WA GHA BODẸ!
Okuo Na Khọn Vbe Ukraine Ya Evbare Fian Kanmwa Vbe Uhunmwu Otagbọn Hia
Vbe May 19, 2022, avbe ukọ arriọba ni gberra 75 ni rre ukpo nọ yo keghi tama otu na tie ẹre United Nations Security Council wẹẹ “Evbare fian kanmwa vbe uhunmwu otagbọn na rhunmwuda e COVID-19 kevbe afiwerriẹ nọ rhiegbe ma vbe odẹ ne amẹ ya rhọọ kevbe odẹ ne ovẹn ya yunmwu, sokpan, rhunmwuda okuo na khọn vbe Ukraine, ọ mwẹ eke nọ gha sẹ ban, emwa i khian ghi zẹdẹ gha miẹn evbare re vbe ihe eso.” Vbọ ma he kpẹẹ vba, ebe iyẹn na tie ẹre The Economist keghi kha wẹẹ, “ọlọghọmwa nibun rre uhunmwu otagbọn na nẹ, sokpan rhunmwuda okuo na khọn vbe Ukraine, te emwa nibun khian ghi wa do gha rre ohanmwẹ.” E Baibol ka tae yotọ nẹ wẹẹ, te evbare khian wa fian kanmwa vbe ẹghẹ ne ima ye na, ọ vbe tama ima emwi nọ gha ru iyobọ ne ima.
E Baibol ka tae yotọ wẹẹ te evbare khian fian kanmwa
Jesu tae yotọ wẹẹ: “Agbẹnvbo ọkpa gha gu agbẹnvbo ọvbehe khọn, arriọba ọkpa ghi vbe gha gu arriọba ọvbehe khọn, evbare ghi fian kanmwa.”—Matiu 24:7.
Ebe Arhie Maan guan kaẹn ikpia enẹ ni hin ẹsin khian. Ikpia enẹ na mwẹ emwi ne iran demu. Ọkpa vbe uwu iran mudia ye ihe okuo. Ọmwa nọ hin ẹsin lelẹe dee vbe iyeke keghi mudia ye ihe ukhunmwu, ọni ọre ẹghẹ ne evbare khian ya kakabọ fian kanmwa, ọ ghi vbe do khian aghanghan. “I ghi tọn aro mu, ya ghee ẹsin nekhui. Ọmwa nọ hin ẹnrẹn keghi viọ esikel na ya mwa emwi eva mwẹ obọ. I keghi họn emwi nọ yevbe urhu ọmwa . . . ọ wẹẹ, ‘Ovbi ọduẹki ọka ọkpa ẹre a khian ya gha ha ọmwa osa iwinna ẹdẹ hoho, obọ eha vbe uwu enẹ ovbi ọduẹki ọka irhuarhua, ẹre a khian ya gha ha ọmwa osa iwinna ẹdẹ hoho.’”—Arhie Maan 6:5, 6, Contemporary English Version.
E Baibol tae yotọ wẹẹ te evbare khian fian kanmwa, ọna gele wa sunu vbe ẹghẹ ne ima ye na. Ẹghẹ ne ima ye na ẹre Baibol tie ẹre “ẹdẹ okiekie.” (2 Timoti 3:1) U ghaa hoo ne u rẹn sayọ vbekpa “ẹdẹ okiekie” kevbe ikpia enẹ ni hin ẹsin khian ne ebe Arhie Maan guan kaẹn, ya ghee vidio nọ mwẹ uhunmwuta nọ khare wẹẹ Agbọn Fi Werriẹ Ke Ukpo 1914 Gha Dee, u ghi vbe ya tie uhunmwuta na, “The Four Horsemen—Who Are They?”
Vbene Baibol gha ya sẹtin ru iyobọ ne ima hẹ
Ibude eso rre uwu e Baibol nọ gha ru iyobọ ne ima vbe ima ghaa rre uwu ọlọghọmwa nọ wegbe, vbe igiemwi deghẹ evbare na fian kanmwa ra deghẹ ọ na khian aghanghan. U gha miẹn ibude eso na guan kaẹn na, vbe uhunmwuta nọ khare wẹẹ, “How to Live on Less.”
E Baibol vbe gi ima rẹn wẹẹ, emwi hia gha maan vbe odaro. Ọ tama ima wẹẹ vbe odaro, “te evbare khian kpọ vbe agbọn na” kevbe wẹẹ, te emwa hia khian gha miẹn evbare re, ẹko ghi vbe vuọn iran. (Psalm 72:16) Deghẹ u hoo ne u rẹn emwi nibun ne Baibol tama ima wẹẹ ọ gha sunu vbe odaro, kevbe evbọzẹe ne u gha na sẹtin ya ẹmwẹ nọ tae yi, ya tie uhunmwuta nọ khare wẹẹ, “A Real Hope for a Better Tomorrow.”