De Emwi Nọ Gha Ru Iyobọ Mẹ Deghẹ Ọmwa Ne Ekhue Mu Ẹre I Khin?

Eke nẹi na maan: Ekhue sẹtin si ẹre ne u ghẹ gha mwẹ avbe ọse ni maan, ọ sẹtin vbe ya emwi eso ni ya ọmwa sọyẹnmwẹ la ruẹ ban.

Eke nọ na maan: Ẹ i re ẹghẹ hia ekhue ya re emwi dan. Ọ sẹtin ya ruẹ gha kọn ẹmwẹ ta, ọ sẹtin vbe ru iyobọ nuẹn ya gha re ọmwa ne aro ọre sotọ, kevbe nọ gua danmwehọ emwa ọvbehe vbe iran ghaa guan.

Emwi ọvbehe nọ khẹke ne u rẹn: Deghẹ ọmwa ne ekhue mu ẹre u khin, u gha sẹtin fi werriẹ. Uhunmwuta na gha ya ruẹ rẹn vbene u khian ya ru ọna hẹ.

• Hia ne u rẹn emwi nọ ya ruẹ mu ohan

• Emwi ne u gha sẹtin ru

• Emwi ne ihua khare

Hia ne u rẹn emwi nọ ya ruẹ mu ohan

Ekhue sẹtin ya ruẹ gha mu ohan vbene u khian ya gu emwa guan hẹ ghee mwẹ ghee ruẹ. Rhunmwuda ọni, u sẹtin do gha roro wẹẹ uwẹ ọkpa ẹre ọ rre agbọn na, ọ ghi do yevbe na miẹn wẹẹ, te uwẹ ọkpa rre ughugha nọ so ebiebi. Te emwi vbenian ya ohan mu ọmwa. Sokpan, u na gele rẹn emwi nọ si ohan yọ ruẹ egbe, u sẹtin do bẹghe ẹre wẹẹ, esa i rrọọ ne u khian ya gha mu ohan. Gi ima zẹ iro yan igiemwi eha.

• Emwi nọ ya ruẹ mu ohan #1: “I ma rẹn emwi ne I khian ta.”

  Ẹmwata nọ rrọọ: Obọ ne u ya mu emwa, ẹre emwa mobọ yerre, ẹ i re ẹmwẹ ne u ta. Emwi ọkpa nọ gha ru iyobọ nuẹn ne ohan ghẹ ghi mu ruẹ gbe, ọre ne u hia ne u gha danmwehọ emwa ọvbehe, u ghi gele gha hoo ne u rẹn emwi ne iran hoo ne iran ta.

  Emwi nọ khẹke ne u mu roro: De aro ọse ne u hoo ne u gha mwẹ—ọmwa nọ talọ vbe ẹghẹ hia, ra ọmwa nọ gbehọkotọ danmwehọ vbe u ghaa gu ẹre guan?

• Emwi nọ ya ruẹ mu ohan #2: “Emwa sẹtin gha roro wẹẹ I i re ọmwa nọ soyaya.”

  Ẹmwata nọ rrọọ: Ọre ọmwa ne ekhue mu ẹre u khin, ra u i re ọmwa ne ekhue mu, ẹ i mwẹ emwa ma gha mwẹ iziro eso vbekpa ruẹ. Deghẹ u na gha ru emwi nọ gha ya emwa rẹn aro ọmwa ne u gele khin, ọna gha ru iyobọ ne iran ya gha ya aro nọ khẹke ghee ruẹ, ẹghẹ nii, u i khian ghi gha mu ohan wẹẹ emwa mwẹ iziro nọ ma khẹke vbekpa ruẹ.

  Emwi nọ khẹke ne u mu roro: Deghẹ u na gha roro ẹre wẹẹ, ẹmwẹ ruẹ i zẹdẹ yẹẹ emwa, a sẹtin miẹn wẹẹ iziro ne u mwẹ vbekpa iran ẹre ọ ma gba.

• Emwi nọ ya ruẹ mu ohan #3: “I gha ta emwi nọ ma khẹke, ekhue ghi do gha mu mwẹ.”

  Ẹmwata nọ rrọọ: A i miẹn ọmwa ne emwi vberriọ i sunu daa. Emwi ọkpa nọ gha ru iyobọ nuẹn ne u ghẹ ghi mu ohan gbe, ọre ne u gha ghee abakuru ne u ru zẹvbe ẹkpotọ nọ kie nuẹn ya rhie ẹre ma wẹẹ, u i ghee egbuẹ zẹvbe ọmwa nọ gbae.

  Emwi nọ khẹke ne u mu roro: Ẹko i rhiẹnrhiẹn ruẹ vbe u ghaa rre uwu ẹbu emwa ni miẹn kue wẹẹ, ọ ma gba ne iran fo ra?

U ka rẹn ra? Emwa eso roro ẹre wẹẹ, iran i re ọmwa ne ekhue mu rhunmwuda, iran wa kakabọ loo efoni ya gie uhunmwu gie emwa. Sokpan deghẹ u na gha gu emwa guan ghee mwẹ ghee ruẹ, ẹre u khian na sẹtin rherhe gha mwẹ avbe ọse ọghe ẹmwata. Okhuo ọkpa na tie ẹre Sherry Turkle nọ rri egie ebe vbe ọ gha de ọghe vbene emwa ya yin hẹ kevbe nọ fiẹnro vbene a ya loo e tẹknọlọgi hẹ khare wẹẹ: “Ma ghaa bẹghe ugbaro emwa, ma na vbe gha họn urhu iran, ẹre ima na sẹtin gele gu obọ egbe.”a

Emwi ne u gha sẹtin ru

• Ghẹ gha ya egbuẹ gie emwa ọvbehe. Ẹ i re esalẹbẹ wẹẹ, te u khian wa gha gbegbe emwa hia. Sokpan, emwi nọ khẹke ne u ru ọre ne u hia, ne ekhue ghẹ ghi mu ruẹ gbe, ne u mieke na sẹtin gha mwẹ avbe ọse ni maan, u ghi vbe sẹtin ruẹ emwi ni bun.

  “A ma we ne u talọ ẹmwẹ nọ bun gbe, ra na miẹn wẹẹ uwẹ ẹre emwa hia ghi wa ghee. U sẹtin ta eni ruẹ ma ọmwa ne u ma he miẹn ẹdẹ, u ghi vbe nọ rẹn ọta eso.”—Alicia.

  Ilele nọ rre Baibol: “Dọmwadẹ ọghẹe ghi tobọre gha ghee vbene uyinmwẹ ọnrẹn ye hẹ, vbe nẹi na ya egbe ẹre gie ọmwa ọvbehe, ẹghẹ nii, ọyẹnmwẹ egbe ẹre ghi gha sẹ ọre.”—Galetia 6:4.

• Gi aro ruẹ gha sotọ. U ghi gi aro ruẹ gha sotọ vbe egbe emwa ni gua gu emwa ọvbehe ru ọse, ne u mieke na bẹghe vbene iran ya gu emwa guan hẹ. De emwi nọ ru iyobọ ne iran? De emwi ne iran i mobọ ru? De emwi ne iran guẹ, nọ khẹke ne u ya egbe taa?

  “Gbarokotọ, ne u vbe gha ruẹ emwi vbe obọ emwa ni gua gu emwa ru ọse. Gha ghee vbene iran ya yin hẹ kevbe ẹmwẹ ne iran ta vbe ẹghẹ okaro ne iran ya miẹn ọmwa.”—Aaron.

  Ilele nọ rre Baibol: “Te a ruẹ emwi vbe obọ egbe, zẹvbe ne ematọn lọ ematọn nọ gha mu.”—Itan 27:17.

• Gha nọ ọta. Emwa ni bun wa hoo ne iran gha ta vbene iran ghee emwi hẹ, rhunmwuda ọni, u gha nọ ọta, ẹkpotọ ghi kie ne uwa ya gu egbe guan. Ẹghẹ nii, ẹ i re uwẹ ọkpa ẹre a khian ghi wa rhie aro tua.

  “U gha gele mu egbe yotọ, ọ gha ru iyobọ nuẹn ne u ghẹ gha si osi gbe. Vbene u te gha rrie ehe ne emwa gha na gbẹbu, u sẹtin ka roro emwi ne u khian ta, ra ọta eso ne u gha nọ, vbe u gha miẹn emwa ne u ma he ka miẹn ẹdẹ. Ọna gha ya orhiọn ruẹ sotọ.”—Alana.

  Ilele nọ rre Baibol: “Wa ghẹ wa rẹn ọghe enegbe uwa ọkpa, sokpan, wa vbe gha mu ọghe emwa ọvbehe roro.”—Filipai 2:4.