INỌTA NE AVBE IGBAMA NỌ
Vbọ Khian Ru Iyobọ Mẹ Ne I Ghẹ Gha Roro Emwi Vbe Odẹ Nọ Ma Gba?
De aro ne u ya ghee egbuẹ?
Ọmwa nọ ya aro yọ wẹẹ te emwi hia khian wa gha maan vbe ẹghẹ hia
“Ẹghẹ hia ẹre I ya hia ne I gha ghọghọ kevbe ne I ghẹ gha mu ohu, I vbe hia ne I gha muẹnmuẹn ogiẹ vbe ẹdẹgbegbe.”—Valerie.
Ọmwa nọ roro wẹẹ emwi dan emwi dan ẹre ọ sunu
“Ẹghẹ ke ẹghẹ ne emwi nọ maan ya sunu, vbobọvbobọ nii, I gha roro wẹẹ, ẹ i sẹtin gha re ẹmwata. I ghi gha ghee ẹre wẹẹ ọ mwẹ emwi eso nọ ma deyọ.”—Rebecca.
Ọmwa nọ ghee emwi vbe nọ khẹke
“Ọmwa gha wa ya aro yọ wẹẹ te emwi hia khian wa gha maan vbe ẹghẹ hia, obalọ ẹre ọ khian si gie egbe ẹre deghẹ emwi ma na ghi deyọ vbene ọ te ya aro yi. Deghẹ ọmwa na vbe gha roro ẹre wẹẹ emwi dan emwi dan ẹre ọ khian gha sunu, ẹghẹ ọkpa i rrọọ nọ khian ya gha ghọghọ. Sokpan, I ghaa roro emwi vbe nọ khẹke, vbene emwi gele ye, erriọ I khian ya gha ghee ẹre.”—Anna.
Vbọzẹ nọ na ru ekpataki?
E Baibol khare wẹẹ, “emwa ne ẹko rhiẹnrhiẹn ghi gha kuobọyuwa ẹghẹ hia.” (Itan 15:15) Ọghe ne ẹmwata, emwa nẹi si osi kevbe ni ya aro yọ wẹẹ emwi hia gha maan mobọ sọyẹnmwẹ. Iran ẹre ọ vbe mobọ mwẹ avbe ọse nibun. Levba sevba, ma rhọkpa rrọọ nọ gha hoo nọ gu ọmwa nọ suku aro ye uhunmwu vbe ẹghẹ hia kevbe nẹi ghọghọ mu obọ ra?
Vbọrhirhighayehẹ, ọ gha khọnrẹn wẹẹ ọmwa nọ sọyẹnmwẹ vbe ẹghẹ hia ẹre u khin, ẹ i mwẹ u ma werriẹ aro daa ọlọghọmwa eso. Vbe igiemwi:
U gha we ne u danmwehọ iyẹn, a sẹtin miẹn wẹẹ iyẹn ọghe okuo, igbinnoguo kevbe uyinmwẹ ikpata vbe izigan, ẹre u khian gha họn vbe ẹghẹ hia.
A sẹtin miẹn wẹẹ u miẹn ọlọghọmwa eso vbe uwu ẹgbẹe.
A sẹtin miẹn wẹẹ, ọ mwẹ uyinmwẹ eso ne u hoo ne u ban, sokpan, ọ ye lọghọ ruẹ.
A sẹtin vbe miẹn wẹẹ, ọse ruẹ ru emwi nọ da ruẹ.
Ne u gha te ya rhie aro gberra avbe ọlọghọmwa na, ra na do wẹẹ, ọni ẹre u ghi mu roro vbe ẹghẹ hia, hia ne u ya aro nọ khẹke ghee ẹre. Adeghẹ u na gha ya aro nọ khẹke ghee emwi, ọ gha ru iyobọ nuẹn ne u ghẹ gha roro emwi vbe odẹ nọ ma gba, u ghi vbe gha mwẹ ọnrẹn vbe orhiọn wẹẹ, vbene a miẹn agbọn, erriọ ẹre a yin ẹnrẹn, ẹghẹ nii, avbe ọlọghọmwa ughughan ni rre uhunmwu otagbọn na i khian ghi ya egbe wọọ ruẹ.
U gha sẹtin zin egbe ọlọghọmwa ne u rhirhi gha ye, vbene u na mwẹ ọnrẹn vbe orhiọn wẹẹ, emwi hia gha maan vbe odaro
Emwi ne u gha sẹtin ru
Gha ya aro nọ khẹke ghee abakuru ruẹ.
E Baibol khare wẹẹ: “Orhunmwu ọkpa i rre agbọn na nọ wa ru emwi ẹse khian nẹi vbe mwẹ abakuru.” (Asan-Ibo 7:20) Ne u na ru emwi eso ni ma khẹke vbe ugbẹnso rhie ma wẹẹ ọmwa nagbọn ẹre u khin, ọ ma rhie ma wẹẹ te u gbokhuẹre.
Vbene u khian ya gha ghee emwi vbe odẹ nọ khẹke: Hia ne u ru afiwerriẹ nọ khẹke, sokpan ghẹ wa ya aro yọ wẹẹ, te u khian wa gha ru emwi nọ gbae vbe ẹghẹ hia. Ọmokpia ọkpa na tie ẹre Caleb khare wẹẹ, “I keghi hia ne I ghẹ gha rhie aro tua abakuru mwẹ, nẹ ghẹ mieke na gbe mwẹ orhiọn mu otọ. Nọghayayerriọ, I ghi hia ne I ya abakuru mwẹ waan ne egbe, I vbe hia ne I gha mwẹ alaghodaro.”
Ghẹ gha ya egbuẹ gie ọmwa ọvbehe.
E Baibol khare wẹẹ: “Wa ghẹ gi ima khian emwa ni ghi tọn egbe mu, ra ne ima gha ru emwi nọ gha si osuan ye uwu ẹbu ima, ra ne ima gha gbọvo egbe.” (Galetia 5:26) Adeghẹ u na gha ghee avbe efoto ne avbe ọse ruẹ mu ye intanẹt ọghe ehe ne iran yo, u sẹtin do gha mu ohu rhunmwuda ne iran ma na tie ruẹ lele egbe. Ẹghẹ nii, u ghi do gha roro ẹre wẹẹ avbe ọse ruẹ ma gele hoẹmwẹ ruẹ.
Vbene u khian ya gha ghee emwi vbe odẹ nọ khẹke: Gha mwẹ ọnrẹn vbe orhiọn wẹẹ, ẹ i re ugie hia ẹre a khian na gha tie ruẹ. U ghi vbe yerre wẹẹ, avbe efoto ne u miẹn vbe intanẹt i khian wa ya ruẹ rẹn emwi hia. Ọmokhuo ọkpa na tie ẹre Alexis khare wẹẹ, “ẹghẹ ne emwa ya sọyẹnmwẹ ẹre iran mobọ mu ye intanẹt. Iran i mobọ mu emwi kẹkan ni sunu vbe ẹdagbọn iran yọ.”
Gha ru emwi nọ gha ya ọfunmwegbe gha rrọọ katekate vbe uwu ẹgbẹe ruẹ.
E Baibol khare wẹẹ: “Adeghẹ emwi nọ gha guẹ ru nọ, hia ne u gha gu emwa hia rrọọ vbe ọfunmwegbe.” (Rom 12:18) U i mwẹ ẹtin ne u khian ya fi uyinmwẹ ọmwa werriẹ, sokpan, emwi ne u gha ru vbe ọmwa gha ru ruẹ emwi rrọọ ruẹ obọ. U gha sẹtin gha re ọmwa nọ gualọ ọfunmwegbe adeghẹ u hoo ne u ru vberriọ.
Vbene u khian ya gha ghee emwi vbe odẹ nọ khẹke: Hia ne u ghẹ gha ru emwi nọ gha si ọlọghọmwa ye uwu ẹgbẹe ruẹ, nọghayayerriọ gha ru emwi nọ gha ya ọfunmwegbe gha rre ẹgbẹe ruẹ, zẹvbe ne u vbe hia ne uwẹ vbe avbe ọse ruẹ gha rrọọ vbe ọfunmwegbe. Ọvbokhan okhuo ọkpa na tie ẹre Melinda khare wẹẹ “A i miẹn nọ fo na, rhunmwuda ma sẹtin ru emwi nọ gha sọnnọ egbe ke ẹghẹ ya fi ẹghẹ. Emwi ne ima gha ghi ru rre obọ ima—deghẹ ima gha ru emwi nọ gha ya ọfunmwegbe gha rrọọ ra ima i khian ru vberriọ.”
Hia ne u gha mwẹ ekhọe ọkpọnmwẹse.
E Baibol khare wẹẹ: “Wa ghi vbe gha re emwa ni kpọnmwẹ ẹse.” (Kọlọsi 3:15) Ma ghaa mwẹ ekhọe ọkpọnmwẹse, ọ gha ru iyobọ ne ima ya rhie aro tua emwi ni khian ẹse vbe ẹdagbọn ima, ne ima gha te ya rhie aro tua emwi ughughan ni sunu vbe ẹdagbọn ima nẹi yẹẹ ima.
Vbene u khian ya gha ghee emwi vbe odẹ nọ khẹke: Yẹrẹro wẹẹ u mwẹ ọlọghọmwa, sokpan ghẹ rhie aro gberra emwi ni maan ni sunu vbe ẹdagbọn ruẹ. Ọmokhuo ọkpa na tie ẹre Rebecca khare wẹẹ, “Vbe ẹdẹgbegbe, I keghi hia ne I gha gbẹn ọnrẹn yotọ emwi nọ maan nọ sunu, rhunmwuda, I hoo ne I gha ye egbe mwẹ re rre wẹẹ, agharhemiẹn wẹẹ I mwẹ ọlọghọmwa, emwi ni maan nibun wa ye rrọọ nọ khẹke ne I gha mu roro.”
Gha ya ẹwaẹn zẹ ọse.
E Baibol khare wẹẹ: “Emwa dan na gu mu obọ ẹre ọ mu uyinmwẹ esi rhia.” (1 Korint 15:33) Deghẹ emwa ne ima gu mu obọ na gha re emwa ni ta ẹmwẹ ekpọ, ne ohu rherhe mu ra ne aro iran kpannọ ugiọnmwerhẹn, uyinmwẹ dan ọghe iran sẹtin vbe do gua ima obọ ro.
Vbene u khian ya gha ghee emwi vbe odẹ nọ khẹke: Ẹghẹ eso sẹtin gha rrọọ ne avbe ọse ruẹ khian na gha rre uwu ọlọghọmwa, rhunmwuda ọni egbe sẹtin wa wọọ iran, iro sẹtin vbe han iran vbe ọwara ẹghẹ eso. Ru iyobọ nọ khẹke ne iran, sokpan ghẹ gia miẹn wẹẹ ọlọghọmwa ọghe iran ẹre u ghi wa mu roro vbe ẹghẹ hia. Ọmokhuo ọkpa na tie ẹre Michelle khare wẹẹ, “Ọ ma khẹke na miẹn wẹẹ, emwa nẹi ya aro nọ khẹke ghee emwi ẹre ima ghi wa gu mu obọ vbe ẹghẹ hia.”
Ruẹ sayọ vbekpa re
E Baibol gi ima rẹn wẹẹ, “ẹghẹ nọ wegbe ne emwi hia khian na gha lọghọ ẹre ima wa ye na.” (2 Timoti 3:1) Ọ lọghọ ruẹ ne u sẹtin ya aro yọ wẹẹ, emwi hia gha maan vbe odaro rhunmwuda ọlọghọmwa ughughan ni rre agbọn na ra? Ya tie “Vbọsiẹ Ne Usẹ Na Gba Ehe Hia?”