RHIEGBE YE IWINNA IKPORHU IYẸN NỌ MAAN | EMWI NỌ GHA YA RUẸ GHA SỌYẸNMWẸ IWINNA IKPORHU SAYỌ
Gha Loo Avbe Emadogua Na Ya Ru Ezanzan
E Jehova keghi kpemehe emadogua ni ru iyobọ ne ima ya gha maa emwa emwi vbe odẹ nọ dagbẹn. Avbe emadogua na keghi re avbe vidio, asobọrrie, ebe iyẹn, ebe ẹmu, ebe kevbe nọ ghi ru ekpataki sẹ nọ re Baibol. (2 Tim 3:16) Ọ vbe kpemehe avbe emadogua na ya ru ezanzan nọ ru iyobọ ne ima ya gha rhan otọ Evbagbẹn Nọhuanrẹn ma emwa. Usun avbe emadogua na ọre, Watchtower Library, JW Library® app, Watchtower ONLINE LIBRARY™, kevbe Research Guide for Jehovah’s Witnesses.
Zẹvbe ne u ya loo avbe emadogua na ya gualọ emwi ewe ọghe orhiọn, te ọyẹnmwẹ khian gha sẹ ruẹ. Hia ne u maa emwa ne u gu ruẹ e Baibol vbene a ya loo avbe emadogua na hẹ. Iran na sẹtin gha tobọ iran gualọ ewanniẹn ne Baibol rhie ye avbe inọta ne iran mwẹ, iran ghi vbe gha sọyẹnmwẹ.
GHEE VIDIO NỌ MWẸ UHUNMWUTA NỌ KHARE WẸẸ GHA SỌYẸNMWẸ IWINNA ỌGHE NA YA EMWA KHIAN ERHUANEGBE KRISTI—MIẸN IYOBỌ ỌGHE JEHOVA YI—GHA LOO AVBE EMADOGUA NA YA RU EZANZAN, IYEKE ỌNI, A GHI ZẸ EWANNIẸN YE AVBE INỌTA NA:
De emwi ne Jade ta, nọ rhie ẹre ma wẹẹ ọ ma yayi wẹẹ Ayi rrọọ nọ yi emwi hia?
De eke ne Neeta na miẹn ayahọmwaehọ eso vbekpa ẹmwẹ na?
Ma gha gualọ emwi ewe ọghe orhiọn, ma na vbe gi emwa ọvbehe rẹn vbekpa re, te ima khian gha sọyẹnmwẹ
De vbene Neeta ya rẹn ayahọmwaehọ nọ gha gele ru iyobọ ne Jade?
De vbene ọ ghaa ye Neeta hẹ vbe ekhọe, vbe ọ loo avbe emadogua na ya ru ezanzan?