Gi Ahoẹmwọmwa Gua Ruẹ Kpa Ya Gha Kporhu!

1. De emwi ne ima ruẹ re vbe iko ne ima do vbe ukpo ukpo ọghe 2023?

VBE iko ne ima do vbe ukpo ukpo ọghe 2023,a a keghi guan kaẹn odẹ ne ima ghi ya rẹn otọ emwi eso kevbe iyẹn eso nọ gbe ọmwa otiti nọ dekaẹn iwinna ikporhu iyẹn nọ maan ọghe ima. Vbe igiemwi, ma keghi do ruẹ ọre wẹẹ, uhiẹn vba gha ghi guọghọ e Babilọn Nọkhua nẹ, ẹkpotọ gha kie ne emwa eso ya do ga e Jehova. A na vbe yae wewe wẹẹ, ke November 2023 kpa etẹn ni ya iyẹn wewe i khian ghi gha rhie ughaẹdẹ ne iran ya winna vbe ikporhu ladian. Te ọna ghi rhie ma wẹẹ, iwinna ikporhu ma ghi ru ekpataki vbe nọ ka ye ra, ra ọ ma ghi de ọghe ẹgiẹgiẹ ra? Hiehie!

2. Vbọzẹ ne iwinna ikporhu ọghe ima na de ọghe ẹgiẹgiẹ vbene ẹdẹ ya gbe? (Mak 13:10)

² Vbene ẹdẹ ya gbe, erriọ iwinna ikporhu iyẹn nọ maan ya de ọghe ẹgiẹgiẹ sayọ. Vbọzẹ? Rhunmwuda, ẹghẹ i ghi rrọọ. Gi ima zẹ iro yan emwi ne Jesu tae vbekpa iwinna ikporhu vbe ẹdẹ okiekie ne ima ye na. (Tie Mak 13:10.) Zẹvbe nọ rre ebe Matiu, e Jesu khare wẹẹ, a gha kporhu iyẹn nọ maan la uhunmwu otagbọn hia, a te miẹn wẹẹ, “ufomwẹ” rre. (Mat 24:14) Ẹghẹ na khian ya mu agbọn Esu na sẹ ufomwẹ ẹre Jesu ghaa guan kaẹn. E Jehova mwamwa “ẹdẹ . . . kevbe ẹghẹ” ne emwi hia khian ya sunu. (Mat 24:36; 25:13; Iwinna 1:7) Vbene ẹdẹ ya gbe, erriọ ima ya sikẹ ẹdẹ ne ẹdẹrriọ. (Rom 13:11) Sokpan, te ima khian ye gha kporhu, a te miẹn wẹẹ, ẹghẹ nii sẹ.

3. Vbọ ya ima kporhu?

³ Zẹvbe ne ima ya mu ẹmwẹ iwinna ikporhu roro, ọ mwẹ inọta eso nọ vbe khẹke ne ima gha mu roro, vbe na ghee: Vbọzẹ ne ima na kporhu iyẹn nọ maan? Rhunmwuda ahoẹmwọmwa ne ima mwẹ ẹre nọ. Ma ghaa kporhu te ima rhie ẹre ma wẹẹ, ẹmwẹ ne ima kporhu ẹre yẹẹ ima, ma hoẹmwẹ emwa ne ima kporhu ma, kevbe nọ ghi sẹ ehia, ma hoẹmwẹ e Jehova kevbe eni ẹnrẹn. Gi ima zẹ iro yan avbe emwi na ọkade ọkade.

MA KPORHU RHUNMWUDA, ẸMWẸ NE IMA KPORHU ẸRE YẸẸ IMA

4. Vbọ ye ima hẹ vbe ima gha họn iyẹn nọ maan?

⁴ U ye yerre vbe nọ ghaa ye ruẹ hẹ vbe u họn iyẹn nọ maan ra, ọ gha kẹ, ọmwa vbe uwu ẹgbẹe ruẹ biẹ, ra iwinna ne u gualọ ke ẹghẹ gha dee sẹ ruẹ obọ? Vbe nai na gbawawẹ, ọ gha wa gbe ruẹ otiti sẹrriọ wẹẹ, u ghi gha hoo ne u tama emwa ruẹ vbe uwu ẹgbẹe kevbe avbe ọse ruẹ. Erriọ vbe gha ye ruẹ ra, vbe u họn iyẹn nọ maan nọ dekaẹn Arriọba Osanobua, nọ re iyẹn nọ ghi maan sẹ?

5. Vbọ ghaa ye ruẹ hẹ vbe u da ruẹ vbekpa ẹmwata ni rre uwu Ẹmwẹ ọghe Osanobua? (Vbe ya ghee efoto.)

⁵ Muẹn roro vbe nọ ghaa ye ruẹ hẹ vbe u ka wa họn iyẹn nọ maan nọ rre uwu Ẹmwẹ ọghe Osanobua. U keghi do ruẹ ọre wẹẹ, Erhaa nọ rre ẹrinmwi hoẹmwẹ ruẹ, ọ hoo ne u do gha re ọkpa vbe usun emwa ni gae, ọ vbe yan wẹẹ, irẹn gha rhie obalọ kevbe usẹ hin agbọn na rre, vbe deba ọni, u na vbe do ruẹ ọre wẹẹ, u gha sẹtin gha mwẹ ọnrẹn vbe ayayẹro wẹẹ, u gha dọlegbe miẹn emwa ruẹ ni wulo vbe agbọn ọgbọn, u keghi do rẹn ena hia kevbe enibun ọvbehe. (Mak 10:​29, 30; Jọn 5:​28, 29; Rom 8:​38, 39; Arhie 21:​3, 4) Avbe emwi ne u ruẹ ọre na, keghi ya ruẹ gha sọyẹnmwẹ. (Luk 24:32) Emwi ne u ghaa ruẹ wa gha yẹẹ ruẹ, u na vbe gha hoo ne u tama emwa ọvbehe vbekpa ẹre!​—Yae tae Jerimaia 20:9.

6. Vbua miẹn ruẹ vbe okha ọghe Ernest kevbe Rose?

⁶ Gia guan kaẹn igiemwi ọkpa. Ọ mwẹ ọtẹn nokpia ọkpa na tie ẹre Ernest,b ukpo igbe ẹre ọ ye vbe erhae wu. Ernest khare wẹẹ: “I na ghi gha nọ egbe mwẹ wẹẹ: ‘Te erha mwẹ ghi rrie ẹrinmwi ra? Ra ẹ i ghi rrọọ hiehie?’ Ọ wa gha daa mwẹ vbe I gha miẹn emọ ọvbehe ni ye mwẹ erha.” Ẹghẹ hia ẹre Ernest wa ya gha yo idin ọghe erhae vbe itẹ, vbe ehe na re ẹre yi, ọ gha na erhunmwu, ọ ghi wẹẹ: “Osanobua, lahọ, I hoo ne I rẹn ehe ne erha mwẹ ye.” Ọ ghi rrie odẹ ukpo 17 ne erha Ernest ya wu, ọ keghi miẹn Avbe Osẹe Jehova, iran na we iran gha hoo ne iran gha gu ẹre ruẹ e Baibol, Ernest keghi kue yọ. Ọ keghi wa kpa ẹre odin vbe ọ ghi do ruẹ ọre wẹẹ, emwa ni wulo nẹ yevbe na ghee ọmwa nọ vbiẹ ovbe nọ dinmwi, iran ma rẹn emwi rhọkpa, kevbe wẹẹ, e Baibol khare we arhiọkpaegbe a gha rrọọ. (Asan 9:​5, 10; Iwinna 24:15) Vbe okiekie, ọ keghi do miẹn ewanniẹn ọghe avbe inọta ni wa gha kpokpo ẹre orhiọn ke ẹghẹ gha dee! Te emwi hia ne Ernest wa gha ruẹ vbe uwu e Baibol wa gha gbe ẹre otiti. Ọvbokhan rẹn ighẹ e Rose na vbe do deba ẹre gha ruẹ e Baibol, te ọvbokhan rẹn wa vbe gbọyẹmwẹ ye emwi nọ ghaa ruẹ. Vbọ ghi rre ukpo 1978 iran keghi dinmwiamẹ. Iran keghi ya ekhọe hia gha gu ẹgbẹe ọghe iran, avbe ọse iran kevbe emwa ọvbehe guan vbekpa emwi ne iran yayi. Ọ gberra orhunmwu 70 ne Ernest vbe Rose he ru iyobọ na, ya do rẹn e Jehova, ne iran vbe dinmwiamẹ.

7. Vbọ khian sunu deghẹ emwi ne ima ruẹ vbe Baibol na gele sẹ ima ekhọe? (Luk 6:45)

⁷ Ọ wa gele dewarorua wẹẹ, emwi ne ima ruẹ vbe Baibol gha gele sẹ ima ekhọe, ma ghi gha hoo ne ima tama emwa ọvbehe vbekpa ẹre. (Tie Luk 6:45.) Ma ghi do yevbe na ghee erhuanegbe Jesu ni ghaa rrọọ vbe ẹghẹ nẹdẹ, ni khare wẹẹ: “Ma i khian sẹtin da unu yi, ne ima ghẹ ghi ta emwi ne aro ima sẹ, kevbe ne ehọ ima họẹn.” (Iwinna 4:20) Te emwi ne ima ruẹ wa gele gbe ima otiti sẹrriọ wẹẹ, ma hoo ne ima tama emwa nibun vbekpa ẹre.

MA KPORHU RHUNMWUDA MA HOẸMWẸ EMWA

8. Vbọ ya ima hoo ne ima gha kporhu ma emwa? (Ya ghee ẹkpẹti nọ khare wẹẹ, “Hoẹmwẹ Emwa​—Ya Emwa Khian Erhuanegbe.”) (Vbe ya ghee efoto.)

⁸ Ma wa hoẹmwẹ emwa vbene Jehova kevbe Ovbi ẹre wa vbe ya hoẹmwẹ iran. (Itan 8:31; Jọn 3:16) Ma wa mwẹ agiẹngiẹn daa emwa ni “ma . . . rẹn Osanobua” ni ma vbe “rẹn ehe ne [iran] rrie ra ehe ne [iran] ke dee.” (Ẹfis 2:12) Rhunmwuda ọlọghọmwa ne iran werriẹ aro daa, te iran yevbe emwa ni dinmwi vbe uwu odin amẹ, sokpan ma mwẹ emwi ne ima gha ya sẹtin sinmwin iran, ọni ọre iyẹn nọ maan. Ahoẹmwọmwa kevbe agiẹngiẹn ne ima mwẹ ne egbe emwa vbenian, ẹre ọ zẹe ne ima na hia vbe odẹ ke odẹ ne ima kporhu iyẹn nọ maan ma iran. Iyẹn ne kpataki na gha sẹtin rhie ayayẹro ne iran, ọ ghi ya iran gha mwẹ arrọọ nọ ghi maan sẹ nian, ọ ghi vbe ya iran gha mwẹ ilẹkẹtin wẹẹ, “arrọọ ọghe ẹmwata” gha sẹ iran obọ, ọni ọre arrọọ ọghe etẹbitẹ vbe agbọn ọghe ọgbọn.​—1 Tim 6:19.

9. De emwi ne ima ya ya obọ sekhae ne emwa wẹẹ, ọ khian sunu vbe odaro, kevbe wẹẹ vbọzẹ? (Ẹzikiẹl 33:​7, 8)

⁹ Ahoẹmwọmwa ne ima mwẹ ne emwa, ẹre ọ vbe zẹe ne ima na ya obọ sekhae ne iran wẹẹ, agbọn dan na gha rherhe sẹ ufomwẹ. (Tie Ẹzikiẹl 33:​7, 8.) Ma mwẹ ẹnina daa emwa hia, ya sẹ egbe emwa ima vbe uwu ẹgbẹe nẹi ga e Jehova. Emwa nibun wa bibi khian, sokpan iran ma zẹdẹ rẹn emwi nọ khian sunu vbe odaro, iran ma rẹn wẹẹ, orueghe nọkhua dee, “egbe na ma he miẹn ẹdẹ, ke na ya bu agbọn tu agbọn gha dee, a i khian ghi vbe dọlegbe miẹn egbọre.” (Mat 24:21) Ma hoo ne iran rẹn emwi nọ khian sunu vbe ẹghẹ ne Jehova khian ya bu ohiẹn, a gha wabọ ugamwẹ ohoghe rua, iyeke ọni, Osanobua ghi ya okuo Amagẹdọn ya guọghọ agbọn dan na rua. (Arhie 16:​14, 16; 17:​16, 17; 19:​11, 19, 20) Erhunmwu ne ima na ọre ne emwa nibun miẹn iyẹn nọ maan yi, ne iran vbe do deba ima ga e Jehova. Sokpan, vbọ khian sunu daa emwa ni ma miẹn iyẹn nọ maan na yi, uhiẹn ya sẹ egbe emwa ima vbe uwu ẹgbẹe?

10. Vbọzẹ nọ na ru ekpataki ne ima ye gha ya obọ sekhae ne emwa?

¹⁰ Zẹvbe ne ima ruẹ ọre vbe ako iruẹmwi nọ lae, a sẹtin miẹn wẹẹ, e Jehova gha tohan emwa ni roro iro fi uyinmwẹ werriẹ, vbe iran gha ghi bẹghe oguọghua ọghe Babilọn Nọkhua. Adeghẹ erriọ nọ, te ọ wa kakabọ ru ekpataki vbe ẹghẹ na nian ne ima ye gha ya obọ sekhae ne emwa. Muẹn roro: Ẹghẹ nii gha sẹ nẹ, iran sẹtin ye ẹre rre ẹmwẹ ne ima tama iran nian. (Yae taa Ẹzikiẹl 33:33.) Ọ gha kẹ, iran sẹtin ya yerre ẹmwẹ ne ima ta vbe ima ya obọ sekhae ne iran, iyeke ọni, iran sẹtin do deba ima ga e Jehova, a te miẹn wẹẹ, ọ la. Vbe na ghee eseghan nọ ghaa rre Filipai nọ roro iro fi uyinmwẹ werriẹ vbe iyeke “ugbohiotọ nọkhua” ghi sunu nẹ, emwa eso ni ma rhie ehọ ne ima ta yi nian, sẹtin roro iro fi uyinmwẹ werriẹ vbe iran gha ghi bẹghe odẹ na khian ya guọghọ e Babilọn Nọkhua rua. Ọ gha wa kpa iran odin.​—Iwinna 16:​25-34.

MA KPORHU RHUNMWUDA MA HOẸMWẸ E JEHOVA KEVBE ENI ẸNRẸN

11. Vbe ima ya rhie uyi, ọghọ kevbe ẹtin ọghe ima ne Jehova hẹ? (Arhie Maan 4:11) (Vbe ya ghee avbe efoto.)

¹¹ Emwi nọ ghi ru ekpataki sẹ nọ ya ima kporhu ọre ne ima na hoẹmwẹ e Jehova kevbe eni ẹnrẹn. Ma keghi ghee ikporhu iyẹn nọ maan zẹvbe odẹ ọkpa ne ima ya rhie urhomwẹ ne Osa ne ima hoẹmwẹ ọnrẹn. (Tie Arhie Maan 4:11.) Ma keghi wa ya ekhọe hia kue yọ wẹẹ, e Jehova ne Osanobua mwa sẹ nọ gha miẹn uyi, ọghọ kevbe ẹtin vbe obọ eguọmwadia ẹre. Ma ghaa ru iyobọ ne emwa ya do yayi wẹẹ, Osanobua ẹre ọ “yi emwi hia” te ima rhie uyi kevbe ọghọ nẹẹn, te ima vbe rhie ẹre ma wẹẹ, rhunmwuda nọ na rhie arrọọ ne ima ẹre ọ zẹe ne ima na rrọọ. Ma ghaa loo ẹghẹ ọghe ima, ẹtin ọghe ima kevbe emwi ne ima mwẹ ya rhiegba ye iwinna ikporhu vbene ẹtin ima sẹ, te ima rhie ẹtin ọghe ima ne Jehova. (Mat 6:33; Luk 13:24; Kọl 3:23) Emwi ne ima ya ọna kha ọre wẹẹ, te ọ wa yẹẹ ima vbe ima ghaa tama emwa vbekpa Osa ne ima họemwẹ ọnrẹn. Te ima wa gele hoo ne ima gha tama emwa ọvbehe vbekpa eni ẹnrẹn kevbe emwi na yae kha. Vbọzẹ?

12. Vbe ima ya kpe eni e Jehova huan vbe ima ghaa kporhu?

¹² Ahoẹmwọmwa ne ima mwẹ ne Jehova ẹre ọ gua ima kpa ya gha kpe eni ẹnrẹn huan. (Mat 6:9) Ma hoo ne ima gi emwa rẹn wẹẹ, ẹmwẹ dan hia fẹẹrẹ ne Setan he ta vbekpa e Jehova i re ẹmwata. (Gẹn 3:​1-5; Job 2:4; Jọn 8:44) Ma ghaa kporhu, ma keghi wa hoo ne ima tama emwa ni gha hoo ne iran danmwehọ vbekpa e Jehova kevbe aro ọmwa nọ gele khin. Ma hoo ne ima gi emwa hia rẹn wẹẹ, emwi na wa mobọ rẹn Osanobua yi ọre ahoẹmwọmwa, Osa nọ bu ohiẹn ata, kevbe nọ khaevbisẹ vbe odẹ nọ gbae ẹre nọ, kevbe wẹẹ Arriọba ọghẹe gha rherhe mu ufomwẹ ye usẹ hia nọ rre agbọn na, ọfunmwegbe kevbe oghọghọ ghi do gha rre ehe hia vbe otagbọn na. (Psm 37:​10, 11, 29; 1 Jọn 4:8) Ma ghaa tama emwa vbekpa avbe emwi na vbe ima ghaa rre ikporhu, te ima kpe eni e Jehova huan. Ọ keghi sẹ ima ọyẹnmwẹ rhunmwuda ne ima na ru emwi nọ khẹke ne ima gha ru zẹvbe Osẹe Jehova. Vbọzẹ ne ima na kha vberriọ?

13. Vbọzẹ ne ima na kha wẹẹ, uyi ẹre a mu ye ima egbe na na tie ima Osẹe Jehova? (Aizaia 43:​10-12)

¹³ E Jehova zẹ ima nẹ, ne ima gha re “osẹe” ọghe irẹn. (Tie Aizaia 43:​10-12.) Vbe ukpo eso nọ gberra, elẹta nọ ke obọ Ẹbu Nọ Su rre keghi kha wẹẹ: “Uyi nọ sẹre ne dọmwadẹ ima mwẹ ọre na na tie ima Osẹe Jehova.”c Vbọzẹ? Gia ru igiemwi yọ. Adeghẹ u gualọ ọmwa nọ khian sẹ osẹe nuẹn vbe ekọtu, ọmwa ne u rẹnrẹn, ne u gba ẹko ẹre kevbe na vbe ta ẹmwẹ ọnrẹn ẹse ẹre u khian zẹ, rhunmwuda u rẹnrẹn wẹẹ, ọmwa vberriọ ẹre emwa khian ya ẹmwẹ ọnrẹn yi. Ne Jehova na zẹ ima ne ima gha re osẹe ọghe irẹn rhie ẹre ma wẹẹ, ọ gele rẹn ima, ọ gba ẹko ima kevbe wẹẹ, ọ yayi wẹẹ ma gha gi emwa ọvbehe rẹn wẹẹ, irẹn ọre Osa ọghe ẹmwata. Ma rẹnrẹn wẹẹ, uyi nọkhua ẹre a mu ye ima egbe ne ima na re Osẹe Jehova, rhunmwuda ọni, ma keghi gi emwa hia rẹn eni Osanobua, ma vbe gi iran rẹn wẹẹ, ohoghe ẹre Esu ta vbekpa e Jehova. Ma ghaa ru ena hia zẹvbe Osẹe Jehova, te ima rhie ẹre ma wẹẹ, vbene a he eni erriọ eni la ghee!​—Psm 83:18; Rom 10:​13-15.

TE IMA KHIAN YE GHA KPORHU YA SẸ UFOMWẸ

14. De emwi eso nọ khian sunu vbe odaro nọ wa gbe ima otiti vbe ima ghaa muẹn roro?

¹⁴ Te ọ wa gbe ima otiti vbe ima ghaa muẹn roro emwi nọ khian sunu vbe nẹi khian ghi kpẹẹ gbe! Vbe ẹtin e Jehova, ma ya aro yọ wẹẹ, emwa nibun gha miẹn ẹmwata na yi a te miẹn wẹẹ, orueghe nọkhua suẹn rẹn. Te ọ wa gbe ima otiti ne ima na rẹn wẹẹ, uhiẹn vbe orueghe nọkhua gha suẹn nẹ, nọ re ẹghẹ nọ ghi wegbe sẹ, a sẹtin miẹn wẹẹ, emwa eso gha ye fi werriẹ do deba ima gha ga e Jehova!​—Iwinna 13:48.

15-16. De emwi ne ima khian ye gha ru, de ẹghẹ ne ima khian ghi ya dobọ yi?

¹⁵ Iwinna wa rre ima urhu ne ima khian ru. A i khian ghi dọlegbe ru iwinna na vbe odaro, iwinna na guan kaẹn na ọre, iwinna ikporhu iyẹn nọ maan ọghe Arriọba Osanobua na kpee vbe uhunmwu otagbọn hia. Ọrheyerriọ, te ọ khẹke ne ima ye gha ya obọ sekhae ne emwa. Te ọ khẹke ne emwa rẹn wẹẹ, ufomwẹ ọghe agbọn dan na sikẹ otọ fo nẹ. Ọ gha ghi sẹ ẹghẹ ibuohiẹn, iran ghi do bẹghe ẹre wẹẹ, obọ e Jehova ẹre ẹmwẹ ne ima ghaa kporhu ẹre ke rre.​—Ẹzik 38:23.

¹⁶ De emwi ne ima ghi hoo ne ima ru nian? Iyẹn ne ima kporhu ẹre yẹẹ ima, ma hoẹmwẹ emwa ọvbehe, kevbe nọ ghi sẹ ehia, ma hoẹmwẹ e Jehova kevbe eni ẹnrẹn, ọna ẹre ọ si ẹre na na miẹn wẹẹ, ọ te sẹ “ẹghẹ ne Jehova khare,” te ima khian ye gha ya izọghae kporhu rhunmwuda ma rẹnrẹn wẹẹ, ẹghẹ kherhe ẹre ọ ghi kẹ!