IRUẸMWI 20
Vbene A Ya Mwamwa Iko Ọghe Ivbiotu E Kristi Hẹ
Osa nọ ru emwi hẹnẹhẹnẹ ẹre Jehova khin. (1 Kọrinti 14:33, NW) Nọnaghiyerriọ, te emwa ni gae khian vbe gha ru emwi hẹnẹhẹnẹ. Vbe a ya mwamwa iko ọghe Ivbiotu e Kristi hẹ? De iwinna nọ khẹke dọmwadẹ ima vbe emwamwa na?
1. De ọmwa nọ re uhunmwuta ọghe iko?
“Kristi [ọre] uhunmwuta ọghe iko.” (Ẹfisọs 5:23, NW) Ẹrinmwi ẹre ọ ke dia iwinna ọghe eguọmwadia e Jehova nọ khian vbe otagbọn hia. Jesu keghi zẹ “ọviẹn nọ gia mu ẹtin yan kevbe nọ fuẹro.” Iran na keghi re ẹbu ediọn ni wẹro, na rẹn ye Ẹbu Nọ Su. (Tie Matiu 24:45-47, NW.) Ẹbu Nọ Su ẹre ọ rhie adia ne iko ọghomwa ni rre otagbọn hia vbe ẹdẹnẹrẹ, vbene avbe ukọ kevbe ediọn ni ghaa rre Jerusalẹm vbe orre nokaro ghaa ru ẹre. (Iwinna 15:2) Sokpan ẹi re iran ọre ọkaolotu ima. Ilele ọghe Jehova ni rre Baibol, ẹre iran ya ru emwi, iran vbe lele adia ọghe Jesu.
2. De iwinna ne ediọn ru vbe iko?
Ediọn keghi re ikpia ni wẹro vbe uwu iko, ni ya e Baibol maa eguọmwadia e Jehova emwi, iran rhie igiọdu ne iran, iran vbe ru iyobọ ne iran. Ai ha iran osa ye iwinna na. Nọghayayerriọ, ekhọe obọ iran ẹre iran ya winna ne Osanobua, iran i ya aro ye igho ra emwi ọvbehe vbe obọ emwa. (1 Pita 5:1, 2) Eguọmwadia iwinna ẹre ọ ru iyobọ ne ediọn. Vbene ẹghẹ ya khian, iran tobọ iran sẹtin vbe do gbegba, ni khian gha ga zẹvbe ediọn.
Ẹbu Nọ Su keghi zẹ ediọn eso ne iran gha ga zẹvbe ọgbaroghe ọghe otako. Iran na ẹre ọ mu otuẹ yo iko ughughan, iran ghi gha rhie adia kevbe igiọdu ne etẹn. Iran ẹre ọ zẹ etẹn nikpia ye ukpo ediọn kevbe ọghe eguọmwadia iwinna vbe iko, ọmwa nii gha gbegba zẹvbe ne adia nọ rre Baibol khare, a ghi zẹ ọre ye nene ukpo.—1 Timoti 3:1-10, 12, NW; Taitọs 1:5-9, NW.
3. De emwi nọ khẹke ne dọmwadẹ Osẹe Jehova gha ru?
Emwa hia vbe uwu iko keghi “rho eni” e Jehova. Odẹ ne iran ya ru ọna, ọre ne iran na mwẹ obọ vbe emwamwa ọghe iko kevbe ne iran na kporhu iyẹn nọ maan, vbene ẹtin iran sẹ.—Tie Psalm 148:12, 13.
GUALỌ OTỌ RE SAYỌ
Gia ziro yan aro ọkaolotu ne Jesu khin, odẹ ne ediọn ya hia ne iran gha ya egbe taa re, kevbe vbene ima khian ya ku obọ gbe ba e Jesu kevbe ediọn hẹ.
4. Ọkaolotu nọ mwẹ ekhọe esi ẹre Jesu khin
Jesu wẹẹ ne emwa hia bu irẹn rre. Tie Matiu 11:28-30, iyeke ọni, uwa ghi ziro yan inọta na:
De obọ ne Jesu ya mu emwa ni rre ototọ re?
De vbene ediọn ya ya egbe taa igiemwi ọghe Jesu hẹ? Kpee VIDIO na.
Adia wa rre Baibol, ni gha ru iyobọ ne ediọn ya gha winna iwinna iran ẹse.
Tie Aizaia 32:2 kevbe 1 Pita 5:1-3, iyeke ọni, uwa ghi ziro yan avbe inọta na:
Vbọ ye ruẹ hẹ vbe ekhọe ne u na rẹn wẹẹ, ediọn hia ne iran gha ya egbe taa e Jesu vbe odẹ nọ ya rhie ifuẹko ne emwa ọvbehe?
De odẹ ọvbehe ne ediọn ya ya egbe taa e Jesu?
5. Ediọn keghi rhie igiemwi esi yotọ
De aro ne Jesu hoo ne ediọn ya gha ghee iwinna na waa iran re? Kpee VIDIO na.
Jesu rhie adia yotọ ne ediọn ni rre iko. Tie Matiu 23:8-12, iyeke ọni, uwa ghi ziro yan avbe inọta na:
De adia ne Baibol rhie ne ediọn ni rre iko? Uwẹ yayi wẹẹ avbe ọkaolotu ugamwẹ lele adia na ra?
Ediọn keghi ru emwi nọ gha ya iran kevbe ẹgbẹe iran sikẹ Osanobua sayọ
Ediọn keghi ru iyobọ ne etẹn hia ni rre iko
Ediọn kporhu vbe ẹghẹ hia
Ediọn keghi maa etẹn emwi. Iran vbe mwẹ obọ vbe Ọgua Arriọba na kpe huan kevbe iwinna nibun ọvbehe
6. Ọ khẹke ne ima gha ku obọ gbe ba ediọn
E Baibol gi ima rẹn evbọzẹe nọ na khẹke ne ima gha ku obọ gbe ba ediọn. Tie Hibru 13:17, NW, iyeke ọni, uwa ghi ziro yan avbe inọta na:
Uwẹ yayi wẹẹ ẹwaẹn rrọọ ne Baibol na wẹẹ, ne ima gha ya ekhọe hia lele adia ne etẹn ni su ima vbe uwu iko rhie ne ima ra? Vbua gu kha vberriọ?
Tie Luk 16:10, iyeke ọni, uwa ghi ziro yan inọta na:
Vbọzẹ nọ na khẹke ne ima gha lele adia ọghe ediọn, ọ gha khọnrẹn ne ima gha roro ẹre wẹẹ, adia nii ma ru ekpataki?
EMWA ESO KEGHI KHA WẸẸ: “Esa i rrọọ ne ọmwa gha rre ugamwẹ rhọkpa.”
De afiangbe ne u yayi wẹẹ a lae miẹn, vbe a ghaa deba emwa na gba mwẹ iyayi ọkpa ga Osanobua?
OLIKA ẸMWẸ
Jesu ọre uhunmwuta ọghe iko. Ma keghi ya ekhọe hia ku obọ gbe ba ediọn ne irẹn loo, rhunmwuda, obọ esi ẹre iran ya mu ima, iran vbe rhie igiemwi esi yotọ ne ima.
Ogbewerriẹ
De ọmwa nọ re uhunmwuta ọghe iko?
De iyobọ ne ediọn ye vbe uwu iko?
De emwi nọ khẹke ne dọmwadẹ Osẹe Jehova gha ru?
RUẸ SAYỌ
Ghee emwi nọ sosẹ yọ wẹẹ, Ẹbu Nọ Su kevbe ediọn nikẹre wa gele mwẹ amuroro daa etẹn ne iran gba ga vbe ẹdẹnẹrẹ.
Vbene A Ya Ru Iyobọ Ne Etẹn Ya Gha Mwẹ Akugbe Vbe Arriọba Mu Awua Ye Iwinna Ima (4:22)
Ruẹ vbekpa iwinna ne avbe ọgbaroghe ọghe otako ru.
Ghee iyobọ ne ikhuo ye vbe uwu iko.
“Ikhuo Ni Re Osẹe Jehova Kporhu Ra?” (The Watchtower, September 1, 2012)
Ghee ẹrhiọn ne ediọn loo ya rhie igiọdu ne etẹn ne iran gba ga.
“Ediọn Ni Rre Iko Keghi Ru Emwi Nọ Gha Ya Etẹn Gha Sọyẹnmwẹ” (The Watchtower, January 15, 2013)