Ndragnahari nikumba atsika, magnambara wahadi tsara nazi karaha akori

Rangu fitampunosana ni kuragnan’holumbelu, Ndragnahari nikumba atsika, nanyiraka malaika ndreki mutrumi hivulagna an holumbelu. Izi nila kua amba hafatranazi ndreki baraka nikuaniani hukwandikana. Wahadin’Ndragnahari reu mikasiki maishanau amarei ou. Basi, aiya meti ahazuanau wahadi reu ijioti ?

Misi hafatra boka an Ndragnahari nintsika, agnati ni soratra ni Vulagnanazi, yaani Soratra masinyi (2 Timuti 3:16). Ndragnahari mwa nampiasa mutrumi karaha akori anga hikwandika hafatranazi ? Izi nagnatitri fikiranazi an fikira ndri mutrumi reu, boka eu nikwandikandreu (2 Piera 1:21). Izi iu karaha raha hitatsika ijioti : Wakatini misi direktera mampikwandika sekretera hafatra, holu mbu hivulagna fu amba direktera ro tompini hafatra iu. Karaha zenyi kua, ata ka Ndragnahari nampikwandika mutrumi hafatranazi, izi ro Tompini Soratra masinyi.

HAFATRA BOKA AN NDRAGNAHARI METI HAZUN’HOLU MARU

Vo hafatra boka an Ndragnahari muhimu swafi, izi mila amba holu djabi midzoru ndreki kwelewa izi iu. Ijioti, « vaovao tsara daima » boka aminazi mora hazu an « kila umati, ndreki razagna, ndreki vulagna » (Fagnambarana 14:6). Vo Ndragnahari nagnamia baraka, Soratra masinyi djabi au nusuni, nikutafaswirina an vulagna mandilatra 3 000, yaani an vulagna maru mandilatra kiu hafa.