De Obọ Ne Avbe Osẹe Jehova Ya Mu Emwa Ni Te Gha Rre Ugamwẹ Ọghe Iran?

Ma keghi hia vbe odẹ ke odẹ ne ima gha ya obọ esi mu emwa hia, ne ima gha rhie ọghọ ne iran, kevbe ne ima vbe hoẹmwẹ iran. Adeghẹ Osẹe Jehova rhọkpa ma na gha yo iko vbe ẹghẹ hia, ra ọ na wa dobọ iko na yo yi, ma ghi ya miẹn ọnrẹn, ma ghi gi ẹre rẹn wẹẹ, ma hoẹmwẹ ọnrẹn, ma ghi vbe hia na ru iyobọ nẹẹn, nọ mieke na dọlegbe do sikẹ Osanobua.—Luk 15:4-7.

Ugbẹnso, a sẹtin rhie ọmwa hin iko rre rhunmwuda emwi nọ ru. (1 Kọrint 5:13) Vbọrhirhighayehẹ, ma hoẹmwẹ etẹn ima, rhunmwuda ọni, ma keghi hia na ka ru iyobọ nẹ, na ghẹ mieke na rhie ẹre hin iko rre. A na dobọ rhie ẹre hin iko rre, te ima ye rhie ẹre ma wẹẹ, ma hoẹmwẹ ọnrẹn kevbe wẹẹ ma rhie ọghọ nẹẹn, rhunmwuda, obọ vberriọ ẹre Baibol we ne ima ya gha mu emwa hia.—Mak 12:31; 1 Pita 2:17.

Vbọzẹ ne Avbe Osẹe Jehova na rhie ọmwa hin iko rre?

E Baibol gi ima rẹn wẹẹ, adeghẹ Ovbi Otu e Kristi na ru orukhọ nọ wegbe, ọ ma na vbe fiwerriẹ, a ghi rhie ẹre hin iko rre.a (1 Kọrint 5:11-13) E Baibol ẹre ima ya rẹn deghẹ orukhọ nọ wegbe ẹre Ovbi Otu e Kristi ru na gha na rhie ẹre hin iko rre. Usun avbe orukhọ ni wegbe ne Baibol sunu yi ọre, oyi, oghẹ, ayọn na da gbe egbe, na gbe ọmwa rua, kevbe na na ya obọ dan mu emwa vbe uwu ẹgbẹ.—1 Kọrint 6:9, 10; Galetia 5:19-21; 1 Timoti 1:9, 10.

Vbọrhirhighayehẹ, ma i wa rhie ọmwa hin iko rre vbe ọwara ọkpa nii vbe ọ gha wa ru orukhọ nọ wegbe. Ediọnb ghi ka hia ne iran ru iyobọ nẹẹn ya fi uyinmwẹ werriẹ. (Rom 2:4) Iran gha khian ru iyobọ nẹẹn, odẹ ọghe ọmẹhẹ ẹre iran ya ru ẹre, iran ghi vbe ya obọ esi muẹn. (Galetia 6:1) Iran gha ru ẹre vbenian, ọ sẹtin ru iyobọ ne ọmwa nọ ru orukhọ nii ya rẹn wẹẹ, orukhọ nọ wegbe ẹre irẹn ru, ẹghẹ nii, ọ ghi roro iro fiwerriẹ. (2 Timoti 2:24-26) Sokpan, deghẹ a ghi zẹ ru iyobọ nẹẹn, ọ ma fiwerriẹ, ọ na ye gha rra uhi e Baibol, a ghi rhie ẹre hin iko rre. Ẹghẹ nii, ediọn ghi yae wewe ma iko wẹẹ, ẹ i ghi re Osẹe Jehova.

Ediọn eva ni re Osẹe Jehova gha ya e Baibol rhie igiọdu ne igbama ọkpa. Nene igbama gha guan, ọdiọn ọkpa rhie obọ ye ọre izabọ. — Ediọn ghaa ru iyobọ ne ọmwa nọ ru orukhọ, odẹ ọghe ọmẹhẹ ẹre iran ya ru ẹre, obọ esi muẹn ẹre iran vbe ya mu ọmwa vberriọ

De ehe nọ rrọọ, vbe a gha rhi ọmwa nọ ma kie rre vbe orukhọ hin iko rre? A gha rhie ọmwa nọ ma fiwerrie hin iko rre, ọ rhie ma wẹẹ, aro ne Osanobua ya ghee uyinmwẹ nọ ma huan ẹre ima vbe ya ghee ẹre. Ọ vbe ru iyobọ ne ima, ne ima ghẹ ya egbe taa uyinmwẹ vberriọ. (1 Kọrint 5:6; 15:33; 1 Pita 1:16) Deba ọni, ọ sẹtin ru iyobọ ne ọmwa nọ ru orukhọ nii ya roro iro fi uyinmwe werriẹ.—Hibru 12:11.

De obọ ne Avbe Osẹe Jehova ya mu emwa na rhie hin iko rre?

E Baibol we ne Ivbi Otu e Kristi ghẹ gu ọmwa na rhie hin iko rre “mu obọ,” ọ we na “ghẹ kue gu ọmwa vberriọ rri evbare.” (1 Kọrint 5:11) Rhunmwuda ọni, ma i gu ọmwa na rhie hin iko rre mu obọ. Vbọrhirhighayehẹ, ma i wa bizugbe iran. Te ima ye rhie ọghọ ne egbe emwa vberriọ. Ọmwa vberriọ sẹtin gha die ehe ne ima na do iko, ọ gha sẹ evba, avbe Osẹe Jehova ni rre evba sẹtin vbe tuẹ ọre, deghẹ iran hoo.c Ọ sẹtin vbe tama ediọn ne iran ru iyobọ ne irẹn, na mieke na rhie irẹn werriegbe.

Ọdọ vbe amwẹ ọkpa gha tuẹ okhuo ọkpa na rhie hin iko rre, vbe ehe ne avbe Osẹe Jehova na do iko. — Ọmwa na rhie hin iko rre gha ye sẹtin gha die ehe ne ima na do iko

Vbọ vbe ye hẹ ne ọmwa na rhie hin iko rre, sokpan, Osẹe Jehova ẹre amwẹ ọnrẹn, ọdọ ẹre, ra ivbi ẹre ni ye gu ẹre vbe owa ye khin? Agharhemiẹn wẹẹ, irẹn vbe ẹgbẹe ọre i ghi koko ga Osanobua, ẹgbẹe ọkpa ẹre iran ye khin. Ugbẹnvbe a miẹn wẹẹ, owa ọkpa ẹre irẹn vbe ẹgbẹe ọre ye ye, obọ ne irẹn vbe ọdọ ẹre ra amwẹ ọnrẹn ka ya mu egbe, ẹre iran khian ye ya gha mu egbe, erriọ ẹre ọ vbe ye deghẹ ọ na vbe gha mwẹ emọ.

Ọmwa na rhie hin iko rre, sẹtin we ne ediọn do miẹn irẹn. Iran gha ghi rre, iran ghi ya e Baibol rhie adia nẹẹn, iran ghi vbe rhie igiọdu nẹẹn nọ fiwerriẹ, nọ vbe bu Osanobua gha de. (Zẹkaraia 1:3) Adeghẹ, ọ na zẹ obọ vbe emwi dan nọ ru, uyinmwẹ ọnrẹn na vbe gha rhie ẹre ma wẹẹ, ọ ya ilele ni rre Baibol ru emwi, a ghi rhie ẹre werriegbe, ọ ghi werriegbe do gha re Osẹe Jehova. A ghi “yabọe” a ghi vbe “fu ẹre ẹko rre,” zẹvbe ne Ivbi Otu e Kristi ni ghaa rrọọ vbe Kọrint ru ẹre vbe ọmwa orukhọ ọkpa ghi fiwerriẹ.—2 Kọrint 2:6-8.

Emwi ne emwa eso na rhie werriegbe tae

Ghee emwi ne Avbe Osẹe Jehova eso na ka rhie hin uwu iko rre ta, vbe a ghi rhie iran werriegbe.

“Vbe I ghi tae nẹ wẹẹ, I gha werriegbe gha die otu e Jehova, I na gha roro ẹre wẹẹ, te ediọn khian wa gha zọlọ mwẹ ọta vbekpa avbe emwi ni he ru, ke ẹghẹ gha de na ya rhie mwẹ hin iko rre. Nọghayayerriọ, iran na tama mwẹ wẹẹ, ‘Emwi nọ sunu sunu nẹ, rhie aro tua emwi ne u gha sẹtin ru nian.’ Orhiọn mwẹ keghi wa sẹ otọ vbe iran ghi ta ẹmwẹ na ma mwẹ.”—Maria, United States.

“Te etẹn ne ima gba ga e Jehova wa gha ghọghọ vbe I ghi dọlegbe rre. I na do rẹn wẹẹ, iran wa hoẹmwẹ mwẹ. Iran ru iyobọ mẹ ya rẹn wẹẹ, Osanobua yabọ mwẹ nẹ kevbe wẹẹ, iran tobọ iran vbe yabọ mwẹ nẹ. Ọna ẹre ọ ghi ru iyobọ mẹ, ni ghẹ gha kpokpo egbe ya emwi nọ gberra. Te ediọn wa vbe mu egbe vbe ẹghẹ hia, ne iran ya ru iyobọ mẹ, ne I mieke na werriegbe sikẹ Osanobua. Iran keghi mu mwẹ orhiọn sẹ otọ, iran na vbe gu mwẹ rẹn wẹẹ, e Jehova wa ye hoẹmwẹ mwẹ, kevbe wẹẹ aro nọ ghaan ẹre ọ ya ghee mwẹ.”—Malcom, Sierra Leone.

“I ghọghọ wẹẹ, e Jehova hoẹmwẹ emwa rẹn sẹrriọ wẹẹ, ẹre kue ne emwi rhọkpa mu otu ọghẹe rria. Agharhemiẹn wẹẹ, emwa nẹi ga e Jehova sẹtin gha roro wẹẹ, ọ ma khẹke ne otu e Jehova gha rhiẹ emwa orukhọ hin iko rre, I do bẹghẹ ẹre wẹẹ, emwi nọ maan kevbe nọ khẹke na gha ru ẹre nọ. I ghọghọ we Osa nọ mwẹ ahoẹmwọmwa kevbe nọ yabọ ẹre erha ima nọ rre ẹrinmwi khin.”—Sandi, United States.

Emwi ne avbe omugui nẹi Osẹe Jehova tae

Ghee emwi ne avbe omugui eso ta, vbekpa ne Avbe Osẹe Jehova na rhie ọmwa orukhọ nọ ma fiwerriẹ hin uwu ẹbu iran rre.

“Emwi nọ khẹke nọ ne ugamwe nọ ya ilele ni rre Baibol ru emwi gha mwẹ asẹ na ya rhie ọmwa orukhọ nọ ma fiwerriẹ hin uwu ẹbu iran rre. Gberra ọni, ọmwa nọ ma mu egbe nọ khian ya gha ya avbe ilele ni rre Baibol ru emwi, ma gbegba nọ khian gha rre ugamwẹ vberriọ, ẹ i re ọni ọkpa, ọmwa vberriọ sẹtin mu uyinmwẹ emwa nikẹre rria, deghẹ iran ma rhie ẹre hin uwu ẹbu iran rre.”—The High Court of Justice, England and Wales, June 7, 2019.
“Avbe ọbuohiẹn ni rre owa ẹzọ ni rre Europe kevbe ẹvbo ọvbehe kue yọ wẹẹ, Avbe Osẹe Jehova mwẹ asẹ na ya rhie ọmwa hin otu ọghe iran rre, rhunmwuda uhi arriọba kie ẹkpotọ ne iran ya ru vberriọ. Eso vbe kha wẹẹ, ẹ i re ẹmwẹ nọ gha gi avbe ọbuhiẹn guan yi.”—Professor Paulo Pinto de Albuquerque, former judge of the European Court of Human Rights.

a Vbe ẹghẹ nọ gberra, emwa na kan fua vbe iko ẹre ima ka tie emwa vbenian. Sokpan, ẹmwẹ nọ rre Baibol ẹre ima ghi loo nian, emwa na rhie hin iko rre ẹre ima ghi tie emwa vbenian.

b Ediọn keghi re ikpia ni wẹro vbe uwu iko, ni ya e Baibol maa eguọmwadia e Jehova emwi, iran rhie igiọdu ne iran, iran vbe ru iyobọ ne iran. Ai ha iran osa ye iwinna na.—1 Pita 5:1-3.

c Ugbẹnso, ọmwa nọ kpa hin otu ọghe Avbe Osẹe Jehova rre sẹtin do gha re ọmwa isọtẹ ra ọ ghi gha kọe ye emwa ekhọe ne iran gha ru orukhọ, ọ gha sunu vberriọ, e Baibol we ne ima ghẹ ghi tuẹ ọmwa vbenian.—2 Jọn 9-11.