De Emwi Ne Arriọba Osanobua Khin?
U gha kha wẹẹ . . .
emwi nọ rre ọmwa ẹkokoudu nọ ra?
igiemwi kẹkan nọ ra?
arriọba nọ rre ẹrinmwi nọ ra?
EMWI NE BAIBOL KHARE
“Osanobua nọ rre ẹrinmwi gha muẹn gbọọ arriọba nẹi khian sẹtin guọghua.”—Daniẹl 2:44.
“A rhie ọmokpia ọkpa ne ima nẹ; a gha mu ene arriọba yọ re izabọ.”—Aizaia 9:6, New World Translation.
ODẸ NẸ IYAYI NA KHIAN YA RU IYOBỌ NUẸ
U ghi do gha rre ototọ arriọba nọ gbae, ne egbe gha na rọkhọ ruẹ.—Aizaia 48:17, 18.
U ghi do gha rre agbọn ọgbọn ne u khian na gha mwẹ egberranmwẹ nọ gbae kevbe oghọghọ.—Arhie Maan 21:3, 4.
MA GHA SẸTIN GELE YAEYI EMWI NE BAIBOL KHARE RA?
Ẹẹn, rhunmwuda emwi eva:
Jesu rhiẹre ma emwi ne Arriọba Osanobua khian ru. Jesu maa erhuanegbe ẹre ne iran gha na erhunmwu ne Arriọba Osanobua rre kevbe na ru ahoo ọghe Osanobua vbe otagbọn. (Matiu 6:9, 10) Jesu rhiẹre ma vbene Osanobua khian ya họn erhunmwu nii hẹ.
Vbe Jesu rre agbọn, ọ keghi rhie evbare ne emwa ne ohanmwẹ gbe, ọ mu emwa ni khuọnmwi egbe rran, ọ na vbe huẹn emwa ni wulo kpaegbe! (Matiu 15:29-38; Jọn 11:38-44) Zẹvbe Ọba nọ khian kha vbe Arriọba Osanobua, Jesu ru igiemwi nọ maan yotọ nọ dekaẹn emwi ne Arriọba nii khian ru ne emwa ni rre ototọ re.—Arhie Maan 11:15.
Emwi dan ni sunu vbe agbọn na suigiẹ yọ wẹẹ, Arriọba Osanobua gha rherhe rre. Jesu tae yotọ wẹẹ, a te miẹn wẹẹ Arriọba Osanobua rhie ọfunmwegbe gha die agbọn na, okuo, ohanmwẹ kevbe ugbohiotọ gha si orueghe nọkhua ye agbọn na.—Matiu 24:3, 7.
Ma wa bẹghe avbe ọlọghọmwa na vbe ẹdẹnẹrẹ. Rhunmwuda ọni, ma gha sẹtin gha mwẹ ilẹkẹtin wẹẹ, Arriọba Osanobua gha rherhe sọfurre ye avbe ọlọghọmwa vberriọ hia.
EMWI NỌ KHẸKE NE U MU RORO
De vbene agbọn na khian gha ye hẹ vbe ototọ ukhamwẹ ọghe Arriọba Osanobua?
E Baibol rhie ewanniẹn ye inọta nii vbe ebe PSALM 37:29 kevbe AIZAIA 65:21-23.