Ghẹ Wa Mu Ẹmwẹ E Baibol Rre Vbe Ọwara Ọkpa

Emwi Ne Filip Ru

E VIDIO: E Filip Kporhu Ma Ovbi Ẹtiopia Ọkpa

1. Ghee VIDIO na, ra u ghi tie Iwinna 8:​30, 31. Iyeke ọni, u ghi mu avbe inọta na roro:

1. De vbene Filip ya suẹn gha gu Ovbi Ẹtiopia nii guan hẹ?

2. Odẹ ne Filip ya suẹn gha gu okpia nii guan, a te miẹn wẹẹ ọ kporhu ma rẹn wa deyọ. Vbe a gu kha vberriọ?

Vbe Ima Miẹn Ruẹ Vbe Obọ E Filip?

2. Adeghẹ ima ma na wa mu ẹmwẹ e Baibol rre vbe ọwara ọkpa, vbe ima gha khian kporhu ma ọmwa, orhiọn ọmwa ne ima gu guan ghi sotọ, ọ ghi gha hoo nọ danmwehọ ima.

Ya Egbe Taa E Filip

3. Gi aro ruẹ gha sotọ. Emwi bun ne ima gha sẹtin rẹn vbekpa ọmwa, vbe ima gha bẹghe vbene ugbaro ọre ye hẹ kevbe vbene ọ ya ru hẹ. Wẹ ghee ẹre wẹẹ, ọmwa nii mu egbe nọ ya gu ruẹ guan ra? Adeghẹ u khian ta emwi nọ rre Baibol ma rẹn, u sẹtin wa nọ rẹn wẹẹ, “Wẹ kue rẹn wẹẹ . . . ?” Adeghẹ ọmwa ma na hoo nọ guan ye ẹmwẹ ne u mu rre, ghẹ kpikpi ẹre nọ ru vberriọ.

4. Gha mwẹ izinegbe. Ghẹ wa gha roro ẹre wẹẹ, te ọ wa khẹke ne u mu ẹmwẹ e Baibol rre vbe ọwara ọkpa. Fẹko zin egbe, ne u gualọ ẹghẹ nọ khẹke ne u khian ya ru vberriọ. Ugbẹnso, ọ sẹtin gha re ẹghẹ ne uwẹ vbe ọmwa nii khian ya werriegbe guan.

5. Mu egbe ne u ya fi ẹmwẹ ne u khian ta werriẹ. Ọmwa ne u gu guan sẹtin wa mu ẹmwẹ ọvbehe rre ne u ma te ya aro yi. Ọ ghaa yerriọ, u ghi rhie ọmwa nii ekhọe ghee emwi ne u rẹnrẹn wẹẹ ọ gha ru iyobọ nẹẹn, ọ gha khọnrẹn wẹẹ ẹmwẹ nii lughaẹn ne ne u te mu egbe ẹre rre.