Mää nɩkpa bhïla gbɩ a -bɛ, -a -kä -mä lagɔwɛlɩɩ bianɩ dɔˈwʋ -wʋ, sɛ -a -ɲɛ -zɩkpö -mimii ˈsɔ ˈkää ˈgämö libho nʋnɩ

Nɩkpa -kä Lagɔ ˈa ˈtɩtɩ a -tɩtɩɩ -mä ˈwa -dagwälɩgbɩ ˈmö ˈnʋʋ, ˈyukwli wa -pʋniɛ sasɛ. Patɩkɔɔtɩ 33 Z.G. mii kää -kamä ˈŋlɩ ˈn Zoova yiɛ gbä ˈn ‘Zwiiföwaa -wa kä a-a Lagɔ a ˈmäna ˈmlɩ, -wa ˈbhöönɩ a-a -mä dʋdʋ a këtiea ˈwuë ˈwʋ,’ ˈn wa ˈwuë, wa yi aˈbhë Ebleegbʋ -ɲɛ glɛkögbʋ ˈsɔ gbä -kë, ˈwa yiɛ Lagɔ ˈa ˈtɩtɩ a -tɩtɩɩ ˈnʋ, -mä ˈwa “-dagwälɩgbɩ ˈmö.” (Zt 2:5, 8) Mää wa gbää zɩˈɛ gbɩ a -bɛ, lagɔzɩkpö -yɩ ˈyɩbhänɩɛ -mä ˈwlu gbɩ a -bɛ ˈmö, yɩ bhɛnɩ yɩ ˈkä pɩɔ -bhlʋ -kpɔ ˈyli lagɔwɛlɩɩ biaa mö. -Sɩbhä a -zɩkpö ˈla ˈmö a lagɔwɛlɩbiawa, sɛ wa ˈkä ɔ ˈzʋ nzɩ wa ˈkä ˈmö -ŋöŋönɩ, wa ˈkä lagɔwɛlɩɩ bia, ˈn wa ˈnaa ˈkä ɔ ˈligbëlowluwa ˈklɛ ˈmö päla ˈnɩ?

• 

  A nɩ ˈnʋnʋnɩ ˈmö (Pr 15:22): Lagɔzɩkpö ˈla ˈmö a -nʋa -wa -gänɩɛ lagɔwɛlɩbialibho ˈyuku, nɩ ˈnʋnʋnɩ ˈmö, nzɩ sɛ wa ˈkää ˈmö ˈzʋzʋnɩ, wa ˈkä Lagɔ ˈa ˈtɩtɩ a -tɩtɩɩ bia, wa ˈki ˈgämö yɔwʋ yɩlɩnɩ. Lagɔzɩkpö -yɩ bianɩɛ lagɔwɛlɩɩ gbʋ -mumuu ˈmö, wa bhɛnɩ wa ˈkä lagɔzɩkpö -miˈla ˈdɩ ˈɲɛ nɩɩ, wa nɩ tɩ ˈwa pɩɔ ˈyli a -nʋa -wa gbää ˈwa gbʋ a bɛyɩ mö. Maa ˈpɩɔ ˈla -kä teɲii ˈghïli, wa ˈnɩ bhɛnɩ wa ˈkʋ zɛmö bhɩɛ sɛɛ -bïdi ˈnɩɛ yɔwʋ -wʋwʋnɩ a za, wa bhɛnɩ wa ˈkä nɩɩ lagɔzɩkpö -miˈla nɩ bianɩ ligbï ˈwuë ˈmö lagɔwɛlɩɩ. Maa wa -kä nɩkpɛ lagɔwɛlɩɩ ˈɲɛɛ, yɩ -kɔ dlɩ yɔwʋ nɛnɩ, wa nɩ ˈɲʋa ˈdɩ, wa ˈkɔ ˈylɩmöä mö. (od-F 93 § 37) Wa bhɛnɩˈɛ wa ˈkä ˈa lagɔzɩkpa ˈmö a -nʋa ˈdɩ ˈɲɛ, a ˈkʋa kwänɩ nzɩ a ˈkä nɩkpa -wa gbää ˈwa gbʋ ghlɩ. A ˈkʋa ghlɩ, a ˈkuë ˈwa -ŋöŋöyukwli a ˈnaba ˈɲɛ. (km 5/15 1 § 3) A yɩɛ, ˈligbë -bhlʋ ˈmö a -nʋa bhɛnɩ wa ˈkä gbɩ a -bɛ gbä. Sɛ a ˈkää zʋ a ˈkä pɩɔ ˈyli mä a bianɩɛ lagɔwɛlɩɩ zɛmö bhɩɛ a dɔˈwʋ, a -kä nɩkpɛ a dlɛsɩ -mɔmɔɔ ˈɲɛɛ yi, yɩ dɔˈwʋ, sɛɛ bhlɩ a -wʋä ˈmö a -lɔ gbää, a nɩ zwi ˈklʋkpamö.

• 

  A nɩ nʋnɩ libho ˈgämö (Ɛf 4:16): -Ɔ -gänɩɛ ˈa lagɔwɛlɩbialibho ˈyuku a ˈdɩmözʋwɛlɩɩ ɔ ɲɩaɲɩɛ, a nɩ -gäni sasɛ. -N -wʋ ɔ nɩkpɛ Biblë ˈcɩa dɔˈwʋ -ɔɲɩ gbʋʋ -ɲɛ gbʋʋ a gbää -mä lagɔzɩkpaa ˈmö ˈnɩɛ -bhʋlʋ glɩnɩ -a? -Ɔ -wʋä Biblë ˈcɩɛ dɔˈwʋ, ɔ bhɛnɩ ɔ ˈkä ˈwʋ -päpanɩsɛ ˈyukusɛ mö, ˈn a -kä lagɔzɩkpaa -a ˈnɔɔ dɛ -tlʋnɩ ˈn -a gbää ˈɔ gbʋʋ ˈmö nɩkpɛ ˈɔ ˈcɩacɩʋ yowʋ ˈɲɛ.

• 

  Gïganɩ -naɲɩ ˈwlu (Pr 15:28; 16:1): -Mä a bianɩɛ lagɔwɛlɩɩ, -n -kä nɩkpɛ ghlɩ ˈn ɔ -kä käbögbʋ gbää, ˈtɛmanɩ ˈyli yɔwʋ n ˈkɔ lagɔwɛlɩɩ ˈɲɛ. -Mä a -nʋa a gbɩ wa gbää, ˈn -n ˈkɩɩ -yi, yɩ -yimö kwänɩ -n ˈkä sasɛ -naɲɩ ˈwlu gïganɩ. Biblë a gbɛlɩ wa bhɛnɩɛ wa ˈkä ˈmö ˈnʋ -ɲɛ videwii ˈsɔ, -n kɩɩ -mä ɛtɛnɛtɩ ˈklʋ -sɛ, yɩ -yimöˈɛ ˈgämö kwänɩ. -N ˈkä sɛɛ wa bhälɩɛ -mä gbɩ ˈla ˈmö ˈcɩɛ a dɔˈwʋ, JW Language -yimö kwänɩ.