Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
JUNE 3-9
EMWI EWE NI RRE UWU ẸMWẸ ỌGHE OSANOBUA | GALATIA 4-6
“Evba Ya ‘Ru Igiemwi’ Nọ Mwẹ Emwi Nọ Demu Ne Ima”
(Galatia 4:24, 25) A sẹtin ya ọni ru igiemwi, ikhuo eva na keghi gha re ile eva, ne ọkpa vbọ (ọni nọ wẹẹ Hega) keghi ke uhunmwu Oke Sainai rre, a keghi biẹlẹ ivbi ẹre eviẹn. 25 Hega mudia ye ihe Sainai, oke nọ rre Arebia, irẹn keghi vbe re ama e Jerusalẹm nọ rrọọ ẹdẹnẹrẹ na, nọ re ọviẹn kẹ kevbe emwa rẹn hia.
it-1 1018 ¶2
Hega
Zẹvbe ne ukọ e Pọl tae, Hega keghi mu ukhọmwẹ Ivbi Izrẹl nẹdẹ ne Jehova gu ta ile, vbe ẹghẹ ne ọ na gbe Uhi ne iran vbe uhunmwu Oke Sainai; uhi na keghi ya Ivbi Izrẹl khian “eviẹn.” Rhunmwuda orukhọ ọghe Ivbi Izrẹl, iran ma sẹtin lele Uhi ne Osanobua gbe ne iran vbe ẹghẹ ne ọ na gu iran ta ile. Vbe ẹghẹ ne iran ya gha rre ototọ uhi nii, Osanobua keghi bu ohiẹn uwu gbe iran rhunmwuda orukhọ ọghe iran; ọni ẹre ọ si ẹre ne iran na ghi khian eviẹn. (Jọn 8:34; Rom 8:1-3) E Jerusalẹm nọ ghaa rrọọ vbe ẹghẹ ọghe Pọl ẹre Hega mudia ye ihe ẹre; e Jerusalẹm na ẹre ọ ghaa re igiogbẹ ọghe otọ Izrẹl hia; vbene ẹghẹ ya khian, e Jerusalẹm na, nọ mudia ye ihe Ivbi Izrẹl hia kevbe ivbi iran keghi khian ọviẹn. Sokpan, Ivbiotu e Kristi na ya orhiọn nọhuanrẹn hannọ zẹ, ọre ivbi ‘e Jerusalẹm nọ rre odukhunmwu,’ ọni ọre okhuo na ya gie otu ọghe Osanobua nọ rre ẹrinmwi. E Jerusalẹm na keghi yevbe na ghee Sera nọ ma he ka yo ọviẹn ẹdẹ. Vbene Aizik ya miẹn ukpokpo vbe obọ Ismẹl, erriọ ivbi ‘e Jerusalẹm nọ rre odukhunmwu,’ ne Jesu fan vbe obọ orukhọ kevbe uwu, vbe ya miẹn ukpokpo vbe obọ ivbi e Jerusalẹm ni re eviẹn. Vbọrhirhighayehẹ, a keghi khu e Hega kevbe ovbi ẹre fua, erriọ e Jehova vbe ya khu Ivbi Izrẹl nẹdẹ fua vbe odẹ ọghe orhiọn.—Gal 4:21-31; vbe ya ghee Jọn 8:31-40.
(Galatia 4:26, 27) Sokpan e Jerusalẹm nọ ke odukhunmwu rre i re ọviẹn, ọni ọrọre iye ima. 27 Rhunmwuda ebe khare wẹẹ, “Gha ghọghọ, uwẹ ne okhuo nọ ma biẹ ẹdẹ, davan ne u gha wee ne oghọghọ, uwẹ ne emwi ubiẹmwẹ ma he ru ẹdẹ. Rhunmwuda, okhuo ne a te kpa sẹrae, gha do gha mwẹ emọ nọ bun sẹ ọghe okhuo ne irẹn vbe ọdọ ẹre gba rrọọ.”
w14 10/15 10 ¶11
Gha Mwẹ Amuẹtinyan Nẹi Beghe Daa Arriọba Osanobua
11 Ẹmwata nọ wẹẹ, eyan ne Osanobua yan ma Ebraham vbe ẹghẹ ne ọ na gu ẹre ta ile, mwẹ amusẹ vbe egbe ivbi Ebraham vbe ẹghẹ ne iran ya la Otọ Na Ru Eyan Rẹn, sokpan Evbagbẹn Nọhuanrẹn ya ima rẹn wẹẹ eyan ne Osanobua yan ma Ebraham vbe mwẹ amusẹ vbe odẹ ọghe orhiọn. (Gal 4:22-25) Vbe ukọ e Pọl ghi guan kaẹn vbene eyan na khian ya mwẹ amusẹ vbe odẹ ọghe orhiọn, orhiọn nọhuanrẹn keghi dia re ya kha wẹẹ, e Kristi ọre abọ nokaro vbe emọ ọghe Ebraham, vbene orhunmwu 144,000 na ya orhiọn nọhuanrẹn hannọ zẹ na re abọ nogieva. (Gal 3:16, 29; Arhie 5:9, 10; 14:1, 4) Okhuo nọ biẹlẹ emọ na ọre ‘Jerusalẹm nọ rre odukhunmwu’—e Jerusalẹm na ọre emọ orhiọn ni mwẹ ẹkoata, iran na ọre otu ọghe Osanobua nọ rre ẹrinmwi. (Gal 4:26, 31) Zẹvbe ne Osanobua yan ma Ebraham vbe ẹghẹ ne ọ na gu ẹre ta ile, emwa nagbọn hia gha miẹn afiangbe vbe obọ ivbi okhuo na.
(Galatia 4:28-31) Wanwan na nian, ọtẹn mwẹ, ivbi Osanobua ne ọ ve zẹ vbene Aizik ye, ẹre uwa khin. 29 Vbe ẹghẹ nii, ọmwa ne a biẹ zẹvbe ne a ya biẹ nii, kegha zẹ ọmọ ne a lekpa orhiọn Osanobua biẹ kpokpo, erriọ ẹre ọ wa vbe ye na nian. 30 Sokpan vbe ebe a ghi kha hẹ? Ọ wẹẹ, “Khu okhuo ne ọviẹn ọmwa nii kẹ kevbe ovbi ẹre ladian, rhunmwuda ovbi okhuo ne ọviẹn ọmwa nii, i ra gu ovbi okhuo nẹi re ọviẹn ọmwa nii ghae ukhu erhae.” 31 Rhunmwuda ọni, nian, wa ne etẹn mwẹ, ma i re ivbi okhuo ne ọviẹn ọmwa, sokpan ivbi okhuo nẹi re ọviẹn ọmwa ma khin.
Gualọ Emwi Ewe Ọghe Orhiọn
(Galatia 4:6) Ne ọ miẹn ehe na rhiema ighẹ ivbi irẹn wa khin, Osanobua keghi gie orhiọn Ovbi ẹre ye uwu ekhọe mwa, orhiọn nọ datu wẹẹ, “Evbavba ne Evbavba” [ra “Abba, Evbavba!” NW.]
w09 4/1 13
U Ka Rẹn Ra?
Vbe Jesu ghi na erhunmwu, vbọzẹe ne ọ na tie Jehova “Abba, Evbavba”?
Emwi na yae kha ighẹ ẹmwẹ Aramaic na nọ re ʼab·baʼʹ ọre “evbavba” ra “Eo Evbavba.” Vbe igba eha na loo ẹmwẹ na vbe Evbagbẹn Nọhuanrẹn, erhunmwu ẹre a yae na, Erha mwa nọ rre ẹrinmwi, nọ re Jehova ẹre a vbe gha guan kaen. De emwi ne ẹmwẹ na mobọ demu?
Ebe ọkpa na tiẹre The International Standard Bible Encyclopedia keghi kha wẹẹ: “Vbe ẹghẹ ọghe Jesu, avbe ibiẹka ẹre ọ mobọ gha loo ẹmwẹ na ya rhie ọghọ ne erha iran.” Ọna keghi re ọkpa vbe usun ẹmwẹ ne ibiẹka ta vbe iran gha da suẹn gha guan; a mobọ loo ẹmwẹ na ne ọmwa na hoẹmwẹ ọnrẹn. Vbe asẹ ọkpa, Jesu loo ẹmwẹ na vbe ẹghẹ ne ọ na gha rinmwian Erhae vbe erhunmwu, nọ ru emwi eso ne irẹn. Vbe Jesu ghi na erhunmwu vbe ogba ọghe Getsemani, vbe ọ ghi kẹ ughaẹdẹ eso nọ wu, ọ keghi tie Jehova ‘Abba, Evbavba.’—Mak 14:36.
Nene ebe na vbe rhie tẹ wẹẹ, “’Abbāʼ keghi re ẹmwẹ na loo ne Osanobua, sokpan Ivbi e Ju ma mobọ gha loo ẹre vbe ebe ne iran gbẹnnẹ vbuwe ẹghẹ ne Ivbi e Grik kevbe Ivbi e Rom ya gha khaevbisẹ, rhunmwuda iran ghee ẹre wẹẹ ẹmwẹ vberriọ ma khẹke na gha loo ne Osanobua.” Vbọrhirhighayehẹ, “Jesu . . . keghi loo ẹmwẹ na, ne ọ ya rhiẹre ma wẹẹ te irẹn vbe Osanobua wa sikẹ egbe khuankhuankhuan.” Ako eva nikẹre ne a na loo ẹmwẹ na, ọre ebe Rom kevbe ebe Galatia ni re ebe ne ukọ e Pọl gbẹnnẹ—ọna rhiema wẹẹ, Ivbiotu e Kristi ni ghaa rrọọ vbe orre nokaro vbe gha loo ẹmwẹ na vbe iran ghaa na erhunmwu.—Rom 8:15; Galatia 4:6.
(Galatia 6:17) Ne I ya mu ẹmwẹ na ye otọ, ọmwa rhọkpa ghẹ ghi kpokpo mwẹ o. Ama ẹtẹ ni rrọọ mwẹ egbe rhiema wẹẹ ọviẹn Jesu ẹre I khin.
w10 11/1 15
U Ka Rẹn Ra?
De emwi ne ima yayi wẹẹ, ukọ e Pọl ghaa mwẹ vbe ekhọe vbe ẹghẹ ne ọ na kha wẹẹ, “ama ẹtẹ ni rrọọ mwẹ egbe rhiema wẹẹ ọviẹn Jesu ẹre I khin”?—Galatia 6:17.
▪ Emwi ne Pọl tae na sẹtin ya emwa ni ghaa rrọọ vbe orre nokaro gha roro emwi ughughan. Vbe igiemwi, vbe ẹghẹ nẹdẹ emwa ghaa loo ematọn nọ kakabọ tọn ya yi emwa ama; usun emwa ne iran ghaa yi ẹre ama, ọre emwa na munọ vbe okuo, emwa ni ya rhaa vbe Ọgua Osa kevbe eviẹn ni lẹre hin owa rre. Ọmwaikọmwa na yi ẹre ama vbenia, ai ghee ẹre sẹ ọmwa.
Sokpan, ẹi re ẹghẹ hia ẹre emwa ya gha ya aro dan ghee ama na vinnọ ye emwa egbe. A ghaa yi emwa nibun ama vbe ẹghẹ nẹdẹ na ya rẹn ẹvbo ne iran ke rre, ra ugamwẹ ne iran ye. Vbe igiemwi, ebe ọkpa na tiẹre Theological Dictionary of the New Testament, keghi kha wẹẹ, “Ivbi e Siria kegha vinnọ ama ye urhuabọ kevbe ẹyaẹn ọghe iran, ne iran ya rhiẹre ma wẹẹ, iran ya egbe fiohan ne avbe ẹbọ ọghe iran na tiẹre Hadad kevbe Atargatis . . . Ama ọghe ebe na tiẹre ivy leaf, ẹre iran ni ga e Dionysus ghaa vinnọ ye egbe.”
Emwa eso ni rrọọ vbe ẹghẹ ọghomwa khian ghi rhan otọ emwi ne ukọ e Pọl tae, iran na wẹẹ ama ne Pọl miẹn vbe ugbemwẹ na gbe ẹre vbuwe ẹghẹ ne ọ ya mu okhian yo ehe ughughan ya gha kporhu, ẹre ọ ghaa guan kaẹn. (2 Kọrinti 11:23-27) Vbọrhirhighayehẹ, ọ khọ wẹẹ, te Pọl ghaa kha wẹẹ uyinmwẹ ọghe irẹn ọre ama ne emwa ya yi irẹn ẹro zẹvbe Ovbiotu e Kristi; ọ gha kẹ, ẹi re ama kẹkan ẹre Pọl ghaa guan kaẹn.
E Baibol Na Tie
(Galatia 4:1-20) Ne a ye tae khianmwu, ọmwa ne ọ ra yan owa erhae, ọ ghaa re ọvbokhan, obọ ne a ya mu ọviẹn ẹre a vbe ya muẹn, agharhemiẹn ighẹ irẹn ẹre ọ yan emwi hia. 2 Ọ gha he gha rre ọvbokhan nii, emwa rrọọ ni gbaroghe ẹre, ni vbe ru emwi hia ne ọ gha te ru, ọ te do sẹ ẹghẹ ne erhae rhie yọ. 3 Erriọ vbe nọ, ma tobọ ima keghi te vbe gha re eviẹn avbe orhiọn ni kha yan agbọn na, rhinrin ma te do sẹ okpia vbe emwi ni re ọghe orhiọn. 4 Sokpan, ugbẹnvbe ọ ghi do sẹ ẹghẹ ne ọ ke yọ sẹ, Osanobua keghi gie ovbi ẹre tobọ re gha dee. Irẹn keghi rre zẹ vbe ọmwa ne iyẹe re ọmwa nagbọn na, ọ na vbe gha rre ototọ uhi avbe Ju. 5 Ne ọ do fannọ emwa ni rre ototọ nene uhi yotọ ne ima miẹn ehe na gha re ivbi Osanobua. 6 Ne ọ miẹn ehe na rhiema ighẹ ivbi irẹn wa khin, Osanobua keghi gie orhiọn Ovbi ẹre ye uwu ekhọe mwa, orhiọn nọ datu wẹẹ, “Evbavba ne Evbavba.” 7 Rhunmwuda ọni nian, wa i ghi re eviẹn ọvbehe, sokpan emọ uwa khin. Vbene a ghi na miẹn nian ighẹ ovbi ẹre ọre uwẹ khin, Osanobua gha rhie emwi hia ni re ọghe ivbi ẹre ne uwa. 8 Vbe ẹghẹ nọ gberra, wa ma rẹn Osanobua, wa keghi rhunmwuda ọni gha re eviẹn avbe emwi ne ẹi re Osanobua. 9 Sokpan wanwanna nian, vbene uwa ghi na rẹn Osanobua nẹ, ra ne I wa kha wẹẹ, vbene Osanobua ghi na rẹn uwa nẹ, vbọzẹe ne uwa na hoo ne uwa dọlegbe bu avbe orhiọn ẹwobi ne evburriẹ, ni khaemwisẹ nii, gha khian yi? Vbọzẹe ne uwa na dọlegbe hoo ne uwa gha re eviẹn iran? 10 Wa siẹn ẹdẹ eso ẹro, uki, ẹghẹ, kevbe ukpo. 11 Afianma uwa fian mwẹ. Ọni rhiema ighẹ ẹsọn ne I miẹn ne uwa, te I miẹn ọnrẹn kua ra? 12 I rinmwian uwa etẹn mwẹ, wa gha ye vbene imẹ ye. Wa ma miẹn ighẹ vbene uwa ye ọre imẹ vbe ye? Wa ma mwẹ emwi ne uwa ya ru mwẹ khọọ. 13 Wa gha yerre emwi ne ọ ya mwẹ kporhu iyẹn nọ maan ma uwa vbe ẹghẹ okaro wẹẹ, te egbe ma rran mwẹ. 14 Sokpan wa ma sọnnọ mwẹ, ra ne uwa sua mwẹ fua, egbe ne a ya miẹn wẹẹ egbe ihe ne egbe mwẹ ghaa ye, edanmwẹ nọkhua ẹre ọ wa gha khin ne uwa. Sokpan, wa keghi rhan obọ miẹn mwẹ, vbene a miẹn wẹẹ odibo Osanobua ẹre I khin, wa na rhan obọ miẹn mwẹ, vbene uwa gha vbe ya rhan obọ miẹn e Kristi Jesu. 15 Te ọyẹnmwẹ te gha sẹ uwa! Vbe ọ mobọ ghi ye hẹ na yi? Mẹ gha sẹtin tobọ mwẹ ta ene unu uwa wẹẹ, akpawẹ te ọ gie uwa ru, wa gha wọlọ aro uwa viọ mẹ. 16 Te I ghi khian oghian uwa ra, rhunmwuda ighẹ I ta ẹmwata ma uwa? 17 Iran nekpa wa gbe egbe uwa ẹsẹse nian, sokpan emwi nọ rre iran ekhọe i maan. Emwi ne iran hoo ma gberra ne iran wannọ uwa hin mwẹ egbe rre, ne ẹmwẹ iran miẹn ehe na gha yẹẹ uwa vbe ekhọe, vbene ẹmwẹ uwa yẹẹ iran vbe ekhọe. 18 Emwi esi wa nọ ne a gha soyaya ye emwi nọ maan, ẹmwata, ẹghẹ hia ẹre ọna khin ighẹ ẹi re vbe I a gha rre ehe ne uwa ye ọkpa. 19 Ivbi mwẹ ni ghaan! Te emwi ubiẹmwẹ uwa ghi vbe ru mwẹ zẹ vbe okhuo ne ọ ra biẹ, rhinrin a te do miẹn wẹẹ ama emwi ne Kristi khin rhiegbe ma vbe uwu uwa. 20 Vbe ọ rrọọ akpawẹ ehe ne uwa ye ọre I gu uwa ye nian, vbene I gha na miẹn ehe na ya obọ ọvbehe mu uwa. Afianma uwa wa fian mwẹ.
JUNE 10-16
EMWI EWE NI RRE UWU ẸMWẸ ỌGHE OSANOBUA | ẸFISỌS 1-3
“Emwamwa Ọghe Jehova Kevbe Emwi Nọ Khian Fiangbua”
(Ẹfisọs 1:8, 9) ne irẹn wa vbe rhie ẹre ọrhẹnrhẹn ne ima. Vbe uwu ẹwaẹn ọghẹe, kevbe ne ọ na ghe umian emwi. 9 Osanobua keghi wa ru zẹvbe ne ọ ya ekhọe mwamwaẹn, ọ keghi gie ima rẹn emwamwa ne irẹn mwamwaẹn vbe ẹkhokho, ne ọ wẹẹ irẹn gha lekpae Kristi ya khian ne a ru gba
it-2 837 ¶4
Emwi Ẹkhokho Nọhuanrẹn
Arriọba Ọghe Mẹzaia. Vbe ebe ne Pọl gbẹn, ọ keghi guan kaan emwi ẹkhokho nọhuanrẹn nọ dekaan e Kristi. Vbe ebe Ẹfisọs 1:9-11, e Pọl tama ima wẹẹ, Osanobua keghi ya emwa rẹn ‘emwi ẹkhokho nọhuanrẹn’ nọ dekaan ahoo ọghẹe. Ọ na kha wẹẹ: “Osanobua keghi wa ru zẹvbe ne ọ ya ekhọe mwamwaẹn, ọ keghi gie ima rẹn emwamwa ne irẹn mwamwaẹn vbe ẹkhokho, ne ọ wẹẹ irẹn gha lekpae Kristi ya khian ne a ru gba. Emwi ne Osanobua mwamwaẹn, ne ọ ra vbe musẹ vbe ẹghẹ a sẹ, ọrọre wẹẹ, ne ọ do viọ emwi na yi hia ni rre ẹrinmwi kevbe agbọn, kugbe ba e Kristi zẹvbe uhunmwuta ehia. Rhunmwuda, vbene Osanobua wẹẹ emwi gha ye ẹre ọ ye, Osanobua keghi zẹ [ima] wẹẹ ne ima gha re emwa irẹn, vbuwe a ya egbe bae Kristi, rhunmwuda emwamwa ne irẹn mwamwaẹn zẹvbe ne ọ tae ke omuhẹn gha dee.” ‘Emwi ẹkhokho nọhuanrẹn’ na keghi dekaẹn Arriọba ọghe Mẹzaia. “Emwi na yi hia ni rre ẹrinmwi,” ne Pọl ghaa guan kaẹn keghi re emwa na hannọ zẹ ni khian deba e Kristi kha vbe Arriọba nii vbe ẹrinmwi. “Emwi na yi hia ni rre . . . agbọn” keghi re emwa ni khian gha rre ototọ Arriọba nii vbe uhunmwu otagbọn na. Jesu keghi gi erhuanegbe ẹre rẹn wẹẹ emwi ẹkhokho nọhuanrẹn na keghi dekaẹn Arriọba Osanobua, vbe ẹghẹ ne ọ na kha wẹẹ: “Wa na ẹre a ta oro ẹmwẹ Arriọba Osanobua ma.”—Mak 4:11.
(Ẹfisọs 1:10) Emwi ne Osanobua mwamwaẹn, ne ọ ra vbe musẹ vbe ẹghẹ a sẹ, ọrọre wẹẹ, ne ọ do viọ emwi na yi hia ni rre ẹrinmwi kevbe agbọn, kugbe ba e Kristi zẹvbe uhunmwuta ehia.
w12 7/15 27-28 ¶3-4
‘E Jehova Ne Osanobua Mwa Ọkpa’ Keghi Si Ẹgbẹe Ọghẹe Koko
3 E Mosis keghi tama Ivbi Izrẹl wẹẹ: ‘E Jehova ne Osanobua mwa ọkpa ọre Jehova.’ (Diut 6:4) Te emwamwa ọghe Jehova kevbe iwinna nọ ru hia wa gua egbe ro. “Emwi ne Osanobua mwamwaẹn nọ ra vbe musẹ vbe ẹghẹ gha sẹ” ọre ne ọ ku emwa ọghẹe ni rre agbọn kevbe ẹrinmwi kugbe, ne iran do gha re ọkpa. (Tie Ẹfisọs 1:8-10.) Emwi eva ẹre Osanobua ru, ne ọ ya mu emwamwa na sẹ. Nokaro ọre wẹẹ, ọ keghi mu etẹn na hannọ zẹ egbe yotọ khẹ ẹghẹ ne iran khian ya deba Arowa iran ighẹ Jesu Kristi vbe ẹrinmwi. Emwamwa na keghi suẹn vbe ugie Pẹntikọst vbe ukpo 33 C.E. vbe ẹghẹ ne Jehova ya suẹn gha si emwa ughughan koko ni khian deba e Kristi kha vbe ẹrinmwi. (Iwinna 2:1-4) Ugbẹnvbe a miẹn wẹẹ Osanobua ka emwa na hannọ zẹ ba emwa imudiase rhunmwuda izọese adẹwerriegbe ọghe Kristi, te iran ghi sẹtin si agbada vbe unu kha wẹẹ “ivbi Osanobua” ẹre iran khin.—Rom 3:23, 24; 5:1; 8:15-17.
4 Nogieva ọre wẹẹ, Osanobua keghi mu emwa ni khian gha rre Paradais egbe yotọ, iran na ẹre ọ khian gha rre uhunmwu otagbọn na vbe etẹbitẹ vbe ototọ Arriọba e Mẹzaia. Abọ nokaro ọghe emwa na guan kaẹn na, ọre ‘oghẹn ne gbii.’ (Arhie 7:9, 13-17; 21:1-5) Vbuwe Ukpo Arriaisẹn Ọkpa Ne Kristi Khian Ya Kha, uye (billions) ọghe emwa nibun ni khian rhiọkpaegbe gha deba iran. (Arhie 20:12, 13) Muẹn roro vbene ima khian gha mwẹ akugbe hẹ, vbe ẹghẹ ne ọkhọngborrie emwa nibun khian ya rhiọkpaegbe! Vbe ukpo arriaisẹn ọkpa nii gha ghi fo nẹ, “emwi na yi hia ni rre . . . agbọn” gha werriẹ aro daa edanmwẹ nokiekie. Emwa ni mudia ẹse ghi do khian “ivbi Osanobua” ni rre agbọn na.—Rom 8:21; Arhie 20:7, 8.
Gualọ Emwi Ewe Ọghe Orhiọn
(Ẹfisọs 3:13) Rhunmwuda ọni nian, I rinmwian uwa, wa ghẹ gi ẹre gbe uwa orhiọn ighẹ oya ne I re ne uwa na, ọyọ [ra uyi, NW ] ọghe uwa nọ.
w13 2/15 28 ¶15
Ghẹ Gi Emwi Rhọkpa Da Ruẹ Yi Ne U Ghẹ Miẹn Uyi Ne Osanobua Mu Ye Ọmwa Egbe
15 Adeghẹ ima na gha ru ahoo ọghe Jehova, vbene ima ma na gi egbe wọọ ima, ọ gha ru iyobọ ne emwa ọvbehe ya miẹn uyi ne Osanobua mu ye ọmwa egbe. Vbe Pọl ghi gbẹn ebe gie etẹn ni rre Ẹfisọs, ọ na kha wẹẹ: “Rhunmwuda ọni nian, I rinmwian uwa, wa ghẹ gi ẹre gbe uwa orhiọn ighẹ oya ne I re ne uwa na, ọyọ [ra uyi, NW ] ọghe uwa nọ.” (Ẹfis 3:13) De vbene oya ne Pọl re ya re ‘uyi’ ne etẹn ni ghaa rre Ẹfisọs? Ne Pọl ma na gi egbe wọọ re vbe iyobọ ne ọ ghaa ye ne etẹn ni rre Ẹfisọs, agharhemiẹn wẹẹ ọ miẹn edanmwẹ nibun, keghi ya iran rẹn wẹẹ, na gha re Ovbiotu e Kristi keghi re ukpamuyọmọ nọkhua kevbe nọ hiunsi. Akpawẹ te Pọl gi egbe wọọ re vbe ọ werriẹ aro daa ukpokpo, ẹi re te ọna gha te ya etẹn ni rre Ẹfisọs gha roro ẹre wẹẹ, asikẹgbe ne iran gu e Jehova mwẹ, iwinna ikporhu ọghe iran kevbe ayayẹro ne iran mwẹ i zẹdẹ mwẹ esa nọ ye ra? Izinegbe ne Pọl ghaa mwẹ keghi ru iyobọ ne iran ya rẹn wẹẹ, na gha re Ovbiotu e Kristi keghi re emwi ne kpataki, kevbe wẹẹ, ukpamuyọmọ ne iran mwẹ zẹvbe erhuanegbe ọghe Jesu sẹ emwi hia ne iran sẹrae.
(Ẹfisọs 3:19) Ẹn, te uwa gha do rẹn ahoẹmwọmwa rẹn, agharhemiẹn ighẹ a i sẹtin rẹn ọnrẹn fo ne a miẹn ehe na ya uvuọnmwẹ nọ gbae ọghe Osanobua vuọn uwa fẹẹrẹ.
cl 299 ¶21
“Te Uwa Gha Do Rẹn Ahoẹmwọmwa [Ọghe Kristi]”
21 Emwi na yae kha ighẹ ẹmwẹ e Grik na ke zedu ẹmwẹ na, nọ re “do rẹn” ọre na gha mwẹ irẹnmwi “rhunmwuda emwi na he miẹn vbe agbọn.” Adeghẹ ima na gha rhie ahoẹmwọmwa ma vbene Jesu ru ẹre, ẹre ima khian na sẹtin kha wẹẹ ima gele rẹn vbene Jesu ru emwi hẹ; odẹ ne ima khian ya ru ọna, ọre ne ima gha ya ekhọe hia ru iyobọ ne emwa ọvbehe, ma ghi gha ye iran obọ vbe iran ghaa gualọ iyobọ, ma ghi vbe gha yabọ iran vbe iran gha ru emwi nọ sọnnọ ima. Ma gha ru vberriọ, ma ghi do “rẹn ahoẹmwọmwa [ọghe Kristi], agharhemiẹn ighẹ ai sẹtin rẹn ọnrẹn fo.” Ọ ma khẹke ne ima mianmian wẹẹ, zẹvbe ne ima ya hia ne ima ya egbe tae Kristi, erriọ ẹre ima ya sikẹ e Jehova sayọ, rhunmwuda te Jesu Kristi tobọ re vbe ya egbe tae Jehova.
E Baibol Na Tie
(Ẹfisọs 1:1-14) E Pọl, ọmwa nọ re ukọ Osanobua ne ọ winna ne Kristi Jesu vbekpa iho Osanobua, ẹre ọ gbẹn ebe na gie emwa Osanobua ni rre Ẹfisọs, iran ni mudia ẹse vbe uwu ẹdẹ agbọn iran vbuwe Kristi Jesu. 2 Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfunmwegbe ne uwa. 3 Wa gie ima rhie ekpọnmwẹ ne Osanobua kevbe Erha Nọyaẹnmwa Jesu Kristi! Rhunmwuda, irẹn fiangbe mwa nẹ vbuwe akugbe ba e Kristi vbekpa ne ọ na rhie ọhẹ emwi orhiọn ne ima ke ẹrinmwi gha dee. 4 Vbe a te do yi agbọn, Osanobua hannọ ima zẹ nẹ ne ima gha re ọghẹe vbuwe Kristi, ne ima sẹtin gha re nọhuanrẹn kevbe ne ẹi mwẹ abe vbe odaro ẹre, rhunmwuda ahoẹmwọmwa rẹn. 5 Osanobua tae nẹ wẹẹ vbekpae Jesu Kristi, irẹn gha silo ima rrie egbe ne ima do gha re ivbi ẹre, vbene ọ yẹẹ ọre, kevbe vbene ọ mwamwaẹn ẹre ọna khin. 6 Wa gie ima rho Osanobua ye ẹsọhẹ nọ mwẹ uyi ọghẹe, kevbe emwi ọhẹ ne ọ ya ru ima ẹse, vbe uwu ovbi ẹre ne ọ ghaan! 7 Rhunmwuda, vbekpa uwu e Jesu Kristi, a keghi fannọ ima ye otọ, ọni nọ wẹẹ a keghi vbe ya avbe orukhọ mwa bọ mwa. U miẹn vbe ẹsọhẹ Osanobua kpọlọ hẹ, 8 ne irẹn wa vbe rhie ẹre ọrhẹnrhẹn ne ima. Vbe uwu ẹwaẹn ọghẹe, kevbe ne ọ na ghee umian emwi. 9 Osanobua keghi wa ru zẹ vbe ne ọ ya ekhọe mwamwaẹn, ọ keghi gie ima rẹn emwamwa ne irẹn mwamwaẹn vbe ẹkhokho, ne ọ wẹẹ irẹn gha lekpae Kristi ya khian ne a ru gba. 10 Emwi ne Osanobua mwamwaẹn, ne ọ ra vbe musẹ vbe ẹghẹ a sẹ, ọrọre wẹẹ, ne ọ do viọ emwi na yi hia ni rre ẹrinmwi kevbe agbọn, kugbe ba e Kristi zẹvbe uhunmwuta ehia. 11 Rhunmwuda, vbene Osanobua wẹẹ emwi gha ye ẹre ọ ye, Osanobua keghi zẹ mwa wẹẹ ne ima gha re emwa irẹn, vbuwe a ya egbe ba e Kristi, rhunmwuda emwamwa ne irẹn mwamwaẹn zẹ vbene ọ tae ke omuhẹn gha dee. 12 Rhunmwuda ọni, wa gie ima, ni re emwa ni ka gha mwẹ idaehọ vbuwe Kristi, rhie urhomwẹ ne uyi Osanobua. 13 Erriọ ẹre ọ wa vbe gha ye ne uwa ba re, ugbẹnvbe uwa họn ikporhu ẹmwata nii, nene iyẹn nọ maan ne ọ rhie imiẹnfan gie uwa, wa keghi ya e Kristi yi, Osanobua keghi yi uwa ama mẹ ọ yan rẹn, vbekpa ne ọ na rhie orhiọn nọhuanrẹn ne ọ ve ne uwa. 14 Nene orhiọn nọhuanrẹn ẹre a ya zẹ osẹe yọ wẹẹ, emwi ne Osanobua ve emwa rẹn re, gha sẹ ima obọ, ọ keghi vbe gie aro mwa dae wẹẹ Osanobua gha rhie ọdakha egbe ọmwa nọ gbae ne avbe emwa rẹn. Wa gie ima rho uyi ẹre!
JUNE 17-23
EMWI EWE NI RRE UWU ẸMWẸ ỌGHE OSANOBUA | ẸFISỌS 4-6
“Viọ Emwi Igbinna Okuo Ne Osanobua Hẹ Nuẹn Hia Ye Egbe”
(Ẹfisọs 6:11-13) Viọ emwi igbinna okuo ne Osanobua hẹ nuẹn hia ye egbe, ne egbe ruẹ miẹn ehe na rrọọ emwi ero ne Esu ru. 12 Rhunmwuda ẹi re emwa ne agbọn kẹkan ma gu vẹn, sokpan iran nọ ighẹ avbe ẹtin ni wo ni re avbe ẹrinmwi, avbe ọdakha, avbe enikhaemwisẹ, avbe eniwanrẹn asọn, ọghe orre ne ọ so ebiebi na. 13 Rhunmwuda ọni, wa viọ ẹwu igbinna Osanobua ye egbe nian. Ẹghẹ nii, ọ gha ghi sẹ ẹdẹ ukpọba, uwẹ ghi sẹtin khẹ emwi ne oghian nii fi, u gha ghi gbinna ya sẹ ufomwẹ nẹ, u ghi ye gha re ne ọ ya ika tua otọ.
Igbama—Wa Mudia Gbain Ne Esu Ghẹ Mieke Na Sẹtin Mu Uwa Rẹrẹ
UKỌ e Pọl keghi ya Ivbiotu e Kristi gie Ivbiyokuo ni gbinna vbe odaro okuo. Sokpan ẹi re emwa nagbọn ma gu khọn, Esu kevbe ekpayẹ ọre ẹre ima mu aro daa. Esu kevbe avbe ugbogiorinmwi keghi re ivbiyokuo ni fuẹro rhunmwuda, ọ kpẹre ne iran ke rre odaro okuo. Ma sẹtin gha roro ẹre wẹẹ ma i khian sẹtin khọnmiotọ vbe okuo vbenian katekate deghẹ ehọnrre ra igbama ma ye khin. De vbene igbama khian ya gele sẹtin khọnmiotọ yan Esu kevbe ekpayẹ ọre hẹ? Ẹmwata nọ rrọọ ọre wẹẹ, iran gha sẹtin, nibun wa khọnmiotọ yaẹn Esu vbe ẹdẹnẹrẹ. Vbọ ru iyobọ ne iran? E Jehova ẹre ọ rhie ẹrhiọn ye iran iwu. Ẹi re ọni ọkpa ẹre ọ ru iyobọ ne iran. Vbene a ghee ivbiyokuo ni rre odaro okuo, iran keghi ‘viọ emwi igbinna okuo ne Osanobua hẹ ne iran ye egbe.’—Tie Ẹfisọs 6:10-12.
(Ẹfisọs 6:14, 15) Rhunmwuda ọni, khẹ ye egbe, ya ẹmwata ru ugbẹkun rhie gba, ya iruemwiẹse ru uhanhan ẹwẹe. 15 Kevbe amuegbe ne a ya kporhu iyẹn nọ maan ọghe ọfunmwegbe, ru ibata hẹ ye owẹ.
Igbama—Wa Mudia Gbain Ne Esu Ghẹ Mieke Na Sẹtin Mu Uwa Rẹrẹ
4 Erriọ ẹmwata nọ rre Baibol vbe ya gbogba gae ima, ne ọyasin ọghe ugamwẹ ohoghe ghẹ sin ima. (Jọn 8:31, 32; 1 Jọn 4:1) Ma gha gele gha gbọyẹmwẹ ye ẹmwata ni rre uwu Ẹmwẹ Osanobua, “uhanhan ẹwẹe” i khian gha lọghọ ima na mu yọ, ọni nọ wẹẹ, uhi ra ilele ọghe Osanobua i khian gha lọghọ ima na lele. (Psm 111:7, 8; 1 Jọn 5:3) Ma gha gele rẹn otọ imamwaemwi ọghe ẹmwata, ẹre ima khian na sẹtin ya udinmwẹ gha sinmwi oseghe ne ugamwẹ ẹmwata vbe odaro emwa ni gbodan.—1 Pit 3:15.
7 U miẹn vbene igiemwi na gbe ye uviẹn hẹ! Vbene uhanhan ẹwẹe ya gbogba gae ẹkokoudu, erriọ ilele ọghe Jehova ya gbogba gae ekhọe iziro ọghe ima. (Itan 4:23) Ai miẹn ovbiyokuo nọ gha kue na miẹn irẹn uhanhan ẹwẹe ọghe ematọn mu ne ọmwa ọvbehe, ne a mu ọghe oze nọ ma wegbe ye ihe ẹre. Erriọ ima i khian vbe bi ilele kevbe adia ọghe Jehova ghee okhiẹ, ne ima mu ọghe ima ye okaro. Irẹnmwi ọghe ima ma sẹ nọ gha sẹtin gbogba gae ima. (Itan 3:5, 6) Ọna ẹre ọ zẹe ne ọ na khẹke ne ima gha gbarokotọ vbe ẹghẹ hia, ne ima mieke na rẹn deghẹ uhanhan ẹwẹe ọghomwa, nọ re ilele ọghe Jehova, ye gbogba gae ẹkokoudu ọghe ima.
10 Ibata okuo na, ẹre ivbiyokuo e Rom gba lae odaro okuo. Erriọ Ivbiotu e Kristi vbe ya mwẹ ibata ọghe orhiọn ne iran gba vbe iran gha khian ya kporhu iyẹn nọ maan ọghe ọfunmwegbe. Ibata orhiọn na, keghi re ne ima na loo ẹkpotọ nọ rhirhi kie ya kporhu iyẹn nọ maan. (Aiz 52:7; Rom 10:15) Ọrheyerriọ, ọmwa nọ ma din i sẹtin kporhu vbe ẹkpotọ gha kie. Ọtẹn nokpia Bo nọ rre ukpo 20 keghi kha wẹẹ: “Ohan i ka gu mwẹ kporhu ma ihua mwẹ vbe klas. Ekhue wa gha mu mwẹ. I ma rẹn emwi nọ ya ohan gha mu mwẹ vbe ẹghẹ nii. Nia, oghọghọ ẹre I ghi ya kporhu ma ihua mwẹ.”
(Ẹfisọs 6:16, 17) Dada iyayi ya ru asa mu mwẹ vbe ẹghẹ hia, ọni ọre u gha ya sẹtin rhọọ ẹre ighẹ avbe ifẹnmwẹ erhẹn ne ọka ẹrhia nii filo. 17 U ghi rhan obọ miẹn imiẹnfan ya ru ẹrhu ematọn, kevbe ẹmwẹ Osanobua zẹ vbe umozo ne nene orhiọn rhie nuẹn.
Igbama—Wa Mudia Gbain Ne Esu Ghẹ Mieke Na Sẹtin Mu Uwa Rẹrẹ
13 Ọkpa vbe usun “ifẹnmwẹ erhẹn” ne Esu filo gi ima ọre ohoghe nọ ta vbekpae Jehova. Esu keghi hoo ne ọ kọe ye ima orhiọn wẹẹ, e Jehova ma zẹdẹ hoẹmwẹ ima. Ọtẹn nokhuo ne a tie ẹre Ida, nọ rre ukpo 19 kegha mwẹ egbe iziro vbenian. Ọ keghi kha wẹẹ: “Te I ka wa gha mwẹ ọnrẹn vbe orhiọn wẹẹ, e Jehova ma zẹdẹ hoẹmwẹ mwẹ kevbe wẹẹ, ọ ma vbe hoo ne I gha re ọsiọre.” De emwi nọ ghi fi iziro ọghẹe werriẹ? Ọ keghi kha wẹẹ: “Iko ne a yo ẹre ọ ghi ya amuẹtinyan mwẹ deziẹn. I wa gha yo iko sokpan, te I wa ya gha tota kua kẹkan. Ii niẹn obọ amaiwẹ te I khian zẹ ewanniẹn. Ẹi re erriọ ghi ye nia. Te I ghi mu egbe iko ye otọ, I vbe hia ne I zẹ ewanniẹn igbava ra igbaha. Ẹi khuẹrhẹ mẹ sokpan I gha ghi sẹtin zẹ ewanniẹn nẹ, ọyẹnmwẹ ghi wa gha sẹ mwẹ. Etẹn ni rre iko mwẹ wa vbe rhie igiọdu mẹ. I ghaa ke iko die owa, I gha mwẹ ọnrẹn vbe ilẹkẹtin wẹẹ, e Jehova hoẹmwẹ mwẹ.”
16 Zẹvbe ne ẹrhu ematọn ya gbogba gae ẹrherhe ọghe ovbiyokuo, erriọ ayayẹro ọghe imiẹnfan ne ima mwẹ vbe ya gbogba gae ekhọe iziro ọghe ima. (1 Tẹs 5:8; Itan 3:21) Ayayẹro ẹre ọ ya ima rhie aro tua eyan ọghe Osanobua. Ẹre ọ vbe zẹe ne orhiọn i na gbe ye ima iwu vbe ima ghaa rre uwu ọlọghọmwa. (Psm 27:1, 14; Iwinna 24:15) Nọnaghiyerriọ, ma gha hoo ne “ẹrhu ematọn” ọghomwa gele gha gbogba gae ima, te ọ khẹke ne ima gha muẹn rhuẹ vbe ẹghẹ hia, ẹi re ne ima gha muẹn mwẹ obọ.
20 E Pọl keghi ya Ẹmwẹ Osanobua gie umozo. Sokpan, te ọ khẹke ne ima gha ya ifuẹro loo umozo na vbe ima ghaa sinmwi oseghe ne ugamwẹ ẹmwata kevbe vbe ima ghaa yae dia iziro ọghomwa. (2 Kọr 10:4, 5; 2 Tim 2:15) Vbe ima khian ya sẹtin gha mwẹ ifuẹro na hẹ? Sebastian nọ rre ukpo 21 keghi kha wẹẹ: “I ghaa tie Baibol, I gha gbẹnnẹ uviẹn ọkpọkpa yotọ vbe uhunmwu ebe ọghe Baibol ne I rhirhi gha tie. Te I hae ye ugan ako ọghe Baibol ni yẹẹ mwẹ. Odẹ vbenian, iziro ekhọe mwẹ ghi do gha gua ọghe Jehova ro.” E Daniel ne a ka guan kaẹn vbe omuhẹn ban keghi kha wẹẹ: “I ghaa tie Baibol ne egbe mwẹ, I ghi yẹrẹro ako eso ne I gha ya ru iyobọ ne emwa vbe ikporhu iyẹn nọ maan. I keghi do bẹghe ẹre wẹẹ, emwa wa danmwehọ ẹsẹsẹmwẹse vbe iran gha tobọ iran bẹghe ẹre wẹẹ, e Baibol ẹre u mobọ loo kevbe wẹẹ, ekhọe hia ẹre u ya hoo ne u ru iyobọ ne iran.”
Gualọ Emwi Ewe Ọghe Orhiọn
(Ẹfisọs 4:30) Ghẹ rhia orhiọn nọhuanrẹn ọghe Osanobua ekhọe rua, rhunmwuda nene orhiọn ọrọre ama ọghe mẹ ọ yan rẹn, ne Osanobua yi yọ ruẹ egbe, ama ne aro ya dae wẹẹ, ẹdẹ dee ne Osanobua gha fan [ruẹ] yotọ.
it-1 1128 ¶3
Uhuanmwẹ
Orhiọn Nọhuanrẹn. Ọna keghi re orhiọn ra ẹtin ne Jehova loo ya mu emwamwa ọghẹe sẹ. Ọ keghi re orhiọn nọ hianrẹn kevbe nọhuanrẹn ne Osanobua loo ya winna iwinna ọghẹe. Ọna ẹre ọ si ẹre ne a na tiẹre “orhiọn nọhuanrẹn.” (Psm 51:11; Luk 11:13; Rom 1:4; Ẹfis 1:13) Adeghẹ orhiọn nọhuanrẹn na gha dia ọmwa, ọ ghi gha gua ẹre kpa ne ọ ya gha yin uyinmwẹ esi ra uyinmwẹ nọhuanrẹn. Adeghẹ ọmwa na gha yin uyinmwẹ nọ ma huan vbe ẹghẹ hia, ọ rhiema wẹẹ, te ọmwa nii gbodan ghee ẹtin ọghe orhiọn nọhuanrẹn ra te ọ “rhia” ekhọe orhiọn nọhuanrẹn rua. (Ẹfis 4:30) Ẹmwata nọ wẹẹ, orhiọn nọhuanrẹn i re ọmwa, sokpan orhiọn nọhuanrẹn na, ẹre Osanobua loo ya mu emwamwa ọghẹe sẹ, rhunmwuda ọni, ma gha sẹtin ‘rhia ẹre ekhọe rua.’ Ọmwa nọ rhiegba ye emwi dan na ru keghi “mu idobo ye orhiọn nọhuanrẹn iwinna.” (1 Tẹs 5:19) Ọmwa nọ ma fi werriẹ vbe uyinmwẹ vberriọ keghi ‘rhia orhiọn nọhuanrẹn ọghe Osanobua ẹko rua,’ ọmwa isọtẹ vberriọ keghi ya egbe ẹre khian oghian Osanobua. (Aiz 63:10) Ọmwa nọ rhia ekhọe ọghe orhiọn nọhuanrẹn rua sẹtin do khian ọmwa nọ fi unu gie ẹre, ra ọmwa nọ rhoo ro; Jesu wẹẹ ọmwa vbenia i khian miẹn ayabọ vbe ẹdẹdẹmwẹdẹ.—Mat 12:31, 32; Mak 3:28-30; ya ghee uhunmwuta nọ khare wẹẹ, SPIRIT.
(Ẹfisọs 5:5) Wa kakabọ rhie ọna ye ekhọe, ọmwaikọmwa ne ọ gbe alama oghẹ ra ne ọ họhọ ra ne ọ zuan (rhunmwuda ozuan, esa ẹbọ ne a ga nọ) ne ọ gha mwẹ ọghae vbe Arriọba e Kristi kevbe ọghe Osanobua, ẹi rrọọ.
it-1 1006 ¶2
Arovbẹmwẹ
Ọ Keghi Rhiegbe Ma Vbe Uyinmwẹ. Adeghẹ ọmwa na gha mwẹ arovbẹmwẹ, ẹi mwẹ ọ ma rhiegbe ma vbe uyinmwẹ ọnrẹn. Ọrhuanegbe ighẹ Jems keghi gi ima rẹn wẹẹ, iziro dan ne ọmwa mwẹ vbe ekhọe gha suẹn gha hanmwa nẹ, ọ ghi biẹ orukhọ. (Jems 1:14, 15) Ọna rhiema wẹẹ, ọmwa ghaa mwẹ arovbẹmwẹ, ọ ghi rhiegbe ma vbe uyinmwẹ ọnrẹn. Ukọ e Pọl keghi kha wẹẹ, ọmwa igẹbọ ẹre ọmwa nọ mwẹ arovbẹmwẹ khin. (Ẹfis 5:5) Ọmwa nọ mwẹ arovbẹmwẹ keghi mu emwi nọ hoo ye okaro vbene a miẹn wẹẹ, ọni ẹre ọ ghi re osa ne ọ ga, nọ gha te ya mu aro ye ugamwẹ ọghe Ayi nọ yi ẹre.—Rom 1:24, 25.
E Baibol Na Tie
(Ẹfisọs 4:17-32) Rhunmwuda ọni, eni Enọyaẹnmwa ẹre I ya ta ẹmwẹ na, te I wa vbe tua unu muẹn wẹẹ, wa ghẹ gha ru vbene avbe iran ni ga ẹbọ ru, emwa ne iziro ekhọe iran i mwẹ esa ne ọ ye. 18 Ekhọe iran keghi vbe rre uwu ebiebi. Iran i mwẹ ọghae vbe ẹdẹ agbọn ne Osanobua ya ru ọmwa ẹse, rhunmwuda iran ma zẹdẹ rẹn na ye, iran keghi vbe ze vbe udu. 19 Iran i ghi rẹn emwi ne a tie ẹre ekhue, iran wa fan egbe iran fi uwu iba ne a zẹ, iran keghi vbe yin uyinmwẹ osọnnọ hia vbe ne ai na vbe ghee iyeke. 20 Wa ma ruẹ emwi vberriọ vbe ehe ne Kristi ye. 21 Vbe ne ai na gbe awawẹ, wa họn ẹmwẹ ọnrẹn, kevbe zẹvbe emwa ni lelẹe khian, a vbe maa uwa ẹmwata nọ rre uwu e Kristi. 22 Rhunmwuda ọni, wa muẹn fua ighẹ emwi ne uwa guẹ nẹdẹ, nọ ya uwa gha ru emwi ne uwa te ka ru nẹdẹ nii, ne emwi erẹrẹ ne ọ hoo te ya rrie. 23 Ọ kere ne orhiọn kevbe ekhọe uwa wa khian ọghe ọgbọn fẹẹrẹ. 24 Wa ghi muẹn yọ ighẹ egbe ọgbọn nii ne a yi zẹvbe ama ọghe Osanobua, nọ vbe rhie egbe ma vbe arrọọ ọghe ẹmwata nọ re nọ mudia ẹse kevbe nọhuanrẹn. 25 Rhunmwuda ọni nian, ohoghe ne a ta i ghi rrọọ, dọmwadẹ ọghẹe ghi gha ta ẹmwata ma ọtiọnrẹn, rhunmwuda otu ọkpa ma hia koko khin vbe uwu egbe Kristi. 26 Deghẹ ohu muẹn, ghẹ gie ohu nọ muẹn ya ru orukhọ, ghẹ vbe mu ohu la ẹdẹ ohoho. 27 Ghẹ rhie ẹghẹ ne Esu. 28 Ọmwa ne ọ te ka rhaa yi, wẹẹ ne ọ dobọ oyi ne a rhaa yi, ne ọ suẹn gha winna, ne ọ miẹn ehe na gha khuan okhuan ne ai gbe ikhan yi ọghe obọ re, kevbe ne ọ sẹtin vbe gha ye ne ẹi mwẹ obọ. 29 Wa ghẹ gha fi obi unu gie egbe, wa gha ta ẹmwẹ nọ yi ọmwa obọ, egbe nọ rhie ẹtin ye ọmwa iwu, ọ ghi vbe rhie emwi ne ẹi te rrọọ rre, vbene a gha na miẹn wẹẹ, ẹmwẹ ne u ya unu ruẹn ta, ghi gha ru ọ maan ne iran ni ya ehọ họn. 30 Ghẹ rhia orhiọn nọhuanrẹn ọghe Osanobua ekhọe rua, rhunmwuda nene orhiọn ọrọre ama ọghe mẹ ọ yan rẹn, ne Osanobua yi ye ruẹ egbe, ama ne aro ya dae wẹẹ, ẹdẹ dee ne Osanobua gha fan ye otọ. 31 Wa gbe ukhu ẹre rua ighẹ ẹkorriaramwẹ, owowo, kevbe ohu, wa ghẹ ghi vannọ okan, ra ne a gha tie ihẹn, wa gie ẹkokhọmwẹ fo, kẹ kevbe emwi ni yerriọ hia. 32 Sokpan, wa gha mwẹ itohan kevbe ekhọe agiẹngiẹn daa egbe, wa vbe gha yabọ egbe, zẹ vbene Osanobua vbe lekpae Kristi yabọ uwa.
JUNE 24-30
EMWI EWE NI RRE UWU ẸMWẸ ỌGHE OSANOBUA | FILIPAI 1-4
“Ghẹ Si Osi Ye Emwi Rhọkpa”
(Filipai 4:6) Ghẹ si osi ye emwi rhọkpa, sokpan gha ya erhunmwu ne a na, nọ emwi ne u hoo hia vbe obọ Osanobua, u ghi gha ya ekhọe ọkpọnmwẹ ẹse nọ rẹn vbe ẹghẹ hia.
“Ọfunmwegbe Osanobua . . . Gberra Ne Ọmwa Nagbọn Gha Sẹtin Rẹn Otọ Ẹre”
10 De emwi nọ gha ru iyobọ ne ima, ne ima ghẹ gha si osi ye emwi rhọkpa? De emwi nọ gha vbe ya ima gha mwẹ “ọfunmwegbe Osanobua”? Erhunmwu wa nọ zẹẹ. Erhunmwu ẹre ọ khẹke ne ima na vbe ima ghaa si osi. (Tie 1 Pita 5:6, 7.) Gha mwẹ amuẹtinyan nẹi beghe wẹẹ, e Jehova gha họn erhunmwu ruẹ. Gha ya “ekhọe kpọnmwẹ” ọnrẹn ye afiangbe nọ ke obọ ẹre rre vbe u ghaa na erhunmwu. Ọ gha ya ilẹkẹtin ọghomwa wegbe sayọ vbe ima ghaa yerre wẹẹ “ọ gha sẹtin ru gberra vbene ima nọ rẹn, ra vbene a roro ẹre vbe ekhọe.”—Ẹfis 3:20.
(Filipai 4:7) Te ọfunmwegbe Osanobua, nọ gberra ne ọmwa nagbọn gha sẹtin rẹn otọ ẹre gha rhie ekhọe kevbe orhiọn uwa mwẹ, vbene ai na mwẹ ẹbe vbe uwu e Kristi Jesu.
“Ọfunmwegbe Osanobua . . . Gberra Ne Ọmwa Nagbọn Gha Sẹtin Rẹn Otọ Ẹre”
7 Vbe Pọl gbẹn ebe gie etẹn vbe Filipai, ẹi mwẹ iran ma yerre emwi nọ sunu dae Pọl kevbe odẹ ọghe ọyunnuan ne Jehova ya ru iyobọ nẹẹn. De emwi ne Pọl hoo ne iran gha mwẹ vbe orhiọn? Ọre wẹẹ: Esa i rrọọ ne iran khian ya gha si osi. Iran gha na erhunmwu, iran ghi miẹn ọfunmwegbe nọ ke obọ Osanobua rre. Yẹrẹro wẹẹ “ọfunmwegbe Osanobua . . . gberra ne ọmwa nagbọn gha sẹtin rẹn otọ ẹre.” Vbe a yae kha? Ọzedu eso keghi zedu ẹre vbenian: “Ọ gberra emwi hia ne a yaro yi” ra “emwamwa ọghe emwa nagbọn hia.” Emwi ne Pọl hoo ne ima rẹn mwa ọre wẹẹ, “ọfunmwegbe Osanobua” hiunsi sẹ emwi ne ima gha sẹtin ya aro ekhọe zẹ omwa rẹn. Te ọlọghọmwa ne ima ghee gẹdẹgbẹẹ ye kherhe vbe aro e Jehova, irẹn gha sẹtin sọfurre yọ vbe odẹ ne ima ma yaro yi.—Tie 2 Pita 2:9.
“Ọfunmwegbe Osanobua . . . Gberra Ne Ọmwa Nagbọn Gha Sẹtin Rẹn Otọ Ẹre”
16 Vbọ kẹrikian vbe ima ghaa mwẹ “ọfunmwegbe Osanobua ne ọ gberra ne ọmwa nagbọn gha sẹtin rẹn otọ ẹre”? Ebe Nọhuanrẹn khare wẹẹ ọfunmwegbe na ghi “gbogba ga” ekhọe kevbe orhiọn ima. (Fil 4:7, NW ) Vbe urhuẹvbo e Grik, ẹmwẹ na, “gbogba ga” keghi re ne ivbiyokuo loo. A kegha loo ẹre ginna ivbiyokuo na gie ya khẹ odẹ vbe ẹvbo na gbogba ga. Erriọ Filipai ghaa ye. Te Ivbi e Filipai vbiẹ dẹ ehọ vbe asọn, orhiọn iran ghi sotọ rhunmwuda iran rẹnrẹn wẹẹ ivbiyokuo khẹ odẹ. Ma ghaa mwẹ “ọfunmwegbe Osanobua,” erriọ orhiọn ima vbe ya sotọ rhunmwuda ima rẹnrẹn wẹẹ e Jehova gbaroghe ima, ọ vbe hoo ne ima musọe. (1 Pit 5:10) Ọna ẹre ọ zẹe ne orhiọn i na gbe ye ima iwu.
Gualọ Emwi Ewe Ọghe Orhiọn
(Filipai 2:17) Ọ gha kẹ, te a ra gbe esagiẹn arrọọ mwẹ ye otọ zẹvbe emwi imuohan [ra ayọn na ya ru izọhẹ, NW ] ye ese ne iyayi uwa zọ ghe Osanobua. Ọ ghaa yerriọ, I gha ghọghọ, I gha vbe ghae ne uwa hia vbe oghọghọ mwẹ na.
it-2 528 ¶5
Izọhẹ
Ayọn Na Ya Ru Izọhẹ. Ayọn kegha rre usun emwi ne Ivbi Izrẹl ya gha ru izọhẹ, katekate vbe iran ghi sẹ Otọ Na Ru Eyan Rẹn Nẹ. (Nọm 15:2, 5, 8-10) Ayọn nọ fian ẹre iran ghaa loo ya ru izọhẹ, iran ghi tue ẹre ye aka izọese. (Nọm 28:7, 14; yae taa Ẹks 30:9; Nọm 15:10.) Vbe ukọ e Pọl ghi gbẹn ebe gie etẹn ni rre Filipai, ọ keghi tama iran wẹẹ: “Ọ gha kẹ, te a ra gbe esagiẹn arrọọ mwẹ ye otọ zẹ vbe emwi imuohan [ra ayọn na ya ru izọhẹ, NW ] ye ese ne iyayi uwa zọ ghe Osanobua. Ọ ghaa yerriọ, I gha ghọghọ.” Te irẹn ya ayọn ne a ya ru izọhẹ ru igiemwi, ne ọ ya rhiẹre ma wẹẹ, irẹn muegbe ne ọ ya loo ẹrhiọn ọghẹe hia ya ru iyobọ ne etẹn. (Fil 2:17) Vbe ọ ghi bu ẹghẹ ne Pọl khian ya wu, ọ keghi gbẹn ebe gie Timoti wẹẹ: “Zẹvbe ọghomwẹ, ẹghẹ ne a ra na ya mwẹ zọese sẹ nẹ nian, ẹghẹ sẹ nẹ ne I ra ya fi agbọn na ye otọ.”—2 Tim 4:6.
(Filipai 3:11, NW) ne I mieke na rẹn deghẹ I gha rhiọkpaegbe vbe ẹghẹ arhiọkpaegbe nokaro.
w07 1/1 26-27 ¶5
“Arhiọkpaegbe Nokaro” Suẹn Nẹ!
5 Vbe iyeke ọni, etẹn na hannọ zẹ ni re ‘Izrẹl ọghe Osanobua’ ghi ya deba Enọyaẹnmwa Jesu Kristi kha vbe ẹrinmwi, iran ghi gha gu “e Nọyaẹnmwa rrọọ ẹdẹdẹmwẹdẹ.” (Galatia 6:16; 1 Tẹsalonaika 4:17) Ọna ẹre Baibol tiẹre “arhiọkpaegbe nokaro.” (Filipai 3:10, 11; Arhie Maan 20:6) Arhiọkpaegbe nokaro na gha ghi fo nẹ, ẹkpotọ ghi do kie ne ẹbu emwa nibun ni wulo, ne iran ya rhiọkpaegbe; iran ghi do gha mwẹ ayayẹro ọghe arrọọ etẹbitẹ vbe Paradais vbe uhunmwu otagbọn na. Rhunmwuda ọni, ọre ẹrinmwi ima rrie, ra uhunmwu otagbọn na ma khian gha ye, ẹmwẹ “arhiọkpaegbe nokaro” dekaan ima hia. De aro arhiọkpaegbe ne ọna khin? De ẹghẹ nọ khian ya sunu?
E Baibol Na Tie
(Filipai 4:10-23) U miẹn vbe ọyẹnmwẹ sẹ mwẹ hẹ ye ẹdẹ agbọn mwẹ vbe uwu e Nọyaẹnmwa! Iyeke vbe ọ ghi kpẹẹ fua nẹ, wa kevbe miẹn ẹkpotọ ya dọlegbe rhiema ighẹ, uwa mu ẹmwẹ mwẹ roro. I ma kha ighẹ wa te yan mwẹ fua nẹ o, te uwa ma miẹn ẹkpotọ ya ru ẹre. 11 Wanwanna nian, ẹi re te I ta ẹmwẹ na rhunmwuda ighẹ te I ghi yevbe ọmwa ne a yangbe, rhunmwuda I ruẹ ọre guẹ nẹ wẹẹ, ne emwi ne I rhirhi a gha mwẹ sẹ mwẹ ọkẹn. 12 I rẹn emwi ne a ye a rre ivbabọ kha, kevbe ne a vbe gha mwẹ emwi ọkpọkua. Te I ruẹ emwi na guẹ wẹẹ, ehe nọ rhirhi gha khin, vbe ẹghẹ nọ rhirhi gha khin, emwi ghi sẹ mwẹ ọkẹn. Deghẹ te ohanmwẹ gbe mwẹ ra te ẹko vuọn mwẹ, deghẹ te I mwẹ emwi vbe nọ bun gbe, ra vbe ne ọ ma sẹ. 13 I mwẹ ẹtin ne I ya ye egbe miẹn emwi hia vbekpa ẹtin ne Kristi rhie mẹ. 14 Sokpan emwi esiesi ọre uwa ru, ne uwa na rro mwẹ rre vbe ẹghẹ ọlọghọmwa. 15 Wa ne emwa Filipai tobọ uwa rẹnrẹn ẹsẹse wẹẹ, ẹghẹ ne I na kpa vbe Masidonia rre, vbe ẹghẹ ne a na wa da suẹn gha kporhu iyẹn nọ maan, wa ọkpa ọrọre esọsi nọ yọ mwẹ obọ, wa ọkpa ẹre ọ gu mwẹ ghae vbe ere ne I re kevbe emwi nọ wii mwẹ. 16 Ọ gberra uhukpa ne a miẹn wẹẹ, ẹghẹ ne I na i mwẹ iyobọ vbe Tẹsalonaika, wa keghi gie ne a rhie gu mwẹ. 17 Ẹi re wẹẹ emwi ọhẹ ẹre ọ ghaa khọn mwẹ ne a miẹn, sokpan, I kegha hoo ne a rhie ere ne a re ba igho na roro ye otọ ne uwa. 18 Rhunmwuda ọni, wa ghee ebe ọ sẹ mwẹ obọ ọghe emwi hia ne uwa he hẹ gu mwẹ, ọ wa vbe sẹ kpọ kua. Emwi ne uwa viọ ne Ẹpafroditọs viọ gu mwẹ, sẹ mwẹ obọ nẹ nian, emwi ne I hoo hia gbae. Te ena yevbe emwi izọese nọ winhin ne a ya mu ohan gie Osanobua, emwi ne ọ yẹẹ ọre, ne ọ gha vbe rhan obọ miẹn. 19 Deba re, Osanobua mwẹ ne ẹfe ẹre kpọkua vbuwe Kristi Jesu, gha kpemehe emwi ne uwa i mwẹ hia. 20 Osanobua mwa kevbe Erha mwa ọre uyi gha rrọọ na ẹdẹ kevbe ẹdẹdẹmwẹdẹ. Isẹ. 21 Wa wẹẹ emwa Osanobua hia ni re ọghe Kristi Jesu do. Etẹn ni gu mwẹ rre edinran wẹẹ uwa do. 22 Emwa Osanobua ni rre edinran hia wẹẹ uwa do, kpataki iran ni rre ẹguae Enọgbaisi. 23 Te ẹsọhẹ ọghe Nọyaẹnmwa Jesu Kristi gha gu uwa hia gha rrọọ.