Bato lakika bɛ ka jɛnsɛn Erɔpu kɔrɔn yanfan jamanaw na
1 San kɛmɛ fɔlɔ Krecɛnw tun ye Masaya weleweledala timinandiw ye. Tuma min na ‘dɔw tun bɛ ka fara jɛkuluw kan don o don’, u ɲagara o la. (Kɛw. 16:5) U ka jagɛlɛya waajuli ye bato lakika ladon Asi ni Afiriki ni Erɔpu kɔnɔna na; o sɛnɛmɔ kɛra dannabaga caman ye.
2 Bi don labanw na, bato lakika bɛ ka jɛnsɛn Erɔpu kɔrɔn yanfan jamanaw la. Danw tun sigilen b’an ye gɔfɛrɛnamanw fɛ jamana minnu kɔnɔ fo ka na se 1990 sanw daminɛ na, sisan, an bɛ ka bugun yen kosɛbɛ. Annuaire 1999 gafe b’a jira k’o yɔrɔ jamana fila la, Irisi (Russie) ni Ikirɛne (Ukraine) bɛɛ kelen-kelen ka weleweledalaw ka ca ni 100000 ye. Union Soviétique kɔrɔ ka marabolo 15 kɔnɔ, mɔgɔ minnu y’u yɛrɛw latɛmɛ Jehowa ma ka tila ka batise kabini san 1991 na ka se sisan ma, olu hakɛ ka ca ni 220000 ye! Nin jama cayali ye Masaya So kuraw ni Jamalajɛ Sobaw jɔli wajibiya. Tɔnbolofara caman wajibiyara fana ka dɔ fara u ka baarakɛyɔrɔw kan.
3 Tɔn ka nafolo min bɛ kɛ ka Masaya Sow jɔ, o tila kelen bɛ juru don jɛkuluw la jamanaw kɔnɔ i n’a fɔ an ta, minnu mago teliman bɛ Masaya Sow la, nka ni se bɛrɛ t’u ye, n’u ka sɔrɔ man bon. San 1996 Marisikalo ni san 1998 Ɔkutɔburukalo cɛ, Tɔn sɔnna juruɲini sɛbɛn 359 de la, ka bɔ tɔnbolofaraw yɔrɔ minnu bɛ Erɔpu jamana 11 lakɔlɔsi. O juru ɲini kun ye ka Masaya Sow jɔ. Bolomafaraw bɛ kɛ ka dugukolo ni Masaya So jɔliminɛnw san, ka jɛkuluw dɛmɛ u k’u ka baarakɛyɔrɔw kuraya. Tɔn ka Masaya Sow jɔ nafolo min bɛ bɔ Etazuni ni jamana wɛrɛw la, o bɛ an balimaw dɛmɛ Erɔpu kɔrɔn yanfan jamanaw na cogo min na, ja ninnu b’o de jira an na.
4 San 1998 kɔnɔna na, Bilibari (Bulgarie) kɔnɔ, mɔgɔ 12 de farala weleweledala kɛmɛ o kɛmɛ kan. O san kelen Awirilikalo la, balimaw ɲagara tuma min na u ka Masaya So kurunbokarili kɛra. Korowasi (Croatie) fana ɲagara, bawo mɔgɔ 4 yɛlɛnna weleweledala kɛmɛ o kɛmɛ kan. Sisan, balimaw bɛ ka Masaya Sow jɔ bato lakika ka ɲɛtaa kama. Hɔngiri (Hongrie) kɔnɔna na, jɛkulu 144 jɛlen bɛ Masaya So 80 de la. O kɔrɔ ye ko yen jɛkulu 235 cɛla, 143 de bɛ n’u halala batokɛyɔrɔw ye. Maseduwane (Macédoine) jamana na, Masaya So-jɔ-jɛkulu ye Masaya So fila ban, dɔ wɛrɛw b’a la ka taa ɲɛ. San 1999 tilema waati la, soba kelen jɔra k’a kɛ Masaya So fila ye faaba la, min ye Sikɔpije (Skopje) ye. A dɔgɔyalenba, jɛkulu wɔɔrɔ bɛ se ka lajɛw kɛ o so ninnu kɔnɔ.
5 Salon, Irisi jamana na, mɔgɔ minnu batisera dɔgɔkun o dɔgɔkun, o hakɛ ka ca ni 260 ɲɔgɔn ye! Ka kɛɲɛ ni jamana tɔw ye, sisan, Irisi jamana ka tɔnbolofara ye So-jɔ-jɛkulu 12 kolabɛn u ka jamanaba in ka maraw kɔnɔna na. U bɛna Masaya So jɔli baara nata kɔkɔrɔdon. Saint-Pétersbourg dugu saheli yanfan ka Jamalajɛ So fɔlɔ jɔli bɛ ka taa ɲɛ. A sigiyɔrɔw bɛɛ bɛ taa 1600 la. Ka fara o kan, Masaya So duuru fana jɔli bolodalen don o soba kelen kɔnɔ. Sigiyɔrɔ 200 bɛna ye u kelen-kelen bɛɛ la. Walasa k’an balimaw ni tiɲɛ kanubagaw mago ɲɛ hakili ta fan fɛ, Ikirɛne jamana na, Masaya So 84 jɔra kaban, 80 b’a la ka jɔ ka taa ɲɛ.
6 Kabini san 1995, an balima minnu bɛ Faransi, u bɛ dɛmɛ don Farafinna faantanw jamanaw ma. U ka dɛmɛ barika la, Masaya Sow sera ka jɔ walima ka kuraya nin dugu ninnu na: Benin, Burkina, Cadi, Gine, Kamerune, Kɔngo, Kɔdiwari, Mali, Nizeriya, Ruwanda, Senegali, Santrafriki, ani Togo. Cɛsiri min kɛra nin ye ka ɲɛsin an balimaw ma, an balima minnu bɛ faantanw yɔrɔw la, yali o tɛ ko cɛɲi ye wa? Ja caman bɛ nin farankan sɛbɛn kɔnɔ, ja minnu b’o baaraw jira, baara minnu sera ka kɛ balimaya kanu sababu fɛ.
7 Jama cayali Erɔpu kɔrɔn yanfan jamanaw na, ani Farafinna jamanaw na, yali o t’an dusukun fa ɲagali la wa? An sigilen bɛ yɔrɔ o yɔrɔ la, bato lakika jɛnsɛnni b’an hakili jigin ko Ala tɛ mɔgɔ woloma kɛ, ani ko a ka muɲuli kun ye “jamaba” kisili ye. (Jir. 7:9; 2 Piɛ. 3:9) Bonyaba de don an bolo k’an niyɔrɔ dɔɔnin kɛ tɔw barika bonyali la hakili ta fan fɛ, hali minnu bɛ jamana janw na! Ntalenw 28:27 b’a fɔ an ye k’a jɛya ko “mɔgɔ min bɛ faantanw sɔn, o tɛna kɔli.” Ŋaniya min b’an bila k’an niyɔrɔ kɛ jɔli baara musakaw la, o ye walasa sɔrɔw ka “kɛɲɛ”, k’a to bɛɛ ka nili hɛrɛ sidɔn, ka nisɔndiya sɔrɔ bato lakika jɛnsɛnni kosɔn diɲɛ kɔnɔ.—2 Kɔr. 8:14, 15; Kɛw. 20:35.
[Sɛbɛn ɲɛ 3nan ja]
Săcele, Roumanie.
[Sɛbɛn ɲɛ 3nan ja]
Maardu, Estonie.
[Sɛbɛn ɲɛ 3nan ja]
Sevnica, Slovénie.
[Sɛbɛn ɲɛ 3nan ja]
Tiszavasvári, Hongrie.
[Sɛbɛn ɲɛ 4nan ja]
Ruma, Yougoslavie.
[Sɛbɛn ɲɛ 4nan ja]
Vranov nad Topl’ou, Slovaquie.
[Sɛbɛn ɲɛ 4nan ja]
Tornakalns, Lettonie.
[Sɛbɛn ɲɛ 5nan ja]
Kigali, Rwanda
[Sɛbɛn ɲɛ 5nan ja]
Muvumba, Rwanda
[Sɛbɛn ɲɛ 5nan ja]
Bangui, R.C.A.
[Sɛbɛn ɲɛ 5nan ja]
Cyangugu, Rwanda
[Sɛbɛn ɲɛ 6nan ja]
Ouassougon, Bénin
[Sɛbɛn ɲɛ 6nan ja]
Hétin, Bénin
[Sɛbɛn ɲɛ 6nan ja]
Lome, Togo
[Sɛbɛn ɲɛ 64nan ja]
Tokoin Akpimaké, Togo