Uwẹ Mu Egbe Ne U Ya “Yin Agbọn Na” Ra?

MU EGBE NE U YA YA AGBỌN NA KHIAN NE MOSE

Vbe ẹghẹ ne Jehova na tama emwa nagbọn wẹẹ, “uwa gha muan yọ, ne uwa gba ehe hia vbe agbọn,” emwi nọ yae kha ọre wẹẹ, ne iran ya otagbọn hia khian e Paradais. (Gẹn 1:28) Emwa ni khian gha rre agbọn na vbe etẹbitẹ, ẹre ọ khian ru iwinna na. Ẹi re te iran khian wa khian lae Paradais vberriọ, rhunmwuda, ogba ọghe Idẹni i ghi rrọọ. E Jehova gha ya Amagẹdọn guọghọ emwa dan nẹ, iwinna nibun a gha rre otọ ne ima gha ru, na ya kpee ehe hia huan. Ọna i khian gha re iwinna nekherhe!

Ọna wa ye ima ẹre rre, iwinna ọrhẹnrhẹn nọ ghaa rre otọ khẹ Ivbi Izrẹl vbe ẹvbo iran, vbe ẹghẹ ne iran ya kpa hin e Babilọn rre. Ukpo 70 gbalaka, ẹre otọ ẹvbo iran ya gha re otọ nọ gbe ẹvbi. Sokpan Aizaia keghi tae yotọ wẹẹ, vbe ẹtin e Jehova, iran gha sẹtin werriegbe yae khian ne mose. Ọ khare wẹẹ: “Ọ gha ruẹ ne ato ọghẹe gha yevbe Idẹni kevbe ogba ọghe Jehova.” (Aiz 51:3) E Jehova gele ru iyobọ ne Ivbi Izrẹl ya musọe. Erriọ khian vbe ru iyobọ ne emwa ni khian gha rre agbọn na vbe etẹbitẹ, ne iran ya ya agbọn na khian ne mose. Emwi nibun rrọọ ne u gha ru nian, ne u ya rhie ẹre ma wẹẹ, u hoo ne u gha mwẹ obọ vbe iwinna nii.

Odẹ ọkpa ne u khian ya ru ọna, ọre deghẹ u na gha hia, ne u gha kpee owa ruẹ kevbe ẹdogbo ne u ye huan vbe ẹghẹ hia. U gha ye sẹtin kpee ẹdogbo ruẹ huan, ọ gha khọnrẹn wẹẹ, emwa ni gbiruẹn rre ehe ne u ye. U sẹtin vbe rhie egbe ladian, ne u deba iwinna akpehuan ọghe Ọgua Arriọba kevbe Ọgua Asikoko. Adeghẹ ẹkpotọ na kie nuẹn, u sẹtin fill e fọm na tie ẹre DC-50, ne u ya deba etẹn ni ru iyobọ ne etẹn ne odekun ẹrhia sunu daa. U gha ru vberriọ, ọni rhie ma wẹẹ, u mu egbe ne u ya ru iyobọ ne etẹn ni gualọ egbe iyobọ vbenian. Nọ egbuẹ wẹẹ, ‘Ọ mwẹ iwinna eso ne I gha sẹtin ruẹ ra, ne I gha ya ru iyobọ ne emwa ni khian gha rre agbọn ọgbọn, deghẹ e Jehova na kue ne I gha rre evba ra?’

MU EGBE NE U YA RU IYOBỌ NỌ KHẸKE NE EMWA NI RHIỌ KPAEGBE

Vbe Jesu ghi huẹn ovbi e Jairọs nokhuo kpaegbe, ọ na wẹẹ, ne iran rhie evbare nẹẹn re. (Mak 5:42, 43) Na do sẹtin gbaroghe ọmọ ukpo 12 na, i khian gha re iwinna nọ lọghọ gbe. Muẹn roro, iwinna ne ima hia khian ru, vbe ẹghẹ ne Jesu khian ya mu eyan rẹn sẹ, nọ na wẹẹ, ‘avbe orinmwi ni rre idin gha họn urhu irẹn, iran ghi ke idin iran ladian.’ (Jọn 5:28, 29) E Baibol ma wa tama ima vbene emwi khian gha ye hẹ, vba gha huẹn emwa ni wulo kpaegbe, sokpan ma rẹn wẹẹ, ẹi mwẹ iran ma gha gualọ evbare ne iran gha re, ukpọn ne iran gha yọ kevbe owa ne iran gha dia. Ẹghẹ na ẹre ọ khẹke ne u ya rhie ẹre ma wẹẹ, u mu egbe ne u gha ya ru iyobọ vbe ẹghẹ nii gha sẹ. Gia guan kaẹn emwi eso ne u gha sẹtin ru.

A gha yae wewe wẹẹ, ọgbaroghe ọghe otako mu otuẹ die iko ruẹ, u sẹtin ru emwamwa ne u ya tie ẹre gha die owa ruẹ, nọ do gu ruẹ rri evbare. A gha wẹẹ ne ọtẹn nọ te ga vbe Bẹtẹl gha rrie owa, ra ọgbaroghe ọghe otako na ghi hẹwẹ vbe iwinna ọgbaroghe nọ te ru, u sẹtin ru iyobọ ne iran, ya gualọ ehe ne iran gha dia. Adeghẹ a khian do asikoko nọkhua ra ne kpataki vbe ẹdogbo ne u ye, u sẹtin rhie egbe ladian ne u deba etẹn winna, vbene a te suẹn nene asikoko, ra vba gha ghi do nene asikoko fo nẹ; u sẹtin vbe deba etẹn gbọbokhian ne etẹn ni ke ẹvbo ughughan rre.

MU EGBE NE U KHIAN YA MA EMWA NI RHIỌ KPAEGBE EMWI

Zẹvbe nọ rre ebe Iwinna 24:15, ma ya aro yọ wẹẹ, ẹbo emwa nibun ẹre a khian huẹn kpaegbe vbe uwu. Emwa nibun ni ma miẹn ẹkpotọ ya ruẹ vbekpa e Jehova, a gha rre usun emwa ni khian rhiọ kpaegbe. Iran gha ghi rhiọ kpaegbe nẹ, a ghi do ma iran emwi vbekpa Osanobua.a Eguọmwadia e Jehova ni mudia ẹse, ni wẹro vbe odẹ na ya ma emwa emwi, rre usun emwa ni khian ma iran emwi. (Aiz 11:9) Ọtẹn nokhuo ọkpa na tie ẹre Charlotte, nọ ka kporhu vbe otọ Europe, South America, kevbe Africa, wa sọyẹnmwẹ zẹvbe nọ ya mu egbe khẹ ẹghẹ nii. Ọ khare wẹẹ: “I ya aro ye ẹghẹ ne I khian ya gha ma emwa ni rhiọ kpaegbe emwi. Ẹghẹ ke ẹghẹ ne I ya tie okha ọghe emwa ni ghaa rrọọ vbe ẹghẹ nẹdẹ, I ghi tama egbe mwẹ wẹẹ: ‘Akpawẹ ọmwa na te wa rẹn e Jehova, agbọn gha te wa maan rẹn.’ I gha wa hoo ne I ma emwa ni khian rhiọ kpaegbe vbekpa e Jehova, I ghi vbe gi iran rẹn vbene agbọn khian ya maan iran hẹ, deghẹ iran na do gae.”

Uhiẹn eguọmwadia e Jehova ni ghaa rrọọ vbene ọ te sẹ ẹghẹ e Jesu, gha wa ruẹ emwi nibun vbe agbọn ọgbọn. Ọ mwẹ ẹmwẹ akhasẹ eso ne Daniẹl gbẹn yotọ, nọ ma rẹn otọ ẹre. Muẹn roro, ọyẹnmwẹ nọ khian gha sẹ ima, vbe ima ghaa tama e Daniẹl vbene avbe ẹmwẹ akhasẹ na ya sunu hẹ. Aro nọ ghaan ma wa ya ghee ẹkpotọ nọ kie ne ima na! (Dan 12:8) Muẹn roro vbene ọ khian vbe gha ye hẹ, vbe ima gha gi e Naomi kevbe Rut rẹn, vbene Mẹzaia ya ke uniẹn ọghe iran ladian hẹ. U miẹn ọyẹnmwẹ nọ khian gha sẹ ima, vbe ima ghaa mwẹ obọ vbe iwinna imamwaemwi na khian ru vbe uhunmwu otagbọn hia. Ẹghẹ nii, ma i khian ghi werriẹ aro daa ọlọghọmwa rhọkpa ne ima werriẹ aro daa vbe ẹghẹ ne ima ye na!

De vbene u khian ya rhie ẹre ma nian wẹẹ, u mu egbe ne u khian ya ma emwa ni khian rhiọ kpaegbe emwi, vbe ẹghẹ nii gha sẹ? Odẹ ọkpa ne u khian ya ru ọna, ọre ne u hia ne u guẹ sayọ, vbe odẹ ne u ya ma emwa emwi, u ghi vbe rhiegba ye iwinna ikporhu iyẹn nọ maan nọ wa khian vbe uhunmwu otagbọn hia. (Mat 24:14) Ọ gha khọnrẹn wẹẹ, ima ma sẹtin rhiegba ye iwinna ikporhu vbene ima te gualọe yi, rhunmwuda wẹẹ ima khian ọmaẹn nẹ ra rhunmwuda emwi ọvbehe, ma gha ye sẹtin rhie ẹre ma nian wẹẹ, ma mu egbe ne ima khian ya ma emwa ni khian rhiọ kpaegbe emwi vbe ẹghẹ nii gha sẹ.

Sokpan, inọta ne kpataki nọ ghi rre evba ọre wẹẹ: Uwẹ gele ya aro ye ẹghẹ ne u khian ya yin uhunmwu otagbọn na ra? Ọ gbe ruẹ otiti, vbe u ghaa muẹn roro vbene u khian ya gha mwẹ obọ vbe iwinna na khian ya ya agbọn na khian e paradais ra, vbene u khian ya ru iyobọ nọ khẹke ne emwa ni rhiọ kpaegbe, kevbe vbene u khian ya ma iran emwi ra? Odẹ ọkpa ne u khian ya rhie ẹre ma wẹẹ, u mu egbe ne u khian ya yin agbọn na vbe etẹbitẹ, ọre deghẹ u na gha mwẹ obọ vbe iwinna ughughan, ne u rẹnrẹn wẹẹ, u gha vbe sẹtin ru vbe agbọn ọgbọn!