Avale bi ne ve mbamba melep

1. Za a yiane ve melep? Timi’in.

YE WO nye’e wo ve bôte bevo’o melep? Bôte béziñe ba yene tyi’ibi ya bo de. Bevo’o ki ba ko woñe ya ve bôte bevo’o melep. Aval ése é ne, bia bese bi ne ntindane ya ve bôte melebe biyoñe biziñ. Amu jé? Amu Yésus a nga jô na bôte ba ye yeme benya bekristene éyoñe ba ye yene nye’an ô ne zañe jap. (Jean 13:35) Zene jia ya liti nye’an ôte, é ne éyoñe bia ve bobejañ a bekale bangane melep éyoñe nalé a sili. Kalate Zambe a jô na: “Mvaé ya mvôé môt” ja soo mbamba “mbôndane mefek.”—Mink. 27:9.

2. Bemvendé ba yiane bo ngule ya bo jé, a amu jé? (Fombô’ô fe nka’ale, “Melep asu ésulane ya zañe sondô.”)

² Bemvendé ba yiane bo ngule ya ve bôte melebe ma ve be ngule nyul. Amu Yéhôva ba Yésus be nga telé be ane beba’ale ya mbame mintômba ékôane bekristen. (1 P. 5:2, 3) Zene jia ya bo jam éte, é ne éyoñe ba ngôné melebe Kalate Zambe a ve a éyoñe ba bo minkañete ékôane bekristen été. Ba yiane fe bo ngule ya ve môt ase ya be bia melep, to’o ba be nga lume Yéhôva mvus, asu na be beta bulan ékôane bekristen. Aval avé bemvendé a bia bese bi ne kui na bi ve mbamba melep?

3. (a) Jé bi ne bo asu na bi bo mbamba bevee melep? (Ésaïe 9:6; fombô’ô fe nka’ale, “Jeñe’e na ô vu Yésus éyoñe wo ve melep.”) (b) Jé bia zu yen ayé’é di?

³ Bi ne yé’é avale bi ne bo mbamba bevee melep, éyoñe bia yé’é bive’ela bi ne Kalate Zambe, e dañedañe ji Yésus. Yésus a bili abui biyôlé mese’esa a jia ya été é ne na: “Mbôndé mefek.” (Lañe’e Ésaïe 9:6.) Ayé’é di, bia zu yene jame bi ne bo éyoñe môt a sili bia melep, a jame bi ne bo éyoñe bia yiane ve môte melebe to’o a nji zu sili bia me. Bia zu fe yen amu jé é ne mfi ya ve bôte melep éyoñe ja yian a aval é ne mvo’é ya bo de.

ÉYOÑE MÔT A SILI BIA MELEP

4-5. Éyoñe môt éziñ a sili bia melep, nsili ôvé bia yiane taté sili biabebien? Va’ak éve’an.

⁴ Jé bi wô’ô taté bo éyoñe môt éziñ a sili bia melep? Éko éziñe bi wô’ô bo ôjeja’a a jeñe na bi ve nye melep été été. Ve bia yiane taté sili biabebiene na, ‘Ye ma ma yiane ve nye melebe mete?’ Biyoñe biziñ, mbamba zene ya volô nye a ne bo na bi liti nye môt a ne ngule ya lebe nye mfa’a ôte.

⁵ Bi tame nyoñ éve’ane ji. Tame ve’ele simesane na mvôé jôé é bili ngul ôkon. A kate wo na a tatéya na a jeñe mezene me ne bo na a saéban, éyoñe te a sili wo na ô kate nye zene wo simesane na é ne bo mvo’é asu dé. Éko éziñ ô ne yeme mbamba zen a ne volô nye na a saéban, ve ô nji bo dokita nge na ô nji bi ñyemane wo ve wo ngule ya saé akon. Ajô te, mbamba zene ya volô mvôé jôé é ne na ô volô nye jeñe môt a ne ngule ya saé nye.

6. Amu jé é ne mfi na bi taté yange ôsusua na bia ve môte melep?

⁶ To’o bi ne kui na bi ve môte mbamba melep a lat a jam éziñ, é ne bo mvo’é ya taté yange mon éyoñ ôsusua na bia yalane môt a te bia zu sili melep. Amu jé? Kalate Minkana 15:28 a jô na ‘zôsôa môt a fas ane a ye yalan.’ Jé bi ne bo nge bia simesane na bia yem éyalan? Bi ne nyoñ abim éyoñ éziñ asu na bi bo minjeñan, bi ye’elan a bindi. Nalé a ye bo na bi tu’a tabe ndi na éyalane bia ye ve ja ye lu’an a avale Yéhôva a simesan a lat a jam éte. Bi tame yen éve’ela nkulu mejô Nathan.

7. Jé éve’ela nkulu mejô Nathan é ne ye’ele bia?

⁷ Njô bôte David a nga kate nkulu mejô Nathan na a kômbô lôñe Yéhôva Temple. Été été nkulu mejô Nathan a nga jô nye na a bo de. Ve nkulu mejô Nathan a nji taté nyoñ éyoñe ya jeñ ôsimesane Yéhôva. Amu jé? Amu Yéhôva a nji be a yiik na David nnye a lôñe nye Temple. (1 Mka. 17:1-4) Jam é nga kui nkulu mejô Nathan da ye’ele bia na, éyoñe môt a sili bia melep, bia ye liti na bi ne fek éyoñe bi ne “ôte’ete’e ya kobô.”—Jacq. 1:19.

8. Jam avé afe da liti bia amu jé bia yiane tabe ntyel éyoñe bia ve bôte melep?

⁸ Jam afe da liti bia amu jé bia yiane tabe ntyel éyoñe bia ve môt éziñe melep é ne na: Nge melebe bia te ve môt éziñe ma bo na a ke tôbane minjuk, yeme’e na bia fe bi be’e ayeme ya minju’u mite. Jam éte da liti fo’o bia amu jé bia yiane kôme fas ôsusua na bia ve melep.

ÉYOÑE MÔT A NJI ZU SILI BIA MELEP

9. Jé bemvendé ba yiane taté jeñe na be yem ôsusua na ba ve môt éziñe melep? (Begalate 6:1)

⁹ Biyoñe biziñ, é wô’ô sili na bemvendé be nyoñe ntyi’ane ya ke lebe mojañe nge sita a nyoñeya “mbia abo dulu.” (Lañe’e Begalate 6:1.) Môt éziñ a ne taté na a nyoñe mbia abo dulu, mvuse ya valé a ne bo mbia nsem. Ajô te, nsôñane bemvendé ô ne na be volô môt ate na a ke ôsu a wulu zene ya ényiñe ya nnôm éto. (Jacq. 5:19, 20) Melebe bemvendé ma ye bo mvo’é, nge ba taté jeñe na be yeme nge môt ate a te fo’o nyoñe mbia abo dulu. Yéhôva a nga ve môt ase ya be bia ngule ya nyoñe mintyi’an a tôñe’e mone môte ya nleme wé. (Rom. 14:1-4) Ve nge bemvendé ba yemelane na môt éziñ a nyoñeya fo’o mbia abo dulu, a na da sili na be ke nye ve melebe méziñ, aval avé be ne bo jam éte?

10-12. Jé bemvendé be ne bo nge da sili na be lebe môt a too ke na a nji sili be melep? Va’ak éve’an. (Fombô’ô fe befôtô.)

¹⁰ É nji ve’ele bo tyi’ibi asu bemvendé na be lebe môt a nji zu sili be melep. Amu jé? Amu nlômane Paul ô nga jô na môt éziñ a ne taté na a nyoñe mbia abo dulu teke jeñe na a bulane mvus. Bemvendé ba yiane taté bôé môt ate nleme si, nalé a ye bo tyi’ibi na a kañese melebe ba ye ve nye.

¹¹ E lebe môt a nji sili bia melep a ne bo aval ane mbé mefup a jeñe na bidi bi yaé si é ne ayet. Ôsusua na a bé, a yiane taté fa’a si, éyoñe te nje a bé. A su’ulane sôé mendim asu na jôm a te bé é faa. Avale te da da, asu na bemvendé be lebe môt a nji zu sili be melep, ba yiane taté bôé nye nleme si ôsusua na ba kobô nye. Ba yiane kôme jeñe mbamba éyoñe ya laan a mojañ ate, asu na be liti na ba nyoñe ngap a nye, a na ba wô’ô nye mintaé. Nge ba yeme môt a ve melep ane nyi a ne nye’an a mbamba nlem, da ye bo tyi’ibi na bôte bevo’o be kañese melebe mé.

¹² Nté ba laan, mvendé é ne ke ôsu a bôé nye nleme si, é jô’ô nye na môt ase ya be bia a ne bo bikop, a éyoñe nalé a kui, da sili na be ve nye melep. (Rom. 3:23) Évôvoé été a ésemé ése, mvendé ja ye liti nye a zene ya Kalate Zambe amu jé abo dulu dé é ne abé. Éyoñe mojañ a yemelaneya fo’o na a te bo ékop, mvendé éte ja ye “bé fes” éyoñe ja ye kôme timine nye jam a ne bo, asu na a sôan abo dulu dé a bela’ane bifia bi ne tyi’ibi. Memane ya minlañ, mvendé ja ye sôé “mendim” éyoñe ja ye kôme se’e mojañ ate, a ye’elane fe ba nye.—Jacq. 5:15.

13. Aval avé bemvendé be ne tabe ndi na môte ba te ve melep a te kôme wô’ô jame ba te nye jô?

¹³ Biyoñe biziñ, é wô’ô kui na môt a ve melep a jô jam afe, nté nyi ki a nyoñe melep a wô’ô jam afe. Jé bemvendé be ne bo asu na be kôme tabe ndi na môte ba te lep a te tu’a wô’ô jame ba te nye jô? Be ne de bo éyoñe ba sili nye mbamba minsili a ésemé ése a lat a mame ba te ngôné éyoñe ba te laan. (Eccl. 12:11) Biyalane bié bia ye volô bemvendé na be yeme nge a te fo’o kôme wô’ô melebe ba te nye ve.

E VE MELEP ÉYOÑE JA YIAN A AVAL É NE MVO’É YA BO DE

14. Amu jé é nji bo mvo’é na bi ve môte melep éyoñe bia wôk ôlun? Timi’in.

¹⁴ Mbôle bia bese bi be’e metyi ya abé, da kui bia na bi jô nge bo mame ma taé bôte bevo’o minlem. (Col. 3:13) Mejô me Zambe ma liti na é ne kui biyoñe biziñe na bi wô’ô môte mbok ôlun. (Éphé. 4:26) Ve bia yiane wosane fulu ya kômbô ve bôte bevo’o melep éyoñe bia wôk ôlun. Amu jé? Amu “ôlune môta binam a wôk ô ne te tôé zôsô Zambe.” (Jacq. 1:20) Nge bia ve môte melep éyoñe bia wôk ôlun, bia ye tu’a ndamane mam. Nalé a tinane ki na bi nji yiane kate môt a te bo na bi wôk ôlun ôsimesane wongan, a avale bia wô’ôtan. Ve bi ne yange mon éyoñ, éyoñ ôlune wongan ô maneya voé, na bi ke laan a nye. Bi tame yene mbamba éve’ela Élihu a nga liti éyoñ a nga ve Job melep.

15. Éve’ela Élihu ja ye’ele bia jé? (Fombô’ô fe fôtô.)

¹⁵ Élihu a nga lôt abui melu a wô’ô ane Job a kaman émien a lat a mejô mbia bemvôé bé be nga bôte nye. Élihu a nga wô’ô Job mintaé. Ve Élihu a nga wô’ô fe ôlun amu Job a mbe a kômbô’ô liti na a ne zôsô a dañe Yéhôva. Ve akusa bo nalé, Élihu a nga yange éyoñe jé asu na a kobô, a nga bo fe de évôvoé été a ésemé ése éyoñ é nga sili na a ve Job melep. (Job 32:2; 33:1-7) Éve’ela Élihu ja ve bia ñye’elane wu: Bia yiane ve melep éyoñe ja yian a aval é ne mvo’é ya bo de, ésemé été a nye’an été.—Eccl. 3:1, 7.

NKELAN ÔSU A VE MELEP A KAÑESE ME

16. Jé Besam 32:8 a ye’ele bia?

¹⁶ Éfuse ja wulu ayé’é di ja jô na: ‘Yéhôva a bôndé fek mise mé me lôô bia.’ (Lañe’e Besam 32:8.) Nalé a tinane na a ye ke ôsu a su’u bia. Yéhôva a nji su’u ve na a ve bia melep, a liti fe bia avale bi ne tôñe melebe mete. A liti fo’o bia mbamba éve’ela! Éyoñe bi bili mvome ya ve bôte bevo’o melep, bia yiane vu Yéhôva a ke ôsu a volô môte bia te ve melebe na a nyoñe mbamba mintyi’an.

17. Éyoñe bemvendé ba ve melebe ma so Kalate Zambe, ba liti na be ne ane jé? Timi’in. (Ésaïe 32:1, 2)

¹⁷ Melu ma mme ñhe ma dañe sili na bi ve nge bi mbamba melep. (2 Tim. 3:1) Bemvendé ba ve melebe ma so Kalate Zambe be ne “ane atôñe mendim vôm a ne nkôt.” (Lañe’e Ésaïe 32:1, 2.) Bemvôé ba yeme jame bia kômbô wôk, ve ba kate bia jame bia yiane wôk, be ne ane das é ne édima aval ane “bibuma bi or avot argent été.” (Mink. 25:11) Ngo’o nge bia bese bia ke ôsu a yé’é avale bi ne nyoñ a ve mbamba melep.