UYINMWẸ ỌGHE IMA NE IVBIOTU E KRISTI
Avbe Ọsuohuan Ni Ru Iyobọ Ne Emwa Ọghe Jehova
Emwa nibun i ya aro nọ maan ghee emwa ni rre ukpo ọdakha. Ẹi re ẹmwẹ iran, rhunmwuda ke otọ gha dee, te emwa ni rre ukpo ọdakha wa loo asẹ ne iran mwẹ ya ru ọghe enegbe iran. (Mai 7:3) Ma ghọghọ wẹẹ, te a wa ma ediọn ni rre iko emwi, ne iran mieke na gha loo asẹ ne iran mwẹ, ya ru iyobọ ne emwa ọghe Jehova.—Ẹst 10:3; Mat 20:25, 26.
Te ediọn wa lughaẹn ne emwa ni rre ukpo ọdakha vbe agbọn na. Ahoẹmwọmwa ne iran mwẹ ne Jehova kevbe emwa rẹn, ẹre ọ gu iran kpa ya ru iwinna ne iran ru. (Jọn 21:16; 1 Pit 5:1-3) Avbe ediọn wa ru emwi ne Jesu tae, iran ru emwi nọ gha ya edọmwadẹ etẹn rẹn wẹẹ, ẹgbẹe ọghe Jehova ẹre iran gele ye, iran vbe ru iyobọ ne iran ya sikẹ e Jehova. Ẹghẹ hia, ẹre iran ya rhie igiọdu ne eguọmwadia e Jehova, erriọ iran vbe ya ru iyobọ ne iran vbe iran ghaa khuọnmwi ra vbe emwi nọ wegbe gha sunu. Deghẹ u na gha gualọ iyobọ, u sẹtin gu ọdiọn nọ rre iko ruẹ guan.—Jems 5:14.
GHEE VIDIO NỌ MWẸ UHUNMWUTA NỌ KHARE WẸẸ, AVBE ỌSUOHUAN NI GBAROGHE OGHẸN OHUAN ỌGHE OSANOBUA, IYEKE ỌNI, A GHI ZẸ EWANNIẸN YE AVBE INỌTA NA:
De vbene avbe ediọn ya ru iyobọ ne Mariana hẹ?
De vbene avbe ediọn ya ru iyobọ ne Elias hẹ?
De aro ne u ghi ya ghee iwinna ne ediọn ru, iyeke vbe u ghi ghee vidio na nẹ?