Emwi Nọ Khian Ya Ima Gha Mwẹ Ayayẹro Vbe Ukpo 2023—De Emwi Ne Baibol Tae Vbekpa Ọna?

Zẹvbe ne ima ya la ukpo 2023 na, ma wa hoo ne emwi gha maan ne ima kevbe ẹgbẹe ọghe ima. Vbọzẹ ne ima gha na ya aro yọ wẹẹ, emwi hia gha maan?

E Baibol ya ima rẹn wẹẹ emwi hia gha maan vbe odaro

E Baibol tama ima wẹẹ, ọlọghọmwa hia ni rre agbọn na vbe ẹdẹnẹrẹ keghi re ọghe ovbi ẹghẹ kherhe, kevbe wẹẹ, ọ gha rherhe la hin otọ rre. Uhiẹn, emwi hia ni rre uwu e Baibol, “te a gbẹnnẹ ọnrẹn na ya ma ima emwi, na mieke na miẹn wẹẹ, rhunmwuda. . . ifuẹko ne Ebe Nọhuanrẹn rhie ne ọmwa, ma ghi gha mwẹ emwi ne ima ya aro kọ.”—Rom 15:4.

• Deghẹ u hoo ne u rẹn vbekpa emwi ne Baibol wẹẹ ọ gha sunu vbe odaro, tie uhunmwuta na nọ khare wẹẹ, “A Real Hope for a Better Tomorrow.”

Emwi ne u ya aro yi gha sẹtin ru iyobọ nuẹn nia

Te emwi hia ne Baibol wẹẹ ọ gha sunu vbe odaro ya ima deziẹn, “zẹvbe ne adẹn ematọn ya okọ deziẹn vbe uwu ẹzẹ.” (Hibru 6:19) Emwi ne ima ya aro yi gha sẹtin ru iyobọ ne ima ya zin egbe ọlọghọmwa ne ima ye nia, ọ gha ya ima rẹn wẹẹ emwi hia gha maan vbe odaro, ọ ghi vbe ya ima gha ghọghọ. Vbe igiemwi:

• Deghẹ u hoo ne u rẹn vbene Baibol ya ru iyobọ ne okpia ọkpa nọ ghaa da ayọn gbe egbe, ghee vidio na, Egbe Agbọn Ne I Ghaa Ye Na Wa Wọọ Mwẹ.

• Deghẹ u hoo ne u rẹn vbene emwi ne Baibol wẹẹ ọ khian sunu vbe odaro, gha ya ru iyobọ ne ima hẹ vbe ọmwa ne ima hoẹmwẹ ọnrẹn gha wu, ghee vidio na, Emwi Nọ Gha Ru Iyobọ Ne Emwa Ni Khiẹ.

Gha ru emwi nọ gha ya ruẹ yayi wẹẹ, emwi hia gha maan vbe odaro

Emwa nibun te wa hoo ne emwi gha maan ne iran, sokpan iran ma rẹn deghẹ emwi ne iran ya aro yi gha gele sunu. Sokpan, ẹi re erriọ eyan ni rre Baibol ye. Vbọzẹ? Rhunmwuda, e Jehovaa tobọre nọ re “Osanobua nẹi sẹtin ta ohoghe,” ẹre ọ ru avbe eyan na. (Taitọs 1:2) E Jehova ọkpa ẹre ọ mwẹ ẹtin nọ khian ya mu eyan ọghẹe hia sẹ; ọ gha sẹtin ru emwi ke emwi “nọ khọn rẹn.”—Psalm 135:5, 6.

Ma hoo ne u do ruẹ vbekpa emwi ne Baibol wẹẹ ọ khian sunu vbe odaro. U gha sẹtin yayi wẹẹ, emwi ne Baibol tae gha gele sunu, deghẹ u na “gbarokotọ gha tie Ebe Nọhuanrẹn.” (Iwinna 17:11) Rhunmwuda ọni, kie ẹkpotọ yọ, ne ima do gha gu uwẹ ruẹ e Baibol vbe ọghe ọhẹ. Zẹvbe ne u ya la ukpo 2023, u gha sẹtin gha mwẹ ilẹkẹtin wẹẹ, emwi hia gha maan vbe odaro!