Ye miñyebe mise mia ye’ele benya mejôô?

1. Miñyebe mivé bôte ya Afrika ba tôñ?

BÔT abui ya Afrika ba yeme na ba yiane kañe Zambe. Ve be nji kañe nye avale da. Mewusa ma kañe Zambe avale dap. Bôte bevok ba toñe mimbunane betate ya melu kôa. Ba ke be ne bebuni Krist, ba sulane menda me Zambe map a kañe nye. Ve si ya Afrika, miñyebe mi nji bo ve milal mila. Ñyebe mewusa été, metiñ a miñye’elane mi aselan. Ñyebe betate wo tyendé ane meyoñe me né. Bebuni Krist be’e ke be ne mengame mengam. Nge ô vaa beta miñyebe milale mi, wo ye koone betoyini miñyebe mife Afrika été.

Mbôka’a ya ñyebe wongan wo yiane bo benya mejôô été

2. (a) Mame mevé me wô’ô bo na môt a tobe ñyebe éziñ? (b) Jé é nji liti na ñyebe wongan ô ne mvaé mise me Zambe?

² Amu jé bôte ba kañe Zambe mevale meva? Bôt abui ba nyiine ñyebe bebiaé bap. Mame me nga bobane melu mvus ma tindi fe bôte na be tobe ñyebe. Kalate ba loone na Africains : un héritage triple (angl.) a jô na: “Ñyebe mewusa ô nga yametane nord ya Sahara a zene ya mewosan. Ñyebe bekristen ô nga nyiine sud ya Sahara avale da. Nge woñe ya nkpwaté mekône ñwô ô nga bo na ñyebe mewusa ô yametan e nord ya Sahara, woñe ya ngal ñwô’ ke ô nga bo na ñyebe bekristen ô yametan e sud ya Sahara.” Môt ase a buni na ñyebe wé ô ne mvaé mise me Zambe. Ve jame da, ñyebe ô nji bo mvaé ve amu na bebiaé bangane be ne été, nge amu na meyoñe mefe mme me nga nyuñulu bimvame biangan été.

3-5. Éve’an évé ja liti na miñyebe mise mi nji ye’ele benya mejôô?

³ Miñyebe mise mi kusa fo’o jô na mi ave Zambe ékaña’a a nye’e, ve bia viane yene na miñye’elane miap mi aselan. Mame miñyebe mite mia ye’ele ajô Zambe a nkômbane wé me nji bo avale da. Tame fas: bi tame jô na beta nda ésaé éziñ a nyoñe wo bisaé. Môse wo taté ésaé, be kate wo na masa wôé a ne awo’on. Nde wo sili bebo b’ésaé belal jé wo yiane bo. Nyi ôsu nye na masa wôé a yi na ô sôbe si. Môte baa nye na wo yiane fiti meyañe mimfine ya nda. Nyi lale ke na wo yiane kabe bebo b’ésaé bekalate.

⁴ Môs ôvok, éyoñe te wo sili bebo b’ésaé avale môt avé masa wôé a né. Môt ôsu nye na, masa wôé a ne ndômane môt é too ayap a ayok. Nyi baa nye na a ne étune nnôme môt a too évôvoé. Môte lale ke na masa wôé a vo’o bo fam, a ne minga. Éyoñe womiene wo fase biyalane bi, nga wo yene na bebo b’ésaé bete bese be nji kate wo benya mejôô? Ajô te nge wo kômbô ba’ale ésaé jôé, womien wo yiane jeñe na ô yeme za a ne masa wôé a jé a yi na ô bô.

⁵ Nne fe ajô ya ñyebe é ne nalé. Amu miñyebe mi ave abui asimesan ajô ya za a ne Zambe a jé a yi na bi bo, bia yiane tu’a yemelane nge ékaña’a jangan é ne mvaé mise me Zambe. Aval avé bi ne ngule ya yeme Zambe nya ñyemane?