Ñye’elane 11

Mimbunan a metum Zambe avini

Avale mimbunan a metum mevé mene abé? (1)

Ye be kristen b’ayiane buni na Zambe ane wua bôt bela? (2)

Amu jé benya bekristen be ne te jem abialé Yésus, nge paska, nge abialé môt? (3, 4)

Ye bewu bene bo bevevee abé? (5)

Ye Yésus anga wu kôlôs? (6)

Amu jé bi ayiane ve Zambe nleme mvaé? (7)

1. Mimbunan mise a metum mese mi nji bo abé. Ve Zambe avini mi miaso évus nyebe, nge mi awosane minye’elane ya Kalate Zambe.—Matthieu 15:6.

2. Zambe wua bôt bela: Ye Yéhova ane Zambe wua—bôt bela? Momo. Yéhova, Esa, ane “nya Zambe étam.” (Jean 17:3; Marc 12:29) Yésus, ntôle mone Zambe, ane éjôé Zambe si. (1 Becorinthien 11:3) Yéhova Zambe Esa ane anen alôté mon. (Jean 14:28) Mbamba nsisim a nji bo môt, ve ane ngule Zambe a bo je mam.—Metata’a 1:2; Mam minlôman 2:18.

3. Abialé Yésus a Paska: Yésus a nji bialé ngone awôm a baa étoo melu 25. Anga yiane bialé ngone awômô étoo alu da; amu éyoñ éte nje beba’ale biyem be wo’o ba’ale bie nseñ alu. (Luc 2:8-12) Yésus anji jô bekristen na be jem abialé dé. Ve anga jô beye’é bé na be simesane awu dé. (Luc 22:19, 20) Abialé Yésus a metum y’été m’aso bivus minyebe ya melu mvus. Mam bi ate jô mfa’a abialé Yésus m’afombô fe Paska a metum mé aval ane mbelane metyi me kup a ôkpweñ mintagan. Bekristen ya melu mvus be nji jem abialé Yésus nge Paska, bekristen ya den b’atôñ bibô’a mebo biap.

4. Abialé môt: Kalate Zambe a kañete mebôk mebialé mebaé. Bôt bene te buni Yéhova mbe be nga bôndé me. (Metata’a 40:20-22; Marc 6:21, 22, 24-27) Bekristen ya melu mvus be nji jem abôk abialé môt. Fulu y’ajem abialé môt j’aso bivus minyebe ya melu mvus. Benya bekristen b’akap a vak éyoñ ése b’akômbô.

5. Nkoane bewu woñ: Bewu bese ngul ya bo mam nge wô’ôtane jôm éziñ. Bise ngul ya volô be a bewu bese ngul y’abo bia abé. (Besam 146:4; Ecclésiaste 9:5, 10) Nsisim wo wu, ônji beta nyiñ mvus awu. (Ezekiel 18:4) Ve mimbia minsisim, mi aveñesan a nyoñ menyôl bewu. Mefulu mese me tii a ékaña’a bewu nge nkoan bewu woñ mene bivus.—Esaïe 8:19.

6. Kôlôs: Yésus a nji wu kôlôs. A nga wu élé nge na mbôñ. Efia grek minkôñelan mi Kalate Zambe mivok b’akôñelan na “Kôlôs” j’atinane na éfus élé jia. Ndem kôlôs j’aso bivus minyebe ya melu mvus. Bekristen ya ôsusua be nji belan nge kañe kôlôs. Nde ye wo buni na éne mvo’é na bi belane kôlôs éyoñe bi akañe Zambe?—Deutéronome 7:26; 1 Becorinthien 10:14.

7. Ene bo njuk na môt a jô’é minye’elan a metum m’éziñe ya bi ndem yen. Bôt ya nda bôt jôé a bemvôé bôé b’éjô wo na ô bo te tyendé metume môé. Ve yeme na, mveane Zambe nleme mvaé w’adañe mveane bôt nleme mvaé.—Minkana 29:25; Matthieu 10:36, 37.

[Eve’ela ya afep 22]

Zambe anji bo môt wua bôt bela

[Eve’ela ya afep 23]

Abialé Yésus a Paska bi aso bivus minyebe ya melu mvus

[Eve’ela ya afep 23]

Bi nji yiane kañe bewu nge ko be woñ