Raha mampizaha fitiavan’Ndragnahari an ndraha nikumbani

1) NDRAGNAHARI NIKUMBA ATSIKA, MAMPANUNGA ZUVA

Anau meti midzeri an maisha tsisi zava ni zuva an tani etu ? Zuva magnamia vudi ni kakazu nguvu anga misi ravinyi, fulera ndreki vuani. Ndreki zuva ro magnanu ata vudi ni kakazu magala ranu ndreki vahini, ampanungani an ravinyi boka eu ranu ritri an hàwa.

2) NDRAGNAHARI NIKUMBA ATSIKA, MANDATSAKA MAHALENI

Mahaleni, iu rehema. Izi iu mampiheti tani magnamia holumbelu haninyi. Ndragnahari magnamia atsika mahaleni ndreki wakati amba kakazu mamua, anga atsika huvintsinyi haninyi ndreki hamparavuravu rohutsika.

3) NDRAGNAHARI NIKUMBA ATSIKA, MAGNAMIA ATSIKA HANINYI NDREKI SIMBU

Maru baba miasa luha, mana ndreki-ndreki tsi mora andreu magnamia havagnandreu haninyi ndreki simbu. Zaha raha vulanyini Soratra masinyia : « Zaha tsara vorugnu : reu tsi mamboli, tsi mitoha wala tsi mamuri agnati ni riha ; ne, Ndragnahari, Babatsika an maingu, magnamia reu haninyi. Ke anareu mwa tsi misi varani mandilatra reu ? » (Mata 6:25, 26).

« Zaha raha ianaranareu an fulera agnati ala : reu mitumbu reu tompini wala tsi mandzetsi simbu. Fo, zahu magnambara anareu amba ata [ampadzaka] Sulaimana, an utukufunazi djabi, tsi nisikini karaha reu. Neka Ndragnahari mampisikini raha maniri agnati ala karaha zenyi [...], basi izi mwa tsi hampisikini anareu kua ? » (Mata 6:28-30).

Vo Ndragnahari mahaleu magnamia atsika haninyi ndreki simbu, leuni tsara mitahitahi atsika ahazu raha hafa hilatsika an maisha. Neka atsika miforinyi magnanu raha hilani, izi meti mfanu, magnamia atsika baraka an djitihadi atotsika an fikapana au mitahitahi atsika ahazu asa anga atsika ahaleu hivanga raha hilana (Mata 6:32, 33).

Wakatini atsika midzeri an zuva, mahaleni, vorugnu ndreki fulera, reu magnamia atsika haki ankitinyi hitia Ndragnahari. Raha nisuratana agnati ni shikandra magnaraka, mikwaledza modeli ivulagnan’Ndragnahari Ampikumba ndreki holumbelu.