Ye bia yiane jeme mebôk?

ABUI mebô’ô ya miñyebe a ma mevok m’awum éyoñe ji abui mesi ya émo, me nji so Kalate Zambe été. Nde ñhe abui mebo’o te ése da so vé? Nge ô ne ngule ya ke nda bekalate, wo ye yene mvaé ya lañe jôme bekalate béziñe ya été ba jô mfa’a ya mebo’o bôte ba dañe jeme ngoto jôé. Bi tame nyoñe bone bive’an.

Paska. The Encyclopædia Britannica a jô na: “Teke jôm éziñ e Mfefé Élat été ja liti na Paska a mbe a jemeban.” Nde abô’ô Paska da so vé? Da so bivuse minkañan behéden. Ja’ane ba jo na ba jeme Paska amu ba simesane ñwôman Yésus, metum me tii a abô’ô te me nji bo ma Bekristen.

Mfefé mbu. Môs, a metume ya me tii a abô’ô ya Mfefé Mbu me nji bo avale da mesi mese. Mfa’a ya tine ya abô’ô te, The World Book Encyclopedia a jô na: “Mbu 46 Ô.É.J., Njô bôt, mone Romain Jules César, a nga tyi’i na alu 1 ya Ngon ôsu, é bo môs abô’ô ya Mfefé Mbu. Beromain be mbe be va’a zambe ba loene na Janus ékaña’a môse te, zambe ya mimbé a metata’a. Éyôlé ya ngon ôsu, Janvier ja so éyôlé Janus, nye a mbe a bili mesu mebaé​—da é fombô’ô ôsu, davok é fombô’ô mvus.” Ajô te, abô’ô ya Mfefé Mbu é tii a metume behéden.

Mebô’ô mefe. Bi se ngule ya mane lañe mebô’ô mese ma bobane si nyi. Ve jame da, Yéhôva a nji kañese mebô’ô mese ma ve bôt nge bijôé ya émo duma. (Jérémie 17:5-7; Mam Minlôman 10:25, 26) Ba’ale’e fe na Yéhôva a yen abô’ô mvaé mise mé veñgeveñge ve tine ya été é ne fe mvaé mise mé. (Ésaïe 52:11; Nlitan 18:4) Mfa’a ya yem ôsimesane Zambe wo fombô mebô’ô ya émo, Kabetôlô 16 ya kalate nyi a ye volô wo a zene ya mimbôka’a metiñe ya Kalate Zambe mi ne été.