Okuo Ne Israel Kevbe Avbe Ẹvbo Ni Lẹga Ẹre Khọn​—De Emwi Ne Baibol Tae?

Emwa vbe ehe hia wa si osi, rhunmwuda okhọn nọ rre uwu ẹkpo United States, Israel, kevbe Iran. Okuo na gha tua sayọ ra? Avbe ẹvbo ọvbehe gha vbe deba okuo na ra? Arriọba emwa nagbọn gha sẹtin ru ẹre ne emwa ghẹ ghi gha khọn ra? Iran gha vbe sẹtin ru ẹre ne ọfunmwegbe gha rre ehe hia vbe agbọn na ra?

Emwa ni ka rẹn vbekpa okuo amagẹdọn ne Baibol sunu yi vbe ebe Arhie Maan, sẹtin gha roro ẹre wẹẹ, okuo ne Israel kevbe avbe ẹvbo ni lẹga ẹre khọn sẹtin gha re omuhẹn ọghe okuo amagẹdọn.

De Emwi Ne Baibol Tae?

Arriọba emwa nagbọn gha sẹtin dobọ okuo ne Israel kevbe avbe ẹvbo ni lẹga ẹre khọn ra?

E Baibol khare wẹẹ: “Wa ghẹ mu ẹtin yan ekaolotu emwa nagbọn; ọmwa nagbọn i ra sẹtin miẹn ruẹn fan.”​—Psalm 146:3.

Ma ma rẹn deghẹ avbe arriọba gha sẹtin ru ẹre, ne ọfunmwegbe gha rre avbe ẹvbo na na khọn okuo na. Vbọrhirhighayehẹ, e Baibol gi ima rẹn wẹẹ, ọkaolotu emwa nagbọn, emwa ni rre ukpo arriọba, kevbe otu rhọkpa i rrọọ nọ gha sẹtin ru ẹre ne emwa ghẹ ghi khọn okuo, iran i khian vbe sẹtin ru ẹre ne ọfunmwegbe gha rrọọ vbe etẹbitẹ. Sokpan, Osanobua ọkpa ẹre ọ khian sẹtin “dobọ okuo yi vbe uhunmwu otagbọn hia.”​—Psalm 46:9.

• U ghaa hoo ne u rẹn sayọ, ya tie ebe Owa Ọkhẹ ne uhunmwuta ọre, “An End to War—How?”

Okuo ne Israel kevbe avbe ẹvbo ni lẹga ẹre khọn, mu ẹmwẹ akhasẹ rhọkpa nọ rre Baibol sẹ ra?

E Baibol khare wẹẹ: “Wa gha họn vbe emwa ghaa khọn okuo, wa gha vbe họn iyẹn ọghe okuo ne emwa khọn vbe ihe ọvbehe. . . . Agbẹnvbo ghi gha gu agbẹnvbo khọn, arriọba ghi vbe gha gu arriọba khọn.”​—Matiu 24:6, 7.

Okhọn nọ rre uwu ẹkpo Israel kevbe ẹvbo ni lẹga ẹre keghi ọkpa vbe usun ama nọ ya ima rẹn wẹẹ, “ẹghẹ ufomwẹ agbọn sẹ nẹ,” kevbe wẹẹ, “ẹdẹ okiekie” ẹre ima ye. (Matiu 24:3; 2 Timoti 3:1) Avbe okuo ne emwa khọn vbe ẹdẹnẹrẹ keghi ya ima rẹn wẹẹ, vbe nẹi khian ghi kpẹẹ gbe Osanobua gha dobọ okuo yi, kevbe wẹẹ, ọ gha vbe sọfurre ye avbe ọlọghọmwa hia ne emwa nagbọn ye.

• U ghaa hoo ne u rẹn sayọ, ya tie uhunmwuta na, “What Is the Sign of ‘the Last Days,’ or ‘End Times’?”

Israel kevbe avbe ẹvbo ni lẹga ẹre, ẹre okuo Amagẹdọn khian na suẹn ra?

E Baibol khare wẹẹ: “Iran keghi si iran koko ye eke ọkpa ne Ivbi e Hibru tie ẹre Amagẹdọn.”​—Arhie Maan 16:16.

Okuo Amagẹdọn i re okuo ne arriọba emwa nagbọn khian gu egbe khọn, ẹ i vbe re okuo nọ khian suẹn vbe Israel kevbe ẹvbo ni lẹga ẹre. Nọghayayerriọ, okuo amagẹdọn keghi re okuo ne Osanobua khian gu arriọba emwa nagbọn hia khọn.

• U ghaa hoo ne u rẹn sayọ, ya tie uhunmwuta na, “What Is the Battle of Armageddon?”

De emwi nọ gha ru iyobọ ne ima vbe osi ghaa si ima?

E Baibol khare wẹẹ: “Wa ghẹ si osi ye emwi rhọkpa, sokpan, wa gha nọ emwi hia ne uwa gualọ vbe obọ Osanobua vbe erhunmwu, wa ghi gha rinmwiaẹn, wa ghi vbe gha kpọnmwẹ ọnrẹn.”​—Filipai 4:6.

E Jehovaha hoo ne ima gha na erhunmwu gi irẹn. Irẹn ẹre ọ gbaroghe ima, rhunmwuda ọni, ọ họn erhunmwu ima, ọ vbe fu ima ẹko rre vbe osi ghaa si ima. (1 Pita 5:7) Odẹ eso nọ ya fu ima ẹko rre, ọre nọ na gi ima rẹn evbọzẹ ne okuo na gba ehe hia. Ọ vbe gi ima rẹn wẹẹ, okuo gha sẹ ufomwẹ, kevbe wẹẹ, irẹn gha do sọfurre ye ọlọghọmwa hia ne ima ye.—Arhie Maan 21:3, 4.

• U ghaa hoo ne u rẹn sayọ vbekpa vbene Osanobua ya ru fu ima ẹko rre, ya tie uhunmwuta na, “You Can Find Words of Comfort in the Bible.”