Septemba

Peeta neva seh di egzak werdz weh Joawel mi seh eena ih prafesi. (Aks 2:16, 17) Insteda staat aaf di seh “afta dat,” laik weh Joawel mi seh, Peeta mi seh: “Eena di laas dayz”—eena dis kays, di laas dayz a di Jooish sistem a tingz—Gaad mi wahn poar owt ih spirit “pahn aal flesh.” Dis tel wi dat wahn lang taim mi wahn paas bifoa Joawel prafesi mi wahn kohn chroo. Afta Gaad mi poar owt ih spirit pahn di Kristyanz bak den eena di fers senchri, dehn mi staat op di preechin werk. Da preechin werk mi wahn spred aal oava di werl az taim paas. Bai di taim di apasl Paal mi rait ih leta tu di kangrigayshan da Koloaseh, rong 61 C.E., hihn kuda mi seh dat di gud nyooz mi-di geh preech “tu evribadi eena di werl.” (Kol. 1:23) Wen Paal seh “evribadi eena di werl,” hihn mi-di taak bowt di paat a di werl weh peepl kuda mi chravl eena dehn dayz. Wid di help a Jehoava powaful hoali spirit, di preechin werk groa wahn lat moa eena fi wee dayz, an ih reech “tu peepl aal oava di werl” fi chroo!​—Aks 13:47. w20.04 6-7 ¶15-16

Jehoava lov eech wan a wi, inkloodin eni sheep weh schray weh fan ahn. (Mach. 18:12-14) Gaad mi pramis dat hihn wuda saach fi eni a fi hihn sheep weh mi geh laas ahn help dehn fi get bak wahn gud rilayshanship wid Ahn. Ahn Jehoava mi seh egzakli weh hihn wuda du. Weh hihn wuda du simila tu weh wahn Izrelait shepad wuda du fi sayv ih sheep. (Ezek. 34:12-16) Fers, di shepad wuda saach fi ih sheep, ahn dat kuda tek wahn lata taim ahn haad werk fi du. Den, wans ih fain di sheep weh laas, ih wuda bring it bak tu di flak. If di sheep mi geh hert, ih wuda ban ahn op. If di sheep mi-di staav, ih wuda feed ahn. Ih wuda sopoat di week animal an eevn bak ahn if ih haftu. Eldaz, hoo da di shepadz a Gaad flak, need fi chreet di sheep weh schray weh di saym way. (1 Peet. 5:2, 3) Di eldaz saach fi dehn, help dehn fi kohn bak tu di kangrigayshan, ahn shoa dehn lov az dehn gi dehn di spirichwal sopoat weh dehn need. w20.06 20 ¶10

Yu tink Jeezas mi tink dat di feel mi raip ahn redi fi reep jos bikaaz hihn mi ekspek dat moas peepl mi wahn fala ahn? No. Di Skripchaz mi prafesai dat da onli wahn lee bit a peepl wahn put fayt eena ahn. (Jan 12:37, 38) Ahn Jeezas kuda mi reed peepl haat. (Mach. 9:4) Bot hihn mi foakos pahn di lee bit a peepl weh mi bileev eena ahn, an ih mi mek shoar hihn mi preech tu evribadi. Soh wee shuda du di saym. Wi kyaahn reed peepl haat, soh wi noh fi joj wi teritori er di peepl eena di teritori! Insteda dat, vyoo peepl az fyoocha disaiplz. Memba weh Jeezas seh tu ih disaipl dehn. Di feel raip ahn redi fi reep. Peepl ku chaynj ahn dehn ku bee Krais disaiplz. Jehoava vyoo peepl eena wi teritori az peepl weh ku bee Krais disaiplz an az “preshos tingz.” (Hag. 2:7) If wi tink bowt peepl di way how Jehoava ahn Jeezas tink bowt dehn, wi wahn laan bowt dehn bakgrong ahn weh dehn inchrestid eena. Wi wahn vyoo dehn az peepl hoo ku bee wi bradaz ahn sistaz. w20.04 13 ¶18-19

Gaad Werd teech wi dat wi haftu ga lov fi Jeezas fi mek wi ku pleez Jehoava. Wan ting weh wi ku du fi bee Jeezas fren da fi geh fi noa hihn. Wi ku du dis wen wi reed di Baibl buk a Machyu, Maak, Look, ahn Jan. Wen wi meditayt pahn weh di Baibl seh bowt Jeezas laif, wi geh fi lov ahn rispek Jeezas bikaaz a di kain way how ih mi deel wid peepl. Fi egzampl, eevn doa Jeezas da-mi ih disaipl dehn Maasta, hihn neva chreet dehn laik slayv. Insted, hihn mi tel dehn egzakli weh hihn mi-di tink ahn how hihn mi-di feel. Wen dehn mi feel sad, Jeezas mi feel sad wid dehn tu. (Jan 11:32-36) Eevn Jeezas enimi dehn kuda mi si dat hoosoeva aksep Jeezas mesij mi geh fi bee fi hihn fren tu. (Mach. 11:19) Wen wi fala Jeezas eena di way how hihn mi deel wid ih disaiplz, wi rilayshanship wid adaz wahn geh beta, wi wahn feel moa hapi, ahn wi wahn lov ahn rispek Jeezas eevn moa. w20.04 22 ¶9-10

Bai 1870, Britain da-mi di moas powaful konchri eena di werl, an ih mi ga di schrangis aami. Danyel prafesi taak bowt wahn smaal haan weh kanka chree ada haan. Da smaal haan stan fi Britain, ahn di ada chree haan stan fi France, Spain, ahn di Netherlands. (Dan. 7:7, 8) Ahn Britain da-mi di king a di sowt op tu nayli di en a di fers werl waar. Rong da saym taim, di United States of America mi groa fi bee di richis konchri eena di werl an ih mi staat tu werk tugeda wid Britain. Joorin Werl Waar I, di United States ahn Britain mi jain op ahn dat da how dehn mi staat werk tugeda fi bee di moas powaful nayshan eena di werl. Jos laik weh Danyel mi prafesai, dis king mi gyada wahn ‘big ahn powaful aami.ʼ Joorin di laas dayz, Britain ahn di United States tugeda da di king a di sowt. w20.05 4 ¶7-8

Di ert deh di perfek distans fahn di son. If di ert mi deh wahn lee bit kloasa tu di son, aal di waata mi wahn ivaporayt ahn di ert mi wahn bee reeli hat ahn notn kuda liv pan it. If di ert mi deh wahn lee bit ferda fahn di son, aal di waata pahn di ert mi wahn freez ahn di ert mi wahn kova wid snoa an ais. Bikaaz Jehoava mi put di ert pahn di perfek spat, di ert waata saikl ku mek laif kantinyu. Di son waam op waata weh deh eena di see ahn weh deh pahn lan an ih ivaporayt di waata fi mek ih ton intu klowd. Di amonk a waata weh di son ivaporayt eena wan yaa da moa dan di amonk a waata eena aal di lagoon dehn pahn di ert. Afta di waata ivaporayt, ih stay eena di ayaa fi bowt ten dayz bifoa ih kohn bak dong az rayn er snoa. Den di waata goh bak tu di see ahn di saikl staat aal oava agen. Jehoava dizain dis saikl soh dat di ert ku aalwayz ga waata. Dis proov dat Jehoava powaful ahn waiz.—Job 36:27, 28. w20.05 22 ¶6

Jeezas inkorij wi fi kip aan di pray fi hoali spirit. (Look 11:9, 13) Jehoava yooz ih hoali spirit fi gi wi di “reel grayt powa.” (2 Kor. 4:7) Wid di help a Gaad hoali spirit, wi ku bayr op anda eni chraiyal weh wi fays. Hoali spirit ku aalso help wi handl wi asainment eena Gaad servis an ih ku mek wi ga eevn beta skilz. Wi noa dat di gud rizolts weh wi ga eena Gaad servis onli pasabl bikaaz ih hoali spirit help wi. Wi ku shoa dat Gaad hoali spirit preshos tu wi wen wi aks Jehoava fi mek ih help wi fain owt if wi ga rang tinkin er rang dizaiyaz eena wi haat. (Ps. 139:23, 24) If wi pray fi dis, Jehoava ku yooz ih hoali spirit fi help wi noa if wi ga eni rang dizaiyaz. Den wi haftu pray fi Gaad hoali spirit fi mek ih gi wi ih schrent fi noh giv een tu dehndeh tinkin ahn dizaiyaz. If wi du dis, Jehoava wahn si dat wi noh waahn du eniting weh ku mek hihn stap help wi wid ih hoali spirit.—Ifee. 4:30. w20.05 28-29 ¶10-12

Wen wi difen Jehoava naym, wi di fala Jeezas Krais egzampl. Wen Jeezas mi seh dat hihn mek peepl noa hoo da Jehoava, da neva jos bikaaz hihn mi yooz Jehoava naym, bot hihn mi aalso difen Jehoava repyutayshan. Fi egzampl, di Farisee dehn mi teech peepl dat Jehoava kruwil, dat ih tu schrik, ahn dat hihn noh kay bowt er ga mersi pahn nobadi. Pahn di ada han, Jeezas mi teech peepl dat Jehoava reeznabl, payshent, lovin, ahn fergivin. Hihn mi aalso help peepl si how Jehoava stan bikaaz hihn mi kapi fi hihn Pa eena evriting weh ih du. (Jan 14:9) Jos laik Jeezas, wi ku tel peepl weh wi noa bowt Jehoava soh dat dehn ku noa ahn rispek fi Hihn hoali naym. Wi ku aalso teech dehn bowt fi hihn lovin ahn kain wayz. Wen wi du dat, wi ekspoaz aala di lai dehn weh peepl seh bowt Jehoava. Wen wi chrai wi bes fi bee laik Jehoava eena weh wi seh ahn du, wi ku shoa peepl how Jehoava stan. Wi klayr Jehoava naym wen wi help peepl fi bee free fahn aala di lai dehn weh dehn mait bileev. w20.06 6 ¶17-18

Yu ku yooz soashal meedya eena wahn gud way. Fi egzampl, fi kamyoonikayt wid yu famili ahn frenz. Bot yu noatis dat som peepl poas pichaz, koments, ahn veedyo fi kaal atenshan tu dehnself? Ih luk laik dehn waahn aal di atenshan fi dehnself. Som peepl eevn poas sohn rood koments pahn dehn oan pichaz er pahn ada peepl pichaz. Kristyanz sopoas tu bee hombl ahn shoa kansaan fi wan anada, soh dehn shuda neva yooz soashal meedya laik dat. (1 Peet. 3:8) If yu yooz soashal meedya, aks yuself dehnya kweschan: ‘Di picha dehn, veedyo dehn, ahn koment dehn weh Ai poas mek adaz tink dat Ai bregin? Ai di mek ada peepl feel jelos?ʼ Kristyanz noh feel laik dehn haftu promoat dehnself. Dehn fala di kongsl weh deh eena di Baibl weh da di skripcha teks fi tudeh. If wi hombl, wi noh wahn bee laik di peepl eena di werl weh prowd ahn weh waahn mek peepl tink dat dehn impoatant.​—1 Jan 2:16. w20.07 6 ¶14-15

Bifoa Paal mi ton wahn Kristyan, hihn mi kruwil tu Gaad peepl. (Aks 7:58) Jeezas ihself mi stap Saal, hoo wi noa tudeh az Paal, fahn persikyoot di Kristyan kangrigayshan. Jeezas mi taak tu Paal fahn hevn an ih mi mek ih geh blain. Fi geh bak ih sait, Paal mi haftu geh help fahn di saym peepl weh hihn mi-di persikyoot. Hihn mi hombl ihself ahn mek Ananaiyas help ahn fi si agen. (Aks 9:3-9, 17, 18) Afta dat, Paal mi geh fi bee wahn impoatant persn eena di Kristyan kangrigayshan, bot hihn neva ferget di lesn weh Jeezas mi teech ahn wen ih mi deh pahn di road tu Damaskos. Paal mi kantinyu fi bee hombl an ih mi wilin fi aksep help fan ih bradaz ahn sistaz. Hihn mi noa dat dehn da-mi “wahn big help” far ahn.​—Kol. 4:10, 11. w20.07 18-19 ¶16-17

Eevn doa Jehoava da di Almaiti, hihn aalso gi adaz sohn rispansabiliti. Fi egzampl, hihn mi apoint Jeezas fi bee King a di Kingdom, an Ih wahn giv atariti tu di 144,000 hyoomanz weh wahn rool lang wid Jeezas. Af koars, Jehoava da di Wan weh mi chrayn Jeezas fi bee King ahn Hai Prees. (Heeb. 5:8, 9) Hihn aalso chrayn di peepl weh wahn rool lang wid Jeezas fi mek dehn ku du di werk weh hihn gi dehn fi du. Bot hihn noh chrai kanchroal how dehn du di werk. Insteda dat, hihn chros dehn fi du weh hihn waahn dehn du. (Rev. 5:10) Wi hevnli Faada noh need help fahn nobadi, bot hihn stil gi rispansabiliti tu adaz. How bowt wee? Wee haftu du di saym ting! Fi egzampl, yoo da di hed a yu famili er wahn elda eena di kangrigayshan? Fala Jehoava egzampl ahn gi rispansabiliti tu adaz, ahn noh chrai kanchroal how dehn du di werk. Wen yu fala Jehoava egzampl, yu noh onli wahn finish di werk bot yu wahn aalso chrayn adaz ahn help dehn fi bee moa shoar a dehnself.​—Isa. 41:10. w20.08 9 ¶5-6

How Jehoava waahn wi feel bowt fi hihn sheep weh laas? Jeezas set di egzampl fi wi. Jeezas noa dat aala Gaad sheep preshos tu ahn, soh hihn mi du evriting weh ih kud fi help di “peepl da Izrel weh da laik sheep weh laas” fi kohn bak tu Jehoava. (Mach. 15:24) Jeezas da wahn gud shepad, soh hihn mi chrai ih bes fi mek shoar dat ih noh looz non a Jehoava sheep. (Jan 6:39) Di apasl Paal mi inkorij di elda dehn eena di kangrigayshan da Efisos fi fala Jeezas egzampl. “Unu fi tek kayr a dehn wan weh week, bikaa memba seh dat da di Laad Jeezas ihself mi seh, ‘Gaad bles yu moa wen yu gi dahn wen yu get.ʼ” (Aks 20:17, 35) Dis skripcha shoa wi dat di elda dehn ga di rispansabiliti fi tek kayr a Jehoava sheep. Salvador, wahn elda fahn Spain, seh: “Wen Ah tink bowt humoch Jehoava kay bowt ih sheep, dat mek Ah waahn du evriting weh Ah kud fi help dehn. Ai noa dat Jehoava waahn mek Ah tek kayr a dehn.” w20.06 23 ¶15-16

Jehoava wahn bee payshent ahn wayt til di en a Krais Towzn-Yaa Rool bifoa ih ekspek wi fi bee perfek. Til den, Jehoava wilin fi fergiv wi sin dehn. Soh wi ga reezn fi bee payshent wid adaz ahn fi luk fi di gud eena dehn. Wen Jehoava mi mek di ert, Jeezas ahn di aynjelz mi reeli hapi. Bot imajin how hapi dehn wahn bee wen dehn si peepl weh lov Jehoava di ful op di ert. Imajin how hapi anointid Kristyanz weh gwehn da hevn wahn feel wen dehn si peepl pahn di ert di benifit fahn dehn werk. (Rev. 4:4, 9-11; 5:9, 10) An imajin fi liv eena di taim wen peepl wahn krai bikaaz dehn hapi insteda krai bikaaz a payn. Dehn noh wahn sofa, feel payn, ner ded nohmoh, bikaaz aala dat wahn gaahn fareva. Til da taim kohn, mek wi mek op wi main fi fala di egzampl a wi lovin, waiz, ahn payshent Faada. If yu du dat, yu wahn kantinyu fi bee hapi eevn wen yu di goh chroo chraiyalz. (Jay. 1:2-4) Wi soh tankful dat Jehoava pramis dat wan day ih “wahn rayz op bak” peepl fahn di ded!​—Aks 24:15. w20.08 19 ¶18-19

Di Baibl da wahn lovin gif fahn Gaad. Wi hevnli Faada mi gi sohn faytful man ih hoali spirit soh dat dehn kuda mi rait di Baibl bikaaz hihn kay wahn lat bowt fi hihn pikni weh deh pahn di ert. Chroo di Baibl, Jehoava ansa di moas impoatant kweschanz weh wee ku aks, laik: Weh wi kohn fram? Wat da di perpos a laif? Ahn weh wahn hapm eena di fyoocha? Jehoava waahn aala fi hihn chiljren laan di ansaz tu dehndeh kweschanz, soh hihn mek man chranslayt di Baibl intu wahn lata langwij. Tudeh day, di hoal Baibl er paat a it avaylabl eena moa dan 3,000 langwij! Peepl chranslayt ahn mek di Baibl avaylabl moa dan eni ada buk. Wee ku shoa dat wi apreeshiayt di Baibl wen wi reed it evri day, wen wi meditayt pahn weh ih teech, ahn wen wi du wi bes fi yooz weh wi laan. Pahn tap dat, wi shoa Gaad humoch wi apreeshiayt di Baibl wen wi du aal weh wi kud fi tel az moch peepl az pasabl bowt weh di Baibl seh.​—Ps. 1:1-3; Mach. 28:19, 20. w20.05 24-25 ¶15-16

Di prafit Jerimaiya mi haftu preech eena wahn teritori wehpaat di peepl neva waahn lisn tu ahn. Wahn taim, hihn mi geh soh diskorij dat ih mi waahn stap preech anaal. Bot ih neva du dat. Wai? Bikaaz “di werd a Jehoava” da-mi laik wahn faiya weh mi-di bon deep eensaida Jerimaiya, an ih kudn hoal it een! (Jer. 20:9) Ahn wi ku bee jos laik Jerimaiya if wi reed di Baibl evri day ahn meditayt pahn weh wi reed. If wi du dat, wi wahn bee hapiya ahn moa peepl mait lisn tu wi eena di minischri. (Jer. 15:16) Soh weneva sohnting di kaaz yu fi feel diskorij, bayg Jehoava fi help. Hihn wahn help yu fi feel beta if yu ga negitiv feelinz bowt yuself, an ih wahn help yu if yu feel gilti bowt di mistayk dehn weh yu mek. Hihn wahn dehdeh fi yu wen yu di sofa wid wahn terabl siknis. Hihn wahn help yu ga di rait atichood tuwaadz di asainment dehn eena yu servis tu Jehoava. An ih wahn help yu fi bee hapi eena yu minischri. Soh pray tu yu lovin Faada ahn tel ahn egzakli how yu feel. Ahn wid fi hihn help, yu wahn ku win di fait gens diskorijment! w20.12 27 ¶20-21

Fi som a wi sistaz, di meetin dehn mait bee di onli chaans weh dehn get fi deh wid di kangrigayshan. Soh wen dehn kohn da di meetin, wi need fi mek shoar dat wi welkom dehn, taak tu dehn, ahn shoa dehn humoch wi kay bowt dehn. Jos laik Jeezas, wi ku chrai spen moa taim wid wi sista dehn. (Look 10:38-42) Maybi wi ku invait dehn oava fi shayr wahn meel er fi play sohn gaym. Ahn wen dehn kom oava, wi waahn mek shoar dat weh wi seh wahn inkorij dehn. (Roam. 1:11, 12) Eldaz need fi ga di saym atichood laik weh Jeezas mi gat. Jeezas mi noa dat ih wuda bee wahn chalenj fi mek som peepl stay singl. Bot ih mi seh playn ahn schrayt dat chroo hapinis noh ga notn fi du wid weda er nat wahn persn marid er ga chiljren. (Look 11:27, 28) Insted, chroo hapinis pen pahn weda er nat Jehoava servis da di moas impoatant ting eena wi laif. (Mach. 19:12) Eldaz need fi set di egzampl ahn chreet Kristyan sistaz laik dehn spirichwal sista er spirichwal ma. Wen eldaz mek taim fi taak tu sistaz bifoa er afta di meetin dehn, ih mek it eeziya fi mek dehn ku help sistaz wen dehn di goh chroo haad taimz. w20.09 21-22 ¶7-9

Eena Izrel, di faama dehn yoostu plaant seed afta di fers rayn tuwaadz di en a di yaa, ahn dehn mi reep di grayn afta di laas rayn rong Maach an Aypril. (Maak 4:28) Wi wuda bee waiz fi kapi di payshens weh di faama shoa. Bot sohntaim, dis mait noh bee eezi. Moas a di taim, wee az hyoomanz waahn si di rizolts a wi werk rait away. Bot if wi waahn wi plaants dehn groa ahn projoos, wi need fi tek kayr a dehn aal di taim. Wi need fi waata dehn ahn root owt di weedz. Jos laik dat, if wi waahn mek disaiplz, wi need fi werk haad. Ih tek taim fi mek wi help wi Baibl styoodents root owt prejudis fahn dehn haat ahn shoa lov. If wi ga payshens, wi noh wahn geh diskorij wen peepl noh lisn tu wi. Ahn wen peepl wilin fi lisn tu wi ahn waahn laan moa bowt Jehoava, wi stil need fi shoa payshens. Wi kyaahn foas wahn Baibl styoodent fi ga fayt. Sohntaim, eevn Jeezas disaipl dehn mi tek wahn wail fi andastan weh hihn mi-di teech dehn. (Jan 14:9) Soh mek wi memba dat eevn doa wee mait plaant di seed dehn ahn waata dehn, da Gaad wahn mek dehn groa.​—1 Kor. 3:6. w20.09 11 ¶10-11

Aala wi waahn wi Baibl styoodent dehn fi mek proagres ahn kwalifai fi geh baptaiz. Wan way wi ku help dehn da fi inkorij dehn fi kohn da wi kangrigayshan meetin dehn. Wen di styoodent dehn goh da meetin rait away dehn mek proagres faas. Sohn bradaz ahn sistaz tel dehn Baibl styoodent dehn dat if dehn reeli waahn laan weh di Baibl teech, dehn haftu stodi di Baibl ahn goh da meetin. Reed Heebrooz 10:24, 25 wid yu styoodent an eksplayn tu ahn how ih wahn benifit if ih goh da meetin. Tel ahn bowt sohnting weh yoo laan da di meetin ahn how hapi ih mek yu feel. Wen ih si how yoo feel bowt di meetin, ih mait waahn kohn tu. Weh yu styoodent si ahn hyaa da ih fers Kristyan meetin wahn bee beta dan eniting weh ih eva si er hyaa da eni ada rilijos meetin. (1 Kor. 14:24, 25) Ih wahn meet adaz weh set wahn gud egzampl weh ih ku fala ahn weh wahn help ahn fi kwalifai fi geh baptaiz. w20.10 10-11 ¶14-15

Gaad hoali spirit wahn help yu fi put intu praktis evriting weh yu reed ahn stodi eena fi hihn Werd. Pray jos laik di saamis hoo mi seh: “Oa Jehoava, teech mi bowt yu way. Ah wahn liv akaadn tu yu chroot. Help mi fi rispek yu naym wid aala mi haat.” (Ps. 86:11) Soh kantinyu fi reed ahn stodi di Baibl an ada poblikayshanz weh Jehoava aaganaizayshan provaid. Af koars, yu goal da noh jos fi geh hed nalij. Bot yu waahn kanvins yuself dat dis da di chroot; yu waahn mek di chroot reech yu haat soh dat yu ku yooz it eena yu laif. Jehoava hoali spirit ku help yu du dat. Aalso, yu need fi inkorij yu bradaz ahn sistaz. (Heeb. 10:24, 25) Wai? Bikaaz dehn da yu spirichwal famili. Soh pray fi mek Gaad hoali spirit help yu fi gi sinsyaa koments da di Kristyan meetin dehn ahn fi du yu bes weneva yu geh wahn asainment. Wen yu du dehnya tingz, yu di shoa Jehoava an ih Son dat yu lov fi dehn preshos “sheep.” (Jan 21:15-17) Soh lisn tu yu Gran Inschrokta ahn tek advantij a aala di spirichwal food weh ih provaid. w20.10 24-25 ¶15-17

Joorin da taim, Jeezas apasl dehn mi reeli diskorij. Soh da how Jeezas mi chreet dehn? Lee wail afta Jeezas geh rayz op bak fahn di ded, ih tel som a ih falowaz: “Noh frayd. Goh ahn ripoat tu mi breda dehn [dat Ah geh rayz op bak fahn di ded].” (Mach. 28:10a) Jeezas neva giv op pan ih apasl dehn. Eevn doa dehn mi abandan hihn, ih stil kaal dehn “mi breda dehn.” Jos laik how Jehoava shoa mersi ahn fergivnis, Jeezas mi shoa dehndeh saym kwalitiz. (2 Ki. 13:23) Sayhn way soh, wi reeli kay bowt wi bradaz ahn sistaz weh stap preech. Dehn da stil wi bradaz ahn sistaz, ahn wi lov dehn wahn lat! Wi noh ferget how haad dehn mi werk fi Jehoava, ahn som a dehn mi werk haad fi lata yaaz. (Heeb. 6:10) Wi reeli mis dehn! (Look 15:4-7) Soh, wi waahn inkorij wi bradaz ahn sistaz fi staat tu goh da di meetin dehn if dehn noh di goh agen. Wen wi si dat wahn brada er sista weh noh kohn da meetin lang taim shoa op da di Kingdom Haal, wi shuda goh op tu ahn an giv ahn wahn waam welkom. w20.11 6 ¶14-17

Jaymz, Jan, ahn dehn ma, mi aks Jeezas fi du sohnting weh hihn neva ga di rait fi du. Rait away, Jeezas tel dehn dat onli Jehoava ga di rait fi disaid hoo wahn sidong da Jeezas rait han said ahn lef han said da hevn. (Mach. 20:20-23) Jeezas mi shoa dat ih noa ih plays. Hihn mi hombl. Ih neva du notn weh Jehoava neva giv ahn di atariti fi du. (Jan 12:49) How wee ku fala Jeezas perfek egzampl? Wi kapi Jeezas egzampl wen wi fala di kongsl eena di skripcha teks fi tudeh. Soh wen adaz aks wi fi advais, wi shuda neva chrai foas wi oan aidyaaz pahn dehn er taak widowt tink fers bowt di mata. Rada, wi shuda bays wi ansa dehn fahn di Baibl ahn wi poblikayshan dehn. Wen wi du dis, wi shoa dat wi andastan dat wi noh noa evriting. Dis aalso shoa dat wi hombl ahn wi shoa dat wi noa dat Jehoava advais aalwayz beta dan fi wee wan.—Rev. 15:3, 4. w20.08 11-12 ¶14-15

If yu eva feel laik yu need fi gi yu fren kongsl, wat da sohn tingz yu need fi memba? Bifoa yu goh taak tu yu fren, yu need fi aks yuself, ‘Ai di goh aan laik if Ai “moa raichos dan evribadi els”?ʼ Wahn persn weh tink dat ih moa raichos dan evribadi els yooz ih oan standadz fi joj peepl; ih noh yooz Jehoava standadz. Ahn peepl laik dat mait eevn mek ada peepl feel wers bowt dehnself. Soh afta yu tek wahn aanis luk pahn yuself ahn yu si dat yu stil need fi kongsl yu fren, den tel ahn wat da di prablem ahn yooz difrent kweschan fi help ahn andastan dat ih du sohnting rang. Mek shoar dat di kongsl kohn fahn Gaad Werd. Ahn memba dat yu jab da noh fi joj yu fren bot da fi help ahn andastan how Jehoava feel bowt weh ih di du. (Roam. 14:10) Soh pen pahn di wizdom weh yu fain eena di Baibl, ahn wen yu di kongsl sombadi, aalwayz ga kompashan jos laik Jeezas. (Prov. 3:5; Mach. 12:20) Wai? Bikaaz Jehoava wahn chreet wee di saym way wi chreet ada peepl.​—Jay. 2:13. w20.11 21 ¶13

Yoo wuda laik if sombadi joj yu jos bikaaz a di kala a yu skin, di shayp a yu fays, er bikaaz a di saiz a yu badi? Moa dan laikli yu ansa da no. Ih reeli komfertin fi noa dat Jehoava noh joj wi bai di tingz weh adaz ku si. Fi egzampl, wen Samwel mi luk pahn Jesi son dehn, hihn neva si weh Jehoava mi si. Jehoava mi tel Samwel dat wan a Jesi son mi wahn bee king a Izrel. Bot wich wan ih mi wahn bee? Wen Samwel mi si Jesi oaldis son weh naym Elaiyab, hihn mi seh “Dis wan da mos di wan weh Jehoava waahn Ah anoint.” Elaiyab mi luk soh gud dat Samwel mi tink Jehoava mi wahn pik hihn fi bee king. “Bot Jehoava seh tu Samwel: ‘Noh pay atenshan tu how ih luk ahn how taal ih taal, hihn da noh di wan weh Ah pik.ʼ” Wat da di lesn? Jehoava gaahn aan ahn seh: “Man si weh deh rait fronta dehn aiy, bot Jehoava si weh deh eena di haat.” (1 Sam. 16:1, 6, 7) Wi waahn bee moa laik Jehoava eena di way how wi chreet wi bradaz ahn sistaz. w20.04 14 ¶1; 15 ¶3

Wen Jeezas mi-di chravl chroo di feel dehn, moa dan laikli di krap dehn mi jos staat tu groa. (Jan 4:3-6) Onli foa moa monts an ih wuda mi bee taim fi haavis di krap. Soh ih mosi mi song schraynj wen Jeezas seh: “Luk rong ahn si how di feel dehn raip ahn redi fi reep.” (Jan 4:35, 36) Weh hihn mi meen? Moa dan laikli, Jeezas mi-di taak bowt wahn simbolik haavis a peepl. Kansida weh mi jos hapm. Eevn doa Jooish peepl mi naamali avoid peepl fahn Samayrya, Jeezas mi stil preech tu wahn uman fahn deh—ahn shee mi lisn tu ahn! Shee mi tel di Samaritan peepl bowt Jeezas, ahn wail hihn mi-di taak bowt how di feel dehn mi “raip ahn redi fi reep,” wahn krowd a Samaritan peepl mi deh pahn dehn way fi laan moa fan ahn. (Jan 4:9, 39-42) Wahn ekspert mi rait bowt dis akonk: “Di fak dat di peepl mi hori fi kohn meet Jeezas ahn lisn tu ahn . . . mi shoa dat dehn da-mi laik grayn weh mi redi fi haavis.” w20.04 8 ¶1-2

Wi meetin dehn help wi fi du beta eena di preechin ahn teechin werk. Fi egzampl, wi laan fi mek gud yoos a di toolz eena wi Teechin Toolbaks. Soh pripyaa gud fi di kangrigayshan meetin dehn. Joorin di meetin, lisn gud. Afta di meetin, yooz di chraynin weh yu get. Wen yu du aala dehndeh tingz, yu wahn bee “wahn chroo soalja a Krais Jeezas.” (2 Tim. 2:3) Wi aalso ga di sopoat a milyanz ahn milyanz a powaful aynjelz. Tink bowt weh jos wan aynjel ku du! (Isa. 37:36) Now tink bowt weh wahn aami a aynjelz kuda du. Jehoava da di moas powaful persn eena di hoal yoonivers. Soh wen Jehoava deh pahn fi wee said, wi wahn aalwayz bee schranga dan wi enimi dehn, noh mata humoch a dehn kohn gens wi. (Judg. 6:16) Wee ku bee shoar a dat! Aalwayz memba dehnya tingz wen sohnbadi weh yu werk wid, sohnbadi weh yu goh da skool wid, er sohnbadi eena yu famili weh da noh wahn Witnis seh er du sohnting weh mek yu feel diskorij. Noh ferget dat yu noh di fait bai yuself. Yu di fala Jehoava dairekshan. w21.03 29 ¶13-14

Di apasl Paal praabli mi-di rifaa tu Isaiah 22:13 wehpaat ih taak bowt di atichood weh di Izrelait dehn mi gat. Tu dehn, ih mi moa impoatant fi ga fon an injai dehnself dan fi schrentn dehn lov fi Jehoava. Soh reeli, di Izrelait dehn mi ga di saym tinkin weh kaman eevn op tu tudeh: “Yu ku deh ya tudeh, ahn tumaaro yu gaan!” Wee noa dat Jehoava wahn rezorek peepl weh ded, soh dat shuda afek hoo wi chooz fi bee frenz wid. Di bradaz da Korint mi need fi mek shoar dat dehn neva spen taim wid peepl hoo neva bileev eena di rezorekshan. Wee ku laan wahn lesn fahn dat tudeh: If wi spen taim wid peepl weh onli waahn ga fon ahn weh noh kay bowt weh wahn hapm eena di fyoocha, dehn noh wahn du wi no gud. If wee az Kristyanz spen tu moch taim wid peepl laik dat, di bad atichood weh dehndeh peepl gat wahn rob aaf pahn wi. In fak, dehndeh kaina peepl ku mek yu du tingz weh Jehoava hayt. Dat da wai Paal mi bayg di bradaz ahn sistaz fi “kohn tu [dehn] sensiz ahn du weh rait ahn stap praktis sin.”​—1 Kor. 15:33, 34. w20.12 9 ¶3, 5-6

Dis vers tel wi how Jehoava aaganaiz ih famili da hevn ahn pahn di ert. Laik how hihn da di hed a da famili, hihn ga aal atariti oava evribadi eena di yoonivers. Fi aaganaiz ih famili, hihn mi gi sohn atariti tu Jeezas, di aynjelz, ahn hyoomanz. Bot dehn haftu ansa tu hihn fi di way how dehn yooz da atariti. (Roam. 14:10; Ifee. 3:14, 15) Jehoava gi Jeezas atariti oava di kangrigayshan, bot Jeezas haftu ansa tu Jehoava fi di way how ih chreet wi. (1 Kor. 15:27) Jehoava aalso gi di hozban dehn atariti oava dehn waif ahn chiljren. How wahn hozban ku laan fi bee wahn gud famili hed? Ih haftu andastan weh Jehoava waahn mek ih du. Ih aalso haftu noa wai Jehoava mi gi som peepl atariti oava adaz, ahn how hihn ku kapi Jehoava ahn Jeezas egzampl. Wai ih soh impoatant fi mek wahn man noa dehndeh tingz? Bikaaz Jehoava gi di famili hed dehn atariti oava dehn famili, ahn hihn ekspek dehn fi yooz it eena di rait way.​—Look 12:48b. w21.02 2 ¶1-3

Ih gud fi mek wi fala Jehoava egzampl ahn chooz fi ferget sertn tingz. Fi egzampl, Jehoava ga wahn perfek memri, bot if wi ton fahn fi wi sin dehn, hihn wahn fergiv wi ahn hihn wahn ferget di mistayk dehn weh wi mek. (Ps. 25:7; 130:3, 4) Ahn hihn waahn wi du di saym tu adaz wen dehn sari fi di mistayks weh dehn du weh hert wi. (Mach. 6:14; Look 17:3, 4) Wi ku shoa dat wi apreeshiayt di wandaful gif a wi brayn wen wi yooz it fi aana di Wan weh gi wi it. Som peepl mait yooz dehn brayn fi sohn selfish reezn, laik fi disaid fi dehnself weh gud ahn weh bad. Bot bikaaz Jehoava da di wan weh kriyayt wi, ih reeznabl fi ekspek dat fi hihn standadz way beta dan eni standad weh wi ku set fi wiself. (Roam. 12:1, 2) Wi ga pees wen wi obay Jehoava. (Isa. 48:18) Ahn wi laan bowt weh Jehoava waahn wi du wid wi laif, weh da fi bring aana tu wi Kriyayta ahn Faada ahn mek ahn prowd a wi.​—Prov. 27:11. w20.05 23-24 ¶13-14

Weh wi ku du if wi waahn ga wahn kloas ahn lovin frenship wid wi bradaz ahn sistaz? If wi tek di taim fi get fi noa dehn, wi mait fain dat ih eeziya fi mek wi andastan dehn ahn fi ga lov fi dehn. Wi ku bee frenz wid dehn eevn if dehn oalda dan wee, if dehn yonga dan wee, er if dehn kohn fahn wahn difrent kolcha. Memba dat Janatan mi bowt 30 yaaz oalda dan Dayvid; yet hihn mi ga wahn kloas frenship wid Dayvid. Yu tink yoo kuda bee frenz wid sombadi eena yu kangrigayshan weh oalda er yonga dan yoo? If yu du dis, yu wahn shoa dat yu ga lov fi yu bradaz “weh deh aal oava di werl.” (1 Peet. 2:17) Yu tink dat if wi ga lov fi wi bradaz ahn sistaz dat meenz dat wi wahn ga wahn kloas frenship wid evri singl persn eena di kangrigayshan? No, dat noh pasabl. Ih naamal fi feel kloasa tu som peepl dan tu adaz. Aftaraal, wi yoozhwali geh fi bee frenz wid peepl hoo inchrestid eena di saym tingz laik wee. Jeezas mi kaal aala ih apasl dehn ih “frenz,” bot owta aala dehn, ih mi veri kloas tu Jan. (Jan 13:23; 15:15; 20:2) Bot dat noh meenz dat Jeezas mi chreet Jan beta dan di adaz.​—Maak 10:35-40. w21.01 23 ¶12-13

Di apasl Paal neva did taak tu peepl da Atenz di way how hihn mi taak tu di Jooz eena di sinagag. Hihn mi luk rong ahn noatis how di peepl mi praktis dehn rilijan. (Aks 17:23) Wen Paal mi preech tu di peepl da Atenz, hihn mi staat aaf di taak bowt tingz weh dehn mi gree pan. Soh Paal mi wilin fi chaynj di way how hihn taak tu peepl. Hihn tel di peepl da Atenz dat di mesij weh hihn mi-di bring kohn fahn di “Gaad weh nobadi noh noa,” weh dehn mi-di chrai wership. Eevn doa di peepl weh da neva Joo neva noa di Skripchaz, Paal neva giv op pahn dehn. Insteda dat, hihn mi si dehn laik grayn weh raip ahn redi fi haavis, ahn hihn mi chaynj di way how hihn mi prizent di gud nyooz tu dehn. Jos laik Paal, yu fi luk fi tingz weh ku help yu fi andastan weh di peepl eena yu teritori inchrestid eena. Laik fi egzampl, how di persn fiks op ih hows er veekl? Maybi yu ku tel weh rilijan sombadi bilangz tu bai dehn naym, di kaina kloaz weh dehn wayr, di way how dehn fiks op dehnself, er eevn di way how dehn taak. w20.04 9-10 ¶7-8