Amu jé Bengaa be Yéhôva be ne te jeme Paska?

Bivuse bi mam bôte b’ajô

Mam bôte b’ajô: Mia bo ke abô’ô Paska amu mi se ke bekristen.

Nya ajô a ne na: Bia buni na Yésus a ne nyii wongan, ajô te bia ve ngule ése na bi “tôñe bibô’a mebo bié.”—1 Pierre 2:21; Luc 2:11.

Mam bôte b’ajô: Mi nji buni na Yésus a nga wômô soñ.

Nya ajô a ne na: Bia buni na Yésus a nga wômô soñ; bia yeme fe na ñye’elane te ô ne mbôka’a ya mbunan bekristen. Ajô te bia ngôné wô éyoñe bi ne nkañete.—1 Becorinthien 15:3, 4, 12-15.

Mam bôte b’ajô: Mia bisi ke nge bone benan ba sube avak ya abô’ô Paska.

Nya ajô a ne na: Bia nye’e bone bangan, ajô te bia volô be na be bi minye’elane mi ne mfi.—Tite 2:4.

Amu jé Bengaa be Yéhôva be ne te jeme Paska?

• Abô’ô Paska é nji bi mbôka’a e Kalate Zambe été.

• Yésus a nji jô na bi simesan ñwômane soñe wé. Ve a nga jô na bi simesan awu dé. Bia simesan awu te mbu ôse éyoñe jia. Calendrier bejuif ya melu mvus a volô na bi yeme môse a nga wu.—Luc 22:19, 20.

• Zambe a nji nye’e abô’ô Paska amu d’aso behéden ya melu mvus. Zambe a jô na a ne “Zambe ya aban” nde a wô’ abé na bi fulane ékaña’a jé a mam a nji nye’e.—Nkôlan 20:5; 1 Bejô bôt 18:21.

Mbunane wongane ajô ya Paska wo so Kalate Zambe été. Émien a jô na bi belane “fek a mfasane mam” a lôté na bi tôñe mefulu me bôt. (Minkana 3:21, Kalate Zambe mfefé nkôñelan; Matthieu 15:3) Bia kate môt a yi ôsimesane wongane ajô ya Paska. Bia yeme fe na môt ase a ne yene mam avale dé.—1 Pierre 3:15.