-A nɩ kä ˈslɛlɛ -mä -aa lagɔwɛlɩɩ bia libhoo ˈmö: ˈPɩɔ ˈyli mää wa ˈpänɩɛ ˈpɛlʋ a lagɔwɛlɩbiabiʋ

ˈSaa kää ˈŋlɩ ˈn yɩ kää dɛsɛ: -A -yi sɛ naa nɩkpa a -bɛ, ˈtɛɲɩ a -bɛ wa libhïä ˈwʋ ˈn wa nʋä libho zaa, -a -kä -a ˈkʋa Lagɔ ˈa ˈtɩtɩ a -tɩtɩɩ ˈɲɛɛ, -mä -a ghlɩnuë -mä ˈwa libhonʋnɩ -bɛyɩ. Mää wa ˈpänɩɛ ˈpɛlʋ a lagɔwɛlɩbiabiʋ yi teɲii ˈmäna ˈwʋ -bhö. Ɛˈɛ -bhö ɲɩasɛ, maa ˈpɛlʋpäda, ˈpɛlʋpäwa -wʋ -lɛ ˈyize. ˈN ˈpɛlʋpäwa, wa -kä nɩkpa ˈylɩmöä, wa dɔˈwʋ pɩapɩawa zaa, ˈklʋkpamö wa zuë. Lagɔwɛlɩbiawa -kä nɩɩ, wa lagɔwɛlɩbiabiʋ ˈkä sasɛ ˈwʋ ˈplɩ nʋʋ, wa kä wa ˈkä ˈnɛgösɛ -bhɛ. Wa käˈɛ wa ˈkä sasɛ ˈmöpäla. (2 Kɔ. 6:3) -Sɩbhä a za, mää wa ˈpänɩɛ ˈpɛlʋʋ, ˈwʋ -zɩmö wa bianɩɛ -mä lagɔwɛlɩ ˈn -mɔ bianɩˈɛ -mä lagɔwɛlɩ, -ɔ -suä -zɩkpa ˈmö a lagɔwɛlɩ bia libho kä ɔ ˈkä yɩ gbʋ ˈyli ˈzʋnɩ.

Sɛ -a ˈkää zʋ:

-Bhɛ ˈylimötulanɩlu -wʋä ˈmö ˈbhʋɔ. ˈN a -kä ˈpɛlʋpäɲɔ a ˈtɛɲɩ a -bɛ ˈwʋ ˈlibhï, a -kä ˈwʋ ˈsɔnadɔˈwʋ yi, ɔ ˈnaa -kaɲɩˈa ˈyukwli -pʋnɩ.
Dɛɛ pɩapɩawa a -bɛ ˈnɔɔ -bhlɛ nuë yi, dɛ ɔ kälɩɛ ˈlili ˈwʋ ˈɔ ˈpɛlʋpäbudu, -lɛ a ˈtɛɲɩ ˈla ˈmö -lɛ -n kää -n ˈkɔ ˈylɩmöä mö.
ˈTɛmanɩ ˈyli yɔwʋ nzɩ -n -ɲɛ -ɔ ˈbhidɩba ˈsɔ ˈkä tɛɛ bhïla. -Su ku ˈmö ˈn ˈlibho -na bheyi a sɛ ˈwʋ. -N bhɛnɩ -n ˈkä nɩɩ, “Nɩkpa ˈmö -a yiɛ mäˈä ˈwa ˈpɛlʋpä -bɛyɩ ˈylɩmöä, -a ˈnaa ˈkä -lɛ gwälɛ. Ɛˈɛ -bhö ɲɩasɛ, maa -mä ˈwa ˈligbï ˈmö, -n ˈkuë -mä ghlɩnɩ a dɔˈwʋ ˈmö yɩ ˈtɛɛ.” Wa -kä nɩkpɛ kpʋ, ɛ -käˈɛ pɛliodikïa, ɛ -käˈɛ lagɔbɔgwɩ -mimii ˈɲɛɛ yi a sɛ wa gbää, gbä ˈtikïyie ˈwʋ -sɩbhä nzɩ -n ˈkɔɲɩ yowʋ ˈɲɛ. Wa -tɩɲɩa pɛlʋpäwa -tɔnɩ zaa, ˈn ɔˈbhë ɔ -nɩɲɩ nimïyɩbhä dɛ -a sɛɛ moni ˈn -a nʋä -aˈa lagɔlibho, -a nɩ tɩ moni a gbʋ bhïlaa.
ˈN ˈbhidɩba -kamö swɩ yɔwʋ päla, -n bhɛnɩ -n ˈkɔ ˈdɩ ˈɲɛ nɩɩ, -n yɩbhä -n -ɲɛ ˈpɛlʋpäwa -muëˈla ˈsɔ ˈkä ˈtikïyie ˈwʋ ˈdɩ -sɛmö. -Mä ˈpɛlʋpänɩde -mämaa, ˈyɩbhä nimï ˈn -n -kä bhɛnɩ, wa -kä libho nʋ -këë a mää wa möä ɲɛpɛnɩɛ, -n ˈkä -mä lagɔbɔgwɩ dlinɩɛ mö.
Kä ˈnɛgö, tɩ nɩ -n ˈkä klɩpaa ke -bhlʋ a ˈyize ˈmö ghlɛnɩ. Yɩɛ -ka, ˈpɛlʋpäɲɔ -ɲɛ pɩapɩawa ˈsɔ -kä bhïla dɔˈwʋ -wʋ, ɔ nɩˈɛ käˈmö ghlɩnɩ, -n kä -n ˈkä -kʋ, ɔ ˈkä käˈmö ghlɩnɩ ˈwë, -n ˈkɔa bhäla yɔwʋ ˈdionɩ.

ˈDɩmözʋwɛlɩɩ -a ˈkää ˈcʋ nɩ ˈmö -gänɩ

-Mä ˈpɩɔ ˈyli mää wa ˈpänɩɛ ˈpɛlʋ, a kä -mä ghlɛ a sɛ a ˈkää gbä, -yɩɛ ˈmö ˈbhʋɔ, a nɩ -bhɛ -sɩbhä a ˈylimötulanɩlu -mä a ˈligbë ˈmö a Biblë a ˈcɩɛcɩʋ ˈmö.