KƐ́ÐƐ́Ì ÐEÍN-SÍ-KÀ CĨ́-CĨ́
Jɛhova Kpá À Gbo Ðé À Mú-Dɔ̃̀-Dɔ̃̀ Ɓèɔ̀ Mú
Ðé we hwɛ̀ìn-gbɔ ɓè nìà kɛ múɛɛ, à dyé mú-dɔ̃̀-dɔ̃̀ ku wɔ̃ pàɖà ɓè. Tiɔ̀ ɖíɛ́ ɓè ɓaɖaín, à ɓɛ́ìn hwìɖìi poɛ̀n kà ɔ ku xwa mìɔ ɓó à bììɛ. Kɛɛ, ɔ jù ké à dyi Jɛhova bũ̀in xwɛ̃́ìn tee ní, ɔ mu à gbo kpáùn, ɓɛ́ à ké mú-dɔ̃̀-dɔ̃̀ ɓè ɓɛ́ wa po à hwòɖò ɖé ɖéi mìɔ kɛɛ hwòɖò kùìn. (Àzé 43:2, 4) Xwɛ̀ à ɓɛ́ìn Jɛhova bũ̀in xwɛ̃́ìn ɔ jù à dyi mú-dɔ̃̀-dɔ̃̀ dyéɛń nììn nyɛ́?
Ɓaà-ɓaà. À dyi Jɛhova kpé dyai poìn ní, ɔ mu gìɖìi kè hwòɖò-dyi-dè-dè ɓɛ́ à mɔ́ ɓɛ́ à ké hwòɖò kuɛɛ à nyíìn.—Fè 4:6, 7; 1Tɛ̀ 5:17.
Dyí-poìn-poìn ɓè. À mɔ́ zùùn ɖii-ɖɛ̀ kè ɓàto ɓè ɓɛ́ Jɛhova tò ɖé à dyí-poìn-poìn ɓèɔ̀ múɛ kàùn ké ɔ zi kà ɔ nyu ma nìɛ̀ kĩ́ín nyɛɛ dyí. (Híì 10:24, 25) À dyi dyí-poìn-poìn ɓèɔ̀ jè ti dyé, ké à dyi ɖé mu, ké à dyi ɖé gɔ̃̀-jù-wùɖù tò ní, nìí, à mu gbo-kpá-kpá ɓɛ́ Jɛhovaa zùùɔ̀ tò kɛɛ kpáná kɔ̃ún dyéìn gàná cá.—Wɛ̀ 2:29.
Wuɖu-wáɖá-kũ̀à. Ɔ mu xwa fɛ̃́ìn ɓɛ́ à ké ɖɛ mɔ̀ ɖɛ sɛ́ɖɛ́ìn dyíɛ jè hwìɖìi poìn ɔ jù ké à dyi ɖɛ séín à ɓɛ́ìn nyuɛ kɛɛ nyu, ɓɛ́ à ké Geɖepɔɔ-wùɖù-wáɖá-kũ̀àɔ̀ gbo vòìn kánáá pu ní. Ké ɖeɛɛ, à mu gbo-kpɔ̃ìn-kpɔ̃ìn nìà à kè à ɖíí kũ̀à-nyu-nyɔ̀ ɓè—ɔ kè à kè Jɛhova pṹa kɛɛ dyi kùìn.—1Kɔ̀ 3:5-10.
DYÉ VÍÐÒ MƆ̀À, JƐHOVA MU M̀ DYÍ ÐÚÙN KƐƐ DYI, NÌÍ, ƁƐ́ ƁÈ KÉ DYI-DIÈ-ÐƐ̀ ƁÈ KƆÀ ƁÓ DYÍƐƐ GƆ̃̀ JÙ:
Ðɛ́ kpá ma Máɖù gbo, ɓɛ́ ɔ ké ma Jɛhova bũ̀in xwɛ̃́ìn tee ɓó ti ɔ nì ma mú-dɔ̃̀-dɔ̃̀ ɓè dyí dyéɛń nyɛ́?
Kà Máɖù nì ma kà kɛɛ, xwɛ̀ wuɖu ɓè céèà ɖé Wɛ́ɖɛ́ 34:18 múɛɛ nyu à hwòɖò-dyi-dè-dè nyíɛ ɓó à mú-dɔ̃̀-dɔ̃̀ ɓèɔ̀ tiín nyɛ́?
Xwɛ̀ ɖɛ kpá ma kà Máɖù gboɛ nyuɛ tɛ̀mɛ̀ìn kà Jɛhova nyí à “kpé zi dyi ɓúáuń mìɔ” ɔ jù ké à dyi mú-dɔ̃̀-dɔ̃̀ dyé níɛ́?—2Kɔ̀ 4:7