IRUẸMWI 02

Emwi Ne Baibol Tae Vbekpa Vbene Emwi Khian Gha Ye Hẹ Vbe Odaro

Na Printi Ladian

Emwa nibun keghi werriẹ aro daa ọlọghọmwa ughughan nọ si akhiẹ, osi kevbe obalọ ye iran egbe. Uwẹ he werriẹ aro daa ọlọghọmwa vberriọ ẹdẹ ra? Ọ mwẹ emianmwẹ ne uwẹ khuọnmwi ra? Ọ mwẹ ọmwa ne u hoẹmwẹ ọnrẹn nọ wu ra? U sẹtin gha nọ egbuẹ wẹẹ, ‘Erriọ agbọn na khian wa gha ye khian ra?’ Ewanniẹn ne Baibol rhie ye inọta na, keghi re nọ fu ọmwa ẹko rre.

1. De emwi ne Baibol tae, nọ ya ima rẹn wẹẹ emwi hia gha dunna vbe odaro?

E Baibol gi ima rẹn evbọzẹe ne emwa nagbọn na rri oya. Ọ vbe gi ima rẹn wẹẹ, emwi hia gha dunna vbe nẹi khian ghi kpẹẹ gbe. Emwi nọ fu ọmwa ẹko rre ẹre ọna wa khin! E Baibol tama ima wẹẹ, “agbọn nọ maan” dee vbe odaro. (Tie Jerimaia 29:11, 12.) Ọna ẹre ọ rhie ifuẹko ne ima, ẹre ọ zẹe ighẹ ima sẹtin zin egbe ọlọghọmwa ne ima werriẹ aro daa nia, ẹre ọ vbe ya ima mwẹ ilẹkẹtin wẹẹ, emwi hia gha dunna vbe odaro.

2. De vbene Baibol wẹẹ agbọn na khian gha ye hẹ vbe odaro?

E Baibol tama ima wẹẹ, ẹghẹ dee ne ‘uwu i khian ghi ya gha rrọọ, ra akhiẹ ra obalọ.’ (Tie Arhie Maan 21:4.) Avbe ọlọghọmwa ni ya iro han ọmwa vbe na ghee ogue, uyinmwẹ agbọmwa ekueku, emianmwẹ kevbe uwu i khian ghi gha rrọọ. E Baibol gi ima rẹn wẹẹ, uhunmwu otagbọn na gha khian e Paradais; ẹghẹ nii, emwa nagbọn ghi gha sọyẹnmwẹ arrọọ vbe etẹbitẹ.

3. Vbọ khian ya ruẹ yayi wẹẹ, emwi ne Baibol tae gha gele sunu?

Emwa nibun te wa hoo ne emwi dunna vbe arrọọ ọghe iran, vbọrhirhighayehẹ, iran ma rẹn deghẹ ọ gha gele gha yerriọ rhunmwuda, iran ma rẹn ẹdẹ nakhuẹ. Sokpan eyan ni rre Baibol lughaẹn. Ma gha sẹtin yaeyi wẹẹ, te ehia khian wa mwẹ amusẹ. Vbọ khian ru iyobọ ne ima? Ma ghi gha “tie Ebe [Nọhuanrẹn] ẹsẹse,” ma ghi vbe gha “gualọ otọ re.” (Iwinna 17:11) Zẹvbe ne u ya ruẹ e Baibol, u ghi do rẹn deghẹ ẹmwata ẹre Baibol tae vbekpa vbene emwi khian gha ye hẹ vbe odaro.

GUALỌ OTỌ RE SAYỌ

Gia ziro yan emwi ne Baibol wẹẹ ọ gha sunu vbe odaro, kevbe vbene eyan na, ya ru iyobọ ne emwa hẹ vbe ẹdẹnẹrẹ.

Efoto: Efoto ughughan ni rhie ẹre ma, ọlọghọmwa ne emwa werriẹ aro daa vbe ẹdẹnẹrẹ, kevbe vbene emwi khian gha ye hẹ vbe odaro zẹvbe ne Baibol tae yotọ. A werriegbe rhan otọ emwi ne avbe efoto na demu vbe ototọ.

4. E Baibol wẹẹ ima gha sọyẹnmwẹ arrọọ ọghe etẹbitẹ vbe agbọn ne usẹ i ye

Ghee avbe afiangbe ne Baibol wẹẹ ima gha sọyẹnmwẹ ọnrẹn. De nọ yẹẹ ruẹ sẹ vbọ? Vbua gu kha vberriọ?

Tie ako ọghe Baibol na gbẹnnẹ lele avbe eyan na, iyeke ọni, uwa ghi ziro yan avbe inọta na:

Avbe ako ọghe Baibol na fu ruẹ ẹko rre ra? Avbe ọse ruẹ kevbe emwa ruẹ vbe uwu ẹgbẹe gha tie ẹre, ọ gha fu iran ẹko rre ra?

Muẹn roro vbene agbọn ọgbọn khian gha ye hẹ. Ghee emwi . . .

NA KHIAN HO BẸKUN	NA KHIAN GHA SỌYẸNMWẸ ỌNRẸN
Obalọ, uwu kevbe ọmaẹn. —Aizaia 25:8.	Emwa ima ni wulo ghi rhiọ kpaegbe.—Jọn 5:28, 29.
Emianmwẹ kevbe egbe nọ ma gba ne ọmwa.—Aizaia 33:24; 35:5, 6.	Egbe ghi rran emwa hia, iran ghi gha sasa egbe vbe na ghee igbama.—Job 33:25.
Uyinmwẹ agbọmwa ekueku. —Aizaia 32:16, 17.	Evbare ghi kpọ, emwa hia ghi gha mwẹ owa kevbe iwinna esi.—Psalm 72:16; Aizaia 65:21, 22.
Okuo.—Psalm 46:9.	Ọfunmwegbe ghi gha rre ehe hia.—Psalm 37:11.
Akhiẹ, osi kevbe emwi nọ da ọmwa vbe orhiọn.—Aizaia 65:17.	Ma ghi gha sọyẹnmwẹ arrọọ vbe etẹbitẹ.—Psalm 37:29, NW.

Te ọmọ okpia na te gha khuọnmwi, sokpan egbe rran rẹn nẹ nian, ọ na mu iyẹe dede.

Okpia na nọ te khian ọmaẹn nẹ, dọlegbe khian igbama; ọ viọ ọmọ erhan kevbe emwi okọ ye wheelbarrow, ọ gha werriẹ ẹre khian.

5. Avbe eyan ni rre Baibol gha sẹtin fi arrọọ ruẹ werriẹ

Te egbe ghi wa kan emwa nibun rhunmwuda oya ne emwa re vbe ẹdẹnẹrẹ, erriọ iro vbe ya han emwa nibun. Eso wa hia vbe odẹ ke odẹ ne iran fi emwi hia werriẹ. Sokpan e Baibol gi ima rẹn wẹẹ emwi hia gha dunna vbe odaro. Gia ghee vbene eyan na, ya ru iyobọ ne emwa hẹ vbe ẹdẹnẹrẹ. Kpee VIDIO na, iyeke ọni, uwa ghi ziro yan inọta ni lelẹe.

E VIDIO: I Kegha Hoo Ne I Wabọ Uyinmwẹ Agbọmwa Ekueku Rua (4:07)

Efoto: Efoto na mu ladian vbe vidio nọ mwẹ uhunmwuta nọ khare wẹẹ, ‘I Kegha Hoo Ne I Wabọ Uyinmwẹ Agbọmwa Ekueku Rua.’ 1. E Rafika kevbe emwa ne iran gba ke ẹvbo ọkpa rre, gha rhọ iku ohu vbe ugbo. 2. Vbe ẹghẹ okaro ne Rafika ya yo asikoko ọghe Avbe Osẹe Jehova, ọ keghi bẹghe obọ esi ne iran ya mu egbe, agharhemiẹn wẹẹ ẹvbo ughughan ẹre iran ke rre; ọna keghi kakabọ yẹẹ ọre.

De uyinmwẹ agbọmwa ekueku nọ ghaa sọnnọ e Rafika vbe vidio na?
De vbene Baibol ghi ya ru iyobọ nẹẹn hẹ, agharhemiẹn wẹẹ uyinmwẹ agbọmwa ekueku na ma dobọ yi?

Ma gha gele yaeyi, eyan ni rre Baibol nọ dekaẹn vbene emwi khian gha ye hẹ vbe odaro, ọ gha ru iyobọ ne ima ya gha sọyẹnmwẹ, uhiẹn vbe ima ghaa rre uwu ọlọghọmwa. Tie Itan 17:22 kevbe Rom 12:12, iyeke ọni, uwa ghi ziro yan avbe inọta na:

Uwẹ yayi wẹẹ, avbe eyan ni rre Baibol gha sẹtin ya ruẹ gha sọyẹnmwẹ vbe ẹghẹ na nia ra? Vbua gu kha vberriọ?

EMWA ESO KEGHI KHA WẸẸ: “I ma yayi wẹẹ emwi ne Baibol wẹẹ ọ gha sunu vbe odaro gha gele sunu.”

Vbọzẹ nọ na khẹke ne u tobọ ruẹ gualọ otọ re, deghẹ eyan ni rre Baibol gha gele mwẹ amusẹ?

OLIKA ẸMWẸ

E Baibol gi ima rẹn wẹẹ, emwi hia gha dunna vbe odaro. Ọna ẹre ọ ya ima sọyẹnmwẹ uhiẹn vbe ima ghaa rre uwu ọlọghọmwa.

Ogbewerriẹ

Vbọzẹ nọ na khẹke ne emwa rẹn vbekpa eyan ni rre Baibol?
De emwi ne Baibol wẹẹ ọ gha sunu vbe odaro?
U gha rẹn emwi ne Baibol wẹẹ ọ gha sunu vbe odaro, de vbene ọ khian ya ru iyobọ nuẹn hẹ nia?

Ẹdẹ na ruẹ iruẹmwi na fo:

Emwi Ne U Gha Ru

Werriegbe tie avbe ako ọghe evbagbẹn nọhuanrẹn ni rre iruẹmwi na, ne u mieke na rẹn avbe eyan ni rre Baibol sayọ.

Emwi Ọvbehe Ne U Gha Ru:

Your other goal

RUẸ SAYỌ

Ghee vbene emwi ne ima yaro yi gha ya sẹtin ru iyobọ ne ima hẹ, vbe ima ghaa rre uwu ọlọghọmwa.

“Ayayẹro—De Ehe Ne U Khian Na Gele Miẹn Ọnrẹn?” (Awake!, April 22, 2004)

Ghee vbene eyan ni rre Baibol gha ya sẹtin ru iyobọ ne emwa ni khuọnmwi emianmwẹ nọ wegbe.

“E Baibol Gha Sẹtin Ru Iyobọ Nuẹn Vbe U Ghaa Khuọnmwi Emianmwẹ Nọ Wegbe Ra?” (Ọ rre intanẹt)

Zẹvbe ne u ya ghee vidio na, gha muẹn roro vbene ọ khian gha ye hẹ vbe uwẹ vbe ẹgbẹe ruẹ ghaa sọyẹnmwẹ arrọọ vbe Paradais ne Baibol wẹẹ ọ dee.

Gia Gha Mu Agbọn Ọgbọn Nọ Dee Nii Roro (3:37)

Ghee vbene arrọọ ọghe okpia ọkpa nọ te sinmwi oseghe ẹvbo ghi ya fi werriẹ hẹ, vbe ọ ghi do rẹn vbekpa eyan ni rre Baibol nọ dekaẹn vbene agbọn na khian gha ye hẹ vbe odaro.

“I Keghi Do Bẹghe Ẹre Wẹẹ Ẹi Re Imẹ Ẹre Ọ Khian Fi Agbọn Na Werriẹ” (The Watchtower, July 1, 2013)