ˈSaa Biblë bhɛnɩ bhä ɛ -kaɲɩ ˈcɩa ˈnɩ?​—Sɛɛ -a ˈkʋä libho ˈmö nʋnɩ

ˈSaa Biblë ˈcɩaɲɩɛ a ˈbɔgʋʋ -ɲɛ -mu wa laa Quˈenseigne ˈsɔ, yɩ ˈsɔ -kpɔ -bhlʋ yɩ glɩnɩɛ. ˈMö -a ghlɛnɩɛ ˈmö ˈn -a ˈcɩa nɩkpa gbëawɛlɩɩ. -Mä ˈbɔgwɩ ˈla ˈsɔ -kpɔ ˈmö a wɛlɩ ˈwuë, sa -bhlʋ -kpɔ -sɩbha yɩ -wʋä. -Waˈa bhɛnɩ wa ˈkä Enseigne ˈmö ˈnʋ a za wa ˈcɛluä. ˈBɔgʋlulu ˈla ˈnɩɛ wa laa appendice ˈmö -kä, maa dlɩgömösɛsɛnɩkïbhï wʋ kää ˈmö. Mii sɛɛ sasɛ wɛlɩkïbhï -a -wʋä ˈcɩɛ dɔˈwʋ zɛmö. -Mä Quˈenseigne ˈmö a dɔˈwʋ, nimïyɩbhäkïbhï wʋ tɛɛnɩɛ ˈwʋ ˈn wʋ käˈɛ ˈwʋligbänɩkïbhï a -ziple ˈmö. Maa -mʋnɩ ˈnɩɛ wʋbhlɩ -sɩbhä -wʋ. Dɛsɛkäkïbhï -yɩ -kaɲɩɛ kwänɩ nzɩ -a ˈkä ˈsaa -a ˈcɩɛ ˈwʋligbanɩ ˈmö wʋ kää ˈmö. ˈTɛɲɩ ˈwuë ˈmö, -a bhɛnɩ -a ˈkʋ nɩkpa ˈɲɛ ˈn -a ˈnʋ cʋʋ ˈmö ˈɲɛ dɔˈwʋ -wʋ aˈbhë -kë. ˈBɔgʋʋ ˈla a sɛ wʋ -wʋä a dɔˈwʋ, sɛ -a ˈkʋ ɔ ˈmö ghlɛnɩ nzɩ -a ˈkä nɩkpa Biblë ˈcɩa ˈnɩ?

DƐSƐKÄKÏBHÏ: ɛɛ -a ghlɛnɩɛ ˈbɔgʋʋ wa laa Quˈenseigne la Bible ? ˈmö a nimïyɩbhäkïbhï -ɲɛ yɩ zɛmösɛkïbhï ˈsɔ ˈn -a ˈcɩa nɩkpa Biblë, yɩ nɛnɩ teɲii abhlɩ. Maa, -mɔ -n ˈcɩa ˈnɩ sasɛ gbʋ -n ˈcɩanɔɔ ˈmö -ŋö, ɔ ˈnɩˈɛ ˈmö zɛlɩsɛ -yi, -lɛ a dɔˈwʋ a nɩ ˈcɩɛnɩ -mä ˈsaa Biblë ˈcɩaɲɩɛ a ˈbɔgʋʋ a dɛsɛkäkïbhï ˈmö. ˈN ˈɲɔ ˈdɩ ɔ ˈkä bhäla ɔ ˈyize ˈbɔgʋʋ ˈmö a nimïyɩbhäkïbhï -ɲɛ yɩ zɛmösɛkïbhï ˈsɔ ˈmö zɛlɩ. ˈA Biblë a ˈcɩɛcɩʋ bhɛnɩ wʋ ˈkä minitia 15 -sɛ. -Mä dɛsɛkäkïbhï ˈla ˈmö, ˈkïbhïyiea ˈwuë ˈmö waˈaa -mä ˈzʋ zaa, -n -kä nɩkpɛ Biblë ˈcɩa yi, gïgänɩ sasɛ -naɲɩ ˈwlu. ˈN sɛ -n ˈkɔɔ kwänɩ, ˈpäni dlɩ kɛ. Ɔ -kä ˈmö zɛlɩsɛ -yi, a -kä ˈcɩɛ ˈwë, a yi dɛsɛkäkïbhï ˈmö ghlɛnɩ nzɩ a ˈkä ˈsaa a ˈyɩɛ ˈylɩmö ˈwʋ ligbanɩ.

DLƖGÖMÖSƐSƐNƖKÏBHÏ: Wɛlɩkïbhï, sɛ a yɩlɩɛ yɔwʋ -mä ˈkïbhï a -wʋä ˈcɩɛ dɔˈwʋ ˈmö, -sɩbhä yɩ -glɛglɛnɩɛ ˈwʋ, -mä dlɩgömösɛsɛnɩkïbhï ˈmö. -N -kä ˈyɩbhää, a -kä ˈcɩɛ dɔˈwʋ -wʋ, a bhɛnɩ a ˈkä dlɩgömösɛsɛnɩkïbhï -mä ˈsaa Biblë ˈcɩaɲɩɛ a ˈbɔgʋʋ ˈmö yɔwʋ yɩlɩ.