ˈYukwlipʋnɩlii: Sɛɛ -a ˈkiɛ ˈmö ghlɛnɩ
1. ˈBɔgwɩ -yɩ cɛlɩɛ -wʋä -lɛ ˈwë, -lu a -mu ˈkä ɔ -aˈa -li a -lii ˈmö ˈnɩ?
1 Nɩkpa a -bɛ, ˈmänasɛ wa ghlɛnɩɛ jw.org ˈmö ˈn wa zɛlɩɛ gbëawɛlɩɩ -yɩ -bhöä ˈmäna ˈwʋ ˈmö. (Eccl. 12:10) Maa, a yɛ ɔ tɛkäsɛ ˈyukwlipʋnɩlii ˈmö ghlɛnɩ -a? Yɩ kä ˈŋlɩ, -mä -aˈa ɛtɛnɛtɩ a dlɛsɩ ˈklʋ a -lii a -bɛ, ˈn -a -pʋniɛ ˈyukwli. Sɛɛ ˈyukwlipʋnɩlii ˈla -kaɲɩɔ -li a -lii ˈwlu nʋ ˈnɩ?
2. Sɛɛ -a ˈkä ɔ ˈyukwlipʋnɩlii ˈlibho ˈwʋ nʋnɩ -aɲɩgäsɛ ɛ -käˈɛ -a -ɲɛ -aˈa ˈligbë ˈmö a -nʋa a Biblë a ˈcɩɛcɩʋ ˈmö nɩ?
2 -Aɲɩgäsɛ, ɛ -käˈɛ -a -ɲɛ -aˈa ˈligbë ˈmö a -nʋa ˈsɔ a lagɔwɛlɩɩ a ˈcɩɛcɩʋ a za: -A -kä lowlu ˈmö mö dɔˈwʋ -wʋ ˈn -a -käˈɛ ˈlibho nʋ dɔˈwʋ -wʋ, -a -kä Biblë, peliodikïa, ɛ -käˈɛ lagɔbɔgwɩ -mimii a ˈyukwlipʋnɩlii ˈyukwli -pʋnɩ, -a yi -aˈa ˈtɛɲɩ -li a -lii ˈwʋ nʋ. (Ɛfɛ. 5:15, 16) -A -kä lagɔbɔgwɩ kamö -su ˈn -a -kä -lɛ yɩ ˈyukwlipʋnɩlii ˈzʋʋ, -a yi -aˈa ˈligbë ˈmö a lagɔwɛlɩɩ a ˈcɩɛcɩʋ nɛnɩmanɩ. -A -kä -aaɲɩ -bhlʋ a lagɔwɛlɩɩ a ˈcɩɛcɩʋ -bhɛ dɔˈwʋ -wʋ, -a yi ˈyukwlipʋnɩlii -lɛ zʋ -yɩ -käɲɩˈɛ kwänɩ -a ˈkä -aˈa ˈmözɛlɩzɛlɛ nɛnɩmanɩ ˈn käbögbʋ a ˈcɩɛcɩɛ dɔˈwʋˈɛ.
3. -Mɔ ˈyukwlipʋnɩlii ˈkä ɔ -li a lii ˈwlu nʋ -mä -aˈa pɩɔ ˈyli ˈnɩ?
3 Lagɔwɛlɩbia za: -Aˈa pɩɔ ˈyli a nɩkpa -wa pää dlɩ nɩɩ, waˈaa ˈtɛɲɩ -kä wa ˈkä ˈbɔgʋ ˈmözɛlɩ, wa yi -kamä ˈwʋ ŋlu wa ˈkä ˈyukwlipʋnɩlii ˈyukwli -pʋnɩ. -A nɩ ghlɛnɩ ˈyukwlipʋnɩlii ˈmö nzɩ nɩkpa -wa ˈnɩ gbää -aˈa gbʋ, maa -wa yɩbhä wa ˈkä lagɔwɛlɩɩ ˈcɩɛ, -a ˈkʋä lagɔwɛlɩɩ ˈɲɛ, -mä “waɲɩgäsɛ a -dagwälɩgbɩɩ ˈmö.” (Ztw. 2:6-8) -Mumuë ˈa ˈbɛyɩ a dɔˈwʋ, ˈyukwlipʋnɩpʋnɛ dɛsɛ ɛ kää. A yɛɛ -ka, nɩkpa wa laa Sɩmɔgö a dɔˈwʋ, wa ˈkä ˈwa yuëa bhlaˈmö a ˈtɩtɩɩ ˈɲɛ a dɔˈwʋ, ŋli wa ˈɲɛnuëë ˈdɩ ˈn wa ˈki ˈwlu ˈmö ˈzʋ ˈnuë kɛ ˈmö ˈtɛɛnɩ. Dʋdʋ -pɩa ˈwa laa Aflikö a ˈbhlɩ a -bɛ ˈmö a nɩkpa a dɔˈwʋ, ˈcɩɛcɩɛ dɔˈwʋ, ŋli wa ˈcɩacɩanɩɛ.
4. -A ˈkää nɩkpa kwänɩ -mä -aˈa pɩɔ ˈyli a dɔˈwʋ sɛɛ -a kä bhä -kamä -aaɲɩ nimï ˈyɩbhä ˈnɩ?
4 -Mä -naˈa pɩɔ ˈyli, -n ˈkä ˈyukwlipʋnɩlu ˈmö ghlɛnɩ -n ˈkä nɩkpɛ lagɔwɛlɩɩ ˈɲɛ -mä ˈɔ -dagwälɩgbʋ ˈmö kä ɔ -li a -lii ˈmö -a? Nɩkpɛ bhɛnɩ bhä ɔ ˈkä ˈyukwlipʋnɩlii wa ˈpänɩɛ ɛtɛnɛtɩ ˈklʋ ˈyio ˈwʋ -li a -lii ˈmö ghlɩnɩ -a? -A bhɛnɩ ɔ -a ˈkä ˈyukwlipʋnɩlii CD ˈklʋ zʋ -ɲɛ ˈbɔgʋ -wʋɲɩ ˈmö a wɛlɩɩ -wʋä ˈyukwlipʋnɩlii ˈla ˈmö ˈsɔ nɩkpɛɛ -a ɲɛɛ lagɔwɛlɩɩ yowʋ ˈɲɛ -a? -N -kä ɛtɛnɛtɩ ˈklʋ ghlɛnɩ -n -kä nɩkpɛ ˈbɔgʋ, blosu, peliodikö -ɲɛ lagɔbɔgʋkpʋ ˈsɔ ˈɲɛ -mä lagɔwɛlɩbiabiu ˈmö, -n bhɛnɩ -n ˈkɩ zɛlɩ. ˈYukwlipʋnɩlii wa -bhɛɛ, -aˈa ˈligbë ˈmö a lagɔwɛlɩɩ a ˈcɩɛcɩʋ -ɲɛ nɩkpa -a ˈkää lagɔwɛlɩɩ ˈɲɛ ˈsɔ a zaa wa -bhɩɩɛ.—1 Kɔ. 3:6.