Soratra ni Vulagnan’Ndragnahari mwa navadiki ?

Misi holu mila mehei neka Soratra ni Vulagnan’Ndragnahari (Soratra masinyi) tsi navadiki. Mutrumi Izaya nivulagna amba Vulagnan’Ndragnahari « mipetraka daima » (Izaya 40:8). Akori ahizana ankitinyi amba wahadin’Ndragnahari nitanina tsara ndreki tsi navadiki ?

Zamani taluha teu, midan’ndri kwandika ni soratra masinyi fa nato, harufu nisahin’ndri ampikwandika tsara be anga reu kwamini ankitinyi amba tsisi raha nisusohina, navadiki au hadignana. Vo holumbelu tsisi vatategna mahampi, nisi ampikwandika nagnanu kosa madinidiniki. Fo, Ndragnahari mahaleu mamalamala Vulagnanazi ndreki mamahagna holu mampihiditri vandi.

AKORI AHIZANA ANKITINYI AMBA SORATRA MASINYI, MISI HAFATRA NAMEN’NDRAGNAHARI TALUHA ?

Misi kwandika ni taluha arivu maru mikasiki Soratra masinyi. Neka misi kwandika misi tafauti, ata madiniki, holu tokutru mampieragna izi iu ndreki kwandika hafa anga ahei inu ro hafatra namen’Ndragnahari taluhaa.

Mfanu, tan mwaka 1947, tan lavaka an vatu be marini ndreki ranumasin’sira, nisi holu ni Arabu kahindreu « Bédouins » nahazu kwandika ni taluha, Soratra ni taluha ni ranumasin’sira. Kwandika reu, misi tapani Soratra masinyi, nikwandikana fa misi mwaka mandilatra aroyi arivu. Holu mehei tsara Biblu, nampieragna kwandika reu ndreki Soratra masinyi ni ijioti. Reu nahita inu ?

Reu nahita amba raha misi agnati ni Soratra masinyi ni ijioti miragna ankitinyi ndreki ri kwandika vualuhanib. Fianarana tsara ni kwandika ni taluha, mampizaha ankitinyi amba raha dzuruatsika agnati ni Soratra masinyi ro hafatra namen’Ndragnahari taluha. Ijioti, holu midzoru Soratra masinyi, meti kwamini amba Ndragnahari namalamala tsara izi iu anga tavela ankitinyi.

Basi atsika meti midzoru Soratra masinyi ndreki kwamini swafi amba izi iu ankitinyi. Ndreki fikira ti an luha, zahatsika raha meti ampianaran’ndri mutrumi atsika mikasiki Ndragnahari.