UYINMWẸ ỌGHE IMA NE IVBIOTU E KRISTI
E Jehova Ru Iyobọ Ne Ima Vbe Ima Ghaa Rre Uwu Ọlọghọmwa
Emwi hia gele wa wegbe, vbe ẹghẹ okiekie ẹdẹ ne ima ye na, te ọlọghọmwa wa gba erhan gba irri. Ugbẹnso, ma sẹtin gha roro ẹre wẹẹ, ọlọghọmwa ne ima ye sẹ ima. Vbọrhirhighayehẹ, deghẹ ima na ye gha ru emwi nọ gha ya ima sikẹ e Jehova, ọ gha ru iyobọ ne ima ya zin egbe ọlọghọmwa nọ rhirhi gha khin. (Aiz 43:2, 4) De emwi eso nọ gha ya ima sikẹ e Jehova, vbe ima ghaa rre uwu ọlọghọmwa?
Erhunmwu. Deghẹ ima na gha fannọ otọ ẹko ima ma e Jehova, ọ gha mu ima orhiọn sotọ, ọ ghi vbe ru iyobọ ne ima ya ko udu rre, ne ima mieke na sẹtin zin egbe.—Fil 4:6, 7; 1 Tẹs 5:17.
Iko. Ma ghaa rre uwu ọlọghọmwa, ọ khẹke ne ima ye gha yo iko, ne ima mieke na sẹtin gha ruẹ emwi vbe obọ e Jehova. Ma gha yo iko, ẹkpotọ ghi vbe kie ne ima, ne ima ya ya egbe rhorho etẹn ne ima gba ga. (Hib 10:24, 25) Deghẹ ima na gha mu egbe iko yotọ, ma na gha yo iko, ma na vbe gha zẹ ewanniẹn, te ima kie ẹkpotọ yọ ne orhiọn nọhuanrẹn ọghe Jehova ya ru iyobọ ne ima.—Arhie 2:29.
Iwinna ikporhu. Deghẹ ima na hia vbe odẹ ke odẹ ne ima ye gha ladian vbe ikporhu, ọ gha ru iyobọ ne ima ya gha mu emwi nọ maan roro. Ọ gha vbe ru iyobọ ne ima ya kakabọ sikẹ e Jehova kevbe etẹn ne ima gba ga.—1 Kọr 3:5-10.
GHEE VIDIO NỌ MWẸ UHUNMWUTA NỌ KHARE WẸẸ, E JEHOVA GHA GBAROGHE RUẸ, IYEKE ỌNI, A GHI ZẸ EWANNIẸN YE AVBE INỌTA NA:
De emwi nọ ru iyobọ ne Malu ya kakabọ sikẹ e Jehova vbe ọ rre uwu ọlọghọmwa?
Zẹvbe nọ ghaa ye ne Malu, de vbene emwi nọ rre ebe Psalm 34:18 gha ya sẹtin rhie ifuẹko ne ima hẹ, vbe ima ghaa rre uwu ọlọghọmwa?
De vbene okha ọghe Malu ya ya ima rẹn wẹẹ, e Jehova rhie “ẹtin nọ sẹ ehia” ne ima, vbe ima ghaa rre uwu ọlọghọmwa?—2 Kọr 4:7