A Fi Emwi Eso Ni Rre Uwu E Baibol Werriẹ Nẹ Ra?

Ẹo. Vbe a ghi ya e Baibol nẹdẹ na ya obọ gbẹnnẹ ya tae Baibol ne ima mwẹ vbe ẹdẹnẹrẹ, a na do bẹghe ẹre wẹẹ, emwi rhọkpa ma fiwerriẹ vbọ, agharhemiẹn wẹẹ, ẹ i re avbiẹ inugba ẹre a he ya obọ gbẹnnẹ ọnrẹn vbe ọwara ukpo nibun gha dee kevbe wẹẹ, emwi ni gha sẹtin rhia ẹre a gbẹnnẹ ọnrẹn yi.

Te ọna ghi rhie ma wẹẹ emwa ni ghaa gbẹnnẹ ẹmwẹ ni rre uwu e Baibol ladian ma ru abakuru rhọkpa ra?

Ẹ i re avbiẹ e Baibol nẹdẹ na ya obọ gbẹnnẹ ẹre a he miẹn. Sokpan eso vbọ lughaẹn ne egbe, ọna rhie ma wẹẹ abakuru ghaa rrọọ vba gbẹnnẹ ọnrẹn ladian. Ọrheyerriọ, te avbe abakuru na ye kherhe, ọ ma fi ẹmwẹ na hoo na ta werriẹ. Vbọrhirhighayehẹ, alughaẹn nọkhua wa rhiegbe ma vbe eso, nọ rhie ma wẹẹ, ọ kpẹẹ re ne emwa eso ke hia ne iran fi ẹmwẹ nọ rre Baibol werriẹ. Gia ghee igiemwi eva na:

1. Vbe Baibol eso na zedu ẹre vbe ẹghẹ nẹdẹ, a keghi zedu ebe 1 Jọn 5:7 vbenian: “vbe ẹrinmwi, emwi eha na keghi re ọkpa, Evbavba, Ẹmwẹ kevbe Orhiọn Nọhuanrẹn.” Sokpan avbe Baibol nẹdẹ na ya obọ gbẹnnẹ ne emwa nibun gele yayi wẹẹ ọ gbae gi ima rẹn wẹẹ, avbe ẹmwẹ na i rre Baibol na ka wa gha gbẹn. Vbene ẹghẹ ya khian, ẹre a na rhie ẹre ba re.a Rhunmwuda ọni, vbe Baibol eso na ghi zedu ẹre vbe ẹdẹnẹrẹ, a keghi rhie ẹmwẹ na hin.

2. Ẹ i re avbiẹ inugba eni Osanobua ladian vbe avbe Baibol nẹdẹ na ya obọ gbẹnnẹ. Ọrheyerriọ, vbe Baibol nibun na zedu ẹre, a keghi ya e “Nọyaẹnmwa” ra “Osanobua” rri ihe ẹre.

Vbọ ya ima rẹn wẹẹ, abakuru nibun ọvbehe i rrọọ na ma he bẹghe?

Vbe ẹdẹnẹrẹ, ẹ i re avbiẹ e Baibol nẹdẹ na ya obọ gbẹnnẹ ẹre a he miẹn, rhunmwuda ọni, ẹ i ghi lọghọ na do sẹtin rẹn deghẹ abakuru rrọọ.b Vba ghi ya avbe Baibol nẹdẹ na, ya tae ni rrọọ vbe ẹdẹnẹrẹ, de emwi na miẹn nọ ya ima rẹn wẹẹ, avbe Baibol ni rrọọ vbe ẹdẹnẹrẹ gele gba?

• Vbe okpia ọkpa nọ rri egie ebe na tie ẹre William H. Green ghi guan kaẹn abọ ọghe Ebe Nọhuanrẹn Na Ya E Hibru Gbẹn, ne emwa mobọ tie ẹre “Ile Nẹdẹ’’ ọ na wẹẹ: “Vbene emwa ya gbarokotọ gbẹnnẹ avbe ẹmwẹ ni rre uwu e Baibol ladian, ebe nẹdẹ ọvbehe i rrọọ na ru vberriọ.”

• Okpia ọkpa nọ rri egie ebe na tie ẹre F.F Bruce ghi vbe guan kaẹn abọ ọghe Ebe Nọhuanrẹn Na Ya E Grik Gbẹn ra “Ile Ọgbọn,’’ ọ na wẹẹ: “Osẹe nibun ni so igiẹ yọ wẹẹ ẹmwẹ nọ rre Ile Ọgbọn gele gba, bun sẹ ọghe ebe nibun ne avbe ọgbẹnbe gbẹnnẹ ladian ne emwa ya aro nọ ghaan ghee.”

• Okpia ọkpa na tie ẹre Sir Frederic Kenyon, nọ wa kakabọ rẹn emwi vbekpa avbe Baibol nẹdẹ na ya obọ gbẹnnẹ khare wẹẹ, “ọmwa gha da e Baibol yi mwẹ obọ, ọ gha sẹtin si agbada vbe unu kha wẹẹ, Ẹmwẹ Osanobua ẹre irẹn gele da yi, vbene ohan i na muẹn wẹẹ, a fi emwi ne kpataki werriẹ nẹ vbọ, vbe ọwara ukpo iyisẹn nibun gha dee.”

De emwi ọvbehe nọ ya emwa mwẹ ilẹkẹtin wẹẹ, a ma he fi ẹmwẹ nọ rre uwu e Baibol werriẹ?

• Ivbi e Ju kevbe Ivbi Otu e Kristi ni ya obọ gbẹnnẹ ẹmwẹ ni rre uwu e Baibol ladian, ma mu abakuru nọ wegbe ne eguọmwadia Osanobua eso ru lẹre.c (Nọmbas 20:12; 2 Samuẹl 11:​2-4; Galetia 2:​11-14) Iran vbe gbẹnnẹ ọnrẹn ladian vbene agbẹnvbo ọghe Ivbi e Ju ya sọtẹ daa Osanobua hẹ, kevbe avbe imamwaemwi ni ma gba ne emwa ghaa ma emwa re vbe ẹghẹ nii. (Hosia 4:2; Malakai 2:​8, 9; Matiu 23:​8, 9; 1 Jọn 5:21) Ne iran na gbẹnnẹ ẹmwẹ nọ rre uwu Ẹmwẹ Osanobua ladian zẹvbe nọ wa ye zẹe, rhie ẹre ma wẹẹ, emwa na gha sẹtin mu ẹtin yan ẹre iran khin kevbe wẹẹ iran ya aro nọ ghaan ghee Ẹmwẹ Osanobua.

• Osanobua nọ loo emwa ya gbẹn e Baibol, ẹ i re te ọ gha vbe gbogba ga re, na ghẹ mieke na fi ẹmwẹ ni rrọọ werriẹ ra?d (Aizaia 40:8; 1 Pita 1:​24, 25) Levba sevba, te Osanobua ya e Baibol ru ima ẹse, nọ mieke na sẹtin ru iyobọ ne emwa ni ghaa rrọọ vbe ẹghẹ nẹdẹ kevbe ima ni rrọọ vbe ẹdẹnẹrẹ. (1 Kọrint 10:11) Vbene ẹmwata, “emwi hia na gbẹnnẹ yotọ vbe Ebe Nọhuanrẹn vbe ẹghẹ nọ kpẹẹ fua, te a gbẹnnẹ ọnrẹn na ya ma ima emwi, na mieke na miẹn wẹẹ, rhunmwuda izinegbe ọghe ima kevbe ifuẹko ne Ebe Nọhuanrẹn rhie ne ọmwa, ma ghi gha mwẹ emwi ne ima ya aro kọ.”​—Rom 15:4.

• Jesu kevbe erhuanegbe ẹre wa gha ya unu kaẹn ẹmwẹ ni rre abọ ọghe Ebe Nọhuanrẹn Na Ya E Hibru Gbẹn vbene iran ma na gha fian afianma deghẹ ọ gbae.​—Luk 4:​16-21; Iwinna 17:​1-3.