Ka ɲɛsin jama bonyani ma, an magoba bɛ Masaya So caman na

¹ Jehowa ka kira dɔ y’a fɔ a tuma mɛnna kosɛbɛ, ko ‘siyaw ka fɛn fisamaw’ tun ka kan ka don. (Agi. 2:7.) Ka ɲɛsin kalan ma min bɛ bɔ Ala yɔrɔ, an ɲɛ b’a la tiɲɛ na k’o bɛ ka mɔgɔ camanba dɛmɛ ka tiɲɛ dɔn, ka kɛ Jehowa batobagaw ye. Mɔgɔ kuraw mago bɛ dɛmɛ na. Walasa ka t’a fɛ k’o kɛ, an ka kan ka ‘miiri an ka siraw la kosɛbɛ’, k’a lajɛ n’an bɛ k’an seko bɛɛ kɛ walasa ka Ala ka baara kɔkɔrɔdon. (Agize 1:5 lajɛ) An bɛ min di batoyɔrɔ bɛnnenw jɔli kama, o b’a to mɔgɔ caman bɛ se k’u lajɛ u kɔnɔ, wa o bɛ to an bolo Ala ka baara kɔkɔrɔdoncogo nafama dɔ ye.

² Tɔn ye wari hakɛ dɔ bila Masaya So jɔli kama. O fɛɛrɛ in bɛ senna a bɛ san caman bɔ sisan. A kɛra sababu ye jɛkulu caman bolo u ka se ka Masaya So kura sɔrɔ. Weleweledalaw y’u teliya cogo min na ka wari di o nafolo ko la, nafolo min bɛna jɛkulu caman mago ɲɛ, o bɛ mɔgɔ dusu lamin kosɛbɛ. Jɛkuluw mago bɛ wari hakɛ min na walasa ka Masaya Sow jɔ, u b’o sɔrɔ Tɔn fɛ. Jɛkuluw bɛ wari minnu di Tɔn ma Masaya sow kama, baara bɛ kɛ n’o ye ka t’a fɛ walasa ka Masaya So wɛrɛw jɔ.

³ Tɔn ka dɛmɛ: Masaya Sow jɔli, walima u kɛli kura ye, o ko bɛ maakɔrɔ minnu bolo Senegali ni Mali la, Tɔn bolofara bɛ o maakɔrɔw dɛmɛ. A b’u dɛmɛ u k’a jateminɛ walasa k’a dɔn n’u mago bɛ so kura de la, walima n’u mago b’a la dɔrɔn ka yɛlɛmaw don so kɔrɔ la. Tɔn bɛ kɛ sababu ye fana u ka dɛmɛ sɔrɔ ka bɔ yɔrɔ wɛrɛ la sanni dugukolo yɛrɛ ka san fo ka ta se baaraw bɛɛ banni ma. Jɛkulu kelen-kelen ka ko dulonnen bɛ Tɔn bolofara de la.

⁴ Mɔgɔ ba tan caman y’u sen don Masaya Sow dilanni na walasa k’u kɛ kura ye, walima u jɔli baaraw la, u yɛrɛw sago la. O mɔgɔw la, caman bɛ so jɔ dɔn, walima u ka baara don. U b’u ka waati n’u fanga ta ka ko caman kɛ, i n’a fɔ ka dugukolo san, ka sariyasɛbɛnw lafa faamaw fɛ ani ka sojɔfɛnw ɲininiko labɛn. Baaraw bɛna kɛ waati kɔnɔ cogo min na, u b’olu fana boloda. Fɛn ɲuman minnu da ka di, u ka dɛmɛ bɛ taa se fo olu fana sanni ma, ani dugukolo yɔrɔ labɛnni baaraw ma. U bɛ so jɔli yɛrɛ baara ɲɛminɛnicogo fana kɔlɔsi. Ka Masaya ka ko kɔkɔrɔdon ni fɛnw ye minnu b’an bolo, nin y’a cogo ɲuman dɔ ye k’o kɛ. O bɛ duba caman lase an ma ka bɔ Jehowa yɔrɔ.—Nta. 11:25.

⁵ Ni jɛkulu dɔ y’a ŋaniya ka Masaya So dɔ kɛ kura ye, walima ka so kura dɔ jɔ dɔrɔn, a ka kan k’o fɔ Tɔn bolofara ye. Mun na? Bawo kunnafoniw b’a bolo minnu bɛ se ka jɛkulu dɛmɛ u ka baara kɛta fɔlɔw la. Dugukolo sugandili bɛna bɔ a sɔngɔ la, ani fɛn wɛrɛw fana na. Dugukolo sɔngɔ bɛ se ka caya k’a da fɛn caman wɛrɛw kan: yɔrɔ dalakɛɲɛni baara bonya; baga bɛ fɛn minnu na, olu bɛ bɔ yen cogo min na; gɛlɛya min bɛ se ka sɔrɔ faamaw ka sariyaw la. Ka ɲɛsin jɛkuluw ma minnu ka kan ka dɛmɛ ɲini Tɔn fɛ, sɛbɛn dɔ bɛ sɔrɔ Tɔn bolofara fɛ, n’o ye Juru ɲini sɛbɛn ye Masaya So kama (Demande de prêt pour un projet de Salle du Royaume). Tɔn bolofara bɛ se fana ka maakɔrɔw dɛmɛ k’o lafa.

⁶ Masaya So jɔcogo sugu caman bɛ Tɔn fɛ. Sanni u k’u ka Masaya So jɔcogo sugandi, jɛkulu maakɔrɔw ka kan k’o fɔ Tɔn bolofara ye walasa u mago bɛ jɔcogo sugu min na, u ka se k’o sugandi. O bɛna dɔ bɔ baara sɔngɔ la. A bɛna to fana jɛkulu ka so sugandi min bɛrɛ bɛnnen don, wa n’a b’a jɔ kun dafa.

⁷ Mɔgɔ dɔw kabakoyara: Jehowa ka hakili senu nɔ min tun bɛ ye balimakɛw kan minnu tun bɛ ka baara kɛ Masaya Sow jɔli la, o kɛra seereyaba ye. Tɔn dɔ ɲɛmɔgɔ min tun ye jiri feere u ma walasa u ka Masaya So jɔ, a y’a sɛbɛn ko: “Ne hakili t’a la ko baarakɛla dɔw sera ka ne kabakoya fo tuma min na ne ye Jehowa Seerew ye u ka so jɔli baara la. Nisɔndiyako tun don, wa koba fana tun don. A diyara ne ye ko n fana sera ka fɛn dɔ kɛ o la. Aw, ani aw ka mɔgɔw, ne b’aw fɔ. Ne bɛ duba kɛ aw ye walasa aw ka dondala sɔrɔ aw ka ko kɛta nataw la.”

⁸ Yɔrɔ wɛrɛ la, jagokɛla dɔ ye a ka baarakɛla bila ka taa so jɔyɔrɔ la tile saba walasa a ka lɛrɛ damadɔw kɛ yen. O cɛ y’a fɔ ko: “Ne ye waati min kɛ aw fɛ yen nin dɔgɔkun laban na, o ye ne nafa kosɛbɛ. Hakilila wɛrɛ bɛ ne na sisan ka ɲɛsin Jehowa Seerew ma. Aw tɛ mɔgɔw ka daw dɔrɔn konkon. A diyara ne ye an ka baaraw kɛ ɲɔgɔn fɛ. A kana bala aw la n’aw ye ne ye aw ka foroba lajɛ nata la.”

⁹ So jɔ dɔ banna tuma min na, mɛri ye bataki sɛbɛn a ka komini tɔgɔ la ko: “A balala an na ka baarakɛla kɛmɛ caman ye baara la ɲɔgɔn fɛ, ani ka so jɔ teliya la ten. A so cɛ ka ɲi yɛrɛ de. A baara teliyara cogo min na, o y’an ka mɔgɔw kabakoya. Masaya So kura in ye komini cɛɲa yɛrɛ de. A b’an kunnawolo an’aw ka jɛkulu fana.”

¹⁰ Tɔn mago bɛ dɛmɛbaga caman na: Jɛkulu minnu bɛna u lajɛ Masaya So kɔnɔ min bɛna jɔ, walima min bɛna kɛ kura ye, mɔgɔ bɛ sɔrɔ olu la minnu bɛ baara dɔw dɔn koɲuman. Tɔn b’a jija ka tɔnɔ bɔ olu ka dɔnniyaw la. Tɔn ni baarakɛla wɛrɛw fana bɛ baara kɛ ɲɔgɔn fɛ, kɛrɛnkɛrɛnnenya la maakɔrɔw ani cidenyabaara magannaw. Tɔn bɛ o mɔgɔw dege baaraw kɛcogo la. O balimakɛ mɔnenw ye dɔnniya minnu sɔrɔ, u bɛna nafa bɔ o dɔnniyaw la so jɔ yɔrɔ wɛrɛw la kɔfɛ. O la sa, jɛkulu minnu bɛna jɔli kɛ, o mɔgɔw ka kan ka ŋaniya ɲuman jira, ka sɔn ɲɔgɔndɛmɛ ma. A tɛ se k’a ɲini Tɔn bolofara fɛ, ani mɔgɔw fɛ minnu bɛ a ka bolo kan, u ka baara mumɛ bɛɛ kɛ. (Neh. 4:6b) Balimakɛ minnu ye baaraw dege o cogo la, kanuya ka kan k’u bila u k’u ka dɔnniya sɔrɔlen bila jɛkulu wɛrɛw ka bila la, jɛkulu minnu bɛ jɔli kɛ, walima minnu b’a fɛ k’u ka so kɛ kura ye, walima minnu mago bɛ so wɛrɛw la.—Neh. 5:19; Fil. 2:3, 4.

¹¹ Balimakɛw ni balimamuso minnu bɛ se so jɔ baaraw la, walima baara wɛrɛw la minnu ni sojɔli baara bɛ taa ɲɔgɔn fɛ, ni tɔgɔ ɲuman b’u la jɛkulu kɔnɔ, Tɔn bɛ o mɔgɔw dusu lamin u k’u tɔgɔ di walasa k’u sen don o baaraba in na. U bɛna ɲinisɛbɛnw sɔrɔ ɲɛmɔgɔya lakɔlɔsibaga fɛ, walima sɛbɛnnikɛla fɛ. U bɛ se baara minnu na so jɔko la, walima baaraw la, i n’a fɔ so dilanni, a lakanani, a jɔfɛnw sanniko ɲuman, jate, ka fara sariyaw sɛbɛnw lafacogo kan faamaw fɛ; u bɛna o fɛn bɛɛ pereperelatigɛ o ɲinisɛbɛnw kɔnɔ. (N’o sɛbɛnw dɛsɛlen bɛ jɛkulu kɔnɔ, a bɛ se k’a ɲini Tɔn fɛ tuma min na a bɛ sɛbɛnw ɲinisɛbɛn ci kalo o kalo.) N’an sɔnna k’o welekan mɛn, an b’an ka kanuya jira an mɔgɔɲɔgɔn na, kɛrɛnkɛrɛnnenya la, mɔgɔw la minnu ka surun an na kosɛbɛ, n’o ye an balimaw ye minnu y’an krecɛnɲɔgɔnw ye.—Mat. 7:12; 22:39; Yuh. 13:35.

¹² Dɛmɛbagaw nafa ka bon an bolo: Masaya So jɔli ye baaraba ye. Mɔgɔ minnu bɛ se ka miiri o bonya ma k’a sɔrɔ u m’u sen don a la tigitigi, o mɔgɔw ka dɔgɔ. Nin ye ko kɛlen dɔ de ye min bɔra jamana na, jamana min na Kafoba ka so jɔliko kulu caman bɛ yen. U ka Masaya So jɔli baara banna min kɛ, maakɔrɔw ye nin sɛbɛn: “An balimakɛ minnu bɛ Kafoba ka so jɔliko kulu la, u ye laadilikan minnu di an ma ni timinandiya ye, o kɛra koɲumanba ye an bolo. U y’an dɛmɛ cogo min na tuma min na u ye baaraw ɲɛminɛ, ani ka baarakɛla ŋanaw sen don baara la, n’an bɛ miiri o la ko kura, an tɛ se ka ɲɛ n’an hakili ma taa 1 Piɛrɛ 5:2, 3 la. An b’a kalan o yɔrɔ la ko saga kulu ka kan ka kɔlɔsi, nka o kɛbagaw ‘kana o kɔlɔsi ni diyagoya ye, nka ni diyanye ye, o kana o kɛ tɔnɔ jugu kosɔn fana, nka ni dusu ɲuman ye. Minnu kalifara u ma, u kana kuntigiya digi u la fana, nka u ka kɛ ɲɛjirabaaw ye saga kulu la’. O balimakɛw ye misali ɲumanw ye Jehowa ka baara la. So jɔ baaratuma bɛɛ la, balimakɛw ye ta-ka-segin caman kɛ, siɲɛ caman na, ka yɔrɔ jan boli, ka lɛrɛ caman kɛ, ka baarakɛminɛnw singa an ma, ka sojɔfɛnw di an ma. U ye nin fɛn bɛɛ kɛ walasa k’an dɛmɛ k’an ka Masaya So jɔ. O balimakɛw ka ɲumanya b’a jira cogo sɔsɔbali la, k’u bɛ ‘balimaw kanu’. O ye dusulamin nafaba ye an bolo dɛ!”—1 Piɛrɛ 2:17.

¹³ An balimakɛw ka ŋaniya ɲuman n’u ka timinandiya bɛ ye tuma min na u bɛ jɛ ka baara kɛ ɲɔgɔn fɛ kelenya kɔnɔ k’a sɔrɔ u tɛ jamana kelen mɔgɔw, ani siya kelen mɔgɔw ye. Zaburu 133:1 kumaw timɛna hali yan yɔrɔ la fana ko: “Balimaw bɛnnen ka sigi ɲɔgɔn fɛ, o ye ko ɲuman ɲuman de ye, a ka di.” Maakɔrɔ dɔ ni Kafoba ka so jɔliko kulu mɔgɔw bɛ baara kɛ ɲɔgɔn fɛ. A kumana bonyaba kan min b’a ye ka baara kɛ a balimaw ye. A y’a jira ko “jɛkulu dusu bɛ lamin kosɛbɛ o balimakɛw fɛ, o balimakɛ minnu bɛ kilomɛtɛrɛ kɛmɛ caman boli walasa ka jɛkulu dɛmɛ u k’u ka dafalen timɛ Jehowa fan fɛ. ( . . . ) Anw ye balimaw ye tiɲɛ na, kanuya ye minnu kɛ kelen ye, denbaya kelen kɔnɔ.”

¹⁴ Walasa k’a ka waleɲumandɔn jira ka ɲɛsin baaraw ma, baara minnu kɛra Masaya So la, ɲɛmɔgɔya lakɔlɔsibaga dɔ ye nin sɛbɛn ko: “Mɔgɔ kɔrɔba caman b’an ka jɛkulu la. An kelen tun tɛ se abada ka baara in kɛ ka ɲɛ. An b’aw fo kosɛbɛ, aw, ani Jehowa kanuya bɛ balima minnu bɛɛ la, i n’a fɔ aw ɲɔgɔn, minnu t’a fɛ dɔrɔn k’o kanuya sɔrɔ u la, nka n’u b’a fɛ k’o jira. An b’a fɛ ka fɔ an balimakɛw ye ko: A’ ye t’a fɛ aw ka baara ɲumanba la. Aw bɛ cɛsiri minnu kɛ, olu nafa ka bon aw jɛɲɔgɔn caman bolo, wa, siga t’a la o b’an Fa Jehowa nisɔndiya.” Kafoba ka so jɔliko kulu dɔ y’a sɛbɛn ko: “Baarakɛlaw bɛ baaraba min kɛ, an b’o dɔn. (File. 21) Sigida mɔgɔw y’a fɔ ko: ‘Jehowa bɛ aw fɛ!’”

¹⁵ A nafa ka bon tuma bɛɛ ka dɛmɛ don ni wari ye: Wari minnu bɛ di Tɔn ma Masaya Sow kama, o wari kɛra sababu ye ka jɛkulu caman dɛmɛ, wa siga t’a la, a bɛna t’a fɛ k’o kɛ. Ka nili kɛ k’a sɔrɔ a ma yɛrɛ ka nafa ɲini, yali Jehowa Ala ma o misali di wa? (Yak. 1:17) Tiɲɛ don ko bɛɛ ka sɔrɔ tɛ kelen ye, nka n’an b’an kɔlɔsi an ka musakaw kɛcogo la, laala an bɛna se ka so jɔ baara kɔkɔrɔdon kosɛbɛ. O fonisireya min bɛnnen don, siga t’a la k’o bɛ Jehowa dusu diya, wa o bɛ an balimakɛw dusu lamin kosɛbɛ fana.

¹⁶ Mɔgɔ minnu bɛ ka sɔn Masaya cikan ma, o hakɛ bɛ bonyana ka t’a fɛ. “Fɛn fisamaw” camanba de bɛ ka na Jehowa ka batoso la hakili ta fan fɛ, k’a ka ‘so fa nɔɔrɔ la’. (Jir. 7:9; Agi. 2:7) Iko Agize ka waati Yahutu kantigiw y’a kɛ cogo min na, an fana k’an dusukun to Ala ka baara la. Ka kɛɲɛ n’an se ye, an ka Masaya Sow jɔli kɔkɔrɔdon katuguni an magoba de bɛ u la. Masaya So cɛɲi ba caman de jɔra san laban ninnu kɔnɔna na, nka mɔgɔ minnu bɛ ka na, olu hakɛ bɛ cayara ka t’a fɛ. N’an bɛ wari di tuma bɛɛ Tɔn ka so jɔ wari ko kama, o ye cogo ɲuman dɔ ye walasa k’an ta kɛ Ala ka baara la.