbe eniwanrẹn nọ, iran ni ma unu iran ẹre, ne iran vbe gha yae rẹn alughaẹn nọ rre ẹkpo emwi ne ọ maan kevbe nẹi maan.