Ghẹ Miamia Ya Na Erhunmwu Ne Etẹn Ni Werriẹ Aro Daa Ukpokpo

E Baibol tae yotọ wẹẹ Setan gha kpokpo ima nọ mieke na mu idobo ye iwinna ikporhu iyẹn nọma ọghe ima. (Jọn 15:20; Arhie 12:17) De vbene ima khian ya ru iyobọ ne etẹn ima ni werriẹ aro daa ukpokpo vbe otọ ọvbehe? Ma sẹtin na erhunmwu ne iran. “Erhunmwu ọmwa ẹmwata wa mwẹ ẹtin ne a ya winna iwinna ẹtin ẹsẹse.”—Jems 5:16.

De emwi ne ima gha sẹtin nọ vbe erhunmwu? Ma sẹtin nọ e Jehova nọ rhie udinmwẹ ne etẹn ima ne ohan ghẹ mu iran. (Aiz 41:10-13) Ma sẹtin vbe na erhunmwu, ne avbe arriọba gha ya aro nọ maan ghee iwinna ikporhu iyẹn nọma ọghe ima, ‘ne ima miẹn ehe na gha mwẹ arrọọ ne khuẹrhẹ kevbe ọfunmwegbe.’—1 Tim 2:1, 2.

Vbe ẹghẹ ne Pọl kevbe Pita ya werriẹ aro daa ukpokpo, Ivbiotu e Kristi ni ghaa rrọọ vbe orre nokaro kegha sunu ye eni iran vbe erhunmwu. (Iwinna 12:5; Rom 15:30, 31) A gha wẹẹ ima ma wa rẹn eni etẹn hia ni werriẹ daa ukpokpo, ima gha sẹtin sunu ye iko ọghe iran, ra ẹvbo ne iran ye vbe ima gha na erhunmwu ra?

Gbẹn ọnrẹn yotọ ẹvbo ne iran ye ighẹ etẹn ima ni werriẹ aro daa ukpokpo nu hoo nu na erhunmwu na.