Vbia Khian Ru Deghẹ I Na Rra Uhi Na Gbe Ye Otọ Vbe Owa?

Iyobọ ẹgbẹe hia wa mwẹ uhi ne iran lele vbe owa, ọ sẹtin gha re ẹghẹ nọ khẹke na ya gha la owa, vbene a khian ya gha loo efoni kevbe ekọmputa hẹ, kevbe obọ nọ khẹke na ya gha mu emwa ọvbehe.

U gha rra uhi na gbe ye otọ vbe owa ghi vbo? U i khian sẹtin fi emwi nọ sunu werriẹ, sokpan, ọ mwẹ emwi ne u gha ru, ne emwi ghẹ rhia sayọ. Uhunmwuta na gha wa ru iyobọ nuẹn.

• Emwi nọ ma khẹke ne u ru

• Odẹ nọ maan sẹ ne u gha ya la ẹmwẹ na

• Emwi ne ihua khare

Emwi nọ ma khẹke ne u ru

• Deghẹ evbibiẹ ruẹ ma rẹn wẹẹ, u rra uhi, u sẹtin gha hoo ne u gbe gue ẹre.

• Deghẹ iran na ghi rẹn wẹẹ, u rra uhi, u sẹtin gha gualọ emwi ne u gha mu na, ra u ghi gha kha wẹẹ, ọmwa ọvbehe ẹre ọ si ẹre.

Ena rhọkpa i maan. Vbọsiẹ? Rhunmwuda, u ghaa gbe gue emwi nọ sunu, ra u na gha gualọ emwi ne u gha mu na, uyinmwẹ ọvbokhan ẹre nọ. Evbibiẹ ruẹ ghi la evba rẹn wẹẹ, ọvbokhan ẹre u ye khin.

“Ọ ma khẹke ne u ta ohoghe. Vbene ẹghẹ ya khian, a gha miẹn ẹmwata nọ rrọọ, ẹghẹ nii, oya ne u khian re ghi do khọọ sẹ, ne u gha te re, akpawẹ u ta ẹmwata vbe ẹghẹ okaro.”​—Diana.

Odẹ nọ maan sẹ ne u gha ya la ẹmwẹ na

• Miẹn emwi ne u ru kue. E Baibol wẹẹ: “U gha gbe gue orukhọ ruẹ, agbọn i maan ruẹ ẹdẹ.” (Itan 28:13) Evbibiẹ ruẹ rẹn wẹẹ, ọmwa nọ ma gba ẹre u khin. Sokpan, iran hoo ne u gha ta ẹmwata.

  “U gha ta ẹmwata, evbibiẹ ruẹ ghi tohan ruẹ. Iran ghi vbe rẹn wẹẹ, ọmwa na gha sẹtin gba ẹko ẹre, ẹre u khin.”​—Olivia.

• Rinmwian na yabọ ruẹ. E Baibol wẹẹ: “Mu imuegberriotọ yọ vbe na ghee ukpọn.” (1 Pita 5:5) Ọmwa nọ mu egbe rrie otọ, ẹre ọ khian sẹtin kha wẹẹ “lahọ, ghẹ gui,” vbe nẹi na gualọ emwi nọ gha mu na.

  “Emwa ni mobọ gualọ emwi ne iran khian mu na, emwi ne iran ru i gbe iran egbe. Vbene ẹghẹ ya khian, ekhọe iran ghi do gbin.”​—Heather.

• Emwi nọ rhirhi ke ẹre ikian, u ghi miẹn ọnrẹn yi. E Baibol wẹẹ: “Wa danmwehọ emwi na ma uwa ẹre.” (Itan 8:33) Ghẹ gha gui ẹzọ uwu unu, oya ke oya ne evbibiẹ ruẹ kha wẹẹ, iran gha rriọ ruẹ re, miẹn ọnrẹn yi.

  “U ghaa gui, rhunmwuda oya na khian rriọ ruẹ re, ọ sẹtin ya emwi hia tua sayọ. Hia ne u miẹn ọnrẹn yi, ghẹ rhie aro tua emwi nọ la ruẹ ban.”​—Jason.

• Gha ru emwi nọ gha ya iran dọlegbe gba ẹko ruẹ. E Baibol wẹẹ: “Uwa ban akpa nẹdẹ mu fua, nọ gua vbene uwa te ka ya gha yin ro.” (Ẹfisọs 4:22) Gha yin ẹse, ne evbibiẹ ruẹ mieke na dọlegbe gba ẹko ruẹ.

  “Adeghẹ u na gha yin ẹse vbe ẹghẹ hia, u na vbe gha gi evbibiẹ ruẹ rẹn wẹẹ, u i khian ghi dọlegbe ru abakuru nii, iran ghi dọlegbe do gba ẹko ruẹ.”​—Karen.

EMWI NE U GHA SẸTIN RU: Hia vbe odẹ ke odẹ ne u ya rhie ẹre ma wẹẹ, ọmwa na gha sẹtin gba ẹko ẹre, ẹre u khin. Vbe igiemwi, ọ ghaa mwẹ eke ne u yo, gi evbibiẹ ruẹ rẹn vbe u ghaa die owa, ọ gha khọnrẹn wẹẹ, u i khian gberra ẹghẹ na rhie yọ ne u ya sẹ owa. Te uwẹ ghi tama iran vberriọ wẹẹ, ‘I hoo ne uwa dọlegbe gba ẹko mwẹ.’