Bangebagaw—A’ ye kɛ misali ɲumanw ye aw denw bolo
1 Ala ka Kuma b’a fɔ an ye ko “mɔgɔ tilennen fa [ani a ba] bɛ ɲagali kosɛbɛ.” (Nta. 23:24, 25) O ye duba ye dɛ bangebagaw bolo minnu ye misali ɲumanw ye u bɔnsɔnw ye! Tɔnbolofara ka jɛkulu mɔgɔ dɔ y’a fɔ a bangebagaw ko la, ko: “U ka ɲɛnamaya kuuru bɛɛ tun ɲɛsinnnen don tiɲɛ ma, wa ne tun b’a fɛ k’a kɛ o cogo kelen na.” Denmisɛnw ɲɛ bɛ misali jumɛn na ka bɔ u bangebagaw yɔrɔ?
2 Kɛcogo ɲumanw ani bonyaba: Bangebagaw jɔyɔrɔ don ka jogo ɲumanw don u denw na. Kɛcogo ɲumanw tɛ kalan ni kuma dama ye, nka u bɛ kalan ni ɲɛmadali ni ladegeli ye. O la sa, aw bɛ kɛcogo jumɛnw jira? Yali aw denw bɛ “hakɛ to” ani “ɲɛ n ma” ani “i ni ce” fɔtɔ mɛn aw da la wa? Denbaya kɔnɔ, yali aw bɛ ɲɔgɔn minɛ ni bonyaba ye wa? Tɔw bɛ kuma aw fɛ tuma min na, yali aw b’u lamɛn koɲuman wa? N’aw denw bɛ kuma aw fɛ tuma min na, yali aw b’u lamɛn wa? Yali aw bɛ nin kɛcogo ɲumanw jira Masaya So kɔnɔ ani aw ka du kɔnɔ wa?
3 Alamɔgɔya barikama, ani cɛsiri baara: Balimakɛ dɔ, min ye san 50 ni kɔ kɛ waati-dafalen cidenyabaara la, o hakili b’a la ko: “Fɛn min ye lajɛw kanu ye, n ba ni n fa tun ye misali ɲumanw ye o ko la; u bɛ ten fana u ka cɛsiri la ka ɲɛsin cidenyabaara ma.” Aw b’aw hami jira aw denw na cogo di, dudenw mago ɲɛni ko la hakili ta fan fɛ? Yali aw bɛ don o don tɛmɛsira sɛgɛsɛgɛta kɛ ɲɔgɔn fɛ wa? Yali denbaya ka Bibulu kalan basigilen b’aw bolo wa? Yali aw denw ɲɛ bɛ to ka kɛ aw la ka Bibulu ni Tɔn ka sɛbɛnw kalan wa? U bɛ mun fɔtɔ mɛn n’aw bɛ Ala deli tuma min na denbaya ye? Yali aw n’aw denw bɛ baro kɛ wa, baro min bɛ dɔ fara u ka alamɔgɔya barika kan? Yali aw bɛ masala dusulamin kow kan minnu ɲɛsinnen don tiɲɛ ni jɛkulu ma wa? Yali aw bɛ kɔrɔtɔ ka taa lajɛw bɛɛ la wa, ani ka taa cidenyabaara la, aw n’aw ka denbaya?
4 Bangebagaw, aw ye misali minnu ye aw denw bolo, a’ y’aw miiri o la. A ka kɛ misali ɲuman ye. N’o kɛra, u na o kanu u ka ɲɛnamaya kuuru bɛɛ la. Lakɔlɔsibaga taamakɛla dɔ muso, min si hakɛ bɛ taa san 70 la sisan, o y’a fɔ ko: “N bangebaga kanulenw kɛra misali ɲuman minnu ye ne bolo, n b’o nafa sɔrɔ hali bi. Wa, n bɛ Ala deli ni kɔnɔnajɛya ye walasa ne ka n ka waleɲumandɔn jira nin ciyɛn in ko la, ani ka n mago ɲɛ n’a ye koɲuman waati nata mumɛ la.”