Loo Avbe Abọ Ughughan Ni Rre Ne Ebe Bible Teach Vbe Odẹ Nọ Gha Biẹ Ọmọ Esi
Zẹvbe ne ọmwa ne ima gu ruẹ Baibol ya ruọre emwi ne Baibol gele ma ọmwa re kevbe ọ na gha rhiẹre ye uyinmwẹ ighẹ emwi nọ ruẹ, ọ ghi sẹtin gha mọ ọmọ okọ ọghe orhiọn. (Psm. 1:1-3) Ima gha sẹtin ru iyobọ ne ọmwa ne ima gu ruẹ Baibol ya gha mwẹ alaghodaro adeghẹ ima na gha loo ẹre ẹse avbe abọ ughughan ni rre ne ebe Bible Teach.
Avbe Inọta Ọghe Omuso: Dọmwandẹ uhunmwu ebe keghi mwẹ avbe inọta eso vbe omuhẹn, ne ewanniẹ ọnrẹn rre ne iruẹmwi. U sẹtin nọ avbe inọta na mu roro, ne u ya ru iyobọ nẹ, nọ mieke na yaro ye emwi na khian ruẹ vbe ne iruẹmwi. U sẹtin vbe khama rẹn nọ zẹ ewanniẹ kuẹi ye dọmwandẹ inọta. Adeghẹ ewanniẹ nọ zẹ ma gba, esa i rrọọ ne u wa ya dia re vbe ẹghẹ na nia. Ewanniẹ nọ zẹ, ẹre ọ khian ru iyobọ nuẹ ya rẹn evbọ khẹke ne u niania ma rẹn vbe ne iruẹmwi.—Itan 16:23; 18:13.
Orhiete: Adeghẹ ọmwa ne u gu ruẹ Baibol na rẹn otọre kevbe ọ na vbe miẹn ọnrẹn yi, ighẹ iruẹmwi nọ rre ne uhunmwu ebe, u sẹtin khama rẹn nọ ya tobọre tie ẹmwẹ nọ rre ne orhiete, nọ guan kaan rẹn sayọ ighẹ ne uhunmwu ẹmwẹ nọ rre ne uhunmwu ebe. Vbe u gha ghi dọlegbe rre, u sẹtin loo ovbiẹghẹ kherhe ya ru ogbewerriẹ ne u mieke na rẹn adeghẹ ọ rẹn otọre. Vbọrhirhighayehẹ, u sẹtin loo ẹghẹ eso vbuwe iruẹmwi ọghe uwa, ya ziro yan ne orhiete, ra ako eso vbọ deghẹ ọni ẹre ọ khian maan sẹ, vbene u gha na tie avbe okhuẹn ni rrọọ kevbe u ghi vbe nọ rẹn ọta eso ne u muegbe ẹre ke owa rre.
Ẹkpẹtin Ọghe Ogbewerriẹ: Ne ẹkpẹtin ọghe ogbewerriẹ nọ rre ufomwẹ ọghe dọmwandẹ uhunmwu ebe keghi mwẹ avbe ewanniẹ ọghe avbe inọta ni rre omuso. U sẹtin loo avbe abọ na ya ru ogbewerriẹ ne u ya rẹn adeghẹ ọmwa ne u gu ruẹ emwi rẹn otọre kevbe adeghẹ ọ gha sẹtin rhan otọe avbe olika ẹmwẹ ni rrọọ. Uwa koko tiẹre ladian ighẹ evba gbẹnnẹ ye ẹkpẹtin nii kevbe avbe ako ọghe evbagbẹn nọhuanrẹn ni lelẹe. Vbe iyeke ọni, u ghi khama ọmwa ne u gu ruẹ emwi nọ loo avbe ako ọghe evbagbẹn nọhuanrẹn ya rhan otọre evbọzẹ ne ọ na yayi wẹẹ emwi na gbẹnnẹ ye ẹkpẹtin nii ighẹ ẹmwata nọ.—Iwinna 17:2, 3.