ˈCƖƐCƖƐKÏBHË 22
Sɛɛ ˗n ˈkä ɔ Lagɔ ˈa ˈtɩtɩ a ˗tɩtɩɩ nɩkpa ˈɲɛ ˈnɩ?
˗N ˗kä Biblë ˈmö a gbëawɛlɩɩ ˈcɩɛ ˈyize, ˗n yi ˗kamä nɩɩ, ‘nɩkpaa kä wa ˈkä wɛlɩ ˈlɛ ˈnʋmö!’ Miɛ abhlɩ, nɩkpaa ˈwuë kä wa ˈkä Lagɔ ˈa ˈtɩtɩ a ˗tɩtɩɩ ˈnʋ! ˗Maa, ˗n ˈkʋaɲɩ ˈɲɛ a dɔˈwʋ ˗n ŋänɩ ˗kamä ˈtikïyie ˈwʋ. Sɛɛ ˗n ˈkää ŋanɔ ˈla ˈwlu ˈplɩ nzɩ ˗n ˈkä ˈmänasɛ Lagɔ ˈa ˈtɩtɩ a ˗tɩtɩɩ bia, mö ˗a ˈkää ˈylɩmö.
1. Sɛɛ ˗n bhɛnɩ ɔ ˗n ˈkä ˈsaa ˗n cɩɛɛ ˗mä Biblë ˈmö nɩkpa ˗n ˗yiɛ ˈɲɛ ˈnɩ?
Zezwii ˈa ˈwʋ˗bhlinɩwaa lɛ nɩɩ: “ˈSaa ˗a ˈyɩɛ ˗aˈbhï ˈylɩmöö, ˗a kä ˗a ˈkä yɩ dɛ bhïla klɩpaa.” (Nʋnʋlii 4:20) Sɛ wa ˗waa gbëawɛlɩɩ a za, wa yɩbhä a˗a wa ˈkɩ nɩkpaa ˈwuë ˈɲɛ. ˗Sɩbhä yɩ ˗wʋ ɔ ˗na dɔˈwʋ ˗a? Sɛɛ ˗n ˈkää ˈzʋ ˗n ˈkä ˗naˈa ˈligbë ˈmö a ˗nʋa ˗ɲɛ ˗na ˈtuawa ˈsɔ ˈsaa ˗n ˈcɩɛ a wɛlɩɩ ˈɲɛɛ, tɛlɩ ˗sɩbhä sɛ. —Zɛlɩ Kolɔɔsɩ a ˗nʋa 4:6 ˈmö.
Sɛɛ ˗n ˈkää ˈzʋ ˗n ˗ɲʋa ˈsɔ ˈkä ˈdɩsɛsʋ tɛɛ
˗N ˗ɲɛ ˗naˈa ligbë ˈmö a ˗nʋa ˈsɔ a ˗kä ˈdɩ ˗sɛ dɔˈwʋ ˗wʋ, ˗n bhɛnɩ ˗n ˈkä nɩɩ: “A yɩɛ, ˈdimasɩ ˈlɛ ˈmö n zɛlɩ ˈmänatɩtɩ ˈmö, ˗mä Biblë ˈmö.”
˗Na ˈtua ˈnɩ ˈmö nɛnɩ ˈn ɔ ˗käˈɛ ˗kamä dlɩpänɔ ˈmö ˗wʋ, zɛlɩ Biblë a gbɛlʋ ˈmö ˗wʋ ˈkɔɔ swɩ ɲɛmʋ ˈmö ˈpä.
˗Na ˈtua ˗kamö nimï ˈyɩbhä nɩɩ, ˈsaa ˗n nʋ ɔ ˈdimasɩ ˈlɛ ˈmö, ˈsaa ˗n ˈcɩɛ ˗mä Biblë ˈmö, ɛ ˗käˈɛ ˗mä ˈwluyɩbhäyɩbhʋ ˈwʋ, ˈɲɔ yɩ wɛlɩɩ.
Sʋlʋnɩ ˗na ˈtuawa ˗aˈa ɛtɛnɛtɩ a dlɛsɩ jw.org.
˗N ˗kä nɩkpɛ Biblë ˈcɩa dɔˈwʋ ˗wʋ, wäzɩ ˗mumuë wa ˈkä ˗lɛ ˗wʋmö. Sɛ ɔ ˈkää ˈzʋ ˗mä jw.org ˈklʋ nzɩ nɩkpɛ ˈkä yi ɔ ˈkɔ ˈcɩa, slʋnɔˈɛ ˗sɩbhä.
2. ˗A ˗ɲɛ lagɔzɩkpa ˈmö a ˗nʋa ˈsɔ, ˗yɩ kä ɔ ˈŋlɩ ˈn ˗a kä ɔ ˗a ˈkä lagɔwɛlɩɩ ˈgämö bianɩ ˈnɩ?
Zezwii ˈa ˈwʋ˗bhlinɩwaa, nɩkpaa wa ˗yiɛ a ˈyize ˈmö wa ˈnɩɛ a˗a Lagɔ ˈa ˈtɩtɩ a ˗tɩtɩɩ ˈɲɛ. ‘˗Gwlɩ ˈkädɩɩ ˗ɲɛ ˗gwlɩ ˈtikïyiea ˈsɔ ˈmö, saa ˈwuë, sɛ Zezwii ˈkää ghlɛnɩɩ, ˈn ˈɔ yiɛ ˈɔ ˈwʋ˗bhlinɩwaa ˗sɩbhä ˈsɔ ˈsɔ ˈsɔ tie.’ (Lwiikö 10:1) Sɛɛ lagɔwɛlɩbialibho ˈlɛ ˗gïganɩ a˗a sasɛ ˈwlu a za, yɩ kä ˈŋlɩ ˈn nɩkpa a ˗bɛ yiɛ Lagɔ ˈa ˈtɩtɩ a ˗tɩtɩɩ ˈnʋ. Sɛɛ Zezwii ˈa ˈwʋ˗bhlinɩwaa bianɩɛ lagɔwɛlɩɩ ˈgämö, yɩ zʋmʋaˈɛ teɲii ˈmäna dlɩ zɛmö. (Lwiikö 10:17) Zaa ˗n yɩbhä ɔ ˗n ˗ɲɛ lagɔzɩkpa ˈmö a ˗nʋa ˈsɔ ˈkä lagɔwɛlɩɩ ˈgämö bianɩ ˗a?
ˈCƖƐ ˗LII ˗MIMII
Sɛɛ ˗n ˈkää ˗naˈa ŋanɔɔ ˈwlu ˈplɩ nzɩ Lagɔ ˈa ˈtɩtɩ a ˗tɩtɩɩ a biabiu ˗kamö ˈmäna ˈwʋ ˗bhö, ˈyi ˈylɩmö.
3. Zoova ˗yimö kwänɩ
Nɩkpaa ˗mumuë yɩbhä wa ˈkä lagɔwɛlɩɩ bia. ˗Maa sɛɛ ˗mumuë ˈkää wa dɔˈwʋ dlɩ ˈpä, ˈn sɛ wa ˈkää gbä, mii ˗bhʋa ŋanɔ ˈwʋ.
˗N ˈkä ˈsaa ˗n ˈcɩɛ a wɛlɩɩ ˗mumuë ˈɲɛ a dɔˈwʋ, ŋänɩ ˗n ŋänɩ bhä ˗a? ˗Yɩ kä ɔ ˈŋlɩ ˈnɩ?
ˈZʋ ˗lɛ VIDEO, ˈn a yɩlɩ nimïyɩbhäkïbhë ˈlɛ yɔwʋ.
ˈYuëdɩgbö ˈlɛ ˗wa glɩnɩɛ Zoova ˈa Bhlɩnɩwaa, sɛ wa ˈplɩ ɔ ˈwa ŋanɔɔ ˈwlu ˈnɩ?
Zɛlɩ Isaïe 41:10 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗N ˗kä ŋänɩ lagɔwɛlɩbiabiu a dɔˈwʋ, ˗yɩ kä ɔ ˈŋlɩ ˈn ˗n kä ɔ ˗n ˈkä Lagɔ bhibhe ˈnɩ?
˗N ˗yi a˗a bhä sɛ ˗a?
Zoova a Bhlɩnɩwa a ˗bɛ, dɛɛ waˈaa ˗bhlɛ Lagɔ ˈa ˈtɩtɩ a ˗tɩtɩɩ a biabiu tɛɛ, wa ˗tɔnɩa nɩɩ, wa ˈnaa ˈkä ˗zɩ libho ˈla bhɛnɩ. ˗Sɩbhä Sɛlɩgɛyɩ ˈpämö a˗a dlɩ. Ɔ dɔˈwʋ, ɔˈɔ a˗a dɛsɛ ˗kä, ˈn ɔ ˗ɲɛ nɩkpa ˈkä ˈdɩ ˗sɛ, yɩ ˈtɛɛnɔ a˗a teɲii kɛˈmö. Ɔ ˈcɩɛ Biblë, ɔ lɛ nɩɩ: “N ŋänɩ a˗a ˈyize, maa ˈyli yɔwʋ n ˈtɛmanɩɛ ˈn n yiɛ ˈsaa n ˈcɩɛ a wɛlɩɩ nɩkpaa ˗mumuë ˈɲɛ. Yɩ kä ˈŋlɩ ˈn n yiɛ ˈna ŋanɔɔ ˈwlu ˈplɩ, ˈn n ˈtɛɛnɩˈaa ˗sɩkaa teɲii Lagɔ dlɩ.”
4. Kä nɩkpa a ˈklʋkpa
˗N ˗kä nɩkpɛ Lagɔ ˈa ˈtɩtɩ a ˗tɩtɩɩ ˈɲɛɛ yii, sɛɛ ˗n ˈkää gbää, ˗n kä ˗n ˈkɩ dlɩ kɛ ˈpänɩ. ˗Maa, sɛɛ ˗n ˈkää ˈklʋkpamözʋsɛ bhïla käˈɛ teɲii dɛsɛ. Zɛlɩ 2 Timotee 2:24; ˈn 1 Piɛlɩ 3:15 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗N ˗kä ˗mumuë lagɔwɛlɩɩ ˈɲɛ dɔˈwʋ ˗wʋ, sɛɛ ˗n ˈkä ɔ Biblë a gbɛlɩ ˈlɛ ˗gänɩ ˈnɩ?
˗Naˈa ˈligbë ˈmö a ˗nʋa, ɛ ˗käˈɛ ˗na ˈtuawa, wa ˈnɩ ˈsaa ˗n ˈcɩa ˈmö ˗wanɩ, sɛɛ ˗n ˈkä ɔ ˈzʋ ˈnɩ? ˈN sɛɛ ˗n ˈnaa ˈkä ɔ ˈzʋ ˈnɩ?
˗A ˗kä ˈnɛgösɛ bhïla ˈn ˗a ˈnʋa ˈwlumö köbhänɩɩ, nzɩ wa ˈkä ˈsaa ˗a kää dlɩ ˈwʋ ˗gänɩ, ˗yɩ kä ɔ ˈŋlɩ ˈn yɩ nɛnɩ ɔ ˈnɩ?
5. Lagɔ ˈa ˈtɩtɩ a ˗tɩtɩɩ a biabiu ˈmäna yɩ zʋä dlɩ zɛmö
Zoova ˈɲɛ Zezwii ˈɔ ˈtɩtɩ a ˗tɩtɩɩ a biabialibhoo. Sɛɛ Zezwii yɩlɩ a˗a bhä libho ˈla ˈwʋ ˈnɩ? Zɛlɩ Zaa 4: 34 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗A ˗kä lile a ˗ma nɛnɩɛ lii, a kä ˈŋlɩ ˈn ˗a nɛnɩɛ ˈmö ˈn ˗a ˗wʋˈɛ ˈmäna ˈmö. ˈSaa Lagɔ yɩbhää, ˗yɩ glɩnɩɛ ˈɔ ˈtɩtɩ a ˗tɩtɩɩ a biabiu, ˗yɩ kä ɔ ˈŋlɩ ˈn Zezwii gbä ɔ nɩɩ yɩ ˗ɲɛ lile ˈsɔ yɔwʋ yɩ mönɩɛ ˈnɩ?
˗N ˗kä Lagɔ ˈa ˈtɩtɩ a ˗tɩtɩɩ nɩkpa ˈɲɛɛ, sɛ yɩ ˗kamö ɔ ˈmäna dlɩ zɛmö ˈzʋ ˈnɩ?
˗Lii ˗yɩ ˗kamöä kwänɩ
ˈDimasɩ a ylɩɩ ˗mɛmɛɛ ˈmö a ˈwluyɩbhäyɩbhʋ ˈwʋ, ˗lii ˗yɩ bhɛnɩɛ yɩ ˗kamö kwänɩ ˗n ˗ɲɛ nɩkpa ˈsɔ ˈkä ˈdɩsɛsʋ tɛɛ, ˈceli.
Libhoo wa ɲɛɛ ˗sukuyuëa ˈdimasɩ a ylɩɩ ˗mɛmɛɛ a ˈwluyɩbhäyɩbhʋ ˈwʋ, tɛlɩ sɛ ˗n ˈkʋ nʋmö. ˗N ˗kä libho ˈla nʋmö, ˗n ˈkä nɩkpɛ lagɔwɛlɩɩ ˈɲɛ ˈnaa ˗kamö kɛˈmö ˈtɛɛnɩ.
Wa ˗kamö ˈkïbhë ˈwʋ ˈyɩbhänɩ sɛɛ ˗n ˈkää gbä a dɔˈwʋ, dɛɛ wa ˈzʋä “Nɩkpa ˗mumuë lɛ nɩɩ” ɛ ˗käˈɛ dɛɛ wa ˈzʋä “˗Mɔmɔɔ ˗kamö nimï ˈyɩbhä nɩɩ,” ghlɛnii ˈmö ˗n ˈkʋa yɩ zɛmösɛna ˈɲɛ.
˗MƆMƆƆ ˗KAMÖ NIMÏ ˈYƖBHÄ NƖƖ: “Sɛ yɩ ˗wʋ ɔ ˈmö?”
Sɛ ˗n ˈkä ɔ kïbhë ˈlɛ ˈmö ghlɛnɩ nzɩ ˗n ˈkɔ ˈsaa ˗n ˈcɩɛ ˗mä Biblë ˈmö a wɛlɩɩ ˈɲɛ ˈnɩ?
DƐSƐKÄKÏBHÏ
Lagɔ ˈa ˈtɩtɩ a ˗tɩtɩɩ a biabialibhoo, ˈmäna wʋ zʋä dlɩ zɛmö. ˗N pä ˗kamä dlɩ nɩɩ ˈmö ˗wʋ ˈtɛɛ, maa ˈlɩlɩlɩ a dɔˈwʋ wʋˈʋä ˈmö ˈtɛɛ.
ˈWʋligbanɩkïbhï
˗Yɩ kä ɔ ˈŋlɩ, ˈn ˗a kä ɔ ˗a ˈkä Lagɔ ˈa ˈtɩtɩ a ˗tɩtɩ nɩkpa ˈɲɛ ˈnɩ?
˗N ˗kä nɩkpa lagɔwɛlɩɩ ˈɲɛ dɔˈwʋ ˗wʋʋ, sɛɛ ˗n ˈkä ɔ ˈklʋkpamözʋsɛ bhïla nɩ?
Lagɔwɛlɩbiabiu a dɔˈwʋ ˗n ˗kä ŋänɩɩ, sɛ ˗n ˈkä ɔ ˈzʋ ˈnɩ?
YILII YƆWƲ
˗A ˗kä nɩkpɛ jw.org ˈklʋ a kpʋke ˈɲɛ yii, ˗lii a ˈki ˗mʋäna ˗a bhɛnɩɛ ˗a ˈkä ˈmö ghlɛnɩ nzɩ ˗a ˈkɔ Lagɔ ˈa ˈtɩtɩ a ˗tɩtɩɩ ˈɲɛ, ˈyi ˈylɩmö.
ˈCɩɛ ˗wʋwʋsaa a ˈki ˗mʋäna ˗yɩ ˗kamöä kwänɩ ˗n ˈkä nɩkpɛ Lagɔ ˈa ˈtɩtɩ a ˗tɩtɩɩ ˈɲɛ.
« Es˗tu prêt à devenir un pêcheur d’hommes ? » (La Tour de Garde, septembre 2020)
Biblë ˈmö a wɛlɩɩ ˗yɩ bhɛnɩɛ yɩ ˈkä ˈyuëdɩgbö swɩ ɲɛmʋ ˈmö ˈpämö, nzɩ wa ˈkä ˈyliyɔwʋtɛɛnɩsɛ Lagɔ ˈa ˈtɩtɩ a ˗tɩtɩɩ nɩkpa ˈɲɛ, ylɛ yɩ video.
Sɛɛ ˗a ˈkää ˗aˈa ˈligbë ˈmö a ˗nʋa ˗waaa Zoova ˗yi lagɔwɛlɩɩ ˈɲɛ, ˈyi ˈylɩmö.
« Touchons le cœur de nos parents non Témoins » (La Tour de Garde, 15 mars 2014)