ˈCƖƐCƖƐKÏBHË 19
Zoova ˈa Bhlɩnɩwaa ˗tiamö a Klɩtɩɛwaa wa glɩnɩ bhä ˗a?
˗Abhʋa Zoova ˈa Bhlɩnɩwaa, ˗a kɩ dlɩ ˈwʋ nɩɩ ˗tiamö a Klɩtɩɛwaa ˗a glɩnɩɛ. ˗Yɩ kä ɔ ˈŋlɩ ˈnɩ? ˗A ˈkɩ ˈmö ˈnʋ a dɔˈwʋ, ˗lii ˗a kää dlɩ ˈwʋ a ˈsaa yɩ ˗glɛ ˈwʋ, ŋlɩɩ ˗mi ˗a ˗suä ˈn sɛɛ ˗a ˗wawanɩɛ, ˗a nɩ yilii yɔwʋ.
1. ˗Lii Zoova ˈa Bhlɩnɩwaa kää dlɩ ˈwʋ ˈsaa yɩ ˗glɛ ɔ ˈwʋ ˈnɩ?
Zezwii lɛ nɩɩ: “˗Naˈa wɛlɩɩ yɩ ˈyize mɩɩ kää ˗tiamö gbëaa ˈmö.” (Zaa 17:17) Zezwii a saa, Zoova ˈa Bhlɩnɩwaa a ˗lii wa kää dlɩ ˈwʋ, ˗mä Lagɔ ˈa wɛlɩɩ ˈmö ˗mä yɩ ˈbhöönɩɛ. ˗Aˈa ˈtɛɲɩ ˈlɛ ˈmö a wɛlɩɩ ˗bhlʋ ˗yɩ ˈplɩɛ ˈwʋ, ˗a nɩ yiliɛ ˗ka yɔwʋ. 1870 a ˈylʋba ˈmö, ˗zɩkpa ˗bhlʋ ˈmö a ˗nʋa mʋa tɛɛ Biblë a ˈcɩɛcɩʋ ˈn wa yee sasɛ ˈmö vɩɛ, wa ˈkä ˈsaa ɛ ˈcɩaa ˗tiamö ˈylɩmö. Sɛɛ Biblë gbää, yɩ ˗ɲɛ ˈsaa lagɔgligbï ˈcɩa ˈsɔ ˈnɩɛ yɔwʋ mönɩ. Maa, Biblë ˈmö a gbëawɛlɩɩ ˈmö wa kä a˗a wabhlɩ dlɩ ˈwʋ zaa, ˈmö wa ˈɲɛmöä nɩkpa ˗mumuë.a
2. ˗Yɩ kä ɔ ˈŋlɩ ˈn wa laɲɩ ɔ Zoova ˈa Bhlɩnɩwaa ˈnɩ?
Zoova, ˈɔ bʋbɔbʋbɔwaa ˈmö ɔ laa ˈɔ Bhlɩnɩwaa. Ɛˈɛ ˗bhö ɲɩasɛ, maa ɔ ˗gömö a gbëawɛlɩɩ ˈmö wa ɲɛɛ nɩkpa. (Ebleewaa 11:4—12:1) Yɩɛ, bhlagɔgɔˈmö, sɛˈɛ Zoova gbä a˗a ˈɔ ŋëyi a dɛ nɩɩ, “Abhʋa glɩnɩɛ ˈna Bhlɩnɩwaa.” (Zɛlɩ Isaïe 43:10 ˈmö.) Zezwii ˈmö Biblë laa ‘Lagɔ ˈa Bhlɩnɩwaa ˈwuë a tɛkänɔɔ.’ (’Ylimötulanɩlii 1:5) 1931 a ˈylʋba ˈmö ˗lɛ ˗a ˈpää ˗aɲɩ Zoova ˈa Bhlɩnɩwaa a ŋlɩɩ. Ŋlɩ ˈla ˗a ˗suä, yɩ ˗bhöɲɩ teɲii ˈmäna ˈwʋ.
3. Sɛɛ Zoova ˈa Bhlɩnɩwaa ˗gänɩ ɔ Zezwii ˈa ˗wawʋ a gbäpöö ˈnɩ?
Zezwii ˗wa a˗a teɲii ˈɔ ˈwʋ˗bhlinɩwaa, ˈɔ ˗kosu yɔwʋ a ˗nʋa a sɛ ɔ ˈlibhuë a˗a ˈwʋ. (Zɛlɩ Maakö 3:35 ˈmö.) Sɛɛ ˗bhlʋ ˗kpɔ ˈla, ˗sɩbhä Zoova ˈa Bhlɩnɩwaa ˗wʋä, ˗kosu ˗bhlʋ yɔwʋ a nʋa a sɛ wa ˗wʋä ˈn wa ˗wʋnɩɛ ˈwʋ. Nza ˗a lalanɩɛ ˗daayuë. (Filemɔɔ 1, 2) ˗A ˈwuë, ˈpäpägba ˈlɛ mö ˗a zʋä ˈklʋkpamö: “A ˈbhɩa lagɔgänɩwaa, a nɩ ˗wʋä.” (1 Piɛlɩ 2:17) Zoova ˈa Bhlɩnɩwaa tula ˈki a ˗bɛ ˈmö sɛ wa ˗waa wa lagɔdaayuë. Wa lagɔdaayuë ˗wa ˗wʋä ˗mä bhlɩ ˈwuë ˗gömö ˗kä yɔlɔylʋ ˈmö ˗wʋʋ, wa kwänuë.
ˈCƖƐ ˗LII ˗MIMII
ˈCɩɛ Zoova ˈa Bhlɩnɩwaa a ˗gömö a wɛlɩɩ nzɩ ˈsaa tulaa nɩɩ ˗tiamö a Klɩtɩɛwaa wa glɩnɩɛ, ˗n ˈki ˈylɩmö.
˗Tiamö a Klɩtɩɛwaa a ˈsaa wa kää dlɩ ˈwʋ, Biblë ˈmö yɩ ˗glɛ ˈwʋ ˈn yɩ wɛlɩɩ ˈmö wa ɲɛɛ nɩkpa.
4. ˗Lii ˈwuë ˗a kää dlɩ ˈwʋ ˗mä Biblë ˈmö ˗mä yɩ ˈbhöönɩɛ
Zoova nʋ a˗a ˗pa nɩɩ Biblë ˈmö a gbëawɛlɩɩ ˗a yi a˗a sasɛ ˈmö ˈnʋ. Zɛlɩ Daniel 12:4 ˈmö ˈn kpʋ zɛmö a kïbhëa. ˈN a nɩ yɩlɩ nimïyɩbhäkïbhë ˈlɛ yɔwʋ:
Lagɔ a ˗nʋa ˗kä Biblë ˈmö vɩɛ ˈyize, ˈsaa ˈkä ɔ “zumanɩ teɲii” ˗mä wa jijoˈwʋ ˈnɩ?
Biblë a ˈcɩɛcɩɛwa a ˗zɩkpa ˗bhlʋ ˗wa ˈcɩɛ a˗a Lagɔ ˈa wɛlɩɩ, Charles Russell ˗wʋmö a˗a ˗mä. ˗A nɩ ˈyɩɛ ˗ka wa wɛlɩɩ ˈylɩmö. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ
˗Mä video ˈlɛ ˈmö, Charles Russell ˗ɲɛ Biblë a ˈcɩɛcɩɛwa ˗mumuë ˈsɔ, sɛ wa ˈcɩɛ ɔ Biblë ˈnɩ?
˗N ˗yi a˗a bhä sɛ ˗a?
ˈTɛɲɩ ˗mɛmɛɛ ˈmö, ˈsaa ˗a kä a˗a dlɩ ˈwʋ zigbonɩ ˈmö. ˗Yɩ kä ɔ ˈŋlɩ ˈnɩ? Sɛɛ ˈylʋ wlʋˈɛ glu, pɛɛpɛ pɛɛpɛ ˗këë ˈn wʋ ŋälaˈɛ saa ˈwuë ˈwʋ ˈn ˗a yɩˈɛ ˗lii ˈwuë ylɩmö, sɩbhä Lagɔ ˈa wɛlɩɩ ˗wʋä. Pɛɛpɛ pɛɛpɛ ˗këë, ˈn Lagɔ yiɛ gbä ˈn ˗a yiɛ sasɛ ˈɔ wɛlɩɩ ˈmö ˈnʋ. (Zɛlɩ Proverbes 4:18 ˈmö.) ˈLɩlɩlɩ a dɔˈwʋ Biblë ˈnɩ zigbonɩ abhlɩ ˈmö, ˗maa ˗a ˗kɛɛ sasɛ ˈmö ˈnʋ, ˗a bhɛnɩ ˗a ˈkä ˗aˈa ˈcɩacɩasaa ˈwlu gïganɩ.
5. Sɛɛ ˗aˈa ŋlɩɩ sɛɛ zɛmö ˗sɩbhä ˗a nɛmöä
˗Yɩ kä ɔ ˈŋlɩ ˈn ˗a yi ɔ ˗aɲɩ Zoova ˈa Bhlɩnɩwaa a ŋlɩɩ ˈpä ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ
˗Yɩ kä ɔ ˈŋlɩ ˈn Zoova ˈa Bhlɩnɩwaa a ŋlɩɩ ˗ŋwaɲɩ ɔ ˈwʋ ˈnɩ?
˗Yɩ kä ɔ ˈŋlɩ ˈn Zoova yi ɔ nɩkpa ˗lɛ ˗sɛ wa ˈkä ɔ Bhlɩnɩwaa ˈzʋ ˈnɩ? Ɛˈɛ ˗bhö ɲɩasɛ, ˗maa wa ˈkä nɩkpa ˈdɩ ˈɲɛ nɩɩ, mɔɔ ˗lɛ ˗tiamö a Lagɔ ˈn yiowɛlɩɩ ˈwuë wa zoo ˗gömö, wa ˈki ˈpɩwʋ ˈpä. ˗A nɩ ˈyɩɛ ˗ka ˈyiowɛlɩ ˈla a glaˈmö a ˗nɩ ˈsɔ ˈylɩmö.
Sɛˈɛ lagɔgligbï ˗mimii ˈcɩa nɩɩ, Lagɔ yɩbhä ˗a nɩ ghlɛnɩ tɛlɩtɛlɩlii ˈmö nzɩ ˗a ˈkɔ bʋbɔ. Zɛlɩ Lévitique 26:1 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Biblë gbä ɔ ˈnɩ? Sɛɛ Zoova pä ɔ dlɩ ˈfʋ a ˗lagwɩ a dɔˈwʋ ˈnɩ?
Lagɔgligbï ˗mimii ˈcɩa nɩɩ, Zezwii mɔɔ glɩnɩɛ Lagɔ. Zɛlɩ Zaa 20:17 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Biblë gbä ɔ ˈnɩ? Lagɔ ˗ɲɛ Zezwii ˈsɔ nɩkpɛ ˗bhlʋ wa glɩnɩ bhä ˗a?
˗N yɩbhlɩnɩɛ sɛ nɩɩ Zoova tie nɩkpa, nzɩ wa ˈkä ɔ ˗ɲɛ ɔ yowli ˈsɔ a ˗gömö a gbëawɛlɩɩ nɩkpa ˈɲɛɛ, ˈsaa yɩ nʋmö ɔ ˈwlu ˈnɩ?
6. ˗A ˈwuë ˗wawanɩ ˗a ˗wawanɩɛ
Klɩtɩɛwaa ˈmö Biblë pälɩɛ ˗aˈa kpökpa yɔwʋ a nɩma ˈwʋ. Zɛlɩ 1 Kolɛɛtɩ a ˗nʋa 12:25, 26 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Tiamö a Klɩtɩɛwaa, wa lagɔdaayuë ˗kä yɔlɔylʋ ˈmö ˗wʋ, sɛɛ wa zʋ ɔ ˈnɩ?
ˈSaa tula ɔ nɩɩ Zoova a ˗nʋa ˗wawanɩ ˗tiamö ˈnɩ?
Zoova a ˗nʋa ˗wa ˗wʋä ˗mä dʋdʋkpäta a pɩɔ ˗mumuu ˈyli ˗kä yɔlɔylʋ ˈmö ˗wʋ, bhlɩ ˗gömö a lagɔdaayuëa ˈwuë, ˈwʋ ˗päpanɩsɛ wa yuaa ˈwʋ. ˈYiɛ ˗ka ˈylɩmö, ˈZʋ ˗lɛ VIDEO. ˈN a nɩ yɩlɩ nimïyɩbhäkïbhë ˈlɛ yɔwʋ.
˗Lizoku ˗kä Zoova a ˗nʋa ghlɩ a sɛ wa kwänɩɛ wa lagɔdaayuëë, sɛ yɩ tula ɔ nɩɩ wa ˗wawanɩ ˈnɩ?
˗Wa ˗wʋä yɔlɔylʋ ˈmö, ˗tiamö a Klɩtɩɛwaa tulanuë ˈwa ˗wawʋ ˈylimö.
NƖKPA ˗MUMUË LƐ NƖƖ: “Zoova ˈa Bhlɩnɩwaa a lagɔgligbëa, lagɔgligbëlele a glɩnɩɛ.”
Zoova ˈkää ˈɔ bʋbɔbʋbɔwaa ɔ Bhlɩnɩwaa laa, ˈtɛɲɩ ˗mɛ ˈmö yɩ tɛɛ ɔ ˈnɩ?
DƐSƐKÄKÏBHÏ
Zoova a Bhlɩnɩwaa, ˗tiamö a Klɩtɩɛwaa wa glɩnɩɛ. Zoova a ˗nʋa ˈwuë ˗wa ˗wʋä dʋdʋkpäta a këtiea ˈwuë ˈwʋ, ˈligbë ˗bhlʋ ˈmö a ˗nʋa a sɛ wa ˗wʋä, ˈsaa wa kää dlɩ ˈwʋ, ˗mä Biblë ˈmö ˗mä yɩ ˈbhöönɩɛ. ˈN wa ɲɛˈɛ nɩkpa Zoova a ˗gömö a gbëawɛlɩɩ.
ˈWʋligbanɩkïbhï
˗Yɩ kä ɔ ˈŋlɩ ˈn ˗a yi ɔ ˗aɲɩ Zoova ˈa Bhlɩnɩwaa a ŋlɩɩ ˈpä ˈnɩ?
Sɛ ˗a ˗susunɩ ɔ ˈnɩ?
Zoova ˈa Bhlɩnɩwaa, ˗tiamö a Klɩtɩɛwaa wa glɩnɩ bhä ˗a?
YILII YƆWƲ
Nɩkpa a cɩacɩawɛlɩɩ ˗yɩɛ gbëaa ˈmö ˗kä, sɛɛ Zoova a Bhlɩnɩwaa ˈpɩɛ ˈpɩwʋ, ˈyi ˈylɩmö.
Zoova ˈa Bhlɩnɩwaa a ˗gömö a wɛlɩɩ ˗n ˈyɩbhänɩɛ ˗käma ˗naɲɩ ˈwʋ, ˗n bhɛnɩ ˗n ˈkä yɩ zɛmösɛna ghlɩ.
« Questions fréquentes sur les Témoins de Jéhovah » (jw.org ˈklʋ)
Sefɛnɩ ˈkulɩbhäɲɔ ɔ glɩnɩ a˗a. Nɩkpa ɔ ˗ɲɛ ˈnɩɛ ku ˈwʋ ˗gbɔ, ˈmö ɔ ˗gblɩɛ zaa, ˈlɩbhä ɔ lɩbhʋää. ˗Maa Zoova ˈa Bhlɩnɩwaa ˈa nʋnʋlii mii ˈsunɔɔ ˗mä ˈn ɔ yiɛ ˈmö zigbonɩ.
« Ma vie allait de plus en plus mal » (La Tour de Garde, 1er juillet 2015)
a Tɛɛnɩ 1879 ˈmö ˗këë zɩˈɛ, Zoova ˈa Bhlɩnɩwaa cɛlɩ ˈbɔgʋ ˗bhlʋ wa laa La Tour de Garde, nzɩ wa ˈkä Biblë ˈmö a gbëawɛlɩɩ nɩkpa dlɩ ˗gömö ˗sɛsɛnɩ.